Вход

Изображения в галерее

834_33.jpg
830_76.jpg
824_57.jpg

Главная

АКАФИСТ Пресвятой Богородице в честь иконы Ея Троеручица


Икона Божией Матери Троеручица. XVII  век. Троицкий собор Данилова монастыря.

Кондак 1
      Взбранной Воеводе, богообрадованной Приснодеве Богородице, посетившей гору Афонскую явлением чудотворныя иконы Своея и многия милости Ею дарующей роду христианскому, похвальное возглашаем ныне пение: Ты же, о Богомати, яко имущая державу непобедимую и матернее о нас попечение, предвари на помощь к нам и от всяких бед избави зовущих Ти:
     Радуйся, Помощнице наша, Троеручною иконою Твоею нам помогающая.

Икос 1
      Ангел земный и человек небесный преподобный Иоанн Дамаскин от любве теплыя к Тебе, Богомати Владычице, икону Твою святую соорудити потщася и сию в келлии своей благоговейно поставив, пред нею сице Тебе в молитвах усердных гааголаше:
     Радуйся, радость вечную, Спасителя миру рождшая;
     Pадуйся, всегубительнаго ада силу Рождеством Твоим поправшая.
     Радуйся, пророческих глаголов исполнение принесшая;
     Pадуйся, Адама и Евы преступление загладившая.
     Радуйся, Единаго от Троицы на руку Твоею нетрудно носившая;
     Pадуйся, огнь Божества неопально во чреве Твоем вместившая.
     Радуйся, Помощнице наша, Троеручною иконою Твоею нам помогающая.

Кондак 2
      Видя преподобный Иоанн Дамаскин десницу свою, много писавшую в защиту чести и поклонения святых икон, по навету царя иконоборца немилостиво отсеченную, испроси ю от невернаго мучителя, и приложив к усеченному ея составу, пред честною иконною Твоею, Пречистая Дево, слезно моляшеся Ти, о еже исцелитися ей. Ты же, всеблагая и всемощная рода нашего Заступнице, молитву его скоро услышала еси, и во сне представши ему, исцеление усеченной руце его даровала еси, да благодарственно поет Богу: Аллилуия.

Икос 2
      Разум человеческий не может постигнути силу исцелений благодатных, иконною Твоею, о Богомати, чудесно являемых, не может изъяснити и чудо велие, како отсеченная десница Преподобнаго во едину нощь цела и здрава обретеся, на ней же токмо червленный знак бывшия язвы оставлен бысть Врачебницею благою, слышащею от нас сия похвалы:
     Радуйся, скоро являющаяся Утешительнице скорбящих душ;
     Pадуйся, радостотворная Посетительнице болезнующих сердец.
     Радуйся, безнадежных страдальцев надеждою исцеления ободряющая;
     Pадуйся, врачами оставленных болезнующих на Свой руце приемлющая.
     Радуйся, усеченную десницу Божия избранника целу и здраву вышеестественно соделавшая;
     Pадуйся, яко ничтоже невозможно Тебе, милосердая Предстательнице, нам всегда заступление показующая.
     Радуйся, Помощнице наша, Троеручною иконою Твоею нам помогающая.

Кондак 3
      Силу десницы Всевышняго в исцелении усеченныя десницы своея познав богоглаголивый Иоанн, песньми красными воспе Тя, Владычице всеблагая, и подобие усеченныя руки своея приложи к целебному Твоему образу ради памяти всегдашния о великом чудеси. Тем ныне видима есть и именуется сия святая икона Твоя Троеручица, тремя руками, на ней описанными, проявляющая таинство Святыя Троицы, чудесы же, от нея бывающими, всех приводящая хвалебно взывати ко Господу: Аллилуия.

Икос 3
      Имеяй велию ревность по Бозе, духоносный песнописец Святыя Церкве и Божественный славитель ея, сладкий преподобный Иоанн, хвалебными пении до конца жизни своея прославляше Твою к нему дивную милость, Богородительнице, в память же бывшаго чудесе плат, имже усеченная рука его обвернута бе, на главе своей ношаше, икону же Твою многоцелебную, яко наследие богатое, святей Лавре преподобнаго Саввы Освященнаго по себе остави, да вси вернии зовут к изображенней на ней Целительнице душ и телес сице:
     Радуйся, врагов святыя православныя веры крепкая Поборнице;
     Pадуйся, проповедников Евангельскаго учения Покровительнице.
     Радуйся, благочестивых христиан защито и похвало;
     Pадуйся, боголюбивых иноков утешение.
     Радуйся, ведущим брань противу мира, плоти и диавола добрая Споспешнице;
     Pадуйся, ревнующим о целомудрии и чистоте изрядная Пособнице.
     Радуйся, Помощнице наша, Троеручною иконою Твоею нам помогающая.

Кондак 4
      Буря недоумения смущает ми ум, како возмогу недостойными усты воспети славу Твою, Пречистая Дево, юже во иконе Твоей святей явила еси, даровавши ю нам в помощь и защиту от враг видимых и невидимых. Темже, величая неисчетныя милости Твоя к роду христианскому, исповедую чудеса Твоя и смиренномудренно пою Вседержителю: Аллилуия.

Икос 4
      Слышавше иноцы святыя Лавры Саввы Освященнаго о великих добродетелех пришедшаго в Лавру на поклонение первосвятителя сербскаго Саввы, по внушению Твоему, Богомати, дароваша ему на благословение святую икону Твою Троеручицу, юже он со благоговением, яко дар многоценен, в страну сербскую принесе, поучая паству свою звати Тебе:
     Радуйся, от востока и до запада силу всемогущества Христова иконою Твоею возвещающая;
     Pадуйся, болезни душевныя и телесныя иконою Твоею скоро врачующая.
     Радуйся, Сербстей стране икону Твою в залог благоволения даровавшая;
     Pадуйся, чудесы Твоими Православие в ней крепко утвердившая.
     Радуйся, Симеона Мироточиваго область благодатно посетившая;
     Pадуйся, Саввы первопрестольнаго паству матерним покровом Твоим приосенившая.
     Радуйся, Помощнице наша, Троеручною иконою Твоею нам помогающая.

Кондак 5
      Боготечней звезде подобна явися икона Твоя, Богородительнице, по воли Твоей святей на осля поставленная и отпущенная из Сербии, осляти никимже водиму, принесеся им на гору Афонскую ко вратом обители Хилендарския, юже яко дар небесный восприимше иноцы, поставиша в алтари соборныя церкве обители, зовуще во умилении глубоцем благих Подателю Богу: Аллилуия.

Икос 5
      Видевше иноцы хилендарстии Твое к ним благоволение, Преблагословенная Дево, в чудеснем пришествии к ним святыя иконы Твоея Троеручицы явленное, с радостию и любовию ей покланяхуся, целующе и песненно возглашающе Ти благохваления сицевая:
     Радуйся, Путеводительнице подвижников благочестия к горнему Сиону;
     Pадуйся, пустыннолюбивых иноков приводящая к небесному Иерусалиму.
     Радуйся, безсловесное осля воли Твоей святей чудесно покорившая;
     Pадуйся, на осли икону Твою благодатную от Сербии на Афон дивно принесшая.
     Радуйся, пустыню Афона благоуханием святыни исполнившая;
     Pадуйся, Хилендарскую обитель благоволением Твоим облагодатствовавшая.
     Радуйся, Помощнице наша, Троеручною иконою Твоею нам помогающая.

Кондак 6
      Проповедует обитель Хилендарская на Афоне богатство милостей и щедрот Твоих, Богородице Дево, и светло красуется имущи святую икону Твою Троеручицу во игумена себе, ибо таковая бысть воля Твоя, еже пребывати иконе Твоей тамо на игуменстем месте во храме Божием и в душах братии, от Тебе единыя благословение на всякое послушание приемлющей и хвалебно зовущей тако благоволившему о них Творцу: Аллилуия.

Икос 6
      Возвестила еси волю Твою, Богомати, иноком хилендарским, разногласием во избрании игумена смущенным, чудесно поставивши святую икону Твою на игуменстем месте во храме Божием и открывши единому от них в видении, яко Сама Ты хощеши пребывати настоятельствующею в обители их иконою Твоею честною, да и прочее не избирают себе игумена. Они же во умилении душ и сердец обрадовании возопиша к Тебе:
     Радуйся, иноков благоподвизающихся известная и всемощная Покровительнице;
     Pадуйся, к Сыну Твоему и Богу теплая о них Предстательнице.
     Радуйся, жезл игуменский в Хилендарстей обители невидимо приемшая;
     Pадуйся, обитель сию доселе целу и благоустроену сохраняющая.
     Радуйся, страхом и благоговением сердца братии, благословение от иконы Твоея приемлющих, исполняющая;
     Pадуйся, неблагоговейныя и дерзостныя грозно наказующая.
     Радуйся, Помощнице наша, Троеручною иконою Твоею нам помогающая.

Кондак 7
      Хотящи соделати не токмо Афон, но и вся иныя страны Православныя причастными благодати великих чудес, иконою Твоею Троеручною изливаемых и бываемых, Пречистая Владычице, тую во всех градех, весех, церквах и обителех иноческих распространила и дивными чудесы прославила еси. Темже вся верная чада святую икону Твою Троеручицу любовию чествуют и на ней вкупе с Тобою изображенному Христу усердно зовут: Аллилуия.

Икос 7
      Дивно являеши, Преблагословенная Дево, милости веерным людем и святою иконою Твоею Троеручицею преславная чудеса содеваеши силою благодати Христовы: слепыя просвещаеши, разслабленныя укрепляеши, недужныя врачуеши и всем прибегающим к целебному Твоему образу скорую помощь Твою присно являеши, подвизающи звати к Тебе:
     Радуйся, Святую гору Афонскую в жребий Себе избравшая;
     Pадуйся, и вся страны Православныя покровом милости Твоея осенившая.
     Радуйся, Хилендарския обители Настоятельнице неизменная;
     Pадуйся, многих мест и пустынь сокровище исцелений неоскудное.
     Радуйся, на Афоне, в России, Сербии и иных странах иконою Твоею преславно чудодействующая;
     Pадуйся, любящия и чтущия Тя от всяких бед избавляющая.
     Радуйся, Помощнице наша, Троеручною иконою Твоею нам помогающая.

Кондак 8
      Странно есть видети иноки Хилендарския, к иконе Твоей яко к игумену приходящия и от Нея благословения на послушания своя приемлющия. Но, о Всеблагая, якоже приемлеши их милостивно и благословляеши, тако и нас, недостойных, не лиши матерняго Твоего милосердия и попечения, приими благоутробно молитвы наша, пред святою иконою Твоею возносимыя, осени нас благословением Твоим благодатным, избави от всяких бед и скорбей и научи богоугодно Пети Триединому Богу: Аллилуия.

Икос 8
      Весь мир преисполнен, яко звездами богосветлыми, чудотворными иконами Твоими, Богородице Дево, в нихже яко денница лучезарная, икона Твоя Троеручица предивными чудесы благодатно сияет и согревает хладная сердца наша знаменьми Твоего к нам Милостиваго призрения. Сего ради чествуем пречистаго лика Твоего святое изображение и Тебе пред ним вопием:
     Радуйся, богообрадованная и пренепорочная Приснодево;
     Pадуйся, едина чистая и благословенная в женах.
     Радуйся, нетленная и неискусобрачная Агнца и Пастыря Мати;
     Pадуйся, прекрасная и светоносная палато святых Святейшаго Слова.
     Радуйся, крине белоснежный и благовонный девства и чистоты;
     Pадуйся, Царице и Владычице Небесе и земли.
     Радуйся, Помощнице наша, Троеручною иконою Твоею нам помогающая.

Кондак 9
      Всяк возраст верных благопользуется Твоим матерним попечением, всеблагая Владычице. Младенцы милосердно окормляеши, отроки невидимо руководствуеши, мужи во благочестии утверждаеши, старцы в немощех укрепляеши, всем же вся благая и душеполезная даруеши всесильным ходатайством Твоим у Престола Пресвятыя Троицы, Ейже благодарно поем: Аллилуия.

Икос 9
      Ветии человечестии не могут достойно восхвалити без сравнения Тя, Богородице, честнейшую Херувим и славнейшую Серафим, рождшую Единаго от Троицы Христа Жизнодавца. Мы же, любовию к Тебе воодушевленнии, смиренномудренно дерзаем приносити Тебе песни таковыя:
     Радуйся, державная Заступнице рода христианскаго;
     Pадуйся, Благосердая Мати всех скорбящих и обремененных.
     Радуйся, кротким сиянием Твоим мрак грехов и страстей наших разгоняющая;
     Pадуйся, на стези покаяния нас премудро наставляющая.
     Радуйся, в грозный час смерти всем нам крепкая Защитнице;
     Pадуйся, добраго ответа нам пред Судиею праведным усердная Ходатаице.
     Радуйся, Помощнице наша, Троеручною иконою Твоею нам помогающая.

Кондак 10
      Спасения залог даровася нам святая и всечестная икона Твоя, Богородительнице Дево, ибо, якоже древле прорекла еси Божественному евангелисту Луце, с нею и доныне сила Твоя благодатно пребывает, чудесы преславными веру в нас утверждает, недужныя безмездно врачует и на путь спасения души наша приводит, до зовем прославльшему имя Твое во вселенней Царю Небесе и земли: Аллилуия.

Икос 10
      Стена еси девам и ликом иноческим, Богоневестная Дево, всем усердно к Тебе прибегающим, икону же Твою святую благоговейно чествующим, ибо сию дарова нам благих податель Господь в помощь и врачество недугом душевным и телексным и сим внушает пети Тебе:
     Радуйся, добрая Младопитательнице дев и безматерних сирот;
     Pадуйся, иноков и инокинь благоскорбящих Предводительнице к градом небесным.
     Радуйся, в узах и темнице седящих посещающая утешением благодатным;
     Pадуйся, благословение домов и супружеств благочестивых.
     Радуйся, юных Наставнице целомудрия и воздержания;
     Pадуйся, старцев приводящая к благому житию и мирней кончине.
     Радуйся, Помощнице наша, Троеручною иконою Твоею нам помогающая.

Кондак 11
      Пение молебное наше, Тебе пред пречистым образом Твоим с верою и любовию возносимое, милостивно услыши, Госпоже всемилостивая, и сохрани нас от тлетворных учений неверия и суеверия, ими же наветуется в нас святоотеческая православная вера, избави нас от лукавых совращений, сохрани нас и Отечество наше от всяких крамол и от всяких нестроений и злых развращений, врагами веры и Отечества нашего воздвизаемых, и сподоби в любви и единомыслии, со всеми верными чады Святыя Христовы Церкве богоприятно пети Создателю нашему: Аллилуия.

Икос 11
      Светоприемлемая свеща икона Твоя святая, Богородице Дево, мир весь сиянием чудес просвещает, сердца же наша любовию воспламеняет к Тебе, пречистей и преблагословенней Мастери сладчайшего Господа нашего Иисуса Христа даровавшаго нам Тебе в покров и защиту противу полчищ сатанинских, иже боятся и трепещут самаго имене Твоего, ведающе силу Твою, юже величаем и Тебе зовем:
     Радуйся, враги наша видимыя и невидимыя премудро запинающая;
     Pадуйся, хулителей святыя православныя веры невидимо карающая.
     Радуйся, духов злобы от нас державно отгоняющая;
     Pадуйся, преобладати им над нами не попускающая.
     Радуйся, любовию к Богу и ближним нас воодушевляющая;
     Pадуйся, яко благая прошения наша скоро исполняющая.
     Радуйся, Помощнице наша, Троеручною иконою Твоею нам помогающая.

Кондак 12
      Благодать свыше даровася святей иконе Твоей Троеручице, Владычице преблагая: скорбящия утешати, болящия исцеляти, слепыя просвещати, разслабленныя укрепляти, верныя во благочестии утверждати, неверныя к познанию истины приводити, знаменьми и чудесы от нея бываемыми, яже воистинну превосходят разумение человеческое и токмо верою постигаются, приводяща верныя души к немолчному славословию Творца богокрасною песнию: Аллилуия.

Икос 12
      Поем чудеса Твоя, благодатная Богородительнице, не таим щедрот Твоих, исповедуем благодеяния Твоя, прославляем неисчетную милость Твою к роду христианскому, юже ведят вси концы земли, ибо от востока до запада хвально имя Твое святое, благословляемое от всех родов и в молитвах призываемое во всех странах. Тебе убо, сице прославленней и превознесенней Сыном Твоим и Богом, и мы хвалебно вопием:
     Радуйся, тихое пристанище плавающих в пучине житейскаго моря;
     Pадуйся, треволнение страстей умиротворяющая Своим сердобольным участием.
     Радуйся, во уныние и отчаяние впадших подъемлющая надеждою спасения;
     Pадуйся, сомнениями в вере колеблющихся вразумляющая знаменьми и чудесы.
     Радуйся, в обителех иноческих подвизающимся богоугодно Подательнице блаженнаго упокоения;
     Pадуйся, и в мире благочестно живущия не лишающая Твоего заступления.
     Радуйся, Помощнице наша, Троеручною иконною Твоею нам помогающая.

Кондак 13
      О всепетая Мати сладчайшаго Искупителя нашего Господа Иисуса Христа! Вонми гласу молебному, Тебе пред святою иконою Твоею нами смиренно возносимому, и матернею молитвою Твоею к рождшемуся от Тебе, святых Святейшему Слову, от всякия избави напасти и вечныя муки всех имя Твое молитвенно призывающих и о Тебе благодарно зовущих Богу: Аллилуия.
Этот кондак читается трижды, затем икос 1-й и кондак 1-й

Молитва ко Пресвятей Богородице
      Пресвятая и Преблагословенная Дево Богородице Марие! Припадаем и покланяемся Ти пред святою Троеручною иконою Твоею, воспоминающе преславное чудо Твое исцелением усеченныя десницы преподобнаго Иоанна Дамаскина от иконы сея явленное, егоже знамение доныне видимо есть на ней во образе третия руки, к изображению Твоему приложенныя. Молимся Ти и просим Тя, всеблагую и всещедрую рода нашего Заступницу: услыши нас, молящих Ти ся, и якоже блаженнаго Иоанна, в скорби и болезни к Тебе возопившаго, услышала еси, тако и нас не презри, скорбящих и болезнующих ранами страстей многоразличных и к Тебе от души сокрушенныя и смиренныя усердно прибегающих. Ты зриши, Госпоже всемилостивая, немощи наша, озлобление наше, нужду, потребу нашу в Твоей помощи и заступлении, яко отвсюду врагами окружени есмы и несть помогающего, ниже заступающаго, аще не Ты умилосердишися о нас, Владычице. Ей, молим Ти ся, вонми гласу болезненному нашему и помози нам святоотеческую православную веру до конца дней наших непорочно сохранити, во всех заповедех Господних неуклонно ходити, покаяние истинное о гресех наших всегда Богу приносити и сподобитися мирныя христианския кончины и добраго ответа на Страшнем суде Сына Твоего и Бога нашего, Егоже умоли за нас матернею молитвою Твоею, да не осудит нас по беззаконием нашим, но да помилует нас по велицей и неизреченней милости Своей. О Всеблагая! Услыши нас и не лиши нас помощи Твоея державныя, да, Тобою спасение получивше, воспоем и прославим Тя на земли живых и рождшагося от Тебе Искупителя нашего Господа Иисуса Христа, Емуже подобает слава и держава, честь и поклонение, купно со Отцем и Святым Духом всегда, ныне и присно и во веки веков. Аминь.

Тропарь Пресвятой Богородице перед Ея иконой, именуемой «Троеручица»
Тропарь, глас 4:
      Днесь всемирная радость возсия нам велия, даровася святей горе Афонстей цельбоносная Твоя, Владычице Богородице, икона, со изображением тричисленно и нераздельно пречистых рук Твоих, в прославление Святыя Троицы: созываеши бо верных и молящихся Тебе о сем познати, яко двема имаши Сына и Господа держати, третию же яви на прибежище и покров чтущим Тя от всяких напастей и бед избавляти, да вси, притекающии к Тебе верою, приемлют от всех зол свобождение, от врагов защищение. Сего ради и мы вкупе со Афоном вопием: радуйся, Благодатная, Господь с Тобою.

Ин тропарь, глас 4:
      Яко звезда светозаряющая, из Сербии на Афон чудесно прииде всечестная икона Твоя Троеручица, юже обитель Хиландарская благоговейно восприемши, яко Божественный дар свыше, прославляет Тя, Владычицу, и умильно вопиет: не остави милость Твою от нас, но пребуди с нами во веки.

Тропарь на молебне, глас 4:
      Днесь светло красуется славнейший град Москва, имеющи в себе, о Всемилостивейшая, всея твари Честнейшая, Заступнице наша Дево Богородице, честный образ Твой, имже подсолнечныя концы земли удивляеши и мир мирови даруеши; во образ бо Святыя Троицы являеши трие руце: двема убо Сына Своего, Христа Бога нашего, носиши, третиею же от напастей и бед верно к Тебе прибегающих избавляеши, и от потопления изымаеши, и всем полезная даруеши, и преподобному Михаилу Малеонскую гору показа, и всех всегда милуеши; честною ризою Своею покрываеши жительство сие и вся грады и страны наша, да зовем Ти: радуйся, Обрадованная.

Кондак, глас 8:
      Днесь веселое наста ныне Твое торжество, Богомати Пречистая, вси вернии исполнишася радости и веселия, яко сподобльшеся изрядно воспети предивное явление честнаго образа Твоего и Рождшагося из Тебе Младенца, истинна же Бога, Егоже двема рукама объемлеши, и третиею от напастей и бед нас изымаеши и избавлявши от всех зол и обстояний.

Ин кондак, глас 3:
      Дева днесь благоволение к нам являет, гора же Афон благодарение Ей приносит, ангели и иноцы славословят, Троеручица из Сербии чудесно путешествует: нас бо ради прииде и вселися во святую обитель Хиландарскую.

Кондак на молебне, глас 8:
      Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но, яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Величание
      Величаем Тя, Пренепорочная Дево, и чтим чудеса образа святаго Твоего, трех пречистых рук Твоих явление в славу Божества, в Троице Бога нашего.

Ино величание
      Величаем Тя, Пресвятая Дево, и чтим тричисленное изображение пречистых рук Твоих, Ты бо двема Сына и Господа держиши, третиею от напастей и бед нас избавляеши.

Православный календарь

Ноябрь 2017
Пн Вт Ср Чт Пт Сб Вс
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.