Вход

Изображения в галерее

833_23.jpg
829_22.jpg
815_41.jpg

АКАФИСТ Пресвятой Богородице в честь иконы Ея «Скоропослушница»


Икона Божией Матери Скоропослушница.

Кондак 1
      Избранной от всех родов Божией Матери и Царице, скоропослушливо внемлющей молитвам смиренным, и токи целебныя изливающей верным от иконы Своей святыя, благодарственное приносим пение. Ты же, всемилостивая Заступнице, преклонися благоутробно к гласом нашим хвалебным, и от всяких бед свободи ны, зовущия Ти:
     Радуйся, Всеблагая Скоропослушнице, прошения наша во благо исполняющая.

Икос 1
      Ангелов лицы благоговейно Тебе служат, и вся небесныя силы немолчными гласы Тя ублажают, Богородице Дево, яко рождшую Ангелов Царя Христа Бога, мы же грешнии, подражати им дерзающе, и достойно благохвалити Тя недоумеюще, смиренномудренно вопием Ти сице:
     Радуйся, неприступнаго Божества селение;
     Pадуйся, Ангельское непрестающее удивление.
     Радуйся, Трапезо святая, хлебом жизни нас питающая;
     Pадуйся, маслино благоплодная, елеом милости сердца наша умащающая.
     Радуйся, даров Божия благодати сокровищнице неистощимая;
     Pадуйся, чудес реко приснотекущая.
     Радуйся, обидимых заступнице;
     Pадуйся, печальных утешительнице.
     Радуйся, бедствующих помощнице;
     Pадуйся, болящих целительнице.
     Радуйся, разслабленных укрепительнице;
     Pадуйся, плененных свободительнице.
     Радуйся, Всеблагая Скоропослушнице, прошения наша во благо исполняющая.

Кондак 2
      Видяще милосердие Твое неисчетное, Владычице, и многая чудеса, Тобою явленная и присноявляемая чрез святыя иконы Твоя, имиже, яко звездами богосветлыми, весь мир христианский украсила еси, величаем Тя, возвеличившую род наш Твоим благоволением, и с любовию покланяемся пречистаго лика Твоего изображению, зовуще Сыну Твоему Христу Богу: Аллилуиа.

Икос 2
      Разум небесный открывая, Богородице, благоволила еси в земном жребии Твоем, святей горе Афонстей, многими чудесы прославити икону Твою, юже Сама Скоропослушницею наименовала еси гласом Божественным от нея изшедшим, да вси ведуще таковое Твое о ней благоволение, песненно Тебе вопиют:
     Радуйся, милосердая всех нас о Христе Мати;
     Pадуйся, Духа Святаго жилище.
     Радуйся, любве Божия к человеком проявление;
     Pадуйся, рода человеческаго возвышение.
     Радуйся, светлая палато Бога Слова;
     Pадуйся, Святая святых большая.
     Радуйся, рождшая Божественнаго Агнца;
     Pадуйся, возрастившая нам клас живота.
     Радуйся, брашна негиблющаго стамно всезлатая;
     Pадуйся, питательнице Питателя вселенныя.
     Радуйся, яко предстательством Твоим спастися уповаем;
     Pадуйся, яко молитвами Твоими наследие небесное получити чаем.
     Радуйся, Всеблагая Скоропослушнице, прошения наша во благо исполняющая.

Кондак 3
      Силою Божиею действующи, неблагоговейно ходившаго пред святою Твоею иконою Дохиарския обители трапезаря Нила слепотою и разслаблением тела наказала еси, Богородице Дево, да прочее не дерзает оскорбляти Тя в пречистом Твоем образе, егоже в залог благоволения Твоего всей Афонстей горе даровала еси милостиво, да все насельницы ея гласы преподобными вопиют рождшемуся от Тебе Богу Слову: Аллилуиа.

Икос 3
      Имея любовь велию к людем, искупленным Кровию Сына Твоего и Бога, Владычице Всеблагая, покаяние трапезаря Нила милостиво прияла еси и исцеление ему от слепоты и разслабления даровала еси, да служит непрестанно Тебе и молитвы немолчныя приносит Ти пред многоцелебною Твоею иконою, взывая сице:
     Радуйся, Иоакима и Анны прозябение святое;
     Pадуйся, рождшая Сокрушившаго главу древляго змия.
     Радуйся, Преблагословенная в женах;
     Pадуйся, рождшая нетленно Спаса душ наших.
     Радуйся, девство и рождество чудесно сочетавшая;
     Pадуйся, во обою непорочно Себе сохранивая.
     Радуйся, всея вселенныя велие чудо;
     Pадуйся, всех родов земных удивление.
     Радуйся, согрешающих исправление;
     Pадуйся, кающихся в добродетели утверждение.
     Радуйся, непамятозлобная наказательнице;
     Pадуйся, благосердная вразумительнице.
     Радуйся, Всеблагая Скоропослушнице, прошения наша во благо исполняющая.

Кондак 4
      Бури житейския избежавшии, и в тихое пристанище спасения на гору Афонскую притекший, обретают зде утешение благодатное и помощь Божественную от святыя иконы Твоей, Богородице, от неяже лучи чудес испущаеши, и токи милости Твоея изливаеши неоскудно. Темже вси хотящии в пустынех Афона жати спасение, величая матерния щедроты Твоя, благодарственно воспевают Богу: Аллилуиа.

Икос 4
      Слышав глас Божественный от святыя иконы Твоея, Владычице, трапезарь Нил позна Тя Скоропослушницу быти всем, с верою и любовию притекающим к чудотворному Твоему образу, и прияв от него вразумление своему невежествию и прозрение своим слепотствующим очесем, возгласи Тебе благодарственно от души:
     Радуйся, временным наказанием невежд умудряющая;
     Pадуйся, согрешающих покаяние милостиво приемлющая.
     Радуйся, на путь исправления заблуждающихся направляющая;
     Pадуйся, раны греховныя благоутробно врачующая.
     Pадуйся, в нерадении коснеющих любвеобильно обличающая;
     Pадуйся, горестию телесных страданий вечных мук избавляющая.
     Радуйся, волнение страстей утишающая;
     Pадуйся, руку помощи Твоея погибающим простирающая.
     Радуйся, безнадежных надеждо;
     Pадуйся, скорбящих отрадо.
     Радуйся, нагих одеяние;
     Pадуйся, сирых призрение.
     Радуйся, Всеблагая Скоропослушнице, прошения наша во благо исполняющая.

Кондак 5
      Боговещанныя глаголы Твоя уведевше иноцы обители Дохиарския, Тебе, Божественней Скоропослушнице, храм соорудиша при трапезе, идеже чудотворная икона Твоя пребывает, Пречистая Дево, и вся верныя утешает знаменьми Твоея милости, еяже не лиши и нас смиренных по долгу Тя воспевающих, и вопиющих чудес Творцу Богу: Аллилуиа.

Икос 5
      Видевше токи чудес, от святыя иконы Твоея Скоропослушницы источаемыя, вси иноцы горы Афонския стекахуся к ней на поклонение. Ты же, Мати Божия, всем, по коегождо потребе, дары милости Твоея неоскудно подавала еси от чудотворнаго Твоего образа, подвизая благодарно вопити Тебе:
     Радуйся, Мати милосердия и щедрот;
     Pадуйся, одушевленный Престоле Вседержителя.
     Радуйся, Сыну Божию плоть заимодавшая;
     Pадуйся, чертоже безсеменнаго уневещения.
     Радуйся, Безплотнаго воплотившая;
     Pадуйся, Бога с человеки соединившая.
     Радуйся, преподобных всежелательное зрение;
     Pадуйся, постников Божественное радование.
     Радуйся, пустынножителей тихое веселие;
     Pадуйся, иноков крепкое упование.
     Радуйся, демонския полки побеждающая;
     Pадуйся, враги спасения человеческаго посрамляющая.
     Радуйся, Всеблагая Скоропослушнице, прошения наша во благо исполняющая.

Кондак 6
      Проповедует гора Афонская милости и чудеса Твоя, Преблагословенная Мати Господа нашего, и светло красуется многими чудотворными Твоими иконами, посреде коих икона Твоя, Скоропослушница Тобою нареченная, яко луна полная, лучами чудес немерцаемо сияет, просвещая души наша светом Божия благодати, и подвизая нас хвалебно взывати прославльшему Тя Триединому Богу: Аллилуиа.

Икос 6
      Возсияла еси в пречистей иконе Твоей, Марие Богородице, свет спасения всем, блуждающим во тьме грехов и страстей, и сию нарекла еси Скоропослушницею, молящимся пред нею с верою и благоговением от души, скорую помощь Твою подающи вопиющим Ти таковая:
     Радуйся, молние, души просвещаяй;
     Pадуйся, громе, соблазняющия устрашаяй.
     Радуйся, благоотишное прибежище утомленных треволнением житейскаго моря;
     Pадуйся, небурное пристанище обуреваемых волнами страстей.
     Радуйся, юных наставнице целомудрия;
     Pадуйся, покрове и ограждение девства.
     Радуйся, окаменение сердечное умягчающая;
     Pадуйся, хладность душевную благодатно согревающая.
     Радуйся, на стезю спасения верных наставляющая;
     Pадуйся, от путей погибельных претыкающихся удаляющая.
     Радуйся, Споручнице наша к Сыну Твоему и Богу;
     Pадуйся, присно умоляющая Его о помиловании нас грешных.
     Радуйся, Всеблагая Скоропослушнице, прошения наша во благо исполняющая.

Кондак 7
      Хотящи всем показати любовь Твою велию к христианскому роду, Богородице Преблагая, в жребий Твой земный гору Афонскую избрала еси, и в ней селения иноческая умножила еси, да вси обуреваемии мирскою суетою, возмогут обретати зде тихое и удобное пристанище ко спасению и, Тобою вспомоществуеми, сподобятся наследия небеснаго и пети со святыми Пресвятей Троице: Аллилуиа.

Икос 7
      Новое знамение милосердия Твоего явила еси, Владычице, в чудесном прославлении святыя иконы Твоея Скоропослушницы, не токмо иноком горы Афонския, но и всем православным христианом, в нихже благоговейно чествуется сея иконы Твоея изображение, да вси Тебе зовут:
     Радуйся, Бога нашего Мати;
     Pадуйся, в рождестве и по рождестве Дево.
     Радуйся, яко Тя блажат вси роди;
     Pадуйся, яко сотвори Тебе величие Сильный.
     Радуйся, яко призре на смирение Твое Господь;
     Pадуйся, яко возжеле доброты Твоея Царь царей.
     Радуйся, Дщи благословенная Отца Небеснаго;
     Pадуйся, Родительнице неискусомужная Сына Предвечнаго.
     Радуйся, приятелище непорочное Духа Святаго;
     Pадуйся, таиннице Божественныя благодати.
     Радуйся, горняго мира украшение;
     Pадуйся, дольняго мира заступление.
     Радуйся, Всеблагая Скоропослушнице, прошения наша во благо исполняющая.

Кондак 8
      Странники и пришельцы есмы на земли и, по глаголу апостола, не имамы зде пребывающаго града, но к кому прибегнем, Владычице, в скорбех странствия нашего, аще не к Тебе, Всеблагая? Не отвержи нас, Мати Божия, не рцы нам: «не вем вас, грехов ради ваших!», но помилуй нас, сирых и безпомощных, и приими нас в вечныя кровы. Покровительнице наша, да радостно вопием во славе небесней Царю славы Христу: Аллилуиа.

Икос 8
      Всем верным утешительно есть взирати на святую икону Твою, Владычице, на нейже зрим Тя, на руку Твоею держащую Превечнаго Младенца Господа нашего Иисуса Христа, Емуже поклоняющеся боголепно яко Творцу и Богу нашему, Тебе, истинней Богородице, умиленно глаголем:
     Радуйся, обрадованная архангельским благовещением Приснодево;
     Pадуйся, Невесто Неневестная.
     Радуйся, Мати Света умнаго, всех души просвещающаго;
     Pадуйся, Престоле одушевленный небесе и земли Творца.
     Радуйся, кроткая голубице;
     Pадуйся, непорочная агнице.
     Радуйся, чаше, черплющая радость;
     Pадуйся, неисчерпаемый сосуде воды животныя.
     Радуйся, мироположнице благоухания Христова;
     Pадуйся, Еюже злосмрадие страстей наших отгонится.
     Радуйся, Еюже познахом Сына Божия;
     Pадуйся, Еюже научихомся поклонятися Триединому Богу.
     Радуйся, Всеблагая Скоропослушнице, прошения наша во благо исполняющая.

Кондак 9
      Вси роди блажат Тя по долгу, благословенная Марие Богородице, от востока бо и до запада хвально имя Твое, иноков же лицы Покровительницу Тя свою именуют, наипаче подвизающийся в жребии Твоем горе Афонстей, юже особым благоволением Твоим осенила еси, многая чудеса в ней содевающи и милости Твоя богатыя насельником ея являющи, да благодарно вопиют о Тебе Богу: Аллилуиа.

Икос 9
      Витии суемудреннии недоумевают познати тайну Твоего приснодевства, Богородице, ниже могут изъяснити силу чудотворную, от икон Твоих проистекающую, во исцеление недужных, и на всяку пользу душевную и телесную человеком. Мы же православно и несомненно Приснодевою Тя исповедующе, верно покланяемся иконе Твоей святей, и вопием Ти сице:
     Радуйся, неверных сумнительное слышание;
     Pадуйся, верных известная похвало.
     Радуйся, из боку чисту Христа нетленно рождшая;
     Pадуйся, ключи девства невредившая в рождестве Твоем.
     Радуйся, Мати и Дево Преблагословенная;
     Pадуйся, Богородице препрославленная.
     Радуйся, дев величание;
     Pадуйся, матерей присное радование.
     Радуйся, едина непорочная и добрая в женах;
     Pадуйся, рождшая обетованнаго Сокрушителя главы змия.
     Радуйся, падших прародителей осуждения древняго избавльшая;
     Pадуйся, Эдем заключенный человеком отверзшая Рождеством Твоим.
     Радуйся, Всеблагая Скоропослушнице, прошения наша во благо исполняющая.

Кондак 10
      Спасение устрояющи христоименитым людем, благоволила еси, Богородице, земный жребий Твой, гору Афонскую, в население иноком определити, и рекла еси в видении первому пустынножителю Афонскому, преподобному Петру, быти горе сей в жилище иноком присное, обетовании благими утешивши его, яко будеши Помощница и Покровительница всем, подвизающимся в ней богоугодно, дарами потребными их снабдевающи, и от всяких бед спасающи, да невозбранно поют Богу: Аллилуиа.

Икос 10
      Стена еси заступления, Дево, иноком православным, и всем подвижником девства и чистоты. Темже жребий Твой земный, гору Афонскую, невходну женам сотворила еси, да без соблазна греховнаго пребывают в ней иноцы, на Тебе едину по Бозе надежду спасения возлагающе, и Тебе зовуще сице:
     Радуйся, неувядаемый цвете девства;
     Pадуйся, крине сельный чистоты.
     Радуйся, светоносная сене небесная, ревнителей чистоты осеняющая;
     Pадуйся, премудрости Божия свитче, рачителей целомудрия умудряющая.
     Pадуйся, иноком благоподвизающимся Ходатаице спасения;
     Pадуйся, пустынножителей горы Афонския Покрове и Ограждение.
     Радуйся, радость благодатную изливающая в сердца боголюбивая;
     Pадуйся, утешение духовное подающая душам огорченным.
     Радуйся, младопитательнице дев и безматерних сирот;
     Pадуйся, любовию Жениха безсмертнаго девственная ликостояния услаждающая.
     Радуйся, в тяжкой борьбе с приражениями страстей плотских крепкая помощнице;
     Pадуйся, обителей иноческих неусыпная блюстительнице.
     Радуйся, Всеблагая Скоропослушнице, прошения наша во благо исполняющая.

Кондак 11
      Пение наше смиренное, от полноты любве и усердия Тебе приносимое, не презри, Чистая, и не отвратися от нас, оскверненных многими грехми, но помози нам, Всеблагая, покаянием очиститися от скверны греховныя, и преуспети в чистем и богоугоднем житии, Тя подвигоположницу и помощницу в сем имуще, да возможем достойно и праведно вопити ко Господу: Аллилуиа.

Икос 11
      Светлыми лучами чудес святая икона Твоя немерцаемо сияет, Богородице Дево, и весь мир благодатно озаряет, прогоняющи всякое вражие действо силою Божиею, от нея исходящею; темже радуемся мы, грешнии, имуще таковый залог Твоего к нам благоволения, и Тебе, Скоропослушнице молений наших, благодарственно взываем:
     Радуйся, деннице Солнца незаходимаго;
     Pадуйся, заре дне невечерняго.
     Радуйся, утро спасения нам возсиявшая;
     Pадуйся, рождшая Жениха безсмертнаго душ человеческих.
     Радуйся, желания наша богоугодная исполняющая;
     Pадуйся, в скорбех и обстояниих на помощь к нам благоутробно ускоряющая.
     Радуйся, раю мысленный, всякаго утешения духовнаго преисполненный;
     Pадуйся, от исполнения Твоего и нам капли утешения источающая.
     Радуйся, зной страстей наших прохлаждающая;
     Pадуйся, благодатное безстрастие ищущим его усердно подающая.
     Радуйся, всех в чистоте целомудрия живущих зело любящая;
     Pадуйся, в сониих и видениих избранники Божия посещающая.
     Радуйся, Всеблагая Скоропослушнице, прошения наша во благо исполняющая.

Кондак 12
      Благодать Божия, присущая святей иконе Твоей, Скоропослушница Тобою нареченней, Богомати Владычице, влечет к ней всех скорбящих и обремененных, и не тщи отходят они от сего источника Твоих милостей и щедрот: в скорбех отраду, в напастех защиту, в болезнех цельбу неоскудно получая от чудотворнаго образа Твоего, Всеблагая, и благодарственно вопиют благих подателю Богу: Аллилуиа.

Икос 12
      Поюще чудеса Твоя, Владычице, и велию милость Твою к христианскому роду, вемы, яко недовольни есмы к достойному прославлению Тебе, честнейшей Херувим и славнейшей без сравнения Серафим, обаче надеющеся на безприкладное милосердие Твое, Всеблагая, смиренномудренно приносим Ти песни таковыя:
     Радуйся, пристанище небурное подвижников благочестия;
     Pадуйся, безмолвствующих сладкая собеседнице.
     Радуйся, в пустынех и горах скитающихся благодатная отрадо;
     Pадуйся, тайных среди мира рабов Божиих тайное вразумление.
     Радуйся, грешников кающихся с Богом примирение;
     Pадуйся, горы Афонския верховная правительнице.
     Радуйся, Петра пустыннолюбиваго посещением Твоим зде озарившая;
     Pадуйся, Афанасия богомудраго явлением Твоим зде облагодатствовавшая.
     Радуйся, многия преподобныя Афонския славою небесною прославльшая;
     Pадуйся, насельником горы сея особую любовь Твою являющая.
     Радуйся, телес наших безмездная целительнице;
     Pадуйся, душ наших к Царствию Горнему путеводительнице.
     Радуйся, Всеблагая Скоропослушнице, прошения наша во благо исполняющая.

Кондак 13
      О Всепетая Мати, Скоропослушницею нарекшаяся во святей иконе Твоей, Богородице Марие! Приими милостивно сие малое моление наше, еже от усердия нашего принесохом Ти с верою и любовию, и умоли приснопокланяемую Троицу избавити ны геенны огненныя, тьмы несветимыя и мучения вечнаго, да предстательством Твоим унаследим Царствие Небесное и сподобимся со святыми пети Богу: Аллилуиа.
Этот кондак читается трижды, затем 1-й икос «Ангелов лицы благоговейно...» и 1-й кондак «Избранной от всех родов...».

Молитва Божией Матери ради иконы Ее «Скоропослушница»
      Преблагословенная Владычице Приснодево Богородице, Бога Слова паче всякаго слова на спасение наше рождшая, и благодать Его преизобильно паче всех приявшая, море явльшаяся Божественных дарований и чудес приснотекущая река, изливающая благость всем, с верою к Тебе прибегающим! Чудотворному Твоему образу припадающе, молимся Тебе, Всещедрей Матери Человеколюбиваго Владыки: удиви на нас пребогатая милости Твоя, и прошения наша, приносимая Тебе, Скоропослушнице, ускори исполнити, все еже на пользу во утешение и спасение коемуждо устрояющи. Посети, Преблагая, рабы Твоя благодатию Твоею, подаждь недугующим цельбу и совершенное здравие, обуреваемым тишину, плененным свободу и различными образы страждущих утеши; избави, всемилостивая Госпоже, всяк град и страну от глада, язвы, труса, потопа, огня, меча и иныя казни временныя и вечныя, матерним Твоим дерзновением отвращающи гнев Божий; и душевнаго разслабления, обуревания страстей и грехопадений свободи рабы Твоя, яко да непреткновенно во всяком благочестии поживше в сем веце, и в будущем вечных благ сподобимся благодатию и человеколюбием Сына Твоего и Бога, Емуже подобает всякая слава, честь и поклонение, со Безначальным Его Отцем и Пресвятым Духом, ныне и присно и во веки веков. Аминь.

Тропарь Божией Матери ради иконы Ее «Скоропослушница»
Тропарь, глас 4:
      К Богородице притецем сущии в бедах, и ко святей иконе Ея ныне припадем, с верою зовуще из глубины души: скоро наше услыши моление, Дево, яко Скоропослушница нарекшаяся, Тебе бо ради раби Твои в нуждах готовую Помощницу имамы.

Кондак, глас 8:
      В мори житейстем обуреваемии, треволнению подпадаем страстей и искушений. Подаждь убо нам, Госпоже, руку помощи, якоже Петрови Сын Твой, и ускори от бед избавити ны, да зовем Ти: радуйся, Всеблагая Скоропослушнице.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Православный календарь

Октябрь 2020
Пн Вт Ср Чт Пт Сб Вс
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.