Вход

Изображения в галерее

803_15.jpg
P3067276.JPG
825_24.jpg

Главная

АКАФИСТ святому новомученику Василию (Иванову)


(старосте храма Вознесения Господня, что на Гороховом поле во граде Москве)


Новомученик Василий (Иванов), с иконой Николая II в руках. Р. Смирнова. Июнь 2006 г. Икона написана для храма Покрова Пресвятыя Богородицы в Бутырском тюремном замке на пожертвования прихожан храма святителя Николая в Бирюлево.


Кондак 1
      Избранный страстотерпче и преславный поборниче за веру Святую Православную, непоколебимый столпе Церкви Христовой, еяже ради положил еси душу твою, сокрушая козни нечестиваго зловерия, прославлен был еси от Предвечнаго и Триипостаснаго Бога Нашего венцем мученическим. И яко имея дерзновение ко Всесвятей Троице, моли и нам верными Христу выну быти, да любовию величая память твою, взываем ти сице:
     Радуйся, святый новомучениче Василие, Церкви Христовой всечестное украшение.

Икос 1
      Ангелов Творец яви тя во дни мятежа и нестроения в земли нашей, ревнителя Веры Православныя и вернаго служителя Церкви Христовой, всеславне Василие. Мы же ныне похвальная воспевам ти, святый страстотерпче, и с сонмом новомучеников — Ревнителей Церкви, кровию своею всю Россию освятивших величаем тя и приносим ти похвалы сия:
     Радуйся, учение нечестивых безбожников отвергший;
     Радуйся, благодатию Божией просвещенный.
     Радуйся, заповеди Христовы всем житием воплотивый;
     Радуйся, евангельския Истины исповедниче неустрашимый.
     Радуйся, яко в подвизе твоем имя пресвятыя Троицы дивно прославивый;
     Радуйся, верность Спасителю мученичеством доказавый.
     Радуйся, просвещение мудростию Божиею сущих в неверии;
     Радуйся, всем христианом доброе поучение и окормление.
     Радуйся, святый новомучениче Василие, Церкви Христовой всечестное украшение.

Кондак 2
      Видя Христос Бог душу твою, всеславне Василие, ко приятию слова Божия предуготованную, просвети тя благодатию своею, ограждая от влияния лжепророков рая земнаго, ты бо выну Пути, Истине и Жизни неизменно до кончины мученическия твоя следовал еси; ныне же веру соблюдши, яко верный воин Христов, радуешися в Небесном Отечестве, воспевая Господеви: Аллилуиа.

Икос 2
      Разум небесный тебе даровася, святче Божий: измлада бо в кротости пребываяй, от юности твоея благочестивыма родители в трудолюбии и вере отцев твоих воспитан был еси. Егда же в стране Российстей времена тяжкая для Православия насташа, преславный поборник истины Христовой даже до смерти явился еси. Сего ради приими убо от нас хвалебное пение сие:
     Радуйся, Распятаго Спасителя последователю всеусердный;
     Радуйся, Небеснаго Домовладыки слуго благий и верный.
     Радуйся, от праздности и лености удалитися ны научаяй;
     Радуйся, всех нас угождати Спасителю токмо подвизаяй.
     Радуйся, в уповании на милосердие Божие нас утверждающий;
     Радуйся, дела наша к славе Божией исправляющий.
     Радуйся, силами духовными нас насыщаяй;
     Радуйся, во трудах благолепия церковнаго нам споспешествуяй.
     Радуйся, святый новомучениче Василие, Церкви Христовой всечестное украшение.

Кондак 3
      Силою Духа Святаго укрепляемый, новомучениче Василие, небрегл еси о немощней плоти твоея, Спасителю мученичеством добропобедным угодивше. Аки на брак ко Христу приглашен быв, поспешил еси в обители райския внити. Сего же ради тебе, заступниче наш и покровителю, и венчавшему тя венцем всепобедным Всемогущему Богу взываем в церковном собрании купно: Аллилуиа.

Икос 3
      Имуще тя, новомучениче Христов, скораго в бедах помощника благовернии людие, в напастех и скорбех тя на помощь молитвенно призывают, и милость небесную молитвами твоими от щедродавца Бога обильно приемлюще, тебе от любве теплыя хвалебно вопиют:
     Радуйся, силою честнаго Креста Господня и Евангелия веру истинную защищавый;
     Радуйся, веру в воскресшаго Иисуса всем сердцем возлюбивый.
     Радуйся, Богом дарованный талант много преумноживый;
     Радуйся, путь страданий Христа ради добровольно избравый.
     Радуйся, в скорбех и муках живот твой скончавый;
     Радуйся, велию благодать молитвы за нас стяжавый.
     Радуйся, от всякаго недуга скоро и благодатно нас избавляяй;
     Радуйся, страдания наша в радость пречудно претворяй.
     Радуйся, святый новомучениче Василие, Церкви Христовой всечестное украшение.

Кондак 4
      Бурею злобы и нечестия безбожническаго терзаеми, враги Церкви Христовой, оклеветаху тя, яко врага народа российскаго, и приведоша во судилище неправедное, иже приговором своим чести гражданския тя лиши, ты бо тако положил еси начало исповеданию Христова пред лицем безбожников, взывая Богу: Аллилуиа.

Икос 4
      Слышавше и видевше гонения на веру Православную, безбожными властитилями возвигнутыя, не устрашился еси, всехвальне Василие, и не одесную ни ошуюю не отошел еси от пути спасительнаго, егда нечестивыя обновленцы полониша храмы в родных местах твоих. Таковому же стоянию во истине Христвей и нас настави, да зовем ти сице:
     Радуйся, ревнителю веры и благочестия богоизбранный;
     Радуйся, светильниче во дни начавшихся гонений отрадный.
     Радуйся, в лоно Церкви Христовой, к таинствам благодатным призывавый;
     Радуйся, на Господа во всех гонениях и ложных обличениях надежду возлагавый.
     Радуйся, молитвенное дерзновение в чистоте веры обретый;
     Радуйся, всякую печаль от нас удаляющий.
     Радуйся, в вере и благочестии нас утверждающий;
     Радуйся, от напрасныя смерти нас изымающий.
     Радуйся, святый новомучениче Василие, Церкви Христовой всечестное украшение.

Кондак 5
      Боготечней звезде уподобился еси, всехвальне Василие, яко столпом Православия был еси всем ближним твоим и тесным прискорбным путем востекл еси в Горний Иерусалим. Путь спасения нам указал еси, да единым сердцем и едиными усты Богу, венчавшему тя и, аки заступника, тя нам даровавшему, умиленно взываем: Аллилуиа.

Икос 5
      Видяще тя святаго добропобеднаго мученика Христова, Святая Церковь Православная ныне неизменно подвиг веры и верности твоея, яже ко Спасителю, воспевает, святый Василие и похвальное пение возносит ти: ты бо ревность благую, безстрашие, верность Царю Небесному и силу веры в нас молитвами твоими укрепляеши. Мы же сего ради с надеждою воспеваем ти сицевая:
     Радуйся, просвещения духовнаго преславный устроителю;
     Радуйся, ревностнаго несения Креста Христова учителю.
     Радуйся, милость и утешение всем чтущим тя являющий;
     Радуйся, кающимся слезы утешительныя низпосылающий.
     Радуйся, в терпении и смирении нас утверждающий;
     Радуйся, падающим руку помощи простирающий.
     Радуйся, от плевел ненависти сердца наша очищающий;
     Радуйся, светом любви нелицемерныя нас озаряющий.
     Радуйся, святый новомучениче Василие, Церкви Христовой всечестное украшение.

Кондак 6
      Проповедует Церковь Российская славу твою, святый Василие, яко веру несумненную, надежду крепкую в Иисуса Христа ты сподобился имети в душе, живот положивше за слово Владыки Христа, исповедниче всехвальне. Егда Царь Небесный, к вечной жизни воззовет весь род человеческий, тогда убо помяни и нас, недостойных, стояще купно со всеми страстотерпцы народа нашего одесную Престола Святыя и Единосущныя Троицы, да сподобимся купно с тобою и всеми святыми в нетленней отчизне Господеви воспевати: Аллилуиа.

Икос 6
      Возсиял еси, новомучениче Василие, яко светильник пресветлый и был еси ближним твоим, блуждающим во тьме греховней, на путь спасении их настваляя. И ныне сохрани нас, благочестно память твою чтущих, от шатаний умов и сердец, да не погибнем во мраце неведения, да зовем ти сице:
     Радуйся, иго Христово всем сердцем возлюбивый;
     Радуйся, крест свой любве ради Божия радостно понесый.
     Радуйся, велию милость в очах Божиих обретый;
     Радуйся, сердца наша огнем Божественныя ревности воспламеняяй.
     Радуйся, от страха злострадания молящихся тебе избавляяй;
     Радуйся, многих людей следовати за Христом выну научаяй.
     Радуйся, источниче, молитвами твоими жажду ведения Бога утоляяй;
     Радуйся, суетливыя сердца наша от многозаботливости очищаяй.
     Радуйся, святый новомучениче Василие, Церкви Христовой всечестное украшение.

Кондак 7
      Хотяще верно заветы Руси Святыя сохранити, благоговейно сберегал еси, богомудре Василие, у себя в доме честных ликов Государя-страстотерпца Николая Вторага и сродников его изображения, исповедуя, яко Православная Церковь почитает царя боговенчаннаго Помазанником Божиим. Ныне во сонме мученическом купно с императором благоверным во славе предстоиши ныне пред престолом Царя Царствующих и воспеваеши, предстательствуя за ны, ангельское пение: Аллилуиа.

Икос 7
      Новое место служения обрел еси, всехвальне Василие, во храме Вознесения Господня, яже на поле Гороховом во граде Москве, тамо бо, аки староста и ктитор, усердно Богу и ближним твоим послужил еси, неустанными молитвы и труды твоими Царя Небеснаго тихо прославляя. Сего ради просим тя: воспламени в сердцах наших огнь любве, да тобою наставляемы заповеди евангельския выну соблюдаем, о Бозе же, милующем и спасающем ны,с благодарением помышляя, тебе, заступнику многомилостивому и покровителю благому, воспоим с о умилением сице:
     Радуйся, сердца наша благодатию Божиею, ти данною, очищающий;
     Радуйся, очи наши духовныя к зрению Бога изощряющий.
     Радуйся, вражды и ссоры наша умиротворяющий;
     Радуйся, всякий мрак заблуждения от нас прогоняющий.
     Радуйся, к терпению лишений и скорбей нас воодушевляющий;
     Радуйся, в пренесении бед и испытаний нас укрепляющий.
     Радуйся, пламень злобный струями любве твоея угасаяй;
     Радуйся, мир Божий в сердца наша привносяй.
     Радуйся, святый новомучениче Василие, Церкви Христовой всечестное украшение.

Кондак 8
      Странен быв на земли, к горнему отечеству добре шествовал еси, Христов угодниче Василие, Господа бо всем сердцем и всею душею измлада возлюбив, скорби многообразные Его же ради добропобедно претерпел еси, егда воздвиже враг спасения брань лютую, дабы отлучити тя от Христа Спасителя. Ты же, презревше вся скорогибнущая мира сего, претерпе до конца страдания, и в небесный вертоград вшел еси, и до днесь радостно поеши: Аллилуиа.

Икос 8
      Всего себе Господеви предал еси, святый новомучениче Василие, егда потщался еси войти, тесным и прискорбным путем в жизнь вечную, презревый вся злопыхания богопротивная с кротостью и смирением, от своих мучителей взыде на заклание, благодатию Христовою укрепляемый. Мы же тобою ко духовному подвигу наставляеми, ублажаем тя:
     Радуйся, неправедный приговор с кротостию приявый;
     Радуйся, во узилищи смрад и тесноту претерпевый.
     Радуйся, муки душевныя пред казнию мужественно пренесый;
     Радуйся, страх смертный упованием на Христа Жизнодавца низложивый.
     Радуйся, во страдании твоем диадиму нетленную стяжавый;
     Радуйся, аки агнец кровию своею землю Российскую омочивый.
     Радуйся, мощи твоя на мощи других новомучеников положивый;
     Радуйся, муками своими миродержателя века сего победивый.
     Радуйся, святый новомучениче Василие, Церкви Христовой всечестное украшение.

Кондак 9
      Все естество ангельское возрадовашися преславней кончине твоей, еюже житие твое достойно в веси Бутовстей венчал еси. Лик страстотерпец с любовию прият тя, святый Василие, и, купно со всеми мученики страны российския, ныне во славе пред Престолом Всесвятыя Троицы во славе неизреченней предстоиши. Мы с надеждою на предстательство твое, Господеви взываем: Аллилуиа.

Икос 9
      Витии многовещанныя не возмогут изрещи по достоянию к восхвалению подвига твоего, богоносне отче наш Василие. Ты бо временныя и земныя жизни Предвечнего Господа ради небрегох, положив душу свою за веру Православную. Мы же, зряще немощи и несовершенства своя, в сокрушении сердечном, с надеждою на предстательство твое, восклицаем ти сице:
     Радуйся, даже до смерти воле Божией послушливый;
     Радуйся, правды служителю нелицеприятный.
     Радуйся, от земных скорбей пришедый к покою небесному;
     Радуйся, обетованнаго Искупителя лицем к лицу узревый.
     Радуйся, в благочестии и трезвомыслии нас утвердждаяй;
     Радуйся, мрак уныния нашего светом радости о Бозе разгоняяй.
     Радуйся, страстями века сего души израненныя омывающий;
     Радуйся, житию богоугодному и благочестию нас научающий.
     Радуйся, святый новомучениче Василие, Церкви Христовой всечестное украшение.

Кондак 10
      Спасти хотя мир, Спас на Кресте за нас человек пострада, смертию смерть попра и воскресением миру живот новый дарова; ты, святый страстотерпче Василие, мужески последовавши Христу Распятому; ныне же во славе предстоя престолу Царя Царствующих купно с царственными мученики молишися о спасении нашем и воскресении веры спасительныя во стране российстей, вопиюще Господеви: Аллилуиа.

Икос 10
      Стена и заступление еси, ограждаяй всех, благочестно память твою чтущих, святый новомучениче Василие, и неутомимый страже противу враг видимых и невидимых пребываеши, непрестанно молящеся Господу Богу о спасении душ наших и исцеляюще немощи наша. Сего ради умильно вопием ти сице:
     Радуйся, светлыми ризами украшенный;
     Радуйся, в Царский чертог возшедый.
     Радуйся, славы присносущныя причастниче;
     Радуйся, света неизреченнаго зрителю.
     Радуйся, право стоящим утверждение;
     Радуйся, заблуждшим кроткое исправление.
     Радуйся, имже житейския нужды разрешаются;
     Радуйся, имже благодатная помощь подается.
     Радуйся, святый новомучениче Василие, Церкви Христовой всечестное украшение.

Кондак 11
      Пение умиленное приносим ти, угодниче Христов, яко в раи сладости со всеми праведники вкушаеши, яко сияеши ныне на небесех в сонме добропобедных новомучеников страны российския и купно с ними молишися о возрождении веры Христовой, благочестия и благонравия в земнем отечестве твоем, правы стези указуеши нам к Царствию Христову и научаеши присно Господеви взывати: Аллилуиа.

Икос 11
      Светозарнаго светильника, елея молитвы чистыя преисполнена, и пламенем веры светло сияюща, воздвиже тя Господь, святый новомучениче Василие, всем благочестивым христианом, благочестно память твою чтущим. Мы же, очами веры зрим тя в Троическом Свете в сонме святых, в крови Агнчей ризы своя убеливших, выну пребывающаго и нам мира и благоденствия просящего. Сего ради с надеждою воспеваем ти сице:
     Радуйся, Христа во житии и страданиях ваших возвеличивый;
     Радуйся, к Царству Небесному узким путем восшествовавый.
     Радуйся, в сонме новомучеников вечный покой и блаженство стяжавый;
     Радуйся, хулителей Имени Господня твердостию веры удививый.
     Радуйся, на Бога, яко на Помощника и Защитника уповавый;
     Радуйся, временною смертию в жизнь вечную пришедый.
     Радуйся, победную песнь на Небеси воспевающий;
     Радуйся, ангелами пресветлыми присно торжествующий.
     Радуйся, святый новомучениче Василие, Церкви Христовой всечестное украшение.

Кондак 12
      Благодатию Всесвятаго Духа укрепляемь, явился еси мучеником во дни нечестивого богоборства во стольнем граде Москве. Твердо стоял еси на камени веры исповедания твоего и, после заточения в тюрьме Бутырстей, веру Истинную мученическою смертию утверди. Мы же ныне молим тя: да не оскудеет вера наша и не умалится надежда наша на Господа, и да поем Ему о тебе: Аллилуиа.

Икос 12
      Поюще твое прославление, всехвальне страстотерпче Христов Василие, воспеваем праведное житие твое и пламенеющую любовь ко Господу. Восхваляем мужественное стояние твое в вере истинней и спасительней, ты бо гонения и многия напасти претерпел еси и мученическим венцем увенчан был еси Христом Спасителем и Подвигоположником. И ныне имея тя предстателем и ходатаем спасения нашего, приносим ти похвалы таковая:
     Радуйся, непоколебимый столпе Церкви Православныя;
     Радуйся, подвижниче веры и благочестия, от Господа Славы достойно венчанный.
     Радуйся, мужество необоримое и твердую веру показавый;
     Радуйся, утверждения ради Правды Божией, жизнь свою положивый.
     Радуйся, адаманте крепчайший, во брани супротив беззаконных;
     Радуйся, истиннаго закона Божия скрижале и источниче чистыя благодати.
     Радуйся, лукавое мудрование о земном раи обличаяй;
     Радуйся, нас ко исповеданию Веры Истинныя призываяй.
     Радуйся, святый новомучениче Василие, Церкви Христовой всечестное украшение.

Кондак 13
      О, пречудный исповедниче и преславный новомучениче Христов и заступниче наш, святый Василие! Приими малое сие моление наше, воздыханием сердец наших приносимое. И испроси у венчавшаго тя венцем нетленным Всемилосерднаго Господа Нашего, всем нам чистоты сердечныя и телесныя, благочестия, мира, братолюбия, милосердия и ревности о Святей вере Христовей. Да благодатию укрепляеми и утешаеми, сподобимся купно с тобою во Царствии Небесном во веки воспевати Богу: Аллилуиа.
Этот кондак читается трижды, затем икос 1-й и кондак1-й

Молитва святому новомученику Василию
      О, святый новомучениче Василие! Нескончаемаго блаженства на небеси ныне причастник еси, идеже несредственно лик Христов во славе созерцаеши, невещественныя благодати Его исполненный. Сего ради тепле умоляем тя: моли Господа и Бога нашего Иисуса Христа исполнити сердца наша любовию к церкви и твердости, во еже крепко держатися о вере спасительней, яко да не окаменеют сердца наша, да не нападут на ня волцы еретицы и заблудят их, во еже растерзати я, ниже да совратят их козни и лукавствия демонския от пути в безводное прелести безпутие. Ей, отче, Богу возлюбленне! Воздей руце твои ко Всевышнему и умоли Его даровати нам мир и благоденствие, да не рекут нечестивии: где есть Бог их? Твоим бо мужеским исповеданием соделался еси велий молитвенник за всех память твою святую чтущих и к честным мощем твоим притекающих. Ты же выну Христа умоляеши даровати нам мир и помиловати души наша. Аминь.

Тропарь святому новомученику Василию
Тропарь, глас 4:
      Мученик Твой, Господи, Василие во страдании своем венец прият нетленный от Тебе, Бога нашего, имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Кондак, глас 5:
      Верный сын земли Русския явился еси, новомучениче Василие, Христа, Солнце Правды, возвещая и безбожия тьму отгоняя. Ныне же сродники твоя в православней вере утверждая, молися о душах наших.

Величание
      Величаем тя, страстотерпче святый Василие, и чтим честная страдания твоя, яже за Христа претерпел еси.

Автор акафиста: Е. В. Храповицкий


Православный календарь

Май 2018
Пн Вт Ср Чт Пт Сб Вс
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.