Вход

Изображения в галерее

807_95.jpg
822_13.jpg
130.jpg

Главная

АКАФИСТ преподобному отцу Феофилу, подвижнику Китаевой пустыни (иной)


Новопрославленные Печерские святые. Икона ХХ века. Прп. иеросхимонах Парфений, блж. Досифей, прп. Алексий, Христа ради юродивый иеромонах Фиофил, Христа ради юродивый старец Паисий.

Кондак 1
      Избранный от возраста млада сосудом быти Премудрости Божией и Силы, угодниче Христов Феофиле. Изрядным жития твоего подвигом, престающую века сего лепоту обнажением срамным обличил еси, да Царства Вечнаго красоту покаяния слезами узрят людие. О нас же воззови ко Господу, молитвы трубо громогласная, да зовем ти радостно:
     Радуйся, отче наш Феофиле, предивный чудотворче и обители Китаевския украшение.

Икос 1
      Ангелы измлада охраняем был еси, блаженне, от злобы мира сего, люте на тя воставшаго от чрева матери твоея и погубити тя тщашагося. Мы же, промышление о тебе Божие видяще, со удивлением зовем:
     Радуйся, от лет младых благословением небесным осененный;
     Радуйся, постничества благодатию утвержденный.
     Радуйся, от млека матерня воздержание явивый;
     Радуйся, сим действом окрест живущих удививый.
     Радуйся, воздержанию благокрасному многих научивый;
     Радуйся, добродетель сию царицею духа твоего утвердивый.      Радуйся, отче наш Феофиле, предивный чудотворче и обители Китаевския украшение.

Кондак 2
   ;   Видя мати твоя благонравие младенческо, изумления достойно, не узре в тебе Духа Святаго действие изрядное, святе Феофиле, о немже благодарити Бога паче подобает. Но князем тмы наваждена, злобою к тебе распыхашеся, во еже не вкусил еси млека ея матерня, не вразумися благодарне возопити Богу: Аллилуиа.

Икос 2
      Разумение возъиме отроковица, при дому служащая, об охранении души твоея силами небесными от погибели лютыя, ужасеся зело: поведа же отцу твоему пресвитеру церковному об озлоблении противочаднем госпожи своея. Сего ради в стране далече вне дома oтча воздоен был еси, святе, благодатию Христовою, мы же тебе вопием:
     Радуйся, рабе Христов благий и верный;
     Радуйся, воли Его святыя исполнителю усердный.
     Радуйся, Евангелия светом духа стези осветивый;
     Радуйся, во главу угла закон Бога Вышняго положивый.
     Радуйся, гонений лютых иго Христа ради радостно носивый;
     Радуйся, волю Божию о тебе всем сердцем лобызавый.
     Радуйся, отче наш Феофиле, предивный чудотворче и обители Китаевския украшение.

Кондак 3
      Силою храним был еси свыше, блаженне, егда мати твоя, гневом безумия одержима бяше, восхоте погубити тя по наущению сатанину. Мы же, чудеса спасения твоего зряще, умильно зовем Хранящему тя: Аллилуиа.

Икос 3
      Имея врачевство болезней скорбных, еже есть молитва к Богу теплая, прибегл еси ко утешению сему вселюбезно, святе, человеков бегая и Христу единому свое сердце принося. Темже терпения твоего добротами обогащаемии, вопием ти сице:
     Радуйся, терпения краеуголен камень во главу браней духовных положивый;
     Радуйся, Христова Креста знамение на горе высоцей духа водрузивый.
     Радуйся, сердце свое к Богу огнем любве воспламенивый;
     Радуйся, козни вражия оружием смирения сокрушивый.
     Радуйся, мира ложнаго уставы житием твоим разоривый;
     Радуйся, родившую тя к покаянию и примирению с тобою приведый.      Радуйся, отче наш Феофиле, предивный чудотворче и обители Китаевския украшение.

Кондак 4
      Бури житейския волнами восхоте погубити тя враг спасения человеча и погрузити ум твой в попечения суетная, егда был еси в научении между отроками. Но яко oрел высокопарный парил еси, отче, в высоте богоoбщения тобою возлюбленнаго конечне, и взывал еси Держащему вся дланию: Аллилуиа.

Икос 4
      Слухом слыша учения училищныя, ушеса же сердца твоего не простирал еси в них, взыскуя на потребу единаго токмо. Сего ради оставив вся суетная, прибегл еси к воде упокоения душевнаго во обитель Киево-братскую, веселяся духом. Темже приими и наша пения:
     Радуйся, верный рабе Христов, волю Божию выну исполнявый;
     Радуйся, благочестия столпе, полки бесовския жития твоего святостию устрашивый.
     Радуйся, земли благия ниво, слезами орошенная и обилен плод принесшая;
     Радуйся, твердыя веры семя, в древо великое послушания возрастшее.
     Радуйся, молитвы сердечныя сладость измлада вкусивый;
     Радуйся, теплоту духа сего до смерти соблюдый.
     Радуйся, отче наш Феофиле, предивный чудотворче и обители Китаевския украшение.

Кондак 5
      Богокрасное видение зрим, о празднолюбцы: юношу млада летами, но духа возрастом древняго видяще, разумом богопросвещенным скоротечность века сего познавшаго и Христа ради в послушание игумену себе предавшаго, свободу духа сим бо улучая. Темже вопием ему: сердца наша уврачуй, святе, страстьми изможденныя, да вопием с тобою Исцеляющему вся: Аллилуиа.

Икос 5
      Видевше мироздания красоту Божественную, отче: потщался еси к сей приобщитися духом, возлюбленным местом молитвы колокольню монастырскую имея: идеже богопознания мыслию парил еси над миром, тело вкупе к сему приобщая. Нас же, память твою чтущих, приведи к высоте сей, да зовем ти:
     Радуйся, земный ангеле и человече небесный;
     Радуйся, молитвы умныя делателю усердный.
     Радуйся, смиренномудрия крине благоуханный;
     Радуйся, таин Божественных созерцателю блаженный.
     Радуйся, своеволия сень темную во гробе послушания заключивый;
     Радуйся, из гроба сего в безмятежную жизнь воскресый.
     Радуйся, отче наш Феофиле, предивный чудотворче и обители Китаевския украшение.

Кондак 6
      Проповедь Креста Господня житие твое бысть, блаженне, распялся бо еси миру апостольски, душу твою за Христа положити желая. Сего ради безумия зрак на себе возложил еси: да с людьми пребывая, яко в пустыни жительствуеши, поношения пищею питаяся, в разуме же богопросвещенне Господеви поя: Аллилуиа.

Икос 6
      Возсиял еси яко солнце мысленное, отче, молитвы теплотою чада твоя согревая и чудесы изрядными во благочестии их соблюдая. К тем сопричти и нас, блаженне, вопиющих ти сице:
     Радуйся, светильниче веры, под спудом юродства себе сокрывающий;
     Радуйся, сим подвигом мудрования безстудных людей обнажающий.
     Радуйся, нищеты душевныя усердный стяжателю;
     Радуйся, сия плодами приходящих к тебе питателю.
     Радуйся, проповедниче покаяния неблазненный;
     Радуйся, о чадех твоих воздыхателю преболезненный.
     Радуйся, отче наш Феофиле, предивный чудотворче и обители Китаевския украшение.

Кондак 7
      Хотением божественным восхотел еси, Спасе, от погибели человеки избавити: даровал бо еси нам святыя Твоя молитвенники, яко кадило благовонное Тебе приятныя. Темже и мы благодарни суще недостойнии, Господи, Феофила блаженнаго за грехи наша ходатая имуще, со слезами вопием: Аллилуиа.

Икос 7
      Новый предтеча явился еси, отче блаженнейший, на покаяния стези верныя наставляя, еже есть крещение второе, омывает бо грехи слезами, дерзновение пред Господем даруя. К сему же и наша души привлецы приобщением спасительным, да глада безпечности избавльшеся, взываем ти:
     Радуйся, свеще пламенногорящая и в молитве за люди истаявающая;
     Радуйся, добродетелей сокровищнице, печатию смиренномудрия затворенная.
     Радуйся, людей безпечных обличение непререкаемое;
     Радуйся, кающихся грешников отрадо всеблагоговейная.
     Радуйся, любве Христовы вино, отчаянных сердца увеселяющае;
     Радуйся, премудрости Божией кладезю, память твою чтущих обильно напаяющий.
     Радуйся, отче наш Феофиле, предивный чудотворче и обители Китаевския украшение.

Кондак 8
      Странное чудо воoчию всех бываемо видяще, дивимся сему, како телец разума лишенный, яко человек старцу Феофилу служаше, желания его предусретающе; темже, о вернии, Христа прославим, святыя Своя славою венчающаго, поюще Ему: Аллилуиа.

Икос 8
      Весь еси был всем воистину oтец чадолюбивый, душу свою за люди готов был еси положити, Феофиле отче наш. Обличал бо еси, запрещал еси и умолял с долготерпением всяким и учением, да погибель всяко не исхитит никогоже. Сего ради приими от нас похвалы сия:
     Радуйся, врачу искуснейший, молитвы зелием души исцеляяй;
     Радуйся, подвижниче прозорливый, от путей погибельных предостерегаяй.
     Радуйся, служителю Христов нелицемерный;
     Радуйся, благочеcтия радетелю усердный.
     Радуйся, благословением твоим супружества честныя охраняющий;
     Радуйся, во иночестве подвизающихся участием молитвенным укрепляющий.
     Радуйся, отче наш Феофиле, предивный чудотворче и обители Китаевския украшение.

Кондак 9
      Всякое зверей естество и гад земных человеческим укрощается естеством: но силен есть, рече апоcтол, иже язык свой укротити может. Славим же тя, святе, не язык токмо, но и все тело покорением духу стеснившаго, чресла своя обручем железным препоясав, богоявления изображением в память трикратнаго от вод спасения запечатлев. Темже Увенчавшему тя славою зовем: Аллилуиа.

Икос 9
      Витийствовати язык наш благокрасно не может, чудная дела твоя зряще, Феофиле отче наш. Обаче лепо есть молчания печать недоуменнаго на уста своя возложити, горения духа созерцая твоего, и сердечне тебе возопити:
     Радуйся, Отечества Небеcнаго пламенне возжелевый;
     Радуйся, яко пришлец житие твое на земли проводивый.
     Радуйся, слез умиления потоки в землю сердца твоего изливый;
     Радуйся, добродетелей произращение обильное явивый.
     Радуйся, начальствующих притеснения великодушно терпевый;
     Радуйся, об их спасении Бога незлобиво моливый.
     Радуйся, отче наш Феофиле, предивный чудотворче и обители Китаевския украшение.

Кондак 10
      Спасти хотя душу, отвергл еси вся препятствия греховныя, на поста и молитвы крилех в горняя возшел еси, памяти смертныя щитом козни вражия отражая. С Давидом, скажи ми, Господи, кончину мою, вкупе — вопиял еси, песнь возсылая Богу: Аллилуиа.

Икос 10
      Стена духовом злобы поднебесным неприступна был еси, отче священный. Темже и души наша от тех насилия свободи и от погибели лютыя избави, да зовем ти сице:
     Радуйся, сердец сокрушенных претихое утешение;
     Радуйся, горделивых умов всегрозное обличение.
     Радуйся, смирения Христова благий носителю;
     Радуйся, премудрости Божия верный тайнозрителю.
     Радуйся, врачу искуснейший недугующих;
     Радуйся, oтрадо вселюбезная примирения с Богом чающих.
     Радуйся, отче наш Феофиле, предивный чудотворче и обители Китаевския украшение.

Кондак 11
      Пения многая умиления исполненная возсылал еси выну Творцу всяческих, блаженне, в клети сердца твоего, иже в тайне. Сего ради яве от него прославляешися яко верный раб Христов светло. Мы же вкупе со святыми вопием дивному во святых своих Богу: Аллилуиа.

Икос 11
      Светозарную пророчества благодать от Бога приял еси, отче, во еже чада остерегати твоя от зол находящих. Сего ради любовь народа христианскаго стяжал еси, вопиющаго ти со умилением тако:
     Радуйся, основание обители в честь Покрова Богородицы на Глубочице предсказавый;
     Радуйся, сие место землею святою прозорливо наименовавый.
     Радуйся, совет от тебе ищущим прияти волю Божию о них вещавый;
     Радуйся, ума лукаваго пытливость в неких грозно обличавый.
     Радуйся, горделивых величание тайнодействий их постыдных изъявлением прозорливым низлагавый;
     Радуйся, от мира сего презираемым утешением велиим бывый.
     Радуйся, отче наш Феофиле, предивный чудотворче и обители Китаевския украшение.

Кондак 12
      Благодать тебе от Бога данную, яко талант умножил еси: был еси смирения и терпения Христова образ непререкаемый, веры и благочестия правило известное, целомудрия и чистоты благоуханный крин. Сего ради вшел еси, отче, в радость Господа твоего, идеже царствует вечная песнь: Аллилуиа.

Икос 12
      Поюще житие твое добродетельми славное, отче наш Феофиле, дивимся терпению твоему и сердца твоего незлобию младенствующу. Нам же сих добродетелей носителями быти помози, умиленно ти поющим:
     Радуйся, правды Божия искателю всеусердный;
     Радуйся, неправды обличителю нелицемерный.
     Радуйся, наставниче Христова стада доблемудрый;
     Радуйся, во обстоянии сущим утешителю сердобольный.
     Радуйся, веры православныя светило;
     Радуйся, благоуханий добродетельных богоприятное кадило.
     Радуйся, отче наш Феофиле, предивный чудотворче и обители Китаевския украшение.

Кондак 13
      О преблаженне и всечеcтне отче наш Феофиле, покаяния спасительнаго глашатаю неутомимый! Похвальная наша пения любезно приими и от мрака греховнаго наша души свободи, да свет небесный восприемши, Солнцу правды богоприятную воспоим песнь: Аллилуиа.
Этот кондак читается трижды, затем икос 1-й и кондак 1-й

Молитва преподобному Феофилу Китаевскому
      О, предивный угодниче Христов, крепкий молитвенниче и заступниче, отче наш Феофиле! Ты от чрева матери избранный Богом на служение ему и дивно им хранимый от всякаго зла. За твоя подвиги юродства Господь дарова тебе дар пророчества и чудотворений. По заповеди пастыреначальника Христа ты душу свою полагавый за овцы стада Христова. Ты грешников тайных и явных грозно обличавый и своими мудрыми словесы к покаянию и исправлению их приводивый. Ты приходящих к тебе больных и скорбных не отвергал еси. Ты был всем яко отец чадолюбивый и пастырь добрый. И ныне услыши нас, с верою призывающих тя и усердно припадающих к раце мощей твоих, отче наш Феофиле. Испроси у Всемилостиваго Бога мир Церкви нашей православней во отечествии твоем. Вразуми и обрати еретиков и раскольников в лоно Матери-Церкви. Пастырям нашим ревность о спасении людей, людем же послушание Святей Церкви и ревность защищати веру православную испроси. Умоли Небеснаго Отца всем нам подати коемуждо по прошению его: юным в православней вepe возрастание, старым и немощным подкрепление и утешение, болящим исцеление, сиротам и безпомощным заступление и нечаянную радость, заблудшим и согрешающим исправление. И всем нам испроси телесное здравие и душевное спасение. Согрей огнем Божественной любви охладевшие сердца наша. Помози нам исправити жизнь нашу греховную, дабы безбедно прейти мытарства демонов лютых и водворитися во обителех Отца Небеснаго, дабы вкупе с тобою и со всеми святыми воспевати всесвятое и великолепое имя Пресвятыя Троицы: Отца и Сына и Святаго Духа во веки веков. Аминь.

Молитва иная
      О пречудне и прехвальне богомудре oтче наш Феофиле, ангелов достойный собеседниче и покаяния человеков неумолкаемая проповедь, иноческаго делания правило и мирян благочеcтивых похвало! Скудосердечия нашего, святе, не презри и приими по силе нашей тебе приносимое пение. Ходатайства бо твоего пред Господем просим и чадолюбие твое к снизхождению усердно призываем. Вемы бо воистину, вемы, яко умы наша к тебе простирающе, подвизаем тя грехи наша обличати и лице твое от беззаконий наших отвращати. Но такожде, oтче священнейший, вемы, яко обличение чадолюбное ко стези покаяния спасительнаго влечет и к участию Божеcтвенному прилагает. Сего ради слезно молим тя и в сокрушении колена сердец наших приклоняюще, умильно просим: немощь нашу укрепи и препоны вражия молитвенным участием твоим сокруши: да молитвами твоими укрепляеми, врагу злокозненному противостанем, в броню благодати Христовы облекшася. И тако ратоборствующе, дерзнем с тобою вкупе славити всесвятое имя Пресвятыя Троицы, Отца, и Сына, и Святаго Духа, ныне и присно и во веки веков. Аминь.

Тропарь преподобному Феофилу Китаевскому
Тропарь глас 4:
      От юности Христа возлюбил еси, блаженне Феофиле, и тому единому работати пламенне возжелел, непрестанною молитвою и юродством в пустыни Китаевой подвизался еси, угодником печерским подражая. Сего ради вопием ти: спасай нас молитвами твоими, преподобне отче наш.

Ин тропарь, глас 8:
      Постом душу твою просветил еси, молитвами непрестанными сердце твое сосуд Духа Святаго соделал еси, преподобне отче наш Феофиле, тем же вся вражия ополчения крепко посрамил еси и яко победоносец истинный воздаяние получил еси от Христа Бога. Тому помолися о душах наших.

Кондак, глас 4:
      От мира суетнаго изшел еси и в дебрех Китаева вселился еси, преподобне отче наш Феофиле. Непрестанным псалмопением и юродством своим многих на путь спасения наставил еси. Сего ради вопием ти: моли Христа Бога, да спасет души наша.

Величание
      Ублажаем тя, преподобне отче Феофиле, и чтим святую память твою, наставниче монахов и собеседниче ангелов.

Православный календарь

Ноябрь 2018
Пн Вт Ср Чт Пт Сб Вс
29 30 31 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 1 2

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.