Вход

Изображения в галерее

P1071292.JPG
133.jpg
809_49.jpg

Главная

АКАФИСТ преподобному чудотворцу Марку Пещернику, Гробокопателю


Преподобный Марк Пещерник, Гробокопатель. Роспись Крестовоздвиженской церкви. 1894 г.

Кондак 1
      Избранный многотрудниче, угодниче Христов, богоблаженне Марко, в посте, молитве, неустанном бдении вся дни и нощи провождавый, темже велии дары Пресвятаго Духа стяжавый, моли Всевышняго и Пресвятую Деву Богородицу изъяти нас от скорбных обстояний, подати нам спасение необоримое, да со умилением зовем ти:
     Радуйся, преподобне отче наш Марко, скорый помощниче и молитвенниче о всех к тебе прибегающих.

Икос 1
      Ангелоподобный иноче, безмездный копателю, молитвенныя келлии и смертныя одры приготовлявый, землю на рамах своих носивый, за вся сия Небесную награду ожидавый, людскую мзду убогим раздавал еси. Дивяся таковому твоему усердию, велицей кротости и нестяжанию, взываем ти хвалебне:
     Радуйся, всем сердцем Бога возлюбивый;
     Pадуйся, пещерное подвижничество в послушание себе вменивый.
     Радуйся, служити миру отрекийся;
     Pадуйся, работати Единому Богу возжелевый.
     Радуйся, мир и вся красная его презревый;
     Pадуйся, о горних благах выну помышлявый.
     Радуйся, из темных лабиринтов к Богу очи сердца возводивый;
     Pадуйся, дар прозорливости и чудотворения от Него стяжавый.
     Радуйся, труды наша на пути спасения облегчающий;
     Pадуйся, к тебе прибегающих скорый помощниче.
     Радуйся, ризы безыскусныя носивый;
     Pадуйся, града Киева и Лавры Печерския велелепное украшение.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 2
      Дар, свыше тебе данный, ты, блаженне отче, до поры скрывал еси, тайныя молитвы Богу вознося непрестанно. Возложиша на пояс себе железо, бодрствовал еси день и нощь в трудах и псалмопениих, не отделяя же всея сея от строгого поста. Воду пил ты мерою из святыя мерки, коею служил тебе медный крест. Темже сподобил тя Господь невидимая зрети и невозможная человеком совершати. Сего ради с благоговением зовем Ему: Аллилуиа.

Икос 2
      Сила Божия укрепи тя, преподобне отче Марко, на подвиги духовныя в подземнем раи, идеже возсия благодать Господня на месте варяжских вертепов. Там же яко наставник иноков явился еси. Почитая таковая деяния твоя, всем сердцем воспеваем ти:
     Радуйся, житием своим терпению нас научающий;
     Pадуйся, любовь Божию людям показующий;
     Радуйся, плодами благочестия украшенный;
     Pадуйся, терпение и незлобие всему миру явивый.
     Радуйся, теплый предстательниче наш пред Престолом Всевышнего;
     Pадуйся, души отчаянныя ко Христу направляющий.
     Радуйся, всехвальне преподобне отче, благими делы братию в ревности о Господе утвердивый;
     Pадуйся, Христа ради железо на теле своем носивый.
     Радуйся, сомнение и маловерие из душ смятенных изгоняющий;
     Pадуйся, чистоту и смирение собою являющий.
     Радуйся, ангелонравный человече;
     Pадуйся, дивный о Господе подвижниче.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 3
      Нося в чине ангельском иноческий образ, крылатому льву уподобился еси. Яко лев оживляет рыком своих мертвых, тако же и ты смиренными и кроткими речами воскрешал еси усопших иноков. Недоумеваяся о таковом чудесном превращении, взываем Богу Всемогущему: Аллилуиа.

Икос 3
      Вкупе со евангелистом Марком и пророком Божиим Иезекиилем, некогда узревшими средь ликов ангельских наделенное крилами львиное подобие, удостоился еси и ты, богоблаженне, поминаем быти наравне с древнейшими наперстники Христа. Мы же, почитающе сия, зовем ти:
     Радуйся, со апостолом Марком крылатому льву подобен бывый;
     Pадуйся, Божественнаго Духа носительниче.
     Радуйся, великий чудотворче;
     Pадуйся, благомощный молитвенниче.
     Радуйся, свеща неугасимая, в молитвах к Богу ярко горящая;
     Pадуйся, пророка Иезекииля благий последователю.
     Радуйся, яко весь во Господе пребывавый;
     Pадуйся, к Нему бодренно и неуклонно ученики твоя направлявый.
     Радуйся, куколь незлобия на ся возложивый;
     Pадуйся, смирения и послушания зерцало.
     Радуйся, Пресвятыя Богородицы избранный любимиче;
     Pадуйся, верный исполнителю заповедей Сына Ея и Бога.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 4
      Бурю житейскую, в умах братии мятущуюся, кротостию и незлобием преодолевал еси, блаженне Марко. В благоотишии пещернем богоугодно подвизался еси, наставляя иноков на всяку добродетель. Темже заслужил еси быти почитаем вкупе со Антонием и Феодосием, первоначальниками иночества и монашескаго общежития на Руси. Се ведуще, взываем Богу: Аллилуиа.

Икос 4
      Бысть егда, утрудяся телесно, изнемогл еси, оставив место погребения тесным и нерасширенным. Инока, внезапно умерша, никто же не возмог в том неудобном гробе оправити достойно. Тогда ты приказал еси усопшему, взявши сосуд, возлити на себе елей крестообразо. И было по сему. При виде чуда братия, зело роптавшая, объялася смертельным ужасом и трепетом. И мы с благоговением трепещем, воспевая ти:
     Радуйся, яко память твоя, не токмо братиею монастырскою величается;
     Pадуйся, помощниче неутомимый скорбящих и нуждающихся.
     Радуйся, ходатаю наш у Престола Божия непостыдный;
     Pадуйся, смиренный многотрудниче, кротостию и незлобием многия в вере утвердивый.
     Радуйся, даров Божиих преисполненный;
     Pадуйся, безпрекословную любовь к ближним явивый.
     Радуйся, послушания рачителю;
     Pадуйся, своими чудесы и предсказании монахов от недоумения и от юродства непотребного спасавый.
     Радуйся, трудолюбия правило;
     Pадуйся, подвиги духовными плоть твою духу покоривый.
     Радуйся, яко Антония и Феодосия учеником соделался еси;
     Pадуйся, яко с ними вкупе во славе небесней пребывая, Бога выну о нас грешных умоляеши.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 5
      Еще бысть, егда другое место погребения явилось неготово. Новопреставленного оживив, ты, преподобне Марко, велел еси ему смиренне дожидатися своего часа. Воскресший же, раскрывши очи, не закрывал их целый день и нощь. Наутро же, прикрыв глазницы, предал дух свой в руце Божии и с честью был положен на готовом месте. Новому явлению чудящеся, взываем: Аллилуиа.

Икос 5
      Уведевше тя, преподобне Марко, яко чудес творителя и прозорливца, многия усердно тя восхваляху и желаху получити благодать молитв твоих. Ты, по глаголу Божию, никого же отгнал еси, но ревностно спасению молящихся служил еси. Сего ради, воспеваем ти похвальная:
     Радуйся, служивый Церкве Божией от трудов твоих праведных;
     Pадуйся, в собственноручно вырытой пещере пристанище спасения получивый.
     Радуйся, в молитве непрестанно пребывавый;
     Pадуйся, Лавру Печерскую и священный град Киев молитвенным бдением от бед ограждавый.
     Радуйся, претворивый пещерное жилище разбойников в храмы Господа Славы;
     Pадуйся, в подземных кровех главу глубиннаго змия крепко сокрушивый.
     Радуйся, преподобне отче, богомудрием высоким преисполненный;
     Pадуйся, наставниче богоносне, дары Духа Святаго преукрашенный.
     Радуйся, апостола Марка словеса возлюбивый;
     Pадуйся, всю братию трудолюбию поучавый.
     Радуйся, даров духовных всем к тебе притекающим у Господа испрошающий;
     Pадуйся, от всякаго недоумения и нас спасающий.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 6
      Внове воссия слава подвигов твоих, блаженне Марко, егда двоица духовных братий возжеле по смерти во едином гробе возлещи: старший горе, младший низу. Феофилу старшему, из монастыря временно исшедшу, пришла весть о смерти Иоанна, младшего. Вернувшеся и видев свое место занято, старший возопи: «Како можеши на мое место класти младшего?» Ты же, Марко, кротце поклонившеся ему, просил еси умершего ожити и перейти на свое место. И было так. Старший брат, роптавший на блаженнаго, припал к ногам его, глаголя: «Согрешил я, отче». Се познавше, мы зовем избравшему тя Богу: Аллилуиа.

Икос 6
      Согрешивый гневом Феофил опечалился зело, рек тебе: «Молю, прикажи брату, чтобы он лег там снова». Ты же отвещал еси: «Сам Господь, уничтожая распрю между нами, сотворил сие. Восставляти мертвых — дело Божие. Я же есмь человек грешный. Но знай и то: негоже, уповая на старшинство, ни в гнев впадати, ни своевольно братскую обитель покидати». Сему дивяся умиленно, поем ти таковая:
     Радуйся, смирения любителю;
     Pадуйся, дивная похвало ревностных трудников по Бозе.
     Радуйся, роптавшей братии примирителю;
     Pадуйся, мира и тишины во обители насадителю.
     Радуйся, ученики твоя от сетей невидимаго врага молитвою твоею соблюдавый;
     Pадуйся, искушенный на мнозе, искушаемым помогавый.
     Радуйся, чистое вместилище добродетелей;
     Pадуйся, красное селение Духа Святаго.
     Радуйся, смиренно творити добродетели нас научающий;
     Pадуйся, к подвигом благочестия всех призывающий.
     Радуйся, кротостию твоею братию и людия мирския удививый;
     Pадуйся, града Киева небесный заступниче.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 7
      Чудо прозорливости явил еси, блаженне Марко, егда велел еси Феофилу готовитися к скорой смерти. Тот же, раздав имущество убогим, уединился в келлии своей, стеня, рыдая и постяся — дабы умилостивити Всевышняго и получити время на покаяние. Се ведуще, молитвенно взываем Богу: Аллилуиа.

Икос 7
      От плача преподобный Феофил ослеп, плоть его истаяла до крайности за много дней. Тогда ты, Марко, молвил еси безутешному: «Прости, я пожелал тебе сего, предсказавши скорую кончину, дабы смирити твое плотское высокоумие. Сердца сокрушенна и смиренна Бог не уничижит». Видя таковое исцеление душевное, поем ти:
     Радуйся, всехвальне отче, со мудрыми учители монашестими в Царствие Небесное вшедый;
     Pадуйся, на путь спасения оттудуже нас призывающий.
     Радуйся, скорби людския угашающий;
     Pадуйся, страстьми одержимых от гибели спасающий.
     Радуйся, яко многия от неверия отвративый;
     Pадуйся, яко мощи твоя святыя и ныне всех припадающих к ним от всякого злаго обстояния спасают.
     Радуйся, даже до отшествия твоего ко Господу всех в разуме Христовом наставлявый;
     Pадуйся, день кончины своея предведый.
     Радуйся, древним пророком Божиим равночестный;
     Pадуйся, прозорливости благодатныя преисполненный.
     Радуйся, чудеса преславна в житии твоем совершивый;
     Pадуйся, Бога прославивый подвиги твоими.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 8
      Наглавие твое честное, яко шлем, укрывает нас от зла, обновляет душу, ограждает от бесовскаго прельщения, лечит от греховных язв. Тебе изрядно послужившее, тысячу лет оно хранило твои помыслы. Мы же, осеняемии сим клобуком, вдохновляемся на подвиги ради Всевышняго, взывая: Аллилуиа.

Икос 8
      Клобук архиепископа, шлем воина и куколь схимника объединила есть в себе твоя благая шапка, ею же мы каждодневно осеняеми, получаем силу и надежду на спасение. Ты же, почиваяй с преподобными на Небесех, не остави нас молитвами твоими, буди нам споборник и стена несокрушимая, да зовем ти:
     Радуйся, велию власть на духи нечистыя от Господа приявый;
     Pадуйся, людей, стужаемых привидении диавольскими молитвою твоею очистивый.
     Радуйся, многия бесноватыя от мучительства демонскаго свободивый;
     Pадуйся, вся привидения и искушения сатанинская победивый.
     Радуйся, бесов и колдунов грозно карающий;
     Pадуйся, яко просящих защиты от них и вспоможения не отторгающий.
     Радуйся, от мучительства демонскаго многия человеки молитвою твоею свобождаеши;
     Pадуйся, яко исцеления благодатныя от гроба твоего верным подаеши.
     Радуйся, победивый враги невидимыя глубоким твоим смирением;
     Pадуйся, низложивый и посрамивый гордыню злобнаго велиара.
     Радуйся, в час смертный всем нам благонадежный помощниче;
     Pадуйся, от насилия диавольскаго многомощный нам защитниче.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 9
      Сколь ни старался подкупити тя глубинный змий, ты оставался еси непреклонен, отче наш честный, и ныне ревностно храниши души верных, не предаеши их на гибель, защищаеши от всяких зол. Темже вси, заступничество получившии, вопиют Спасителю: Аллилуиа.

Икос 9
      Стена еси твердая и прибежище необоримое молящимся тебе, преподобне отче наш Марко. Сего ради вопием ти: охраняй нас всегда от враг видимых и невидимых, буди заступлением непостыдным и надеждою неизменяемою всем нам, прославляющим тебе глаголы сицевыми:
     Радуйся, душевныя страсти умертвляющий;
     Pадуйся, ко спасению всех призывающий.
     Радуйся, благочестию и смирению нас научающий;
     Pадуйся, мятущихся и маловерных в вере укрепляющий.
     Радуйся, на труд духовный нас воздвигающий;
     Pадуйся, мир Божий в сердца людей приносящий.
     Радуйся, дух злобы в сердцах озлобленных угашающий;
     Pадуйся, от сетей вражиих нас избавляющий.
     Радуйся, делы благими душу свою украсивый;
     Pадуйся, с лики небесными Творца прославивый.
     Радуйся, славы Божественныя удостоивыйся;
     Pадуйся, на Небеси обитель себе обретый.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 10
      Яко видеста очи твоя пренесение мощей преподобнаго Феодосиа, ты бо своима рукама их во храме возложил еси, ныне в горнем Иерусалиме, вкупе со великими учителеми пребываеши. Призри и на нас, ты, угодниче Божий, благосердием твоим от всякия напасти защити, от бесовских наваждений и от ран греховных охрани, исцеление подаждь молитвами твоими, да благодарне воззовем ко Господу: Аллилуиа.

Икос 10
      Ветия многовещанныя не могут разумети, како ты гласом своим чудеса творил еси, како целомудрием единым, постничеством и смирением неизбывную Божию благодать стяжал еси. Надо всем тем Богородицы лик сияет, Ей же святые молебны вкупе с тобою творяще, из глубины сердец наших зовем:
     Радуйся, изрядный слуго Пресвятыя Девы;
     Pадуйся, с Нею вкупе молитися за ны ко Господу дерзновение получивый.
     Радуйся, велию власть на диавола от Господа имеющий;
     Pадуйся, вся искушения духов тмы победоносно отражающий.
     Радуйся, цвете прекраснейший рая небеснаго;
     Pадуйся, всем скорбящим благий утешительниче.
     Радуйся, целомудрия рачителю;
     Pадуйся, яко и вся Русь Православная тя пред Господом величает.
     Радуйся, яко тя гонителем бесов нарицают;
     Pадуйся, яко ты еси Лавры Печерския и града Киева молитвенниче святый.
     Радуйся, в горних обителех пребывающий;
     Pадуйся, о нас грешных тамо молящийся.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 11
      Пещеры Лаврския, выну Подземным Небом величавшаяся, и ныне всеми тако величаются, понеже истекает от могил, вырытых тобою, Марко, и позднейшими усердными копателями благодать. В рацех положеннии святии принимают лобызания и молитвенные воздыхания за всех, кто праведным житием своим стяжали от Всевышняго дар чудотворения и посмертного нетления, обаче всех имен подвижников не вемы. Прославляем ныне благодатный сей некрополь паче пирамид египетских и прочих величайших кладбищ мира, вознося в небесный рай молитву: Аллилуиа.

Икос 11
      Еретики пытахуся разрушити некрополь, основанный тобою; людие, не веровавшия во благодать святых мощей, потщашася зело вывезти и сожещи нетленние останки преподобных. Однако же посрамлены явилися безбожники и богоборцы: не допустил Всевышний кощунственнаго разорения, ибо Господь посрамлен не бывает. Припадая же к ракам преблагословенным, из глубины сердец взываем сице:
     Радуйся, блаженне Марко, даже по смерти еретическую злобу посрамивый;
     Pадуйся, яко житием своим пещерным ангелов удививый.
     Радуйся, о снискании жизни вечныя наш ходатаиче преблагий;
     Pадуйся, яко за Русь Православную, молитвенниче пресвятый.
     Радуйся, всем ищущим милосердия Божия всегда помогающий;
     Pадуйся, о всех страждущих и труждающихся молитвы о нас Богу приносящий;
     Радуйся, преподобне отче, чудодейственную шапку нам даровавый;
     Pадуйся, под нею же стоящим велию надежду и неиссякаемую помощь подаеши.
     Радуйся, изрядный слуго Пречистыя Девы;
     Pадуйся, молитвы усердныя за нас пред Нею приносящий.
     Радуйся, благоволением Богоматере осененный;
     Pадуйся, откровений Божественных от Нея удостоенный.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 12
      Имуще дар великой благодати Божией, святе преподобне отче Марко, и ныне неоскудно помогаеши всем жаждущим защиты и спасения. Подвиги твоя, многажды воспетыя в летописаниих, запечатленныя на стенах храмов и в изображениих святых икон, вдохновляют нас на житие по Бозе. Ты бо охраняеши и укрепляеши труждающихся, наставляеши заблудших, подставляя рамо крепкое ведущим брань противу духовом злобы поднебесным. Ныне же и нам, тебе молящимся, источи от Бога струи исцеления, да зовем Ему: Аллилуиа.

Икос 12
      Чудотворные мощи твоя подают неоскудеваемыя исцеления всем с верою притекающим к раце твоей честней, коей место есть в Ближних пещерах велицей Лавры Киево-Печерстей, во единей келлии с любящими братиями Феофилом и Иоанном, вкупе такожде и с преподобным Титом. Прославляем тя сердечно со всеми преподобными Печерскими, глаголя сице:
     Радуйся, распинати плоть со страстьми и похотьми научающий;
     Pадуйся, о чтущих память твою ходатаю и покровительниче.
     Радуйся, ко гробу твоему притекающим отраду подающий;
     Pадуйся, о спасении Отечества нашего присно ходатайствующий.
     Радуйся, учителю монахов, многими чудесы всю братию удививый;
     Pадуйся, со всеми преподобными отцы в Лавре прославляемый.
     Радуйся, усердный предстателю, у Престола Божия молитвы о нас приносящий;
     Pадуйся, от насилия диавольскаго многомощный нам защитниче.
     Радуйся, Лавры Печерския крепкое ограждение;
     Pадуйся, по Бозе и Богородице непостыдное наше упование.
     Радуйся, яко семя твое духовное не оскуде в земли Русской;
     Pадуйся, яко веселишися со чады твоими во обителех райских.
     Радуйся, преподобне отче наш Марко, скорый помощниче и молитвенниче о всех к тебе прибегающих.

Кондак 13
      О великий чудотворче, богоблаженне отче Марко, смиренне понесый крест жития пещернаго, сокрушивый мерзкую главу внутренняго змия, за вся сия от Бога милость велию приявый, приими от нас, грешных и недостойных, моление сие, к тебе приносимое, огради нас молитвами твоими от наветов духов тьмы и всех, мыслящих нам злая, избави от скорбей и болезней, от злых человек и напрасныя смерти. Ты бо еси молитвенниче и помощниче великий, взывающих к тебе неутомимый в Небе заступниче, да с тобою и мы, ко спасению придя, воспоем всепобедную песнь Богу нашему: Аллилуиа.
Этот кондак читается трижды, затем икос 1-й и кондак 1-й

Молитва преподобному Марку, гробокопателю, Печерскому, в Ближних пещерах почивающему
      О великий и предивный чудотворче, богоблаженне отче наш Марко, всего себе служению Христу отдавый, до изнеможения священныя гробы копавый, монахов на путь правый наставлявый и от грехов нечаянных их ограждавый, услыши нас, молящихся тебе, яви на нас любовь свою, умоли Всевышняго Бога и Пресвятую Деву Богородицу избавитися нам от всякаго злаго обстояния и от геенны огненной, да безболезненно и непреткновенно войдем в чертоги Господа нашего Иисуса Христа и сподобимся вкупе с тобою во Царствии Небеснем пети Ему: Аллилуиа.

Тропарь преподобному Марку, гробокопателю, Печерскому, в Ближних пещерах почивающему
Тропарь, глас 1:
      Умертвив плотския похоти многим вздержанием и копанием гробов святым, присно, аки мертв, в пещере живя, мертвыя повелением своим воздвизал еси, Марко прехвальне, умертви и наша мудрования плотская и настави нас на течение добродетелей, моля о нас Единаго Человеколюбца.

Ин тропарь, глас 4:
      Яко усердный служитель Христа, праведный отче наш, Марко, исполненный добрых и безкорыстных дел, вошел еси в чертог Его Небесный и тамо со святыми блаженства вечнаго наслаждаешися. Тем же моли, Его же возлюбил еси и Ему же душу и труды своя посвятил еси, спастися душам нашим.

Кондак, глас 8:
      Врача изрядна и чудотворца любовию, вернии, ублажим, просяще его: да молитвами своими уврачует наша страсти душевныя и телесныя, имать бо на сие благодать от Бога, и прогонит духи лукавыя от всех, верно ко гробу его притекающих и зовущих: радуйся, Марко, целителю немощей наших.

Величание
      Ублажаем тя, преподобне отче Марко, и чтим святую память твою, наставниче монахов и собеседниче ангелов.


Православный календарь

Июнь 2018
Пн Вт Ср Чт Пт Сб Вс
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.