Главная

АКАФИСТ новомучеником, исповедником и страстотерпцем, в земли Российстей просиявшим

Подробности

Создано 08.02.2020 01:59

      Избраннии новомученицы и исповедницы Российстии, свидетелие Христовы, агнцы новозакланнии, кровию своею ризы Церкве нашея украсившии. Вы, прещений мучителей не убоявшеся, любовь к Богу даже до смерти явили есте и в жизни вечней к Нему дерзновение стяжали есте. Темже, предстояще Престолу Вседержителя, поминайте нас, любовию вас почитающих и вопиющих:
     Радуйтеся, новомученицы и исповедницы Российстии, Церкве нашея похвало и украшение.

      Ангелов Творец и мира Зиждитель от века предъизбра вас, яко верныя свидетели Своя в земли Российстей, и в годину тяжких испытаний благодать и силу вам дарова. Вы же, веру Православную миру безбожному явивше, твердым исповеданием, изгнанием и терпением страданий Христа прославили есте. Сего ради и мы прославляем вас сице:
     Радуйтеся, измлада Христа возлюбившии;
     Pадуйтеся, глас Пастыря Добраго послушавшии.
     Радуйтеся, Царства Божия внутрь себе присно искавшии;
     Pадуйтеся, крест на рамо свое вземшии.
     Радуйтеся, славу мира сего отринувшии;
     Pадуйтеся, за Христа страдания претерпевшии.
     Радуйтеся, любве ради Божия смерть приемшии;
     Pадуйтеся, небеснаго Царствия достигшии;
     Радуйтеся, новомученицы и исповедницы Российстии, Церкве нашея похвало и украшение.

      Видя Отечество наше в бедах и скорбех сущее, святителю отче Тихоне, богоизбранный патриарше земли нашея, призывал еси верная чада Церкве Российския за Христа и веру Православную мужественне стояти. Сам же, по вся дни умирая за паству твою, исповедник непоколебимый явился еси, воспевая Богу: Аллилуиа.

      Разумом Божественным просвещаемь, святителю отче Тихоне, Церковь Русскую мудре управил еси и, безбожныя гонители обличая, паству твою подвиги новомучеников почитати призывал еси. Сего ради вопием тебе сице:
     Радуйся, первосвятителей Московских благодатный преемниче;
     Pадуйся, Земли Русския великий печальниче.
     Радуйся, апостольских преданий усердный хранителю;
     Pадуйся, сокровищ Православныя веры благоговейный блюстителю.
     Радуйся, благодать Духа Святаго в сердце присно имевый;
     Pадуйся, разделения церковная любовию врачевавый.
     Радуйся, заточение и поругания мужественне претерпевый;
     Pадуйся, крестный путь с паствою твоею прошедый.
     Радуйтеся, новомученицы и исповедницы Российстии, Церкве нашея похвало и украшение.

      Силою, данною вам свыше, страстотерпцы славнии, царю Николае и царице Александро, царевичу Алексие и царевны Ольго, Татиано, Марие и Анастасие, лишение царства и славы земныя со смирением восприяли есте. Страданием же вольным даже до смерти Христу последовали есте и за убивающия вы молилися есте, вопиюще Богу: Аллилуиа.

      Имуще веру несумненну, яко вся от Бога суть, изгнание, поругание и темничное заточение мужественне претерпели есте, царственнии страстотерпцы, и мученических венцев сподобилися есте. Сего ради вопием вам сице:
     Радуйтеся, венец и похвало рода царскаго и богоизбраннаго;
     Pадуйтеся, преславныя отрасли корене благочестиваго.
     Радуйтеся, царствия земнаго лишение со смирением приемшии;
     Pадуйтеся, страдании вашими Царствия Небеснаго сподобльшиися.
     Радуйтеся, за враги своя усердно молившиися;
     Pадуйтеся, всем сердцем Бога взыскавшии.
     Радуйтеся, образ исповедничества верным людем показавшии;
     Pадуйтеся, седмочисленнии страстотерпцы, во едином дусе Богу представшии.
     Радуйтеся, новомученицы и исповедницы Российстии, Церкве нашея похвало и украшение.

      Бурею гонений на Церковь Русскую обдержими, святителие Божии, верою и страданьми мученическими благодать Христову стяжали есте и, корабль церковный неврежденно сохранивше, подражатели первым мучеником явилися есте. С ними же на Небесех взываете Богу победную песнь: Аллилуиа.

      Ведуще глас евангельский, яко пастырь добрый душу свою полагает за овцы, священномученицы доблии, любве ради Христовы и паствы своея изгнания, глад, хлад, зной солнечный и работы горькия претерпели есте, смертию мученическою житие свое увенчавше. Сего ради и мы с любовию прославляем вас сице:
     Радуйтеся, залог Христов добре сохранившии;
     Pадуйтеся, житием и смертию образ верным показавшии.
     Радуйтеся, жертву безкровную благоговейне совершавшии;
     Pадуйтеся, самех себе в жертву живую принесшии.
     Радуйтеся, Церкве Российския славо;
     Pадуйтеся, Отечества нашего украшение.
     Радуйтеся, паствы вашея ко Христу путеводителие;
     Pадуйтеся, догматов церковных ревностнии блюстителие.
     Радуйтеся, новомученицы и исповедницы Российстии, Церкве нашея похвало и украшение.

      Богосветлыя звезды на небе церковнем явилися есте, священноисповедницы Российстии, и, поношения, заточения, изгнания и горькия работы претерпевше, Господа Иисуса Христа мужественне исповедали есте. Таже, благочестно в мире поживше, путь ко спасению во тьме безбожия явили есте, научающе верныя присно благодарственно пети Богу: Аллилуиа.

      Видевше разорение земли Русския и беззаконие велие, опустошившее ю, вы, священноисповедницы славнии, страха и смерти не убоялися есте и, подвиги исповедничества благоухающе, яко крини сельнии посреде пустыни, процвели есте. Сего ради прославляем вас сице:
     Радуйтеся, молитвою теплою сердца ваша в подвизе утверждавшии;
     Pадуйтеся, твердым исповеданием веры просиявшии.
     Радуйтеся, во страданиих терпение и кротость явившии;
     Pадуйтеся, яко агнцы незлобивии посреде волков ходившии.
     Радуйтеся, службу Божию во узах совершавшии;
     Pадуйтеся, соузники в терпении укреплявшии.
     Радуйтеся, души ваша за паству полагавшии;
     Pадуйтеся, посреде гонений благодатию Божиею хранимии.
     Радуйтеся, новомученицы и исповедницы Российстии, Церкве нашея похвало и украшение.

      Проповедует Церковь Российская подвиги ваша, преподобномученицы достославнии, поты трудов и кровию мучений землю нашу освятившии. Вы бо, слезами покаяния души ваша омывше, в жертву живую, благоприятную Господеви, себе предуготовили есте. Ныне же Ему дерзновенно предстоите и взываете победную песнь: Аллилуиа.

      Возсия свет Христов в сердцах ваших, преподобномученицы, вы бо, яко воини добропобеднии, молитву во всеоружие приемше, веры правыя никакоже отпали есте и, узы темничныя, мучения тяжкая и работы горькия претерпевше, лютую смерть от безбожных прияли есте. Сего ради прославляем вас сице:
     Радуйтеся, путь истиннаго Богопознания нам показавшии;
     Pадуйтеся, души ваша за Христа положившии.
     Радуйтеся, язвы Господа Иисуса Христа на телесех ваших носившии;
     Pадуйтеся, вся тленная мира сего презревшии.
     Радуйтеся, любовь Христову к мучителем явившии;
     Pадуйтеся, молитву за ненавидящих вас пролиявшии.
     Радуйтеся, велие дерзновение ко Господу стяжавшии;
     Pадуйтеся, подвиги постническими и кровию вашею землю Русскую освятившии.
     Радуйтеся, новомученицы и исповедницы Российстии, Церкве нашея похвало и украшение.

      Хотяще во дни гонений безбожных на Церковь Русскую веру твердую и любовь ко Господу сохранити, преподобноисповедницы честнии, поношения, заточения, изгнания и горькия работы, Христа ради претерпели есте. Таже, благочестно в мире поживше, многим путь ко спасению показали есте, научающе пети Богу победную песнь: Аллилуиа.

      Новыя исповедники показа вас Господь, преподобнии отцы наши, егда прииде испытати люди Своя, вас же, блаженнии, обрете рабы бдящия, смирением и добродетельми украшенныя. Сего ради прославляем вас сице:
     Радуйтеся, иго благое на рамена своя вземшии;
     Pадуйтеся, подвиги поста и молитвы просиявшии.
     Радуйтеся, мужество и крепость в страданиих явившии;
     Pадуйтеся, исповеданием вашим веру запечатлевшии.
     Радуйтеся, верность Христу в житии вашем сохранившии;
     Pадуйтеся, многия люди в вере правей наставившии.
     Радуйтеся, заповедей Христовых вернии исполнителие;
     Pадуйтеся, подвигов новомучеников истиннии свидетелие.
     Радуйтеся, новомученицы и исповедницы Российстии, Церкве нашея похвало и украшение.

      Странное чудо миру явисте, новомученицы Российстии, вы бо, во страдании крепость показавше, силою Христовою безбожныя одолесте и смертию вашею воскресение Христово проповедасте. Ныне же у Престола Божия предстоите и воспеваете победную песнь: Аллилуиа.

      Вся красная мира сего презревше, святии новомученицы Российстии, во след Господу крестным путем последовали есте и по заповеди евангельстей мзду многу на Небесех обрели есте. Сего ради приимите от нас похвалы сицевыя:
     Радуйтеся, вернии сыны Церкве Российския, безбожных гонителей не убоявшиися;
     Pадуйтеся, узы темничныя, труды горькия и изгнания претерпевшии.
     Радуйтеся, древним мучеником в страданиих уподобившиися;
     Pадуйтеся, талант, врученный вам Господем, терпением преумножившии.
     Радуйтеся, блаженство изгнанных правды ради верою достигшии;
     Pадуйтеся, кровию вашею Землю Русскую освятившии.
     Радуйтеся, страдании вашими образ верным подающии;
     Pадуйтеся, венцы нетленныя от Христа Бога приемшии.
     Радуйтеся, новомученицы и исповедницы Российстии, Церкве нашея похвало и украшение.

      Всяческая страдания за Христа претерпевше, исповедницы преславнии, веру Православную сохранили есте и, терпением гонители Церкве Русския посрамивше, благочестием в мире возсияли есте. Ныне же Престолу Божию предстоите и воспеваете хвалебную песнь: Аллилуиа.

      Ветии церковнии недоумевают како воспети вас по достоянию, новии исповедницы Церкве Русския, вы бо в скорбех, изгнаниих и заточениих Христа, истиннаго Бога, прославили есте и верным путь ко спасению указали есте. Мы же, прибегающе к молитвенному предстательству вашему, дерзаем ублажати вас сице:
     Радуйтеся, все упование на Бога возложившии;
     Pадуйтеся, подвиг исповедничества в терпении совершившии.
     Радуйтеся, мучителей безбожных не убоявшиися;
     Pадуйтеся, немощныя в вере укрепившии.
     Радуйтеся, работы горькия в сладость духовную восприемшии;
     Pадуйтеся, сердца ваша Богу в жертву принесшии.
     Радуйтеся, страданием души ваша очистившии;
     Pадуйтеся, житием святым образ верным показавшии.
     Радуйтеся, новомученицы и исповедницы Российстии, Церкве нашея похвало и украшение.

      Спасти хотя Господь множество жен и дев, во обители иноческия тыя призва. Во дни же гонений безбожных мужескую крепость им дарова, еже за имя Свое пострадати и терпением многим Царствия Небеснаго достигнути, да, яко мудрыя девы, в чертозе брачнем Христу Жениху воспевают песнь: Аллилуиа.

      Стена и помощь благонадежная бысть Богородица вам, святыя преподобныя жены, мученицы и исповедницы, в скорбех, изгнаниих и узах пребывающим. Вы бо любовию и труды людем страждущим, яко Самому Сыну Ея, послужисте. Темже с благодарением вас ублажаем:
     Радуйтеся, преподобномученицы, яко агницы непорочныя, за Христа закланныя;
     Pадуйтеся, преподобноисповедницы, яко голубицы чистыя, сетей врага избавльшияся.
     Радуйтеся, житейская попечения во иночестве отринувшия;
     Pадуйтеся, во страданиих Христу, яко мироносицы, последовавшия.
     Радуйтеся, гонений жестоких и смерти лютыя не убоявшияся;
     Pадуйтеся, в мучениих благодатию Божиею укрепляемыя.
     Радуйтеся, евангельски, яко Мария, благую часть избравшия;
     Pадуйтеся, яко Марфа Христу, ближним послужившия.
     Радуйтеся, новомученицы и исповедницы Российстии, Церкве нашея похвало и украшение.

      Пение всеумиленное приносим вам, новомученицы и исповедницы Российския, вы бо, благочестно в законе Господни поживши, веру Православную сохранили есте и смертию мученическою и терпением страданий за Христа гонители Церкве Русския посрамили есте. Ныне же, во Царствии Небеснем ликующи, воспеваете Богу победную песнь: Аллилуиа.

      Светом евангельским просвещенныя и заповеди Господни сохраншия, святыя жены и девы, добродетельное житие во дни гонений лютых страданием вольным увенчали есте и воистинну новыя мученицы и исповедницы явилися есте. Сего ради воспеваем вас сице:
     Радуйтеся, мученицы, любовию ко Христу страх смерти превозмогшия;
     Pадуйтеся, исповедницы, в страданиих за Христа веру и надежду соблюдшия.
     Радуйтеся, подвиги вашими Ангелы возвеселившия;
     Pадуйтеся, немощь естества женскаго словом Божиим препобедившия.
     Радуйтеся, Христовы заповеди житием и смертию исполнившия;
     Pадуйтеся, мудрости евангельских дев подражавшия.
     Радуйтеся, мужем своим в гонениих последовавшия;
     Pадуйтеся, ныне купно с ними венцы Небесными увенчанныя.
     Радуйтеся, новомученицы и исповедницы Российстии, Церкве нашея похвало и украшение.

      Благодатное утверждение Церкве нашея имамы вас, новомученицы и исповедницы Российстии. Вы бо, сердцем верующе в правду, усты же Господа Иисуса Христа во спасение исповедавше, заточения, изгнания, горькия работы и смерть претерпели есте. Ныне же молитеся ко Господу о нас, земных сродницех ваших, да присно с вами поем Богу: Аллилуиа.

      Поюще вашу небесную славу, страстотерпцы Христовы, лобызаем язвы ваша, вы бо, стопам древних мученик последующе, не уклонистеся скорби, ни убоястеся темницы, горькими работами, гладом и хладом изморени бысте и, многовидными муками умерщвляеми, яко агнцы незлобивии, веры ради пострадасте и смерть приясте. Темже приимите от нас похвалы сицевыя:
     Радуйтеся, святителие Христовы, добре Церковь управившии;
     Pадуйтеся, иереи Божии, души за паству полагавшии.
     Радуйтеся, царственнии страстотерпцы, от богоборных властей смерть и поругание приемшии;
     Pадуйтеся, благовернии князие и княгини, благочестие даже до смерти соблюдшии.
     Радуйтеся, преподобнии мужие, праведное житие венцем страдания увенчавшии;
     Pадуйтеся, преподобныя жены, крепость и мужество в страданиих явившия.
     Радуйтеся, вси православнии христиане, за пределами Отечества многоразличне пострадавшии;
     Pадуйтеся, вси ведомии и неведомии, Богом увенчаннии людие.
     Радуйтеся, новомученицы и исповедницы Российстии, Церкве нашея похвало и украшение.

      О, преславнии новомученицы и исповедницы Российстии! Приимите малое сие моление наше, в похвалу вам ныне приносимое, и молитеся ко Христу Богу, да укрепит в людех дух братолюбия и благочестия, да утвердит во Отечестве нашем веру Православную и сподобит нас купно с вами воспевати Ему: Аллилуиа.
      О, святии новомученицы и исповедницы Российстии: святителие и пастырие Церкве Христовы, царственнии страстотерпцы, благовернии князие и княгини, доблии воини, монаси и мирстии, благочестивии мужие и жены, во всяцем возрасте и сословии за Христа пострадавшии, верность Ему даже до смерти свидетельствовавшии и венец жизни от Него приемшии! Вы во дни гонения лютаго, землю нашу от безбожных постигшаго, на судищах, в заточениих и пропастех земных, в горьких работах и всяких скорбных обстояниих образ терпения и непостыднаго упования мужественне явили есте. Ныне же, в раи сладости наслаждающеся, пред Престолом Божиим во славе предстоите и присно хвалу и ходатайство со Ангелы и всеми святыми Триединому Богу возносите. Сего ради мы, недостойнии, молим вас, святии сродницы наши: не забудите земнаго Отечества вашего, грехом Каинова братоубийства, поруганием святынь, безбожием и нашими беззаконии отягченнаго. Умолите Господа Сил, да утвердит Церковь Свою непоколебиму в мире сем многомятежнем и лукавом; да возродит в Земли нашей дух братолюбия и мира; да паки будем мы царское священие, род Божий, избранный и святый, присно с вами славящий Отца и Сына и Святаго Духа во веки веков. Аминь.

      Днесь радостно ликует Церковь Русская, прославляющи новомученики и исповедники своя: святители и иереи, царственныя страстотерпцы, благоверныя князи и княгини, преподобныя мужы и жены и вся православныя христианы, во дни гонения безбожнаго жизнь свою за веру во Христа положившия и кровьми Истину соблюдшия. Тех предстательством, Долготерпеливе Господи, страну нашу в Православии сохрани до скончания века.

      Днесь новомученицы Российстии в ризах белых предстоят Агнцу Божию и со Ангелы песнь победную воспевают Богу: благословение, и слава, и премудрость, и хвала, и честь, и сила, и крепость нашему Богу во веки веков. Аминь.

      Величаем вас, святии новомученицы и исповедницы Российстии, и чтим честная страдания ваша, яже за Христа претерпели есте.