Вход

Изображения в галерее

327.jpg
71_4.jpg
803_68.jpg

АКАФИСТ святым царственным страстотерпцем (третий)


Икона святых царственных страстотерпцев. Дерево, левкас, темпера, золочение. Елоховский собор г. Москва.

Кондак 1
      Избраннии царственнии страстотерпцы, едина домашняя церковь Христова, Николае, Александро, Алексие, Ольго, Татиано, Марие и Анастасие, вы, союзом любве связуеми, яко агнцы, Христу Богу верою последовали есте и, в страданиих смерть претерпевше, Царствия Небеснаго наследницы явилися есте. Ныне же, дерзновение ко Господу имуще, молитеся о земнем Отечестве вашем, да прославляем вас сице:
     Радуйтеся, царственнии страстотерпцы, земли Российския хранителие и молитвенницы.

Икос 1
      Ангельскими силами укрепляеми во истиннем пути, седмочисленнии страстотерпцы, о житии праведнем и богоугоднем ревновали есте, да явите народу русскому образ благочестивых царей. Сего ради прославляем вас сице:
     Радуйтеся, страх Божий в сердце, яко основание, положившии;
     Pадуйтеся, премудрость Божию истинне возлюбившии.
     Радуйтеся, все упование на Бога возложившии;
     Pадуйтеся, Отечеству вашему верно послужившии.
     Радуйтеся, христианскаго благочестия твердое правило;
     Pадуйтеся, царственнаго рода Российскаго похвало.
     Радуйтеся, Православныя веры крепкое исповедание;
     Pадуйтеся, страждущаго народа нашего утешение.
     Радуйтеся, царственнии страстотерпцы, земли Российския хранителие и молитвенницы.

Кондак 2
      Видя Господь покаяние народа нашего, егда смутная времена насташа, умилосердися и яви милость Свою во избрании Михаила царя, егоже иконою Пречистыя Богородицы, Феодоровская именуемою, чрез родительницу благослови, да будет икона сия покров и защищение ему и всему новоизбранному царскому роду и во утверждение державы Российския. Сего ради благодарне вопием Богу: Аллилуиа.

Икос 2
      Разумеша людие Российстии, яко избранием на царство новаго рода благочестиваго, утиши Господь нестроения и смуты в Земли нашей, принесоша обет вернаго служения роду сему. Мы же, любви и ревности тех подражающе, к вам, царственнии страстотерпцы, яко наследником сего избрания со умилением вопием:
     Радуйтеся, венец и похвало рода царскаго и священнаго;
     Pадуйтеся, корене благочестиваго преславныя отрасли.
     Радуйтеся, Патриарха Российскаго Филарета святое прозябение;
     Pадуйтеся, попечению его о Церкве и Отечестве подражавшии.
     Радуйтеся, великия старицы инокини Марфы благословенное наследие;
     Pадуйтеся, покорность воли Божией от нея восприимшии.
     Радуйтеся, пред иконою Божия Матере Феодоровския молитвы присно возносившии;
     Pадуйтеся, все упование на помощь Богородицы с верою возлагавшии.
     Радуйтеся, царственнии страстотерпцы, земли Российския хранителие и молитвенницы.

Кондак 3
      Сила Божия и промышление Всевышняго явися в рождении твоем, царственный страстотерпче Николае, великаго бо святителя имя восприем, заступник Российския Земли показался еси. Многия же скорби и болезни, подобне Иову праведному, в житии претерпев, ныне с лики страстотерпцев наслаждаешися райскаго блаженства, воспевая Богу: Аллилуиа.

Икос 3
      Имея сугубыя заступники и покровители в рождении твоем: Иова многострадальнаго и Николаа чудотворца, державный страстотерпче, добродетелем тех последовал еси. Мы же, дивящеся промышлению Творца, во святых сих образ благочестия указавшаго ти, благоговейне воспеваем сице:
     Радуйся, в молитвах святителя Мир Ликийских присно призываяй;
     Pадуйся, помощию того Российскую Державу праведно окормляяй.
     Радуйся, образом кротости тому уподобивыйся;
     Pадуйся, милосердие многое, якоже оный, явивый.
     Радуйся, терпение Иовле в сердце твоем имевый;
     Pадуйся, верность Богу в житии твоем до конца сохранивый.
     Радуйся, в тяжких бедах, якоже оный, благодарение Богу приносивый;
     Pадуйся, вся находящая на тя со смирением приемый.
     Радуйтеся, царственнии страстотерпцы, земли Российския хранителие и молитвенницы.

Кондак 4
      Бурю смущения, воздвизаемую от человек безбожных в стране нашей, видя, страстотерпче Николае, не смутился еси в сердце твоем и, все упование на Бога возложив, не возроптал еси, егда отвергоша тя люди твоя; обаче с верою воспел еси Богу: Аллилуиа.

Икос 4
      Слыша о мятежех, болезнех и междоусобных бранех, нашедших на землю Русскую, во узах сый, страстотерпче царю Николае, моление о людех ея непрестанне приносил еси, милосердие Божие к ним призывая. Сего ради мы воспеваем тебе тако:
     Радуйся, от юности Отечество и народ твой возлюбивый;
     Pадуйся, яко и во отвержении любовь сию сохранивый.
     Радуйся, помазание на царство с благоговением приемый;
     Pадуйся, образ благочестиваго царя миру явивый.
     Радуйся, царский венец со смирением на ся возложивый;
     Pадуйся, венца страданий от Господа удостоенный.
     Радуйся, царское служение, яко послушание Богу, разумевый;
     Pадуйся, поношения, яко крест, вземый и с терпением понесый.
     Радуйтеся, царственнии страстотерпцы, земли Российския хранителие и молитвенницы.

Кондак 5
      Богосветлый светильник во мраце скорбей благоверней супружнице твоей явился еси, царственный страстотерпче Николае, указуя и возглавляя путь ея, якоже повеле Господь. Мы же, прославляюще ваш благословенный союз во Христе, хвалу Богу воздаем, поюще: Аллилуиа.

Икос 5
      Видя царственный страстотерпец юницу Александру, яко голубицу чисту, избра ю себе в благоверную супружницу, православную царицу и матерь народа Российскаго. Мы же, ведуще усердное служение ея, воспеваем сице:
     Радуйся, именитаго рода благочестивое прозябение;
     Pадуйся, от лютерския веры к Православию образе спасительнаго прехождения.
     Радуйся, всем сердцем молитву возлюбившая;
     Pадуйся, о службе Божией сердечно ревновавшая.
     Радуйся, словом Божиим и писанием святых отец себе наздавшая;
     Pадуйся, уставы церковныя благоговейне соблюдавшая.
     Радуйся, русское благочестие достойне восприемшая;
     Pадуйся, истинныя жизни во Христе приобщившаяся.
     Радуйтеся, царственнии страстотерпцы, земли Российския хранителие и молитвенницы.

Кондак 6
      Проповедует житие ваше брака святаго чистоту, благовернии Николае и Александро. Вы бо, благодать сего великаго таинства достойно восприемше, даже до мученическия кончины верность Христу и любовь друг ко другу сохранили есте, присно воспевающе Богу: Аллилуиа.

Икос 6
      Возсия в стране Российстей, яко прекрасная светила, благоверная царственная чета Николае и Александро, супрузи, соузом любве Христовы связуемии. Мы же, прославляюще образ их целомудреннаго и добронравнаго жития в мире сем, со благоговением воспеваем сице:
     Радуйтеся, всем сердцем Бога взыскавшии;
     Pадуйтеся, в путех Господних непорочно ходившии.
     Радуйтеся, двоице честная, свыше избранная;
     Pадуйтеся, двоице святая, славою и честию от Бога венчанная.
     Радуйтеся, целомудрие супружеское многочадием прославившии;
     Pадуйтеся, чада ваша, яко новосаждения масличная, окрест трапезы Небесныя собравшии.
     Радуйтеся, супруги, во благочестии и любви жити научающии;
     Pадуйтеся, мир Христов оным милостивно низпосылающии.
     Радуйтеся, царственнии страстотерпцы, земли Российския хранителие и молитвенницы.

Кондак 7
      Хотяще ваш дом благочестно устроити, любовь, яко основание, положили есте и брак честен добре соблюли есте, благовернии супрузи Николае и Александро. Темже и дщери ваша, яко мудрыя евангельския девы, воспитавше, в невесты Христу уготовали есте. С нимиже ныне вкупе воспеваете Богу: Аллилуиа.

Икос 7
      Новую милость дарова Господь народу русскому, целомудренныя дщери царственныя четы: Ольгу, Татиану, Марию и Анастасию. Тыя бо, женам мироносицам подражающия, елеем милосердия болящим и страждущим послужиша и смерть за Христа приемша, ныне Престолу Божию предстоят. Сего ради прославляем их сице:
     Радуйтеся, дщери царевы, обетований Божиих сподобльшияся;
     Pадуйтеся, заповедь Божию о почитании родителей соблюдшия.
     Радуйтеся, достоинство царственное свято сохраншия;
     Pадуйтеся, стихиями мира сего не порабощенныя.
     Радуйтеся, людем, сущим в бедах и скорбех, яко Христу, послужившия;
     Pадуйтеся, за врагов своих усердно молившияся.
     Радуйтеся, агницы непорочныя, в жертву Богу себе принесшия;
     Pадуйтеся, невесты Христовы, в чертозех Жениха Небеснаго пребывающия.
     Радуйтеся, царственнии страстотерпцы, земли Российския хранителие и молитвенницы.

Кондак 8
      Странно и чудно бысть рождение твое, святый царевичу Алексие. Плод бо благославен молитв Саровскаго чудотворца и чаемый наследник царственных родителей быв, слава, надежда и упование явился еси всем концем земли нашея. Сего ради людие российстии с радостию благодарственно воспеша Богу: Аллилуиа.

Икос 8
      К вышним душею чистою устремляяся, святый царевичу Алексие, измлада болезнь, яко крест от Господа данный, безропотно понесл еси, последи же, яко агнец незлобивый, руками злочестивых убиен, молитвенник пред Богом явился еси. Сего ради воспеваем ти сице:
     Радуйся, отроча, от утробы матере Богом предъизбранное;
     Pадуйся, чадо, молитвами Саровскаго чудотворца России дарованное.
     Радуйся, страдальче, измлада скорби и недуги безропотно понесый;
     Pадуйся, царевичу, в болезнех сострадание к людем обретый.
     Радуйся, наследниче, лишение царства земнаго со смирением приемый;
     Pадуйся, страстотерпче, Царствия Небеснаго от Бога удостоенный.
     Радуйся, агнче незлобиве, от безбожных закланный;
     Pадуйся, царственный отроче, венцем нетленным от Царя царствующих увенчанный.
     Радуйтеся, царственнии страстотерпцы, земли Российския хранителие и молитвенницы.

Кондак 9
      Всяк ум человеческий смутися, егда в земли нашей беззаконие умножися, истина помрачися и мерзость запустения на месте святем ста. Ты же, царю Николае, изгнание, поругание и темничное заточение мужественне претерпев, сын верный Святыя Церкве и страстотерпец Христов явился еси. Сего ради Церковь Русская, прославляющи тя, Богу вопиет: Аллилуиа.

Икос 9
      Ветии зломудреннии тщашася оболгати тя клеветою, помазанниче Божий Николае, ты же, евангельски вся терпя, о благочестии народа православнаго попечение сугубое прилагал еси. Сего ради, память твою светло празднующе, воспеваем ти сице:
     Радуйся, прославления угодников Божиих добрый рачителю;
     Pадуйся, пастыря Кронштадтскаго благоговейный почитателю.
     Радуйся, Саровских торжеств державный возглавителю;
     Pадуйся, иноческих обителей благочестивый покровителю.
     Радуйся, духовных вертоградов усердный попечителю;
     Pадуйся, православных храмов боголюбивый здателю.
     Радуйся, Святыя Земли и Афонския Горы щедрый благотворителю;
     Pадуйся, устроения Церкве Русския мудрый ревнителю.
     Радуйтеся, царственнии страстотерпцы, земли Российския хранителие и молитвенницы.

Кондак 10
      Спасти хотя люди Российския от розни братоубийственныя, царю Николае, престол земный оставил еси, обаче, на милость Божию уповая, непоколебимь в вере и благочестии пребыл еси, воспевая: Аллилуиа.

Икос 10
      Стена и ограждение бысть Господь тебе, царю Николае, Ему же тепле молился еси, да сохранит державу Российскую от нашествия иноплеменник и братоубийственныя брани, наипаче же люди православныя во благочестии да укрепит. Сего ради благодарне воспеваем ти сице:
     Радуйся, полков Российских мудрый предводителю;
     Pадуйся, ратных людей христолюбивый попечителю.
     Радуйся, Отечества нашего державный хранителю;
     Pадуйся, словенских народов ревностный защитителю.
     Радуйся, мечи на орала прековати народы призвавый;
     Pадуйся, мир имети со всеми языки преискренне желавый.
     Радуйся, благоверным князем в благочестии подражавый;
     Pадуйся, образ царя православнаго во смирении миру явивый.
     Радуйтеся, царственнии страстотерпцы, земли Российския хранителие и молитвенницы.

Кондак 11
      Пения всякаго достойна память ваша, святии царственнии страстотерпцы. Вы бо, образ исповедничества и ревности по Бозе верным людем показавше, заповедасте не мстити злодеющим, паче же прощати гонящим и молитву творити за них, поюще Богу: Аллилуиа.

Икос 11
      Светоносный светильник седмочисленный вемы вас, святии царственнии страстотерпцы, царским бо путем шествующе, уготовасте себе за Христа пострадати. Темже, просветите омраченная сердца наша и евангельским путем шествовати научите нас, прославляющих вас сице:
     Радуйтеся, агнцы незлобивии, Агнцу Божию в кротости подражавшии;
     Pадуйтеся, образ терпения в злостраданиих верным показавшии.
     Радуйтеся, во всем житии совесть чисту хранившии;
     Pадуйтеся, убиение беззаконное смиренно восприемшии.
     Радуйтеся, седмочисленнии страстотерпцы, во едином дусе Богу представшии;
     Pадуйтеся, кровию мученическою землю нашу обагрившии.
     Радуйтеся, лик благоверных царей и князей восполнившии;
     Pадуйтеся, собор святых земли Российския украсившии.
     Радуйтеся, царственнии страстотерпцы, земли Российския хранителие и молитвенницы.

Кондак 12
      Благодать изрядну Бог дарова Церкве Российстей, прославив вас на Небеси, царственнии страстотерпцы, хранителие и покровителие страны нашея. Сего ради и мы на земли почитаем вас, Богу вопиюще: Аллилуиа.

Икос 12
      Воспевающе подвиги ваша, царственнии страстотерпцы, прославляем Триединаго Бога. Вы бо соизволением Отца Безначальнаго, совершением Сына Единороднаго и содействием Святаго Духа Божия причастницы Царствия Небеснаго соделастеся и заступницы Отечества нашего явистеся. Сего ради дерзаем взывати вам сице:
     Радуйтеся, яко прославлению вашему Церковь радуется;
     Pадуйтеся, яко чудесы вашими вера укрепляется.
     Радуйтеся, яко образы ваши мироточением прославляются;
     Pадуйтеся, яко в честь вашу храмы созидаются.
     Радуйтеся, яко житием вашим люди благочестию научаются.
     Pадуйтеся, яко терпением вашим во страданиих вернии назидаются;
     Радуйтеся, яко евангельския заветы исполняти нас наставляете;
     Pадуйтеся, яко беды и скорби мужественне нести нам помогаете.
     Радуйтеся, царственнии страстотерпцы, земли Российския хранителие и молитвенницы.

Кондак 13
      О, святии царственнии страстотерпцы! Приимите от нас похвальное сие пение и милостивым вашим ходатайством умолите Царя Славы мир стране нашей даровати, Церковь в Православии и единстве сохранити, нас же во благочестии утвердити, да вопием Богу: Аллилуиа.
Этот кондак читается трижды, затем икос 1-й и кондак 1-й

Молитва святым царственным страстотерпцем
      О, святая седмерице, царственнии страстотерпцы, Николае, Александро, Алексие, Марие, Ольго, Татиано и Анастасие! Вы, союзом любве Христовы связуеми, дом ваш, яко малую церковь, благочестно устроили есте и смирением себе посреде земнаго величия украсили есте. В годину же братоубийственныя брани и гонений безбожных во Отечестве нашем, все упование на Бога возложивше, образ терпения и страдания всей земли Российстей явили есте и, молящеся о мучителех, клевету, узы и изгнание, глумление, насмеяние и оболгание, убиение и телес поругание мужественне претерпели есте. Сего ради от земнаго царствия к Небесному прешли есте и теплии ходатаи о нас явилися есте. О, святии угодницы Божии! Молитеся о нас Богу, да Церковь в единомыслии и твердей вере соблюдет, страну нашу миром и благоденствием оградит и от междоусобныя брани и разделения избавит, власть предержащую умудрит, воинство мужеством украсит, народ от разорения сохранит, супруги христианския в верности и любви укрепит, чада в благочестии и послушании возрастит, и вся ны купно с вами сподобит воспевати Пречестное и Великолепое имя Живоначальныя Троицы Отца и Сына и Святаго Духа ныне и присно и во веки веков. Аминь.

Молитва иная страстотерпцу царю Николаю
      О, святый страстотерпче, царю мучениче Николае! Господь тя избра помазанника Своего, во еже милостивно и право судити людем твоим и хранителем Церкве Православныя быти. Сего ради со страхом Божиим царское служение и о душах попечение совершал еси. Господь же, испытуя тя, яко Иова Многострадальнаго, попусти тебе поношения, скорби горькия, измену, предательство, ближних отчуждение, и в душевных муках земнаго царства оставление. Вся сия ради блага России, яко верный сын ея, претерпев и, яко истинный раб Христов, мученическую кончину прием, Небеснаго Царства достигл еси, идеже наслаждаешися Вышния славы у Престола всех Царя, купно со святою супружницею твоею, царицею Александрою, и царственными чады Алексием, Ольгою, Татианою, Мариею и Анастасиею. Ныне, имея дерзновение велие у Христа Царя, моли, да простит Господь грех отступления народа нашего и подаст грехов прощение и на всякую добродетель наставит нас, да стяжим смирение, кротость и любовь, и сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.

Тропарь благоверному императору Российскому, страстотерпцу, Николаю II и иже с ним убиенным
Тропарь, глас 5:
      Царства земнаго лишение, узы и страдания многоразличныя, кротко претерпел еси, свидетельствовав о Христе, даже до смерти от богоборцев, страстотерпче великий Боговенчанный царю Николае, сего ради мученическим венцем на Небесех венча тя с царицею, и чады, и слуги твоими Христос Бог, Егоже моли помиловати страну Российскую и спасти души наша.

Тропарь, глас 4:
      Днесь благовернии людие, светло почтим седмерицу честную царственных страстотерпец, Христову едину домашнюю церковь: Николая и Александру, Алексия, Ольгу, Татиану, Марию и Анастасию. Тии бо, уз и страданий многоразличных не убоявшеся, от богоборных смерть и поругание телес прияша и дерзновение ко Господу в молитве улучиша. Сего ради к ним с любовию возопиим: о святии страстотерпцы, гласу покаяния и стенанию народа нашего вонмите, землю Российскую в любви к Православию утвердите, от междоусобныя брани сохраните, мир мирови у Бога испросите и душам нашим велию милость.

Кондак, глас 3:
      Мирликийскому предстателю, благоверный царю, подражатель показался еси, Христово бо Евангелие исполнив. Положил еси душу твою за люди твоя и спасл еси повинныя, паче же неповинныя от смерти, сих ради мученническою кровию освятился еси, яко великомученик Церкве Христовы.

Ин кондак, глас 6:
      Надеждо царя мученика с царицею, и чады, и слуги укрепи, и к Твоей любве окрыли, будущий им покой предвозвестивши, тех молитвами, Господи, помилуй нас.

Ин кондак, глас 8:
      Избраннии Царем царствующих и Господем господствующих от рода царей Российских, благовернии мученицы, муки душевныя и смерть телесную за Христа приимшии и венцы небесными увенчавшиися, к вам, яко покровителем нашим милостивым, с любовию благодарне вопием: радуйтеся, царственнии страстотерпцы, за Русь Святую пред Богом усерднии молитвенницы.

Величание
      Величаем вас, седмерицу честную царственных страстотерпец: Николае и Александро, Алексие, Ольго, Татиано, Марие и Анастасие, и чтим святую память вашу, вы бо молите за нас Христа Бога нашего.

Память 4/17 июля

Житие святых Царственных Страстотерпцев Царя Николая и его семьи

АКАФИСТ святым царственным страстотерпцем императору Николаю II и его семье

АКАФИСТ святым царственным страстотерпцем императору Николаю II и его семье (иной)

АКАФИСТ святому Царю-мученику Николаю

АКАФИСТ царю и страстотерпцу Николаю (иной)

АКАФИСТ святой благоверной Царице-мученице Александре

АКАФИСТ святой великомученице благоверной царице Александре (иной)

АКАФИСТ святому великомученику благоверному царевичу Алексию

АКАФИСТ святой преподобномученице великой княгине Елисавете

Православный календарь

Ноябрь 2017
Пн Вт Ср Чт Пт Сб Вс
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.