Вход

Изображения в галерее

836_41.jpg
834_69.jpg
813_41.jpg

Главная

АКАФИСТ Пресвятей Богородице, ради иконы Ея, именуемыя «Смоленская»


Образ Пресвятой Богородицы Смоленская. 11х13 см. Современная икона.

Кондак 1
      Избранней от всех родов Царице и Богородице, теплей нашей Заступнице и усердней пред Богом Молитвеннице, благодарственное воспеваем пение. Ты же, всемилостивая Мати и верная Наставнице, от всяких нас бед свободи, с верою и любовию зовущих:
     Радуйся, Богородице Одигитрие, христиан упование.

Икос 1
      Архангельский глас вопием Ти, Чистая: радуйся, Благодатная, Господь с Тобою. И нас исполни радости духовныя, да умиленною душею и чистым сердцем принесем Ти, рождшей миру Спасителя Христа Бога нашего, похвалы сия:
     Радуйся, Бога Отца благоволением осененная;
     Pадуйся, Бога Сына Мати Неискусобрачная.
     Радуйся, Бога Духа Святаго обитель священная;
     Pадуйся, тайны Пресвятыя Троицы проявление.
     Радуйся, ангельских умов удивление;
     Pадуйся, человеческаго рода украшение.
     Радуйся, горняя с дольними совокупившая;
     Pадуйся, врата райская земнородным отверзшая.
     Радуйся, радости вечныя Ходатаице;
     Pадуйся, благословения Источниче.
     Радуйся, древния клятвы разрешение;
     Pадуйся, прародителей избавление.
     Радуйся, Богородице Одигитрие, христиан упование.

Кондак 2
      Видевши Всесвятая Дева пречистаго лика Своего изображение, егоже евангелист Лука написа, рече: благодать Сына Моего и Моя с сею иконою да пребудут. Таковое обетование Твое ведуще, почитаем образ Твой, Владычице, зовуще Богу: Аллилуиа.

Икос 2
      Уразумев благоволение Твое, Богородице, к первописанней иконе Твоей, славный апостол Лука дарова ю в благословение и освящение Церкве Антиохийстей, идеже вернии воспеша Ти сицевая:
     Радуйся, огнеобразная колеснице Слова;
     Pадуйся, преукрашенная божественною славою.
     Радуйся, Небес пространнейшая;
     Pадуйся, яко носиши Носящаго вся.
     Радуйся, лествице небесная;
     Pадуйся, одушевленный раю.
     Радуйся, Божества приятелище;
     Pадуйся, промышления Его сокровище.
     Радуйся, светильниче светозарный;
     Pадуйся, престоле превознесенный.
     Радуйся, вертограде Христов благоуханный;
     Pадуйся, чертоже Царя великаго.
     Радуйся, Богородице Одигитрие, христиан упование.

Кондак 3
      Силою Божиею чудеса предивная совершахуся от иконы Твоея, Богомати Владычице, егда пренесена бысть в Царьград. Вси бо, с верою к Тебе притекающии и вспоможения просящии, исцеления и помощь получаху, в радости поюще Богу: Аллилуиа.

Икос 3
      Имущи благоутробие щедрот и милосердия пучину неизчетную, явилася еси, Пречистая, двум слепцем и во Влахернскую церковь тещи повелела еси, идеже очи их отверзошася. Тии же, улучивше исцеление, в радости возопиша:
     Радуйся, свеще неугасимая;
     Pадуйся, звездо незаходимая.
     Радуйся, божественною славою сияющая;
     Pадуйся, души верных просвещающая.
     Радуйся, слепых Путеводительнице;
     Pадуйся, заблуждших Наставнице.
     Радуйся, тьму неведения разрушившая;
     Pадуйся, мрачныя бесы отгнавшая.
     Радуйся, немощных укрепление;
     Pадуйся, недугов исцеление.
     Радуйся, скорое в бедах избавление;
     Pадуйся, готовое скорбящих утешение.
     Радуйся, Богородице Одигитрие, христиан упование.

Кондак 4
      Бурею морскою сокрушила еси, Владычице, корабли иноплеменник, град Твой пленити восхотевших, и победы воинству христолюбивому даровала еси. Темже людие прославиша Тя, Одигитрие, яко крепость державную Царьграда, и воспеша Богу: Аллилуиа.

Икос 4
      Слышание чудес Твоих, Владычице, укрепи верныя, егда нечестие иконоборцев посрамила еси и по мнозех летех икону Твою, в стене церковней сокрытую, невредиму явила еси. Мы же, дивящеся Твоему смотрению, глаголем:
     Радуйся, Царьграда крепкое ограждение;
     Pадуйся, храмов Божиих украшение.
     Радуйся, иноплеменных ратей одоление;
     Pадуйся, врагов Православия посрамление.
     Радуйся, иконоборства бурю укротившая;
     Pадуйся, правую веру утвердившая.
     Радуйся, Воеводо добропобедная;
     Pадуйся, славо православных честная.
     Радуйся, царей благоверных похвало;
     Pадуйся, святителей богомудрых проповедание.
     Радуйся, прибежище верных;
     Pадуйся, Заступнице уповающих на Тя.
     Радуйся, Богородице Одигитрие, христиан упование.

Кондак 5
      Яко боготечная звезда, икона Твоя, Владычице, благоволением Твоим от Царьграда в Землю Русскую пренесеся и граду Смоленску в наследие даровася; таковому промышлению о нас радующеся, вопием в Троице славимому Богу: Аллилуиа.

Икос 5
      Видеша российстии людие досточудный и многоцелебный образ Девы Пречистыя и, всесвятую Одигитрию Земли Русския разумевающе, потщашася во имя Ея церкви многи воздвигнути и возопити Преблагословенней:
     Радуйся, Царице горних и дольних;
     Pадуйся, Владычице ангелов и человеков.
     Радуйся, мира умирение;
     Pадуйся, древния вражды разрушение.
     Радуйся, освящение градов и весей;
     Pадуйся, забрало Русския земли.
     Радуйся, от междоусобныя брани избавляющая;
     Pадуйся, к братолюбию наставляющая.
     Радуйся, Еюже отгонится рыдание;
     Pадуйся, Еюже приносится радование.
     Радуйся, благоотишное пристанище;
     Pадуйся, всему миру предивный Покрове.
     Радуйся, Богородице Одигитрие, христиан упование.

Кондак 6
      Повеление Богоматере исполняя, непобедимь явися воин Меркурий, егда, ранами своими венец мученический прием, воеводу рати Батыевы порази и град Смоленск от нашествия иноплеменник избави, не ведущих пети: Аллилуиа.

Икос 6
      Возсия во граде Смоленске просвещение Божественных чудес Твоих, Богородице Одигитрие, и отгнася сила вражия, полцы же агарянстии, не терпяще Твоея крепости, бежаша; сих же избавльшиися вопияху Тебе таковая:
     Радуйся, чудо чудесем Одигитрие;
     Pадуйся, всех радостей Радосте.
     Радуйся, утешение в скорбех;
     Pадуйся, хранилище в бедах.
     Радуйся, страстотерпцев венчание;
     Pадуйся, воинов непобедимая дерзосте.
     Радуйся, варварскаго пленения свобождающая;
     Pадуйся, безпомощным помощь подающая.
     Радуйся, Еюже воздвижутся победы;
     Pадуйся, Еюже низпадают врази.
     Радуйся, земли нашея священное ограждение;
     Pадуйся, града Смоленска крепкое защищение.
     Радуйся, Богородице Одигитрие, христиан упование.

Кондак 7
      Хотящи престольному граду благословение даровати, благоволила еси, Владычице, иконе Твоей от Смоленска во град Москву пренестися, идеже князие, святителие, монаси и простии познаша Тя, Всесвятую Путеводительницу, и, дивящеся чудесем Твоим, возопиша Богу: Аллилуиа.

Икос 7
      Новую милость явила еси, Всепетая Одигитрие, егда, по мнозех летех во град Смоленск возвратившися, московским людем подобие честнаго образа Твоего оставила еси, да видяще его, воспевают Ти сице:
     Радуйся, Света Невечерняго жилище;
     Pадуйся, Солнца Незаходимаго Мати.
     Радуйся, облаче, росу благодати источающий;
     Pадуйся, сосуде, миро благовонное изливающий.
     Радуйся, луче пресветлая;
     Pадуйся, заре немерцающая.
     Радуйся, Сиона горняго украшение;
     Pадуйся, мира дольняго защищение.
     Радуйся, землю Русскую прехождением Твоим освятившая;
     Pадуйся, возвращением Твоим град Смоленск возвеселившая.
     Радуйся, град Москву возлюбившая;
     Pадуйся, людем его благословение даровавшая.
     Радуйся, Богородице Одигитрие, христиан упование.

Кондак 8
      Странное отшествие образа Твоего, Владычице, во град Смоленск видевше, московстии собори дивляхуся и плача исполняхуся, глаголюще: камо идеши Дево? Обаче, уразумевше благоволение Твое, еже покрывати православныя люди, сущия под властию иноверных, возопиша Богу: Аллилуиа.

Икос 8
      Вся милости и щедрот преисполнена, Всеблагая Богородице Дево, град Смоленск Земли Русской возвратила еси, молитву великаго князя Василия услышавши. Той же во граде Москве обитель нову во имя Твое постави и лик девственных собра, да радующеся воспевают:
     Радуйся, обрадованная Приснодево;
     Pадуйся, Невесто неневестная.
     Радуйся, селение Бога Слова;
     Pадуйся, святая святых большая.
     Радуйся, земле ненасеянная;
     Pадуйся, горо несекомая.
     Радуйся, крине райскаго прозябения;
     Pадуйся, цвете божественнаго саждения.
     Радуйся, чистая голубице;
     Pадуйся, нескверная агнице.
     Радуйся, девственная славо;
     Pадуйся, преподобных похвало.
     Радуйся, Богородице Одигитрие, христиан упование.

Кондак 9
      Вся земля Русская о Тебе, Одигитрие, хвалится и веселится, обитель Твоя светло красуется, лицы иночестии с преподобною Еленою славят имя Твое. Темже и мы молимся Тебе, Владычице: украси души наша целомудрием и чистотою и научи неосужденно пети ангельскую песнь: Аллилуиа.

Икос 9
      Витии многовещаннии не могут достойно прославити чудеса Твоя, Всесвятая Одигитрие, яже от лет древних и до днесь являеши всем, с верою и любовию к Тебе приходящим. Темже молим Тя: даждь нам слово разума, ублажающим Тя похвалы сицевыми:
     Радуйся, праотцев надеждо;
     Pадуйся, пророков исполнение.
     Радуйся, ковчеже спасения;
     Pадуйся, всего мира очищение.
     Радуйся, жезле старости;
     Pадуйся, вдов и сирот утешение.
     Радуйся, алчущих Питательнице;
     Pадуйся, обидимых Заступнице.
     Радуйся, печальных Отрадо;
     Pадуйся, ненадеждных Надеждо.
     Радуйся, пространство благостыни;
     Pадуйся, неисчерпаемое море щедрот.
     Радуйся, Богородице Одигитрие, христиан упование.

Кондак 10
      Спасти хотящи землю Русскую, Владычице, от нахождения галлов, даровала еси икону Твою Одигитрию воинству христолюбивому в щит и ограждение. Мы же, ведуще Тя, Заступницу непобедимую, прославляем милости Твоя и чудеса, воспевающе Спасителю Богу: Аллилуиа.

Икос 10
      Стена нерушимая явилася еси земли нашея, Владычице, егда иноплеменницы восхотеша ю пленити и веру Православную погубити. Ты же, неистовство их укротивши, верным людем одоление на враги даровала еси и град Москву свободила еси. Темже восхваляем Тя сице:
     Радуйся, земли нашея державная Хранительнице;
     Pадуйся, града Москвы всемощная Заступнице.
     Радуйся, нашествия вражия нас избавльшая;
     Pадуйся, от пленения град наш свободившая.
     Радуйся, злочестивых шатание низложившая;
     Pадуйся, всю крепость их сокрушившая.
     Радуйся, Предводительнице воинств христианских;
     Pадуйся, едина Предстательнице верных.
     Радуйся, из рова погибели возводящая;
     Pадуйся, нечаянную радость дарующая.
     Радуйся, Судии Праведнаго умоление;
     Pадуйся, грешных с Богом примирение.
     Радуйся, Богородице Одигитрие, христиан упование.

Кондак 11
      Пение всеумиленное, Пресвятая Владычице, днесь приносит Ти обитель Московская. Ты бо издревле божественным Твоим покровом соблюдаше ю от разорения и огненнаго запаления, да ревнительницы девства и чистоты вкупе со всеми чтущими Тя, возсылают хвалебную песнь Богу: Аллилуиа.

Икос 11
      Неопалимую купину, якоже древле Моисей, разумеем Тя, Святая Дево, Ты бо, обитель Твою от нахождения вражия и запаления невредиму сохранивши, иноверных вспять обратила еси. Темже лик девический, спасение улучив, принесе Ти похвалы сицевыя:
     Радуйся, купино неопалимая;
     Pадуйся, руно орошенное.
     Радуйся, стамно Богоприимная;
     Pадуйся, Хлеба животнаго трапезо пресвятая.
     Радуйся, чаше, питие истинное подающая;
     Pадуйся, купеле, всякую скверну очищающая.
     Радуйся, столпе огненный, мрак грехов отгоняющий;
     Pадуйся, столпе облачный, зной страстей прохлаждающий.
     Радуйся, реко нетления;
     Pадуйся, вечнаго огня свобождение.
     Радуйся, добрая Младопитательнице девам;
     Pадуйся, обители Твоей покрове и снабдение.
     Радуйся, Богородице Одигитрие, христиан упование.

Кондак 12
      Благодать Божественная, немощная врачующи и оскудевающия восполняющи, невредиму сохрани обитель Твою, Богомати, егда тщахуся безумнии богоборцы ю осквернити и храмы Божии поруганию предати. Ныне же в ней, Владычице, Покровом Твоим осеняеми, пастырие Христовы благодать священства улучают, лицы иночестии, яко Матерь свою Тя прославляют, вопиюще Богу: Аллилуиа.

Икос 12
      Поюще Твоя чудеса, Богородице, и припадающе к чудотворней иконе Твоей, молимтися с верою и любовию: буди нам Путеводительница благая к светлому граду Иерусалиму Небесному, да узрим Тя в славе Божественней и вкупе со святыми воспоем сице:
     Радуйся, Царице наша Преблагая;
     Pадуйся, Владычице Пренепорочная.
     Радуйся, едина благословенная в женах;
     Pадуйся, Небесных радование.
     Радуйся, лукавых духов отгонительнице;
     Pадуйся, богопротивных советов разорительнице.
     Радуйся, премудрых разум превосходящая;
     Pадуйся, верных смыслы озаряющая.
     Радуйся, ключу Царствия Христова;
     Pадуйся, надеждо благ вечных.
     Радуйся, милости источниче;
     Pадуйся, мирови прибежище.
     Радуйся, Богородице Одигитрие, христиан упование.

Кондак 13
      О, Всепетая Мати, Царице Всемилостивая, Дево Богородице Одигитрие, нынешнее приемши приношение, от всякия избави напасти всех и к Царствию Небесному путеводствуй, вопиющих Ти: Аллилуиа.
Этот кондак читается трижды, затем икос 1-й и кондак 1-й

Молитва Пресвятей Богородице, пред иконою Ея Смоленскою
      О, пречудная Царице Богородице, Небеснаго Царя Христа Бога нашего Мати, Пречистая Одигитрие Марие! Услыши ны, грешныя и недостойныя, в час сей молящияся, и со слезами пред пречистым образом Твоим припадающия. Изведи нас от рова страстей, Одигитрие благая, избави нас от скорби и печали, огради от злыя клеветы и навета вражия. Можеши бо, о, Благодатная Мати наша, от всякаго зла сохранити люди Твоя и всяким благодеянием снабдити и спасти. Разве Тебе иныя Предстательницы и теплыя Ходатаицы о нас, грешных, к Сыну Твоему и Богу нашему не имамы. Егоже умоли, Владычице, спасти нас и Царствия Небеснаго сподобити, да спасеннии славим Тя, яко спасения нашего Виновницу, и превозносим всесвятое и великолепое имя Отца и Сына и Святаго Духа, в Троице славимаго и покланяемаго Бога, во веки веков. Аминь.

Тропарь Пресвятой Богородице перед Ея иконой, именуемой «Одигитрия»
Тропарь, глас 4:
      К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Кондак, глас 6:
      Предстательство христиан непостыдное, ходатайство ко Творцу непреложное, не презри грешных молений гласы, но предвари яко благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих тя.

Ин кондак, глас 6:
      Не имамы иныя помощи, не имамы иныя надежды, разве Тебе, Владычице: Ты нам помози, на Тебя надеемся и Тобою хвалимся: Твои бы есмы раби, да не постыдимся.

Слава, и ныне, Богородичен
      Не умолчим никогда, Богородице, силы Твоя глаголати, недостойнии. Аще бо Ты не бы предстояла молящи, кто бы нас избавил от толиких бед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.


Православный календарь

Август 2018
Пн Вт Ср Чт Пт Сб Вс
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.