Вход

Изображения в галерее

835_99.jpg
824_18.jpg
807_38.jpg

АКАФИСТ Пресвятой Богородице пред иконою Ея «Колочская»


Икона Божией Матери 
«Колочская». 1897 год. Москва. Дерево, левкас, темпера. 47,5х33,7 см. Внизу золотом надпись «явленная и чюдотворная икона б(о)жия матери колочския. яже  явися на месте, колоча зовомом, на древе, земледельцу  луке, в уделе можайском, при благоверном кня(зе) андрее.  в лето от рож(де)ства хр(ис)т(о)ва в [1413] е и быша от сея с(вя)тыя иконы  знамения велия. неоскудно подаваемыя досего дне». На обороте «сия икона  построена усердием  жителей города Можайска 1897 года июля 9 дня». Верху Троица Ветхозаветная, по сторонам Иоанн Предтеча и Симеон Богоприимец. По сторонам Богородицы Одигитрия Николай Чудотворец и Илия Пророк, внизу Авраамий Смоленский и Пафнутий Боровский, в медальонах вселенские святители Василий Великий, Иоанн Златоуст и Григорий Богослов. ЦАК МПДА.

Кондак 1
      Взбранной Воеводе, Заступнице нашей, хранящей от бед землю Можайскую, благоговейное пение приносим Ти, недостойнии раби Твои, Богородице. Ты же, непрестанною молитвою мир спасающая, сохрани нас от всяких напастей, да зовем Ти:
     Радуйся, Благодатная, Ангелов и человеков Радование.

Икос 1
      Ангелов Царице и Небесных Сил Госпожа яви древле на Колочи святую икону Свою. Людие же, о обретении чуднем дивящеся, возрадовашася зело и возопиша Преблагословенней:
     Радуйся, Палато Бога и Царя облагоуханная;
     Pадуйся, Горо, Духом Святым преосененная.
     Радуйся, Тайно Боговоплощения неизреченная;
     Pадуйся, Ниво неоранная, Богом возделанная.
     Радуйся, хлеб жизни, Христа, израстившая;
     Pадуйся, Стамно, манну небесную носившая.
     Радуйся, Надеждо нашего спасения;
     Pадуйся, Лествице божественнаго схождения.
     Радуйся, Благодатная, Ангелов и человеков Радование.

Кондак 2
      Видя разслабленный икону Твою, Богомати, милостивно явленную, с верою той припаде и, благоговейно ю облобызав и здравие улучив, с радостию возопи Богу: Аллилуиа.

Икос 2
      Разум человеческий не может, Владычице, постигнути силу благодатных исцелений от иконы Твоея Колочския явленных: како слепии прозираху, глусии слух обретаху, разслабленнии исцеляхуся и многия, недуги душевными и телесными одержимии, здравие улучаху. Сего ради прославляем Тя сице:
     Радуйся, Мати наша милосердная;
     Pадуйся, Заступнице усердная.
     Радуйся, болящих скорое исцеление;
     Pадуйся, немощных всесильное укрепление.
     Радуйся, сердца наша очищающая;
     Pадуйся, печали утоляющая.
     Радуйся, недужных безмездное врачевание;
     Pадуйся, жизни вечныя упование.
     Радуйся, Благодатная, Ангелов и человеков Радование.

Кондак 3
      Сила многоцелебная исхождаше от иконы Твоея, Владычице, егда во град Можайск со благоговением на поклонение изнесеся. Вернии же людие, с трепетом припадающе пред тою, прославляху Тя и Сына Твоего, поюще хвалебную песнь: Аллилуиа.

Икос 3
      Имущи издревле попечение о пределех Отечества нашего, Богородице Царице, благоволила еси и стольный град Москву освятити дивным пришествием иконы Твоея, юже сретоша со славою великою князи и боляре и вси христолюбивии людие, похвалы приносяще Ти сицевыя:
     Радуйся, земли Русския небесная Покровительнице;
     Pадуйся, к горнему Отечеству верная Путеводительнице.
     Радуйся, избавляющая от всякаго вражия обстояния;
     Pадуйся, крепкое о нас пред Богом предстояние.
     Радуйся, ко благочестию наша Наставнице;
     Pадуйся, телес наших скорая Целительнице.
     Радуйся, всем земнородным Прибежище и Оградо;
     Pадуйся, христолюбивым людем Нерушимая Стено.
     Радуйся, Благодатная, Ангелов и человеков Радование.

Кондак 4
      Бурею многих скорбей обдержимии, людие московстии ко образу Твоему святому, Богородице, со упованием притекаху, милостивно бо приемлеши прошения верных и молишися за всех, с верою имя Твое призывающих, Сыну же Твоему и Богу нашему зовущих: Аллилуиа.

Икос 4
      Слышав благоверный князь Андрей Можайский о благодеяниих Богоматере, со умилением пред иконою Ея взываше: О, Державная наша Помощнице, Воеводо Великая и Надеждо всем христианом! Не остави нас, на Тя уповающих. Мы же, ведуще Тя, яко теплую нашу Заступницу, вопием сице:
     Радуйся, милосердая Мати, от погибели грешных избавляющая;
     Pадуйся, благая Владычице, на путь правый тех наставляющая.
     Радуйся, в страданиих наших присное утешение;
     Pадуйся, от уныния и отчаяния надежное заступление.
     Радуйся, Сына Твоего о нас умоляющая;
     Pадуйся, молитвами Твоими мир спасающая.
     Радуйся, яко Тобою от вечныя смерти свобождаемся;
     Pадуйся, яко Тобою безконечныя жизни сподобляемся.
     Радуйся, Благодатная, Ангелов и человеков Радование.

Кондак 5
      Божественным промышлением чудесно явися в Колочи икона Твоя, Пресвятая Дево, Ты же благоволила еси на месте сем и обитель в честь преславнаго Успения Твоего воздвигнути, идеже ныне глас хваления приносится Богу: Аллилуиа.

Икос 5
      Видяще пречудную икону Твою, Богомати, и чудеса бываемая, в сокрушение приходим и слезы покаяния приносим Ти, грешнии раби Твои. Ты же, Владычице, милосердия двери отверзи нам, да вопием сице:
     Радуйся, пресветлая Весно покаяния;
     Pадуйся, милосердия неоскудное излияние.
     Радуйся, кающихся Споручнице во спасение;
     Pадуйся, согрешающих благонадежное исправление.
     Радуйся, от соблазнов мира сохраняющая;
     Pадуйся, пламень страстей угашающая.
     Радуйся, падших скорое возстание;
     Pадуйся, грехом ураненых врачевание.
     Радуйся, Благодатная, Ангелов и человеков Радование.

Кондак 6
      Проповедницы богоноснии прежде бывше апостоли, слово Божие всей вселенней возвещаху. Ты же, Богородице, святыми иконами Твоими по всей земли благовествуеши и знаменьми уверяеши истину веры Христовы, научающи нас взывати Богу: Аллилуиа.

Икос 6
      Возсия преславно чудотворный образ Твой, Царице Богородице, во утверждение Державы Российския и залог любве к православному народу ея, имже и ныне ублажаешися похвалами сими:
     Радуйся, знамение Божия к нам благоволения;
     Pадуйся, Российския Державы укрепление.
     Радуйся, скиптры Царствия молитвами Твоими утверждающая;
     Pадуйся, достояние Твое желанным миром венчающая.
     Радуйся, душ наших с Богом примирение;
     Pадуйся, православным Щит и Ограждение.
     Радуйся, милость Божию верным являющая;
     Pадуйся, омофором Своим Русь покрывающая.
     Радуйся, Благодатная, Ангелов и человеков Радование.

Кондак 7
      Хотя царь Иоанн град Полоцк свободити и латинян далече от земли Русския отгнати, изволи взяти на брань Колочскую икону Пречистыя Богородицы, да, видяще ю, нечестивии падут и разумеют, яко с нами Бог, Емуже вопием: Аллилуиа.

Икос 7
      Новое чудо явися, егда икона Твоя, Богомати, невредима сохранися и много паче украшена бысть, аще и поруганию и сожжению предадеся обитель Колочская от латинян в литовское разорение. Темже, ныне на образ Твой взирающе, благодарне вопием:
     Радуйся, земли Русския Защищение;
     Pадуйся, иноплеменных ратей одоление.
     Радуйся, от междоусобныя брани избавляющая;
     Pадуйся, смуту и крамолу уставляющая.
     Радуйся, злых сердец Умягчение;
     Pадуйся, благочестивых душ украшение.
     Радуйся, братолюбию нас научающая;
     Pадуйся, на путь спасения наставляющая.
     Радуйся, Благодатная, Ангелов и человеков Радование.

Кондак 8
      Странно и преславно заступление Твое бысть во бранех, Богомати, егда галлы и двадесять язык на землю Русскую от Запада приидоша. Тогда вси людие правовернии с верою моляху Тя об одолении прегордаго супостата, да победу улучивше, воспоют Богу: Аллилуиа.

Икос 8
      Вси воспомянем битву Бородинскую, егда воини русстии живот свой за веру, царя и Отечество полагаху, в стенах же обители Колочския укрепление и утешение духовное обретаху, под кров Пречистыя прибегающе и вопиюще Ей сицевая:
     Радуйся, православным воином во бранех помогающая;
     Pадуйся, на безбожныя враги их укрепляющая.
     Радуйся, раны тяжкия прикосновением Твоим исцеляющая;
     Pадуйся, преставльшихся во обителех Небесных упокоевающая.
     Радуйся, Воеводо добропобедная;
     Pадуйся, Заступнице наша усердная.
     Радуйся, вражду и злобу упраздняющая;
     Pадуйся, Отечество наше сохраняющая.
     Радуйся, Благодатная, Ангелов и человеков Радование.

Кондак 9
      Всякое шатание еретическое, отвергающее святых икон почитание, разорися древле духоносным Собором богоглаголивых отец. Мы же, отеческия законы Церкве храняще, веруем, яко почитание, воздаваемое образу Твоему, к Тебе Самей восходит, Владычице. Темже, Сыну Твоему, тако благоволившему, зовем: Аллилуиа.

Икос 9
      Ветии многовещаннии не возмогут, Владычице, изглаголати неизреченное милосердие Твое к роду человеческому. Сице, егда смертоносная язва землю Можайскую порази, Ты, Пречистая, гнев Божий на милость преложила еси и раби Твоя пагубы лютыя свободила еси. Темже вопием Ти:
     Радуйся, ненадежных Упование;
     Pадуйся, погибших Взыскание.
     Радуйся, болезнем исцеление;
     Pадуйся, страстем изменение.
     Радуйся, злотворных воздухов отгнание;
     Pадуйся, благодати Божия присвоение.
     Радуйся, Главизно нашего спасения;
     Pадуйся, верным Отрада и Утешение.
     Радуйся, Благодатная, Ангелов и человеков Радование.

Кондак 10
      Спасти хотя мир, Иже всех Господь, яко дождь на руно Гедеоново, во утробу Пречистыя Девы с Небесе сниде и по рождестве сохрани Ю, якоже бе нетленну, да, чудо видяще, поем воплотившемуся нас ради Христу Богу: Аллилуиа.

Икос 10
      Стена еси и защищение людем Твоим, Богородице Дево, даровала бо еси земли Русстей чудотворныя иконы Твоя во укрепление веры Православныя. Тако и на Колочи святый образ Твой явися в помощь и заступление народу нашему. Темже прославляем Тя сице:
     Радуйся, Церкве Православныя Столпе непоколебимый;
     Pадуйся, земли нашея Покрове нерукотворенный.
     Радуйся, Русь Православную возлюбившая;
     Pадуйся, благочестие в ней утвердившая.
     Радуйся, мечем молитвы нас вооружающая;
     Pадуйся, щит веры в руце наша влагающая.
     Радуйся, к Сыну Твоему присная Ходатаице;
     Pадуйся, молений наших всеблагая Скоропослушнице.
     Радуйся, Благодатная, Ангелов и человеков Радование.

Кондак 11
      Пение молебное приносят Ти, Пречистая Дево, инокини честныя во обители Колоцтей и, чудную икону Твою почитающе и ради обновления обители древния Тя благодаряще, возсылают Богу хвалебную песнь: Аллилуиа.

Икос 11
      Светородительнице боголепная, Ты, девство и рождество нетленно в Себе сочетавши, девам Похвало и матерем Отрадо явилася еси. Мы же, таинству, на Тебе бывшему, дивящеся, вопием Ти сице:
     Радуйся, матеродевственная Славо;
     Pадуйся, человеческаго рода Похвало.
     Радуйся, Сеятеля чистоты непорочно родившая;
     Pадуйся, преслушание Евино послушанием Твоим исцелившая.
     Радуйся, дев богомудрых украшение;
     Pадуйся, чистоте и целомудрию научение.
     Радуйся, благоуханный Крине девства;
     Pадуйся, Всенепорочная Богоневесто.
     Радуйся, Благодатная, Ангелов и человеков Радование.

Кондак 12
      Благодать неоскудевающую от иконы Твоея источаеши, Богородице, и, яко Божественнии стражи, предстоят Тебе святии ревнители Богопочитания истиннаго, пророк Илия, небошественник преславный, и святитель Николай, чудотворец предивный. С ними же моли, Дево, Сына Твоего спастися нам, зовущим Ему: Аллилуиа.

Икос 12
      Поюще неистощимое множество чудес Твоих, Владычице, прославим и милость Твою от источника многоцелебнаго, на месте явления святыя иконы Колочския проистекшаго и до днесь врачевство обильное источающаго, всем с верою приходящим и вопиющим Богородице:
     Радуйся, Источниче исцелений, присно изливаемый;
     Pадуйся, Кладезю чудес неисчерпаемый.
     Радуйся, Сосуде, благодати исполненный;
     Pадуйся, Облаче легкий, Христа одождивый.
     Радуйся, Купеле, всякую скверну очищающая;
     Pадуйся, Бане, совесть омывающая.
     Радуйся, Море, вся наша страсти потопляющее;
     Pадуйся, Чаше, духовную жажду утоляющая.
     Радуйся, Благодатная, Ангелов и человеков Радование.

Кондак 13
      О, Всепетая Мати, Пречистая Богородице Дево! Приими сие малое моление наше и, яко неоскудевающий Источник благодати, уврачуй болезни душ и телес наших и умоли Сына Твоего о всех, с верою к Тебе притекающих и поющих Богу: Аллилуиа.
Этот кондак читается трижды, затем икос 1-й и кондак 1-й

Молитва Пресвятой Богородице пред иконою Ея «Колочская»
      О, Пресвятая Владычице Богородице, Царице Небесе и земли, Высшая Ангел и Архангел и всея твари Честнейшая, Чистая Дево Марие, миру Благая Помощнице, всех христиан Утверждение и всем во всяких нуждах Избавление! Призри ныне на раби Твоя, молящияся Тебе умиленною душею и сокрушенным сердцем, со слезами припадающия и пречестному и цельбоносному образу Твоему поклоняющияся. Буди за нас Ходатаица к Сыну Твоему, Христу Богу нашему, мы бо, грешнии, не имамы иныя Помощницы, разве Тебе, Владычице. Ты еси наша Надежда и Упование, Ты еси Заступница и Предстательница наша, Ты обидимым Защищение, печальным Утешение, скорбящим Радование, сирым Прибежище, вдовицам Хранительница, девам Слава, слезящим Веселие, больным Исцеление, грешным Спасение. Сего ради, о Богомати, к Тебе прибегаем и, на Твой святый образ взирающе, с любовию покланяемся Тебе и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему, Христу Богу нашему. Емуже подобает всякая слава, честь и поклонение со Безначальным Его Отцем и Пресвятым и Благим и Животворящим Его Духом ныне и присно и во веки веков. Аминь.

Тропарь Пресвятой Богородице пред иконою Ея «Колочская»
Тропарь, глас 4:
      Днесь возсия неизреченно месту Колочу икона Богоматере и яко светозарным солнцем пришествием Тоя озарися место то. Небесныя Силы и души праведных мысленно торжествуют, радующеся, мы же, на ню взирающе, к Богородице со слезами вопием: о, Всемилостивая Госпоже, Владычице Богородице, молися из Тебе Воплощенному Христу Богу нашему, да подаст мир и здравие христианом по велицей и неизреченной Своей милости.

Ин тропарь, глас 4:
      Днесь возсия в Колочи икона Твоя, Богомати, и, яко солнце светозарное, освети место то. Мы же, на образ Твой взирающе, со слезами вопием: о, Всемилостивая Госпоже, Владычице Богородице, молися из Тебе Воплощенному Христу Богу нашему, да подаст земли нашей мир и спасение душам нашим.

Кондак, глас 8:
      Взбранной Воеводе, Заступнице нашей, хранящей от всяких бед землю Можайскую, благоговейное пение приносим Ти, недостойнии раби Твои, Богородице, но, яко мир спасающая непрестанною молитвою Твоею, помяни и нас, Мати Всепетая, да зовем Ти: радуйся Обрадованная, Ангелов и человеков Радование.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.


Православный календарь

Август 2017
Пн Вт Ср Чт Пт Сб Вс
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.