Вход

Изображения в галерее

P72106930.jpg
834_85.jpg
642.jpg

АКАФИСТ святому преподобному Арсению Великому


Прпп. Иоанн Лествичник, Иоанн Дамаскин, Арсений Великий. Оборотная сторона таблетки «Воскрешение Лазаря». Конец ХV – начало ХVI века. Новгород. Новгородский музей.

Кондак 1
      Избранный угодниче Божий, пресветлый путыни светильниче, и богомудрый монахов наставниче, преподобне отче наш Арсение. Со ангелы предстояй триипостасному Богу, и стяжавый к нему дерзновение многое, молися выну о спасении нас грешных, и молитвами твоими от всяких бед свобождай зовущих ти:
     Радуйся, Арсение, великий пустынножителю.

Икос 1
      Ангела во плоти и человека небеснаго вемы тя, преподобне отче Арсение. Ты бо чистотою и святостию жития твоего, безплотным силам поревновал еси, и земнородных удивил еси, являя всем дивный образ в себе совершенства духовнаго. Темже восхваляем тя и глаголем:
     Радуйся, ветхаго Рима святое прозябение;
     Pадуйся, родителей благочестивых пречестная отрасль.
     Радуйся, от младости на подвиги духовныя предъизбранный;
     Pадуйся, от юности единаго Бога всем сердцем возлюбивый.
     Радуйся, премудрости земной добре обученный;
     Pадуйся, премудростию небесною одаренный.
     Радуйся, закон Христов на скрижалех сердца твоего начертавый;
     Pадуйся, во всех оправданиих господних непорочно ходивый.
     Радуйся, страхом Божиим огражденный;
     Pадуйся, ритор и богослов изрядный бывый.
     Радуйся, целомудрие души и тела невредимо сохранивый;
     Pадуйся, свято и богоугодно на земли поживый.
     Радуйся, Арсение, великий пустынножителю.

Кондак 2
      Видев сердцеведец Господь, непорочную чистоту души твоея, отче Арсение, во диакона святыя Римския церкве тя постави, да служиши Пречистым и Животворящим Христовым Таинам, и, яко достойный сосуд Божией благодати, возносиши молитвы соборныя за вся люди, воспевая Пресвятей троице: Аллилуиа.

Икос 2
      Разума Божественнаго преисполнен был еси, Арсение богомудре, яко не быти равному тебе в премудрости и благочестии во всем царствии Римстем. Темже царь Феодосий в наставника сыновом своим Аркадию и Гонорию тя избра, сим подвизая и нас звати тебе:
     Радуйся, от Запада к Востоку пришедый светити людем богомудрием твоим;
     Pадуйся, от ветхаго Рима в новый Рим преселивыйся на новыя подвиги духовныя.
     Радуйся, царей наставниче и учителю;
     Pадуйся, владык земных к царствию горнему руководителю.
     Радуйся, при дворе царстем подвижничеству о Христе прилежавый;
     Pадуйся, дни на учение, нощи же на молитву посвящавый.
     Радуйся, от царя Феодосия зело любим и почитаем бывый;
     Pадуйся, отцем царя и сыновей его нареченный.
     Радуйся, саном сенаторским почтенный;
     Pадуйся, во славе царствия земнаго смирения святаго преисполенный.
     Радуйся, молитвы усердныя к Богу возсылавый;
     Pадуйся, коленопреклонения многия совершавый.
     Радуйся, Арсение, великий пустынножителю.

Кондак 3
      Силою Божиею укреплен, отче преподобне, возжелал еси в безмолвии пустыннем работати Господеви, выну же восприем гнев на тя царевича Аркадия, умыслил еси тайно оставити двор царский, и скрытися в пустыни, да невозбранно возможеши воспевати Богу серафимскую песнь: Аллилуиа.

Икос 3
      Имея желание велие спасти душу твою, отче Арсение, молился еси Богу, да укажет тебе путь правый ко спаcению, и услышал еси глас небесный, глаголющ тебе: «Арсение, бегай от человеков, и спасешися!» Темже от двора царскаго тайно изшел еси, в худыя ризы облеченный, и в пустыню скитскую пришел еси, прося отцев пустынных, да сотворят тя иноком. О сем тя славяще зовем:
     Радуйся, от Самаго Господа тайно наученный подвижничеству духовному;
     Pадуйся, гласом небесным наставленный безмолвствовати душеспасительно.
     Радуйся, дом царский оставивый, да царствие горнее унаследиши;
     Pадуйся, всю славу мира сего презревый, да славу вечную небесную получиши.
     Радуйся, един единому Христу в пустыни работати возжелавый;
     Pадуйся, святый ангельский образ усердно себе просивый.
     Радуйся, от великаго Иоанна Колова во смирении дивно искушенный;
     Pадуйся, смирение нелицемерное во искушении том показавый.
     Радуйся, пострижение во иночество от рук его святых восприявый;
     Pадуйся, от него предъуведенный, яко инок благоискусен будеши.
     Радуйся, в безмолвии пустыннем добре подвизавыйся;
     Pадуйся, в посте и молитвах неослабно пребывавый.
     Радуйся, Арсение, великий пустынножителю.

Кондак 4
      Бури страстей избежав, отче Арсение, в пристань благодатнаго безстрастия достигл еси, и в пустыне скитстей равноангельно пожил еси, Богом наставляемь к безмолвию совершенному, дивным житием твоим удивлял еси вся отцы пустынныя, и подвизал еси их славити Бога и пети Ему: Аллилуиа.

Икос 4
      Слышав паки глас небесный: «Арсение, бежи от человек и в молчании буди: ибо сие есть корень безгрешия», в пустыню глубочайшую удалился еси, преподобне, и молчанием уста твоя заключил еси, избегая бесед человечестих, да выну беседуеши с Богом в сердце твоем. Сего ради и мы вопием к тебе:
     Радуйся, высото безмолвия, удобовосходимая точию избранными из избранных;
     Pадуйся, глубино смирения, удостоенная благоволения Божия.
     Радуйся, прозорливче дивный, древним пророком уподобивыйся;
     Pадуйся, дара предведения преисполненный.
     Радуйся, бегавый от людей, да не разлучишися с Богом;
     Pадуйся, молчавый устами, да не престанеши вопия ко Господу в сердце твоем.
     Радуйся, истинный Христов угоданиче, вся заповеди Его верно совершивый;
     Pадуйся, о Христе вся ближния твоя искренно любивый.
     Радуйся, правило иноческаго безмолвнаго жития;
     Pадуйся, образе совершенства духовнаго.
     Радуйся, о нем же удивишася ангели;
     Pадуйся, о нем же Бога славят человецы.
     Радуйся, Арсение, великий пустынножителю.

Кондак 5
      Богоприятный источник слез молитвенных, очи твои источаху, преподобне отче, и толико умиления божественнаго преисполнен был еси, яко плакати тебе выну при молитвах твоих. Темже и нас поучаеши примером твоим со слезами молитися Богу, и пети Ему во умилении сердечнем: Аллилуиа.

Икос 5
      Виден был еси весь огнезрачен, на молитве предстоя, серафимскою любовию ко Господу объятый, и богомыслием высоким от земли к небесным возносимый, отче Арсение. Дивящеся убо сему начатку славы твоея, ублажаем тя благохвалении сими:
     Радуйся, пустыни скитския духовное украшение;
     Pадуйся, Египта славо и похвало.
     Радуйся, державо безмолвия;
     Pадуйся, мира Христова обитель.
     Радуйся, слез источниче неоскудный;
     Pадуйся, молитв благоухающее кадило.
     Радуйся, псалмопения органе прекрасный;
     Pадуйся, терпения столпе непоколебимый.
     Радуйся, праздность душевредную возненавидевый;
     Pадуйся, рукама твоима кошницы сплетавый.
     Радуйся, молитвою непрестанною с Богом выну беседовавый;
     Pадуйся, видения небесныя тайно созерцавый.
     Радуйся, Арсение, великий пустынножителю.

Кондак 6
      Проповедник был еси душеспасительный, отче Арсение, всем к тебе притекаюшим, молчанием твоим поучавый паче риторскаго благословения вся верныя, видевшыя в тебе совершеннаго о Христе подвижника, сильнаго пред Богом и людьми, егоже лице, яко лице ангела Божия, светом небесным сияюще. Темже и вопияху прославльшему тя Богу: Аллилуиа.

Икос 6
      Возсияв великими добродетельми твоими в пустыни скитстей, яко солнце пресветлое, отче Арсение, весь мир озарил еси славою твоих подвигов, и твоего безмолвнаго жития, иже во образ всем безмолником от Бога дадеся, и в правило известное ко спасению. Темже присно тя славяще вопием:
     Радуйся, заповедей Христовых верный исполнителю;
     Pадуйся, примером твоим богомудрию совершенному люди научивый.
     Радуйся, ангельское житие на земли показавый;
     Pадуйся, святую Христову Церковь подвигами твоими благоукрасивый.
     Радуйся, возшедый на верх добродетелей христианских;
     Pадуйся, нисшедый во глубину смирения святаго.
     Радуйся, добрый делателю винограда небеснаго;
     Pадуйся, сладкия плоды Христу принесый.
     Радуйся, разсуждение духовное стяжавый;
     Pадуйся, богомыслие молитвенное возлюбивый.
     Радуйся, пустыннолюбивая горлце, Предтече подобящаяся;
     Pадуйся, сосуде Господень, дарами Святаго Духа преисполненный.
     Радуйся, Арсение, великий пустынножителю.

Кондак 7
      Хотя Господь явити отцем пустынным твоего, отче Арсение, безмолвнаго жития совершенство, показа единому от них в видении, како корабль твой в велицем безмолвии не человеки и не ангелы, а Самим Господом управляется: и тако всем ведомо сотворися, яко бегая от человеков с Богом соединился еси, зовый Ему: Аллилуиа.

Икос 7
      Ново и дивно бысть житие твое, преподобне отче, в молчании и безмолвии крайнем проводимое тобою в пустыни скитстей: дивны бяху и бдения твоя всенощныя, в нихже, воздев горе руце твои на заходе солнца, стоял еси тако моляся, дондеже солнце восхождаше. О сем удивляющеся, вопием ти сице:
     Радуйся, преподобне, пустыню безплодную духовно оплодотворивый;
     Pадуйся, богоносе, от Египта добродетельми твоими всему миру возсиявый.
     Радуйся, отче, отцев красото;
     Pадуйся, пустынножителей богомудрая доброто.
     Радуйся, нищеты рачителю;
     Pадуйся, ангелов собеседниче.
     Радуйся, видений божественных тайнозрителю;
     Pадуйся, яко тебе безвестная и тайная Бог явил есть.
     Радуйся, яко тобою мнози ко спасению наставлени быша;
     Pадуйся, яко тобою заблуждающиися путь правый обретоша.
     Радуйся, светильниче, сияющий богомудрия лучами;
     Pадуйся, реко многоводная учения Божественнаго.
     Радуйся, Арсение, великий пустынножителю.

Кондак 8
      Странническое на земли житие возлюбил еси, отче Арсение, не имый зде пребывающаго града, но грядущаго, Иерусалима Небеснаго, выну взыскуяй, преходил еси от места на место в пустыни скита египетскаго, и тако, яко безплотный, нищетно и безмолвно пребывал еси, взывая ко Господу: Аллилуиа.

Икос 8
      Весь ум свой в Бозе углублен имел еси, Арсение отче наш, и толико богомылию непрестанному прилежал еси, яко многажды забывати тебе о пищи и питии. Научи убо и нас ленивых и нерадивых бодрствовати в молитвах к Богу, да тебе благодарственно зовем:
     Радуйся, освященный сосуде Божия благодати;
     Pадуйся, сокровище пребогатое добродетелей.
     Радуйся, яко час смертный присно поминал еси;
     Pадуйся, яко дне суднаго в забвении не положил еси.
     Радуйся, яко рыдал еси горце воспоминая мучения вечная;
     Pадуйся, яко плакал еси во вся дни живота твоего, да избегнеши геенскаго пламене.
     Радуйся, смирением совершенным низложивый вся искушения прегордаго велиара;
     Pадуйся, неуязвим пребывавый его разжженными стрелами.
     Радуйся, руце твои преподобныя со дерзновением горе воздевавый;
     Pадуйся, от захода до восхода солнечнаго в молитвах Господеви предстоявый.
     Радуйся, преисполненный Божественныя любве;
     Pадуйся, болий в лике преподобных.
     Радуйся, Арсение, великий пустынножителю.

Кондак 9
      Вся заповеди Христовы верно исполнил еси, преподобне отче, и толико Богу угодил еси, яко дарова великий дар разсуждения духовом и познания помыслов человеческих, учеником же твоим глаголал еси, яко множицею о глаголе, егоже провещал еси, каялся еси, а о молчании никогдаже, сим поучая их избегати празднословия душевреднаго, да возмогут благоприятно пети создателю своему: Аллилуиа.

Икос 9
      Витий многовещанных превосходил еси даром слова, преподобне, молчанием же твоим паче слова поучал еси вся приходящия к тебе пользы ради душевныя, наставляя их хранити уста от многословия и осуждения ближних, еже и нас сподоби улучити молитвами твоими, да зовем ти:
     Радуйся, земный ангеле и небесный человече;
     Pадуйся, верный последователю Христов.
     Радуйся, положивый хранение устом твоим;
     Pадуйся, молчаливый подражателю совершенств Иисусовых.
     Радуйся, молчанием твоим ближних твоих поучавый;
     Pадуйся, высотою добродетелей твоих человеки удивлявый.
     Радуйся, нищету духовную стяжавый;
     Pадуйся, кроткое и незлобивое сердце имевый.
     Радуйся, всякое угождение плоти возненавидевый;
     Pадуйся, пустынное озлобление сладце претерпевый.
     Радуйся, гнилую воду яко ароматы обоняяй;
     Pадуйся, вместо мягкаго одра, рогозину себе постилаяй.
     Радуйся, Арсение, великий пустынножителю.

Кондак 10
      Спасения душевнаго стяжал еси вся дни живота твоего, преподобне отче, и сие благонадежно получил еси, в старости маститей кончиною святою преставился еси ко Господу, прияти от Него мзду трудом твоим на Небеси, на земли же оставил еси память с похвалами житием твоим благим, еже восхваляя, поем Богу, дивному во святых своих: Аллилуиа.

Икос 10
      Стена ограждения явился еси верным, отче Арсение, по честнем успении твоем, соблюдаяй их молитвами твоими от всяких искушений и озлоблений диавольских: приял бо еси благодать от Господа помогати земнородным, молитвенно тя призывающим:
     Радуйся, победоносче, увенчанный от Христовой десницы;
     Pадуйся, украшенный славою невечернею на Небеси.
     Радуйся, ублажаемый от рода в род на земли;
     Pадуйся, радостный совсельниче ангелов.
     Радуйся, блаженный сонаследниче всех святых;
     Pадуйся, в лоне Авраамли упокоенный.
     Радуйся, со избранными Божиими водворенный;
     Pадуйся, лицезрения Христова сподобленный.
     Радуйся, приявый блага, праведным от века уготованныя;
     Pадуйся, получивый гражданство Иерусалима горняго.
     Радуйся, вселивыйся, тамо, отнюдуже отбеже всяка болезнь;
     Pадуйся, осиянный светом трисолнечнаго Божества.
     Радуйся, Арсение, великий пустынножителю.

Кондак 11
      Пение со ангельскими воинствы приносиши горе Пресвятей Троицы, Арсение богоблаженне, и молишися выну за люди, верно почитающия святую память твою. Молим тя, преподобне: помолися и за нас грешных ко Господу, славящих днесь имя твое и ублажающих подвиги твоя; да будем и мы подражатели добродетелем твоим, и вкупе с тобою сподобимся пети Триединому Богу: Аллилуиа.

Икос 11
      Светоподательный светильник добродетелей евангельских был еси при жизни, отче Арсение, таковым являешися и по смерти, наставляя нас к богоугождению истинному душеспасительными изречениями твоими, в книгах святоотеческих записанными, от нихже почерпая назидание духовное, взываем ти:
     Радуйся, зерцало чистое сокровеннаго в Бозе жития;
     Pадуйся, свеще, горящая пламенем любве ко Господу.
     Радуйся, совершенный о Христе подвижниче;
     Pадуйся, добрый иноков наставниче.
     Радуйся, Евангелия Христова последователю;
     Pадуйся, апостольских преданий блюстителю.
     Радуйся, богомудрия небеснаго преисполненный;
     Pадуйся, богомыслием молитвенным удобренный.
     Радуйся, уме, озаренный лучами Божественнаго света;
     Pадуйся, связавый язык свой молчанием во славу Божию.
     Радуйся, в молчании твоем благоглаголивый учитель бывый;
     Pадуйся, ученики твоя богоугождению истинному научивый.
     Радуйся, Арсение, великий пустынножителю.

Кондак 12
      Благодать Господню испроси нам, преподобне угодниче Христов, и буди нам руководитель в Царствие Небесное. Молимтися прилежно: помози нам немощным и грешным, твоим добродетелем подражати, Богу, а не миру благоугождати, да возможем благоприятно пети всех Творцу: Аллилуиа.

Икос 12
      Поюще святое безмолвное житие твое, отче Арсение, дивимся богомыслию твоему молитвенному, яко выну с Богом пребывал еси умом твоим, ныне же, егда прешел еси от временных подвигов к вечному блаженству, тем паче с Богом неразлучно пребываеши, и Бог в тебе пребывает, егоже умоляти не престай за чтущия тя и вопиющия:
     Радуйся, крине святости и чистоты;
     Pадуйся, древо благоплодное сада Иисусова.
     Радуйся, возрасший в удолиях святаго смирения;
     Pадуйся, вознесенный даже до горы небесныя.
     Радуйся, вышняго Сиона жителю;
     Pадуйся, славы тройческия созерцателю.
     Радуйся, всех святых присный друже;
     Pадуйся, грешных с Богом примирителю.
     Радуйся, подвижническаго безмолвнаго жития верный указателю;
     Pадуйся, о всех чтущих тя усердный ко Господу предстателю.
     Радуйся, души наша наставляяй во спасение;
     Pадуйся, телеса наша в подвизех укрепляяй.
     Радуйся, Арсение, великий пустынножителю.

Кондак 13
      О, великий угодниче Божий, преподобне отче наш Арсение! Приими благоутробно сие малое моление наше в похвалу тебе приносимое с верою и любовию, и умоли возлюбленнаго тобою и возлюбившаго тя Господа: да спасет и помилует нас грешных, избавит муки вечныя, и сподобит во Царствии Небеснем со святыми пети ему: Аллилуиа.
Этот кондак читается трижды, затем икос 1-й и кондак 1-й

Молитва преподобному отцу нашему Арсению Великому
      О, священная главо, земный ангеле, небесный человече, безмолвия рачителю, молчания любителю, преподобне и богоносне отче наш Арсение! Припадаем ти и молимся: помолися ко Господу, Богу и Спасу нашему Иисусу Христу, да дарует нам грешным и недостойным рабом своим, вся ко спасению душевному благопотребныя дары своя: веру праву, надежду благу, любовь нелицемерну, благочестие непоколебимое, любомудрие христопоследовательное, и вся добродетели, во святем Евангелии Им заповеданныя; да будем подражатели твоего богоугоднаго жития, и вкупе с тобою сподобимся спасение вечное получити и Царствие Небесное унаследити. Ей, угодниче Божий! Не презри нас, но помози нам, небесным предстательством твоим, благочестно житие временное скончати, кончину благую, мирную и непостыдную стяжати, и блаженства райскаго удостоитися, да прославим человеколюбие и щедроты в Троице славимаго и покланяемаго Бога, Отца и Сына и Святаго Духа, и твое святое заступление, во веки веков. Аминь.

Тропарь преподобному Арсению Великому
Тропарь, глас 8:
      Слез твоих теченьми пустыни безплодное возделал еси, и иже из глубины воздыханьми, во сто трудов уплодоносил еси, и был еси светильник вселенней, сияя чудесы, Арсение отче наш. Моли Христа Бога, спастися душам нашим.

Кондак, глас 3:
      От Рима возсиял еси якоже солнце великое, и к царскому граду достигл еси преблаженне, словесы твоими просвещая сего и делы, всяку неразумия мглу отгоняя. Сего ради тя почитаем, отцев славо, Арсение преподобне.

Величание
      Ублажаем тя, преподобне отче Арсение, и чтим святую память твою, наставниче монахов и собеседниче ангелов.


Православный календарь

Ноябрь 2017
Пн Вт Ср Чт Пт Сб Вс
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.