Вход

Изображения в галерее

D178_00.jpg
817_65.jpg
825_24.jpg

Главная

АКАФИСТ Пресвятой Богородице в честь иконы Ея «Отрада» или «Утешение» (третий)


Образ Пресвятой Богородицы Отрада или Утешение. 15Х20 см. Дерево, левкас, паволока, масло, тиснение под позолоту, позолота. Иконописная мастерская Е.Ильинской (icon-art.ru)

Чтомый в женской общине во имя иконы Божьей Матери «Отрада и Утешение»
Составлен по благословению архиепископа Амвросия (Щурова)


Кондак 1
      Возбранных сил небесных радость и хваление, всего же рода человеча исправление, ублажаем Тя, Пречистая Дево Мати, Ты же, наше упование единое, низпосли душам отраду благодатную, да поем Тебе, образ дивный Твой чтущии:
     Радуйся, Божия Мати, Невесто нетленная, светлая наша Отрадо.

Икос 1
      Ангелов лицы дивятся, образ Афонский Твой зряще, на немже, Пречистая Дево и Мати, от уст нетленных рукою десною десницу Младенца отводиши кротко. Что сие есть знамение образа? Мы же речем, поюще таковая:
     Радуйся, Дево, Всевышняго Мати;
     Pадуйся, дивный Раю благодати.
     Радуйся, наша Отрадо небесная;
     Pадуйся, людем Надеждо известная.
     Радуйся, образ бо Твой нам спасение;
     Pадуйся, взор бо Твой благих извещение.
     Радуйся, радостно Ти восклицаем;
     Pадуйся, песненно Тя величаем.
     Радуйся, Божия Мати, Невесто нетленная, светлая наша Отрадо.

Кондак 2
      Недоумеет ум человеческий тайны Твоя разумети, Пречистая, Богоблаженная Дево! Ты в лоно чистое действием Духа приимши безсеменно Отчее Слово. Бога человеком сочетаеши и песнь повелеваеши всем пети: Аллилуиа.

Икос 2
      Гору Афонскую, Дево, Сыном Ти данную в жребий, покровом Своим осеняющи свыше, храниши дивно от бед и напастей. Икон бо Твоих благодатных зарями светятся Афонския обители и гласы преподобных Тя хвалят:
     Радуйся, Дево, Отрадо в печалех;
     Pадуйся, Скоропослушнице в скорбех.
     Радуйся, сущим в пути Одигитрие;
     Pадуйся, храмов священных Вратарнице.
     Радуйся, добрая нам Предвозвестнице;
     Pадуйся, верное всем Утешение.
     Радуйся, Дево, Млекопитательнице;
     Pадуйся, Жено елеоносная.
     Радуйся, Божия Мати, Невесто нетленная, светлая наша Отрадо.

Кондак 3
      Евину гордую прелесть Девы смиренное «Буди» в очах Милосердаго Бога всю упраздняет, и се Сын Божий, Сын Девы, бывает и Бог неприступный живет с человеки. Темже благодарственное пение немолчными устами возсылаем: Аллилуиа.

Икос 3
      Ликостояще над морем, светом молитвы горяще, сияют пред Богом святыни Афона. И явно Божией Матере слава Афона святыя главы осеняет, к пению на всяк час призывает пустынников лики, поющие Ей хвалебно:
     Радуйся, Славо пустынь вожделенных;
     Pадуйся, Чудо высот поднебесных.
     Радуйся, сел и градов Ограждение;
     Pадуйся, вод и полей Освящение.
     Радуйся, Плод Живота источившая;
     Pадуйся, Хлеб нам Небесный подавшая.
     Радуйся, благоуханная Радосте;
     Pадуйся, присноцветущая Младосте.
     Радуйся, Божия Мати, Невесто нетленная, светлая наша Отрадо.

Кондак 4
      О человечестем роде, еже спасти ны, о Дево, в молитвах пред Сыном сладчайшим стоиши. О Мати, людей благая Отрадо, Ты видиши бездну грехов наших лютых! Мы же, в ров истления поверженнии, не смеем возвести очес и пети: Аллилуиа.

Икос 4
      Ватопеда обитель славится образом чудным, емуже есть древнее имя «Отрадо». О нем предание старцев блаженных хранит благодатную дивную повесть, во славу Богородицы заступницы, да слышаще сию, поем Пречистей:
     Радуйся, миру благая Отрадо;
     Pадуйся, верным Стено и Оградо.
     Радуйся, Чудо чудес несказанное;
     Pадуйся, Небо небес осиянное.
     Радуйся, хладных сердец Оживление;
     Pадуйся, мертвенных душ Воскресение.
     Радуйся, Славо к Тебе прибегающих;
     Pадуйся, Радость на Тя уповающих.
     Радуйся, Божия Мати, Невесто нетленная, светлая наша Отрадо.

Кондак 5
      Рождшая жизнь всему миру, рождшая милости бездну! О Дево Пречистая! Оком яснейшим Ты зриши наших печалей пучину, Ты слышиши гласы земных воздыханий, скоро к нам на помощь притекающи, и учиши нас пети Всеблагому: Аллилуиа.

Икос 5
      Алчуще злата и крове, дерзко разбойники с моря обитель святую в нощи облагают, да рано утром, вратом отворенным, убивше монахов, расхитят святыни. Ты же, неусыпная Заступнице, удел Свой защищаеши, да славим Тя:
     Радуйся, Ты Ватопеда Отрадо;
     Pадуйся, вражиим козням Преградо.
     Радуйся, замыслов злых Обличение;
     Pадуйся, лютых врагов Отражение.
     Радуйся, Ты неусыпная миру Помощнице;
     Pадуйся, Ты непрестанное верных Предстательство.
     Радуйся, светлый Покрове всех чтущих Тя;
     Pадуйся, щит Благодатный поющих Тя.
     Радуйся, Божия Мати, Невесто нетленная, светлая наша Отрадо.

Кондак 6
      Девственный взор Твой, благая Мати с Предвечным Младенцем, потоки любви и щедрот изливает. Ты нас храниши в исходех и входех, спасаеши верных на суши и в мори; аще токмо искра покаяния возникнет в сердце, еже воспевати: Аллилуиа.

Икос 6
      Общия молитвы чин в час утра совершивши, иноки отходят по кельям до литургии. В храме же молится старец игумен и слышит глас от иконы «Отрадо»: «Врат не отворяйте днесь», и трепетом объятый старец восклицает:
     Радуйся, Дево, Оградо святыни;
     Pадуйся, дом Твой спасаеши ныне.
     Радуйся, Щите заутра и нощию;
     Pадуйся, грозная силою многою.
     Радуйся, грешников Упование;
     Pадуйся, праведных Увенчание.
     Радуйся, Ты бо смиряеши гордыя;
     Pадуйся, Ты бо возносиши кроткия.
     Радуйся, Божия Мати, Невесто нетленная, светлая наша Отрадо.

Кондак 7
      Сын Человеческий близ есть, Суд Его Страшный при дверех — вещает нам глас богоносных Писаний. Обаче мы нерадим о кончине, ленивии, грозным глаголом не внемлем, вси бо суете повиннии волею, и слово изрещи не вемы Богу: Аллилуиа.

Икос 7
      Трепетно старец игумен к образу взор свой возводит и видит: се лицы пред ним оживают, и Деве грозный Младенец рукою уста заграждает, глаголя: «О Мати, не провещай им, да накажутся!» — и старец, ужасаяся, поет Пречистей тако:
     Радуйся, Дево, Владычице мира;
     Pадуйся, неба Царице благая.
     Радуйся, Божий бо гнев утоляеши;
     Pадуйся, грозный бо суд отвращаеши.
     Радуйся, Мати всемилосердая;
     Pадуйся, Помоще благодатная.
     Радуйся, наших печалей Отгнание;
     Pадуйся, наших скорбей Утоление.
     Радуйся, Божия Мати, Невесто нетленная, светлая наша Отрадо.

Кондак 8
      Единомысленно, Дево, взоры к Тебе обращаем, Ты в день воздаяния нас не остави и нам простри Твою щедрую руку, грехми бо падохом до адския бездны! Кто же нас избавит от грядущих мук? И кто нас утвердит, еже воспети: Аллилуиа.

Икос 8
      Матерь отводит десницу сладкаго Сына и, мало лице отклоняющи, старцу глаголет: «На стены братия вся да восходит и лютых разбойников да отражает». Старец братию всю глашает и вси, слышавше чудо, воспевают:
     Радуйся, Мати Христова благая;
     Pадуйся, светлый Афона Покрове.
     Радуйся, Спаса Палато прекрасная;
     Pадуйся, Господа Сень освященная.
     Радуйся, киими словесы возвеличим Тя;
     Pадуйся, киими песньми прославим Тя.
     Радуйся, огненных Херувимов честнейшая;
     Pадуйся, пламенных Серафимов чистейшая.
     Радуйся, Божия Мати, Невесто нетленная, светлая наша Отрадо.

Кондак 9
      Истинный мир возвестися людем пришествием Бога, Сын бо от девственных недр воплотися, благоволение Отчее бысть нам, темже от рабства греху отвратимся, ум обратим на служение Богу, молитвенно псалом поюще присно: Аллилуиа.

Икос 9
      Радостно в храме сем зряще список с иконы «Отрадо», Афонских обителей дар многоценный, в молитве мысленно соединимся с хвалебными лики отцев Святогорцев, иже с заоблачных высот своих Пречистую пети нас приглашают:
     Радуйся, стран и народов Святыне;
     Pадуйся, всех христиан Благостыне.
     Радуйся, Огнь во утробу приявшая;
     Pадуйся, Слово во плоти явившая.
     Радуйся, Облако Света легкое;
     Pадуйся, Лествице, к небу возведшая.
     Радуйся, тихая Ангелов Славо;
     Pадуйся, людем благая Отрадо.
     Радуйся, Божия Мати, Невесто нетленная, светлая наша Отрадо.

Кондак 10
      Ум к небеси устремивши, сердце вознесши над тленом, о, коль вожделенно спастися от мира! Единое духа стремление к горним. Единая сердца надежда на Бога. Дево! Помогай нам, Богородице! И в путь правый веди нас, во еже пети: Аллилуиа.

Икос 10
      Образ пречудный стяжавше, веруем, сей бо дадеся в покров благодатный всем верным, в залог же небесныя помощи граду. Темже на образ сей взирающе глаголем: Се благословение Владычицы! Ейже воспеваем тако:
     Радуйся, Ты нам покров благодатный;
     Pадуйся, Ты нам залог упований.
     Радуйся, сущим в бедах Утешение;
     Pадуйся, сущим в грехах Умиление.
     Радуйся, Ты бо сердца укрепляеши;
     Pадуйся, Ты бо умы умудряеши.
     Радуйся, в жизни нам Радость небесная;
     Pадуйся, в смерти Отрадо единая.
     Радуйся, Божия Мати, Невесто нетленная, светлая наша Отрадо.

Кондак 11
      Темныя силы во аде брань воздвизают на веру и света Христова прияти не могут. Но верным только молитва есть сила. Им слезы — залог и победы, и славы. О Мати и Дево, даждь нам тучу слезную и бодрственный ветр возвей нам поющим: Аллилуиа.

Икос 11
      Радость и свет источает образ пречудный «Отрадо». Темже к нему притецем вси усердно и принесем сокрушенное сердце, Первообразней молящеся тепле и в умилении духа стояще, Той воспеваем хвалы таковая:
     Радуйся, Ты бо Кивот освященный;
     Pадуйся, Ты бо Престол вознесенный.
     Радуйся, горних чинов воспевание;
     Pадуйся, адовых сил трепетание.
     Радуйся, вечное к Богу о людех Моление;
     Pадуйся, всем христианам Спасение.
     Радуйся, Духа Жилище преславное;
     Pадуйся, Бога Селение дивное.
     Радуйся, Божия Мати, Невесто нетленная, светлая наша Отрадо.

Кондак 12
      Ангельски днесь воспеваем песнь благодатней Марии: Сия бо есть сладость, и рай, и блаженство. Отрадо в час испытаний и гнева, надеждо блаженств безконечных по смерти. Радуйся, Заступнице усердная! И радость подавай нам пети Богу: Аллилуиа.

Икос 12
      Да защитит Богоматерь образом дивным «Отрадо», молитвы оплот и святыни: сей храм наш. И да во век не угаснет лампада пред ликом спасительным Богоневесты. Сонмы же верных сынов Православныя Церкви, немолчными гласы да взывают Ти, Дево:
     Радуйся, Храме, светлейший Сиона;
     Pадуйся, Свете и Славо Афона.
     Радуйся, иноков мысль непрестанная;
     Pадуйся, девственных песнь неумолчная.
     Радуйся, Ты нам Роса освященная;
     Pадуйся, Ты нам Поток умиления.
     Радуйся, Помоще Тя призывающим;
     Pадуйся, Радосте Тя воспевающим.
     Радуйся, Божия Мати, Невесто нетленная, светлая наша Отрадо.

Кондак 13
      О всепетая Мати! Рождшая всех святых Святейшее Слово! Нынешнее приимши приношение, от всякия избави напасти всех и будущия изми муки о Тебе вопиющих: Аллилуиа!
Этот кондак читается трижды, затем икос 1-й и кондак 1-й

Молитва пред иконою Пресвятыя Богородицы, именуемою «Отрада» или «Утешение», чтомая в женской, во имя сея иконы, общине Московской епархии
     О Пресвятая Госпоже Богородице, отрадо и утешение наше! Воззри милостивно на люди, предстоящия с верою и любовию и поклоняющияся пречистому образу Твоему; приими наше хвалебное пение и пролей теплую Твою молитву о нас, грешных, ко Господу, да презрев вся наша согрешения, спасет и помилует нас. О Предивная Владычице! Покажи на нас чудныя малости Твоя: сохрани и помилуй святейшаго патриарха (имя) и преосвященнаго (имя), даруй им здравие и спасение: сохрани пастырей Церкви, христолюбивое воинство и вся люди Твоя. Молим Тя умиленно: избави и всех нас от всякия скорби, настави на путь всякия добродетели и благостыни, спаси от искушений, бед и болезней, изми от нас оклеветания и свары, сохрани от молниеноснаго грома, от запаления огненнаго, от глада, труса, потопа и смертоносныя язвы: подаждь нам Твою милостивную помощь в пути: и в море, и на суше. Се бо, Всемилостивая Владычице, во уповании несумненнем Тебе нашу убогую молитву возносим. Не отрини наших слез и воздыханий, не забуди нас во вся дни жизни нашея, но всегда пребывай с нами и Твоим заступлением и ходатайством у Господа подавай нам отраду, утешение, защиту и помощь, да славим и величаем и ублажаем Тя во вся роды во веки веков. Аминь.

Молитва Пресвятей Богородице пред иконою Ея «Отрада» или «Утешение»
      О Пресвятая Владычице Госпоже Дево Богородице, Невесто нетленная, Мати благословенная, светлая наша отрадо, вожделенное утешение! Приими ныне дерзновенное и неотступное моление сие, от грешных устен и недостойных душ Тебе приносимое пред святым и светозарным Твоим образом. Пощади ны, милостивая и милосердная и щедролюбивая наша заступнице, и не предаждь нас суду и гневу Сына Твоего и Спаса нашего, Господа Иисуса Христа, Емуже без конца согрешихом и повинни есмы осуждению и праведному Его изречению, да накажемся по грехом нашим, превозшедшим всякую меру Его долготерпения. Приникни с высот Твоих горних, идеже ангели трепетно славят Тя, и воззри на нашу дольнюю нищету: како обнищахом верою, како бедствуем надеждою и оскудехом любовию, како умом омрачихомся, сердцем же и чувством ожесточихомся. Уврачуй нас молитвою Твоею, Дево целебнице. Возстави ны, падшия духом, укрепи разслабленныя умом, возбуди унылыя и отчаянныя, исцели болящия душею и телом. Призри на град наш и пощади его, Божий отводящи Твоим предстательством гнев. Укроти гордостная стремления людей и богоотступная их шатания. Возвей тихое дыхание благодати Твоея на смятенныя души и сокрушенная сердца. Сохрани супружеством чистоту, материнству честь, девству благословение. Низпосли под кров жилищ наших освящающий луч божественнаго света, да обличатся деяния неподобная и устыдятся речи хульныя, и укротятся мысли злобныя. О миролюбивая, благостнейшая и тишайшая Дево Мати, о падениих наших скорбящая, о спасении нашем воздыхающая! Утоли церковныя бури, умири расколы и распадения, собери расточенныя, обрати отпадшия и всех приведи в единение Святыя Церкве, да единодушно и единомудренно славится на земли, якоже и на небеси, единое святейшее и спасительное имя Единосущныя Троицы, Отца и Сына и Святаго Духа, во веки веков. Аминь.

Молитва иная
      Надежда всем концем земли, Пречистая Дево Богородице, Утешение и Отрадо наше! Не гнушайся нас грешных, на Твою бо милость уповаем. Угаси пламень греховный и покаянием ороси изсохшие сердца наша. Очисти ум наш от греховных помышлений. Приими моления от души и сердца с воздыханием Тебе приносимыя. Буди Ходатаице о нас к Сыну Твоему и Богу, и отврати гнев Его от нас Матерними молитвами. Укрепи в нас веру православную, вложи в нас дух страха Божия, дух смирения, терпения и любви. Душевныя и телесныя язвы исцели, утиши бурю злых нападений вражеских. Отыми бремя грехов наших и не остави нас до конца погибнути. Подаждь нам милость Твою и святое благословение Свое всем зде предстоящим и молящимся и всегда пребываяй с нами, подавая приходящим к Тебе отраду и утешение, помощь и заступление, да славим и величаем Тя вси до последняго нашего воздыхания. Аминь.

Молитва третья
      О Пресвятая Дево, Мати Господа, Царице Небесе и земли! Вонми многоболезненному воздыханию души нашея, призри с высоты святыя Твоея на нас, с верою и любовию поклоняющихся Пречистому образу Твоему. Се бо грехми погружаемии и скорбьми обуреваемии, взирая на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорбь нашу, настави на путь правый нас заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину, и на страшном суде Сына Твоего явися нам Милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.

Тропарь Божией Матери ради иконы Ее Ватопедской, именуемой «Отрада» или «Утешение»
Тропарь, глас 4:
      Яко Покров благодатный и спасительный стяжахом честную Твою икону, Богородице. На сию убо со умилением взирающе, Тебе вопием: Владычице, низпосли нам отраду и утешение, на Тя бо упование возлагаем грешнии и смиреннии, на Твое предстательство надеемся недостойнии, ускори нас избавити от бед и скорбей и умоли Сына Твоего, Христа Бога нашего, помиловати и спасти души наша.

Ин тропарь, глас 4:
      К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений. Не отврати Твоя рабы тщи, Тя бо и едину надежду имамы.

Кондак, глас 8:
      Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.


Православный календарь

Август 2017
Пн Вт Ср Чт Пт Сб Вс
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.