Главная

АКАФИСТ Пресвятей Богородице в честь иконы Ея «Отрада» или «Утешение» (иной)

Подробности

Создано 03.02.2020 12:49

      Возбранных сил небесных радость и хваление, всего же рода человеча исправление, ублажаем Тя, пречистая Дево Мати, Ты же, наше упование единое, низпосли душам отраду благодатную, да поем Тебе, образ дивный Твой чтуще:
     Радуйся, Божия Мати, Невесто нетленная, светлая наша отрадо.

      Ангелов лицы дивятся, образ афонский Твой зряще, на немже, пречистая Дево и Мати, от уст нетленных рукою десною десницу Младенца отводиши кротко. Что сие есть знамение образа? Мы же речем, поюще таковая:
     Радуйся, Дево, Всевышняго Мати;
     Радуйся, дивный Раю благодати.
     Радуйся, наша отрадо небесная;
     Радуйся, людем надеждо известная.
     Радуйся, образ бо Твой спасение возвещает всей земли;
     Радуйся, взор бо Твой утешение пребывающим во тли.
     Радуйся, свете небесный, мглу наших дний озаряяй;
     Радуйся, цвете нетленный, тлен наших дел оживляяй.
     Радуйся, Ты бо молитвы к Сыну за мир твориши;
     Радуйся, яко в теплой молитве, аки светильник, гориши.
     Радуйся, радостно Ти восклицаем;
     Радуйся, песненно Тя воспеваем.
     Радуйся, Божия Мати, Невесто нетленная, светлая наша отрадо.

      Недоумеет ум дольний тайны Твоея разумети, Пречистая богоблаженная Дево, Ты бо, в лоно чистое действием Духа приимши безсеменно Отчее Слово, Бога человеком сочетавши и песнь повелеваеши всем пети: Аллилуиа.

      Гору Афонскую, Дево, Сыном Ти данную в жребий, покровом Своим осеняющи свыше, храниши дивно от бед и напастей. Благодатных икон Твоих чудесы обители афонския славятся и гласы преподобными Тя хвалят:
     Радуйся, Дево, отрадо в печалех;
     Радуйся, скоропослушнице в скорбех.
     Радуйся, сущим в пути Одигитрие;
     Радуйся, храмов священных вратарнице.
     Радуйся, добрая предвозвестнице унывающим в беде;
     Радуйся, верное утешение притекающим к Тебе.
     Радуйся, бедным богатство, елеоносная Жено;
     Радуйся, чтущим акафист благоволящая тайно.
     Радуйся, в келлии старцу рекшая «Радуйся» чудно;
     Радуйся, живоприемная Мати.
     Радуйся, Тя бо достойно есть пети;
     Радуйся, Тя бо по долгу ублажаем.
     Радуйся, Божия Мати, Невесто нетленная, светлая наша отрадо.

      Евину гордую прелесть Девы смиренное «Буди» в очах Милосерднаго всю упраздняет: се Сын Божий Сын Девы бывает и Бог неприступный живет с человеки, темже благодарственное пение немолчными усты возсылаем: Аллилуиа.

      Ликостояще над морем, светом молитвы сияют пред Богом святыни Афона и явно Божия Матере слава Афона святыя главы осеняет, к пению на всяк час призывающи пустынников, поющих Ей хвалебно:
     Радуйся, славо пустынь вожделенных;
     Радуйся, чудо высот поднебесных.
     Радуйся, гор и холмов осенение;
     Радуйся, скал и стремнин освящение.
     Радуйся, Еюже открывается путь в небесныя страны;
     Радуйся, Еюже отверзается рай нетленныя весны.
     Радуйся, крине в юдоли, благоуханная радосте;
     Радуйся, лилие в поли, приснотекущая сладосте.
     Радуйся, света восточе, долы земли озаривый;
     Радуйся, жизни поточе, воду живую явивый.
     Радуйся, гласе немолчных молений;
     Радуйся, щите священных селений.
     Радуйся, Божия Мати, Невесто нетленная, светлая наша отрадо.

      О человечестем роде, еже спасти ны, о Дево, в молитвах пред Сыном сладчайшим стоиши; о Мати, людем благая отрадо, Ты видиши бездну грехов наших лютых, мы же, в рове истления поверженнии, не смеем возвести очес и пети: Аллилуиа.

      Ватопеда обитель славится образом чудным, емуже есть древнее имя Отрада. О нем предание старец блаженных хранит благодатную дивную повесть, во славу Богородицы заступницы, да слышаще сию, поем Пречистей:
     Радуйся, мира благая отрадо;
     Радуйся, верным стено и оградо.
     Радуйся, чудо чудес несказанное;
     Радуйся, небо небес осиянное.
     Радуйся, любящим жизнь безмолвия святых желаний краю;
     Радуйся, ищущим безмятежия желанный раю.
     Радуйся, яко Тобою всяка душа оживает;
     Радуйся, яко Тобою мертвенный ум воскресает.
     Радуйся, веры горнило, имже неверие тает;
     Радуйся, тайная сило, яже от тли возставляет.
     Радуйся, славо отшельников твердых;
     Радуйся, крепосте иноков бодрых.
     Радуйся, Божия Мати, Невесто нетленная, светлая наша отрадо.

      Рождшая жизнь всему миру, рождшая милости бездну, о Дево Пречистая, оком яснейшим зриши наших печалей пучину, слышиши гласы земных воздыханий, скоро к нам на помощь притекающи, и учиши нас пети Всеблагому: Аллилуиа.

      Алчуще злата и крове, дерзко разбойницы с моря обитель святую в нощи облагают, да зело утро, вратом отворенным, убивше монахов, расхитят святыни. Ты же, неусыпная Заступнице, удел Свой защищаеши, да славит Тя:
     Радуйся, Ватопеда отрадо;
     Радуйся, вражиим кознем преградо.
     Радуйся, замыслов злых обличение;
     Радуйся, лютых врагов отражение.
     Радуйся, Ты бо не усыпаеши, Свой спасающи удел;
     Радуйся, Ты бо бодрственно отвращаеши тучи смертоносных стрел.
     Радуйся, крепосте чтущих святость икон Твоих чудных;
     Радуйся, столпе поющих славу чудес Твоих многих.
     Радуйся, кротких победо и поражение гордых;
     Радуйся, правых защито и посрамление лживых.
     Радуйся, Ты бо еси заблудших кормило;
     Радуйся, Ты бо еси молитвы кадило.
     Радуйся, Божия Мати, Невесто нетленная, светлая наша отрадо.

      Девственный взор Твой, благая Мати, потоки любви и щедрот изливает: Ты нас храниши в исходех и входех, спасаеши верных на суши и в мори, аще токмо искра покаяния возникает в сердце, еже воспевати: Аллилуиа.

      Общия молитвы в час утра иноцы совершивше, отъидоша в келии до литургии, обаче игумен обители, в храме един моляся, от иконы Твоея Отрады глас слыша: «Врат не отверзайте днесь», трепетом же объят сый, сице старец восклицаше:
     Радуйся, Дево, Ты бо еси стража святыни;
     Радуйся, яко дом Твой спасаеши ныне.
     Радуйся, щите заутра и нощию;
     Радуйся, грозная силою многою.
     Радуйся, Ты бо щадиши грешныя милосердием Твоим;
     Радуйся, Ты бо поражаеши сильныя, востающия на ны.
     Радуйся, венче надежды, знаменование мира;
     Радуйся, жезле победы, обетование славы.
     Радуйся, каменю сапфире, подобный видению неба;
     Радуйся, светлый престоле и колеснице Царева.
     Радуйся, яко глас Твой сладок ушима;
     Радуйся, яко образ Твой красен очима.
     Радуйся, Божия Мати, Невесто нетленная, светлая наша отрадо.

      Сын Человеческий близ есть, Суд Его Страшный при дверех: вещает нам глас богоносных Писаний, обаче нерадим о кончине, ленивии суще, и грозным глаголом не внемлем, вси бо суете повинни волею, и слово изрещи не вемы Богу: Аллилуиа.

      Трепетно старец игумен к образу взор свой возводит и видит: се лицы пред ним оживают, и Деве грозный Младенец рукою уста заграждает, глаголя: «О Мати, не провещавай, да накажутся». Старец же, ужасаяся, поет Пречистей тако:
     Радуйся, Дево, Владычице мира;
     Радуйся, неба Царице благая.
     Радуйся, яко Божий гнев утоляеши;
     Радуйся, яко грозный суд отвращаеши.
     Радуйся, Мати всемилосердная, избавление от бед;
     Радуйся, помоще благодатная, упование душам.
     Радуйся, Ты бо печали наша отгониши скоро;
     Радуйся, Ты бо болезни грешных врачуеши дивно.
     Радуйся, якоже утро, свет проливающая тихий;
     Радуйся, якоже солнце, согревающая хладныя души.
     Радуйся, чудная Отроковиче;
     Радуйся, дивная Богоневесто.
     Радуйся, Божия Мати, Невесто нетленная, светлая наша отрадо.

      Единомысленно, Дево, взоры к Тебе обращаем, Ты бо в день воздаяния нас не оставляеши; простри убо нам щедрую Свою руку, грехми бо падохом до адския бездны, и кто нас избавит от грядущих мук, кто же нас утвердит, во еже пети: Аллилуиа.

      Мати отводит десницу сладкаго Сына и, мало лице отклоняющи, старцу глаголет: «На стены братия вся да выходят и лютых разбойников да отражают!» Старец же всю братию глашает и, видевше все чудо, воспевают:
     Радуйся, Мати благая Христова;
     Радуйся, тихой пустыни покрове.
     Радуйся, аще и не вемы, киими Тя хвалебными возвеличим словесы;
     Радуйся, аще и не вемы, кия благодатныя принесем Ти похвалы.
     Радуйся, яко Свет превечный носиши неопалимо;
     Радуйся, яко Огнь ипостасный держиши непостижимо.
     Радуйся, Тя бо имамы необоримую стену;
     Радуйся, Тя бо вси вемы милости велию бездну.
     Радуйся, херувимов честнейшая;
     Радуйся, серафимов славнейшая.
     Радуйся, Небесными Силами величаемая;
     Pадуйся, от всех земнородных ублажаемая.
     Радуйся, Божия Мати, Невесто нетленная, светлая наша отрадо.

      Иов, страдалец пред Богом, мудренно нас поучает, глаголет бо: се, благочестие — мудрость, и благо всем уходящим от мира и сладостный повиг молитвы подъявшим, имже помогает Богородица в молитвах укреплятися и звати: Аллилуиа.

      Радостно в храме сем зряще список с иконы Отрады афонских обителей дар драгоценный, в молитве мысленно соединимся с хвалебными лики отцев-святогорцев, иже от заоблачных высот своих Пречистую нас пети приглашают:
     Радуйся, стран и народов святыне;
     Радуйся, всех христиан благостыне.
     Радуйся, Огнь во утробу приявшая;
     Радуйся, Слово по плоти явившая.
     Радуйся, облаче света легкий, в мир принесший Христа;
     Радуйся, лествице, возводящая от земли на небеса.
     Радуйся, стамно манны, алчущим сладкая пище;
     Радуйся, чаше златая, жаждущим новое пиво.
     Радуйся, вышнее небо, свет озаряюще верным;
     Радуйся, тучная ниво, всем веселящая души.
     Радуйся, тихая ангелов славо;
     Радуйся, людем благая отрадо.
     Радуйся, Божия Мати, Невесто нетленная, светлая наша отрадо.

      Ум к Небеси утремивше, чувства вознесше над тленом, о, коль вожделенно спастися от мира, имуще едино духа стремление к горним, едину сердца надежду на Бога. Помогай нам, Дево Богородице, и в путь веди нас правый, еже пети: Аллилуиа.

      Образ честный провождая в путь от Афона на север в покров благодатный обители новыя, в залог небесныя помощи граду, честный схимонах святогорец вещает: Се благословение Владычицы! Молитеся и веруйте, и пойте:
     Радуйся, яко еси нам покров благодатный;
     Радуйся, яко еси нам залог упований.
     Радуйся, сущим в бедах Утешение;
     Радуйся, сущим в грехах Умиление.
     Радуйся, яко в час гнева Божия укрепляеши сердца;
     Радуйся, яко в день испытания умудряеши умы.
     Радуйся, яко злых наветов тучи от нас отвращаеши;
     Радуйся, яко в годы бедствий не до конца погубляеши.
     Радуйся, яко во дни бурь безбожных Ты еси единая нам пристань;
     Радуйся, яко прелестей ложных избавляеши нас присно.
     Радуйся, в жизни нам тихая радосте;
     Радуйся, в вечности райская славо.
     Радуйся, Божия Мати, Невесто нетленная, светлая наша отрадо.

      Темныя силы владеют в мире силою же и славою, и света Христова познати не могут, но верным токмо молитва есть сила, им слезы — залог и победы, и славы. О Дево Мати, даждь нам тучу слезную и бодрственный нам ветр возвей, поющим: Аллилуиа.

      Радость на лицах сияет, глас вопиет от Афона: Владычица шествует к вам, исходите, сретайте Деву Небес со свещами, сретайте же паче Сию со слезами радости, любве и умиления и празднуйте, и светлым гласом пойте:
     Радуйся, кивоте освященный;
     Радуйся, престоле вознесенный.
     Радуйся, горних чинов воспевание;
     Радуйся, адовых сил трепетание.
     Радуйся, яко еси веселие человеческим сердцам;
     Радуйся, яко еси спасение совратившимся душам.
     Радуйся, яко глас Твой пресладкий вечную радость вещает;
     Радуйся, яко взор Твой претихий нам тишину обещает.
     Радуйся, яко Сына и Бога Ты умолиши о людех;
     Радуйся, яко райских чертогов Ты нам отверзаеши двери.
     Радуйся, храмино Духа Святаго;
     Радуйся, скиние Бога Живаго.
     Радуйся, Божия Мати, Невесто нетленная, светлая наша отрадо.

      Ангельски днесь воспеваем песнь благодатней Марии: Сия бо есть сладость, и рай, и блаженство, отрада в час испытаний и гнева, надежда блаженств безконечных по смерти. Радуйся убо, Заступнице усердная, и радость подавай нам пети Богу: Аллилуиа.

      Да защитит Богомати образом дивным Отрады молитвы оплот — монастырь сей и храмы, да во век не угаснет лампада пред ликом спасительным Богоневесты, сонми же монахов гласом радости с миряны немолчно взывают:
     Радуйся, храме, светлейший Сиона;
     Радуйся, свете и славо Афона.
     Радуйся, иноков мысль непрестанная;
     Радуйся, девственных песнь неумолчная.
     Радуйся, росу утешения посылаеши во дни;
     Радуйся, яко слезы умиления исторгаеши в нощи.
     Радуйся, дивное Имя, чудотворящее в тайне;
     Радуйся, Божие миро, в мир излиянное щедро.
     Радуйся, яко Тобою лиется нам свет безконечный;
     Радуйся, яко с Тобою вечно Младенец предвечный.
     Радуйся, светлосте людем, Тя чтущим;
     Радуйся, радосте нам, Тя поющим.
     Радуйся, Божия Мати, Невесто нетленная, светлая наша отрадо.

      О всепречистая Дево, светлая наша отрадо, сладчайшаго Сына нетленная Мати! От всяких бед и скорбей ограждай нас и от будущих мук избави нас, Благая, радости же вечныя сподоби нас у горняго престола воспевати: Аллилуиа.
      О Пресвятая Владычице, Госпоже Дево Богородице, Невесто нетленная, Мати благословенная, светлая наша отрадо, вожделенное утешение! Приими ныне дерзновенное и неотступное моление сие, от грешных устен и недостойных душ Тебе приносимое пред святым и светозарным Твоим образом. Пощади ны, милостивая и милосердная и щедролюбивая наша заступнице, и не предаждь нас суду и гневу Сына Твоего и Спаса нашего, Господа Иисуса Христа, Емуже без конца согрешихом и повинни есмы осуждению и праведному Его изречению, да не накажемся по грехом нашим, превозшедшим всякую меру Его долготерпения. Приникни с высот Твоих горних, идеже ангели трепетно славят Тя, и воззри на нашу дольнюю нищету: како обнищахом верою, како бедствуем надеждою и оскудехом любовию, како умом омрачихомся, сердцем же и чувством ожесточихомся. Уврачуй нас молитвою Твоею, Дево целебнице. Возстави ны, падшия духом, укрепи разслабленныя умом, возбуди унылыя и отчаянныя, исцели болящия душею и телом. Призри на град наш и пощади его, Божий отводящи Твоим предстательством гнев. Укроти гордостная стремления людей и богоотступная их шатания. Возвей тихое дыхание благодати Твоея на смятенныя души и сокрушенная сердца. Сохрани супружеством чистоту, материнству честь, девству благословение. Низпосли под кров жилищ наших освящающий луч божественнаго света, да обличатся деяния неподобная и устыдятся речи хульныя, и укротятся мысли злобныя. О миролюбивая, благостнейшая и тишайшая Дево Мати, о падениих наших скорбящая, о спасении нашем воздыхающая! Утоли церковныя бури, умири расколы и распадения, собери расточенныя, обрати отпадшия и всех приведи в единение Святыя Церкве, да единодушно и единомудренно славится на земли, якоже и на небеси, единое святейшее и спасительное имя Единосущныя Троицы, Отца и Сына и Святаго Духа, во веки веков. Аминь.

      Надежда всем концем земли, Пречистая Дево Богородице, Утешение и Отрадо наше! Не гнушайся нас грешных, на Твою бо милость уповаем. Угаси пламень греховный и покаянием ороси изсохшие сердца наша. Очисти ум наш от греховных помышлений. Приими моления от души и сердца с воздыханием Тебе приносимыя. Буди Ходатаице о нас к Сыну Твоему и Богу, и отврати гнев Его от нас Матерними молитвами. Укрепи в нас веру православную, вложи в нас дух страха Божия, дух смирения, терпения и любви. Душевныя и телесныя язвы исцели, утиши бурю злых нападений вражеских. Отыми бремя грехов наших и не остави нас до конца погибнути. Подаждь нам милость Твою и святое благословение Свое всем зде предстоящим и молящимся и всегда пребываяй с нами, подавая приходящим к Тебе отраду и утешение, помощь и заступление, да славим и величаем Тя вси до последняго нашего воздыхания. Аминь.

      О Пресвятая Дево, Мати Господа, Царице Небесе и земли! Вонми многоболезненному воздыханию души нашея, призри с высоты святыя Твоея на нас, с верою и любовию поклоняющихся Пречистому образу Твоему. Се бо грехми погружаемии и скорбьми обуреваемии, взирая на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорбь нашу, настави на путь правый нас заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину, и на страшном суде Сына Твоего явися нам Милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.

      Яко Покров благодатный и спасительный стяжахом честную Твою икону, Богородице. На сию убо со умилением взирающе, Тебе вопием: Владычице, низпосли нам отраду и утешение, на Тя бо упование возлагаем грешнии и смиреннии, на Твое предстательство надеемся недостойнии, ускори нас избавити от бед и скорбей и умоли Сына Твоего, Христа Бога нашего, помиловати и спасти души наша.

      К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений. Не отврати Твоя рабы тщи, Тя бо и едину надежду имамы.

      Взбранной Воеводе победительная, яко избавльшеся от злых, благодарственная восписуем Ти, раби Твои, Богородице, но яко имущая державу непобедимую, от всяких нас бед свободи, да зовем Ти: радуйся, Невесто Неневестная.

      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.