Вход

Изображения в галерее

810_25.jpg
808_70.jpg
P1071271.JPG

Главная

АКАФИСТ Алма-Атинским преподобномученикам иеромонахам Серафиму и Феогносту


Преподобномученики Серафим и Феогност Алма-Атинские в молении ко Пресвятой Богородице. Конец ХХ в.

Кондак 1
      Избраннии служителие Превечнаго Агнца Божия, во спасение наше на Кресте Себе принесшаго, Емуже, вземше крест свой, во иноческом благочестивом житии усердно последовавшии и кровь свою за Него пролиявшии, дивная двоице друзей Христовых Серафиме и Феогносте. Прославльшаго вы Подвигоположника нашего и Церкви Зиждителя, прославляюще, и чистое житие и честная страдания ваша восхваляюще, любовию вопием:
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Икос 1
      Ангели земнии и человецы небеснии во всем житии вашем явилися есте, преподобнии: измлада под кров Честнейшей Херувимов и славнейшей без сравнения Серафимов Пречистыя Девы Богородицы притекшии и равноангельному лику иночествующих в Глинской пустыни вчиненнии, отонудуже гласу Божественному кротко последуя, края Семиречия достигли есте, идеже во исповедании Христове даже до крови подвизалися есте. Темже, кротости и смирению вашему удивляющеся, восхваляем вас тако:
     Радуйтеся, измлада Христа Иисуса возлюбившии и Тому усердно потрудившиеся;
     Радуйтеся, спасения ради вечнаго во обитель Глинскую под кров Пречистыя Богородицы притекшия.
     Радуйтеся, равноангельную честь в сонме глинских старцев достойне восприявшия;
     Радуйтеся, целомудрия хранителие и душевныя и телесныя чистоты рачителие.
     Радуйтеся, души ваша и телеса во обители Духа Святаго уготовившия;
     Радуйтеся, во плоти, аки бесплотныя на земли пожившия.
     Радуйтеся, яко на небеси и на земли от Господа прославленнии;
     Радуйтеся, обретшия вечное всесветлое место упокоения.
     Радуйтеся, яко восходя тамо душами, нам мощи святыя ваша оставившия;
     Радуйтеся, яко мощей ваших демоны трепещут.
     Радуйтеся, яко чудодействует теми Господь с любовию к вам приходящим;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 2
      Видя Христос Господь непорочную чистоту сердец ваших, плотскими страстьми не омраченную, суди достойны вас быти жребия апостольскаго благовестия в Туркестанском крае. Егоже гласу: грядите по Мне, и сотворю вы ловцы человеков, внемлюще по Нем с любовию и трепетом идосте. Темже и нас, чад ваших, молитвами вашими сотворите скоры быти на делание заповедей Божественных, поющих Богу: Аллилуиа.

Икос 2
      Разум недоразумеваемый о дивном призвании вашем, Божественным смотрением проявленный, разумети ища, преподобнии, помышляли есте како Богу содействующу возможете мир и князя его, человекаубийцу искони и отца лжи диавола, победити. Сего ради, во вся оружия Божия облекшися, яко возмощи вам стати противу всем кознем диавольским, разженныя стрелы сего постом и молитвою, слез течением, кротостию и смирением угасили есте. Сего ради слышите от нас похвалы сия:
     Радуйтеся, душевная ловления и страсти плотския мечем воздержания посекшии;
     Радуйтеся, помыслы греховныя молчания обучением и сокрушенною исповедию истребившии.
     Радуйтеся, струями слез покаяния пустынную гору сию напоившии;
     Радуйтеся, трудами постническими, яко светила просиявшии.
     Радуйтеся, сладчайшее Имя Иисусово во уме своем и сердце непрестанно носившии;
     Радуйтеся, стоянием на молитве, бдением и поклонами плоть вашу духови покорившии.
     Радуйтеся, душами вашими в Сион горний молитвенно восходившии;
     Радуйтеся, тамо славою небесною обогатившиися.
     Радуйтеся, Ангелов собеседници и человеков наставницы.
     Радуйтеся, потами постническими углие стрел вражиих угасившии;
     Радуйтеся, во иноческом житии пропасти греха избавившиися;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 3
      Сила Вышняго, в сиянии светозарном явленная, трикраты указа вам со спостники вашими место подвижнических трудов, исповедничества и упокоения вашего на Кзыл-Жарской горе Заилийскаго Алатау. На нюже, радующеся, взошли есте, древним столпником и пустынником подобяся, и Господеви поя: Аллилуиа.

Икос 3
      Имея неусыпное попечение о спасении душ ваших и ввереных вам от Бога благословением архипастырей Туркестанских чад церковных, показуя неленостный подвиг в подражании угодником Божиим, пастырски в душепопечении словом и самым делом прилежно потрудилися есте. Сего ради от усердия нашего приимите похвалы сия:
     Радуйтеся, отцу верных праведному Аврааму подражавшии;
     Радуйтеся, теплотою веры согреваемыя, отечество свое оставльшии.
     Радуйтеся, Боговидцу Моисею, на Синайскую гору восшедшему, поревновавшии;
     Радуйтеся, на горах Тяньшаня поучении Божественными и добродетелей исправлением Владыку Христа выну духом своим созерцавшии.
     Радуйтеся, Иову Многострадальному в слезах и терпении уподобившиися;
     Радуйтеся, елеем благочестия и благотворения души ваша помазавшии.
     Радуйтеся, яко древнии пророцы духа прозрения имущии;
     Радуйтеся, действом Того озаряеми, мученическую кончину вашу предузнавшии.
     Радуйтеся, апостолом Христовым во благовестии Евангельском в крае Семиречия последовавшии;
     Радуйтеся, преподобному Серафиму Саровскому в житии вашем иноческом усердно подражавшии.
     Радуйтеся, мучеников добропобедных лику сопречтеннии;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 4
      Бурю богоборчества, от безбожныя власти воздвигнутую, огнем веры крепкия, надежды несумненныя и любве истинныя угасившия, преподобнии, Агнцу Божию Христу Иисусу, яко заколение благоприятное, себе принесли есте, и душепагубных волков суемудрия бурю укротили есте, Господеви поя: Аллилуиа.

Икос 4
      Слышаша богохульнии и злочестивии людие ангелоподобное житие ваше, в тишине пустыннаго уединения на горе совершаемое, богопротивною яростию дышуще и богатство обрести мняще, предаша вас смерти, коварно в рассветныя часы утра расстреляв. Сего ради Церковь Святая, кровию исповедничества вашего, за Христа пролиянною, украшаема, сретает вы приветствии сими:
     Радуйтеся, воини Христовы, не обязавшиися куплями житейскими, да Ему угодни будете;
     Радуйтеся, во всем житии вашем Его искавшия и в Нем намерение полагавшии.
     Радуйтеся, на гору высокую добродетелей возшедшея, монашески Тому угодившии;
     Радуйтеся, невинно от пребеззаконных за веру и любовь к Нему пострадавшии.
     Радуйтеся, венцев неувядаемых от Небеснаго Царя славы сподобившияся;
     Радуйтеся, к Распеншемуся нас ради на Кресте разум свой выну возводившии.
     Радуйтеся, страдальческою кончиною вашею незлобие Агнца Божия проповедавшия;
     Радуйтеся, в небесном всевеселом пребывании в лике Ангелов и всех святых от Него прославлении.
     Радуйтеся, дерзновение молитвенное о нас к Нему имущия;
     Радуйтеся, потемненныя грехми очеса душ наших светом евангельским просвещающии.
     Радуйтеся, грехов оставление и в добродетельном житии укрепление нам подающии;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 5
      Боготечныя звезды явилися ясте в христоподражательном житии вашем, блаженнии, лучами добродетелей души верных озаряющия и путь к достижению Царства Небеснаго ищущим спасения указующе, поучая тех благодарне пети Богу: Аллилуиа.

Икос 5
      Видяще православнии людие града Вернаго премногую любовь вашу к Богу и ревностное благочестивое иноческое житие, усердно искаху назидания и молитвеннаго предстательства вашего, преподобнии. Егда же о невинном убиении вашем узнаша, едиными усты и единым сердцем ко Христу Подвигоположнику нашему о упокоении вашем в селениих праведных на лоне Авраама моляхуся, надгробное рыдание творяще победною песнью: Аллилуиа. Темже и до днесь, святый гроб ваш обстояще, вернии взывают:
     Радуйтеся, житием и кончиною вашею Агнца Божия проповедавщии;
     Радуйтеся, заклани бывше, якоже агнцы.
     Радуйтеся, первее слез ваших теченьми фараона мысленнаго потопившии;
     Радуйтеся, последи во успении вашем пролиянием мученическия крови того сокрушившии.
     Радуйтеся, к жизни нестареемой и присносущной преставльшиися;
     Радуйтеся, преподобных похвало и мучеников украшение.
     Радуйтеся, постников сликовницы и девственников радование;
     Радуйтеся, иноков и инокинь путеводящия в селения небесная.
     Радуйтеся, богобоязненных мирян скоропослушливии попечителие;
     Радуйтеся, стада своего иночествующех наставницы и хранитилие.
     Радуйтеся, пустынныя обители вашея похвало и утверждение;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 6
      Проповедуют Семиречия концы Казахстанской стране величие монашеских подвигов и невинную страдальческую за Христа кончину вашу, преподобномученицы, ихже ради дарова вам Господь благодати чудес струю непрестанно текущую. От неяже благоговейно миро теплаго ходатайства вашего черплюще, благодарне Богу вопием: Аллилуиа.

Икос 6
      Возсия Казахстанстей стране свет благоприятнаго ходатайства вашего ко Престолу Живоначальныя Троицы, ибо тленная и скоротекущая мира оставльше и крест на рамена вземше, демонския победили есте полки и Ангельския достигли есте чины. Темже восхваляюще болезни и страдания ваша, любовию вопием:
     Радуйтеся, веру истинную, надежду несумненную и любовь нелицемерную в себе имевшии;
     Радуйтеся, любовь вашу к Богу любовию к ближним своим показавшии.
     Радуйтеся, воздержания правило в житии вашем приявшия;
     Радуйтеся, смирение, кротость и послушание друг ко другу имевшия.
     Радуйтеся, сего ради Божественную зарю Святаго Духа разумне приявшии;
     Радуйтеся, Трисияннаго и Трисолнечнаго Божества церкви нерукотворенныя пребывшии.
     Радуйтеся, богодухновенными наставлениями вашими в православии верныя утверждающии;
     Радуйтеся, противу злобы гонящих вас незлобивы и просты явившиися.
     Радуйтеся, незлобию и братолюбию нас научающии;
     Радуйтеся, милости и сострадания преисполненнии.
     Радуйтеся, нестроения, раздоров и всякого нечестия искоренителие;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 7
      Хотящим нам воспевати славно венчавшаго вас, преподобномученицы, Господа и ваша славити подвиги и труды, любве ради Божественныя, вами подъятыя, помозите нам, недостойным, свыше данною вам благодатию Духа Святаго, сердца наша от греховныя тьмы очищая, во еже чисте пети Богу: Аллилуиа.

Икос 7
      Новыя, победоносныя, боговенчанныя воини Христовы Того благостию в последния сия времена лютых гонений, преподобномученицы, явилися есте, добрый жития вашего подвиг скончавше и веру православную непорочно соблюдше. Темже о таковом Божием благоволении радующеся, воспеваем вам таковая:
     Радуйтеся, во едино естество Божественныя Троицы веровавшии православно;
     Радуйтеся, крещением во Имя Отца и Сына и Святаго Духа словесное стадо Христово приумножившии.
     Радуйтеся, Безкровную Жертву о своих гресех и о людских неведениях со страхом и трепетом Богу приносившии;
     Радуйтеся, во время совершения Божественныя Литургии слезы умиления пролиявшии.
     Радуйтеся, пречистыми Тайнами Христовыми в наследие жития вечнаго себе и чад церковных насыщавшии;
     Радуйтеся, славословия и благодарения к Богу во храмех благоговейно приносившии.
     Радуйтеся, верных научившии покланятися Творцу в Троице;
     Радуйтеся, Пресвятую Деву Богородицу во всем житии вашем прославлявшии.
     Радуйтеся, Еяже преблагому Покрову и всех верных поручившии;
     Радуйтеся, чина и уставов Святыя Церкве вернии хранителие.
     Радуйтеся, благих обычаев и преданий святоотеческих ревнителие;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 8
      Странно есть видети, яко благодатиею Божиею, и по сокровении в недра земная страдальческая телеса ваша, преподобномученицы досточуднии, присносущную жизнь являют. Приходящим бо к вам и теплаго вашего ходатайства к Богу во Святей Троице славимому и покланяемому ищущим, яко живы суще, во благое пособствуюте, научая прославляющему вас Богу пети: Аллилуиа.

Икос 8
      Вся дни христоподражательнаго жития вашего, во едино существо Божественныя Троицы веровав православно, богодухновенными наставлении вашими в правоверии верных утверждали есте и наследия небеснаго сподобилися есте, духоносныя отцы, Ангелов сослужителие. Темже честную память вашу совершая, приносим вам похвальная сия:
     Радуйтеся, дивная двоице друзей Христовых;
     Радуйтеся, соуз любве духовныя до смерти верно сохранившии.
     Радуйтеся, не токмо в житии земном, но и по отшествии в небесныя селения о Господе соединеннии;
     Радуйтеся, на светозарную колесницу добродетелей Божественных восшедшии.
     Радуйтеся, Небеснаго Царствия достигшии;
     Радуйтеся, и нам, грешным, образ добродетелей словом и житием явившии.
     Радуйтеся, смирением и целомудрием вечное блаженство улучившии;
     Радуйтеся, милостию и молитвою Небесное Царство стяжавшии.
     Радуйтеся, славу временную ни во чтоже вменившии;
     Радуйтеся, молитвами вашими от многих бед нас избавляющии.
     Радуйтеся, вся благая прошения наша исполняющии;      Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 9
      Вси Ангели Божии и лики святых радостно восприяша богоносныя души ваша на небеси, христоименитых же людей множество, обстояще с любовию гроб ваш, на земли песньми и пеньми духовными ублажают вас, преподобномученицы, псаломски поя: Аллилуиа.

Икос 9
      Витийствующий язык не возможет по достоянию изнести похвальная в прославлении вашем, о блаженная двоице друзей Христовых. Вы же, милостивы и благопослушливы суще, приимите убогая похвалы наша, дерзновенными своими и богоприятными молитвами, скудность нашу восполняющи, да благодарственне зовем вам:
     Радуйтеся, Трисияннаго Божества таинницы;
     Радуйтеся, Славы небеснаго Царствия наследницы.
     Радуйтеся, Ангельских ликов собеседницы;
     Радуйтеся, со святыми на небеси вечно царствующии.
     Радуйтеся, от горних высот райских к нам, недостойным, милостивно приникающии;
     Радуйтеся, благодеяний множество нам источающии.
     Радуйтеся, милостию сострадания вашего всех объемлющии;
     Радуйтеся, Божиих милостей и щедрот нам подателие.
     Радуйтеся, безпомощных скории помощницы;
     Радуйтеся, сирых и вдовиц кормителие.
     Радуйтеся, болезней душевных и телесных врачи безмезднии;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 10
      Спасти хотя души своя, да неосужденно предстаните на судищи Христове, вся сущая в мире доброхотне оставили есте, тесным путем покаяния в безмолвие Заилийских гор возшедше, слез течением и твердым духовным трудолюбием богодарованныя таланты ваша умножили есте, моление теплое за всех Богу приносяще, да вси в познание Истины приидут, поя Богу: Аллилуиа.

Икос 10
      Стеною непоколебимою богоприятных молитв и ходатайств ваших, преподобномученицы, остените град и страну нашу, утоляя праведный гнев Божий, поражающий нас, грешных и непотребных бездождием и гладом, тлетворными ветры и болезньми, селями и землитрясении, да сих избавльшеся, благодарственно поем:
     Радуйтеся, блаженнии, в боголюбии на земли пожившии;
     Радуйтеся, милости и сострадания преисполненнии.
     Радуйтеся, благодатных даров верным раздаятелие;
     Радуйтеся, приходящим к вам с верою и любовию предстательство и покрове.
     Радуйтеся, изнемогающим от уныния и печали помощницы;
     Радуйтеся, юных наставницы и старцев питателие.
     Радуйтеся, разтленных обычаев искоренителие;
     Радуйтеся, ко спасению вечному добрые путеводителие.
     Радуйтеся, кротости, воздержания и покаяния учителие;
     Радуйтеся, Церкве Христовы ограждение и Православия поборницы.
     Радуйтеся, пастырей учитилие и монашествующих наставницы;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 11
      Пение всеумиленное от юности Христу, Солнцу Правды, утреневав приносили есте, богоноснии отцы, и умную чистоту безстрастием стяжав, церкви нерукотворенныя явилися есте Духа Святаго, Имже непрестанно в сердцах ваших Отцу Небесному воспевали: Аллилуиа.

Икос 11
      Светозарная светила во граде Алма-Ате и всей Казахстанской стране явилися есте, просвещая люди светом истиннаго боговедения и разгоняя мрак безбожия, Трисолнечнаго света евангельскаго сиянием, имже и наша, грехом помраченная, смыслы просветите, вопиющих вам таковая:
     Радуйтеся, чистоту сердечную и телесную до смерти опасно хранившии;
     Радуйтеся, целомудренно и праведно на земли пожившии.
     Радуйтеся, веру свою во страдании, яко злато в горниле, очистившии;
     Радуйтеся, стезею тесною воздержания и оскудения иноческаго шествовавшии.
     Радуйтеся, яко тою широты рая Божия достигшии;
     Радуйтеся, от горния обители земныя во Обители Небесныя удобь возшедшии.
     Радуйтеся, со Ангелы и лики всех святых Трисвятую песнь Богу воспевающии;
     Радуйтеся, яко память ваша с похвалами и успение со Святыми.
     Радуйтеся, яко имена ваша честны и благоговейны в Церкве Христовой;
     Радуйтеся, светильницы трисолнечнаго света, умы и сердца верных озаряющии.
     Радуйтеся, стадо свое от волков хищных соблюдающии;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 12
      Благодать небесныя славы от Христа Бога восприявше, пречудныя и кроткия страстотерпцы Христовы, земных нас не оставляете без помощи и заступления вашего, утверждая нас в вере, укрепляя в надежде, совершенствуя в любве и наставляя в мудрости, и научая благих подателю Богу пети: Аллилуиа.

Икос 12
      Поюще дивнаго во святых Своих Бога нашего, прославляем вас, блаженнии, с мученики Христовыми сочетаемыя и с лики преподобных вчиняемыя, с девственники ликовствуемыя, с постники и пустынники ублажаемыя, с нимиже непрестанно песнь хвалебную Церкве Зиждителю возсылаете и молитеся о нас таковая вам глаголющих:
     Радуйтеся, Церкве Русския украшение;
     Радуйтеся, Казахстанския страны заступление.
     Радуйтеся, граду Алма-Ате сокровища пребогатыя;
     Радуйтеся, во благоухании святыни почиваяй.
     Радуйтеся, всех с верою приходящих к вам благодатно освящаяй;
     Радуйтеся, усердно призывающим вас помогаяй.
     Радуйтеся, возлагающим по Бозе упование на вас пособствуяй;
     Радуйтеся, крепции защитницы наша от врагов видимых и невидимых.
     Радуйтеся, приснии нам ходатаи спасения;
     Радуйтеся, телес наших благодатныя целебницы.
     Радуйтеся, о душах наших усердныя ко Господу молебницы;
     Радуйтеся, преподобномученицы Серафиме и Феогносте, молитвенницы наши и заступницы, от Бога прославленнии.

Кондак 13
      О, пречуднии и кротции страстотерпцы Христовы, преподобнии Серафиме и Феогносте, всем с верою и любовию вас призывающим скорые и теплие помощницы, приимите от нас недостойных малое сие со усердием приносимое вам благодарение и заступите ны от всех врагов видимых и невидимых и вечныя муки избавитися нам Господа умолите, да с вами в невечернем дни Царствия Божия воспоем: Аллилуиа.
Этот кондак читается трижды, затем икос 1-й и кондак 1-й

Молитва преподобномученикам иеромонахам Серафиму и Феогносту Алма-Атинским
      О, Богоблаженная двоице друзей Христовых, преподобнии страстотерпцы Серафиме и Феогносте! Казахстанския страны светильницы достопочтенныя, града Алма-Аты защитницы и покровителие Богодарованныя, православных всех неусыпныя наставницы! На небеси Богопросвещенными душами вашими Престолу Божию предстоящии, на земли же мучинечески за Христа пострадавшими телесы вашими на горах Заилийских почивающии и различная дарования духовная всем с верою и любовию к вам приходящим источающии! Милостивым призрением благосердия вашего призрите на люди, святую память вашу почитающия, на месте исповеднических подвигов и преподобнических трудов ваших святый гроб ваш обстоящия и теплаго вашего ко Господу ходатайства во обдержащих нуждах просящия. Вси бо мы по множеству грехов наших не дерзаем возвести на Небо очес наших, долу поникших, вы же, яко стяжавшии дерзновение ко Господу и ныне со Ангелы Ему предстоящии, принесите о нас благоуханные молитвы ваша, во еже избавитися нам от глада, потопа, труса, огня, меча, нашествия иноплеменник и междоусобныя брани, от всякия скорби, зол и болезни душевныя и телесныя от людей и диавола по грехом нашим бывающия. Да сих избежавше, Господу усердно работающе, молитвами вашими и теплым предстательством внидем в нескончаемый покой Царства Небеснаго и тамо с вами и лики всех святых прославим Великое Имя Святыя Троицы, Отца и Сына и Духа Святаго во веки веков. Аминь.

Тропарь преподобномученикам Серафиму и Феогносту Алма-Атинским
Тропарь, глас 1:
      Любве ради Христовы отечество свое оставльше, вся мира сего красная, яко скороисчезающая, презревше, горняго Иерусалима взыскующе, на горах Тянь-Шаня подвигами благочестия Святую Троицу прославили есте. И венцами добропобеднаго мученичества украсившеся, граду Алма-Ате богодарованнии покровители явилися есте, преподобномученицы Серафиме и Феогносте, православия мужественнии исповедницы. Темже и мы, духовная чада ваша, любовию вопием: слава Давшему вам крепость, слава Венчавшему вас, слава Подающему вами милости и исцеления.

Кондак, глас 2:
      Благое иго Христово на себе восприимше, и легкое бремя Его любовию облобызавше, житием своим Агнца Божия проповедавше, за истину, радуяся, пострадали есте, и в покой небесный прешедше, с лики святых Престолу Божию предстоите, преподобномученицы Серафиме и Феогносте, граду Алма-Ате испросите мир и всем чтущим вас велию милость.

Ин кондак, глас 8:
      Во страданиих веру Христову исповедавших преподобномучеников Серафима и Феогноста ублажаем и почитаем днесь, вернии, яко любве евангельския служителей, чистоты душевныя и телесныя хранителей, правды Божией ревнителей, и житием сих и кончиною назидаеми, поем: радуйтеся молитвенницы наши и заступницы, от Бога прославлении.

Величание
      Ублажаем вас, преподобномученицы Серафиме и Феогносте, и чтим святую память вашу, наставницы монахов и собеседницы ангелов.


Православный календарь

Август 2018
Пн Вт Ср Чт Пт Сб Вс
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.