Вход

Изображения в галерее

813_62.jpg
814_98.jpg
825_28.jpg

Главная

АКАФИСТ преподобному Герману Аляскинскому, чудотворцу


Герман Аляскинский с житием. США. 1980-е гг.

Кондак 1
      Изрядный чудотворче и преславный угодниче Христов, Богоносне отче наш Германе, Аляски украшение и всея Америки радование, воспеваем ти вси похвалы сия. Ты же яко небесный покровитель страны нашея и всемощный пред Богом молитвенник, не престай молиться о нас, чадех твоих, усердно тебе вопиющих:
     Радуйся, преподобне отче наш Германе, Аляски и всея Америки преславный чудотворче.

Икос 1
      Ангелов Творец предызбра тя, отче Германе, быти проповедником Православныя Веры в Новой Земле и основоположником иноческаго подвижничества в Дальней Западней стране и посла тя, яко Апостола Павла к язычникам, да возсияет свет Православия во всех концех земли. Благодарные же людие воспевают тебе, яко небесному покровителю, похвалы сия:
     Радуйся, отче наш Германе, Апостолов последователю;
     Радуйся, светом истинныя Веры землю Американскую осветивший.
     Радуйся, исконное пустыннолюбие стяжавший;
     Радуйся, Божией Материю от смерти спасенный.
     Радуйся, Пустыней Саровской издетства взращенный;
     Радуйся, Валаама отрасль пречестная.
     Радуйся, Фаворским светом озаренный;
     Радуйся, тьму дикаго Запада Христом просветивший.
     Радуйся, преподобне отче наш Германе, Аляски и всея Америки преславный чудотворче.

Кондак 2
      Видя, яко пламенной любовию ко Господу воспылал еси, Ему Единому служити восхотел еси, яко дар великий принося Богу, юность твою, во обитель Саровскую, последи же Валаамскую путь свой управил еси, идеже в сонме инок воспевал неустанно «Иисусе сладчайший, спаси нас грешных»: Аллилуиа.

Икос 2
      Разум духовный тебе от юности даровася, святче Божий, да уразумееши красоту небесную и сладость ея. Сего ради от премудраго игумена Назария, наставника преподобнаго Серафима Саровскаго, поучался еси премудрости Божией и путем Господним, тем же святая Церковь восхваляет тя сицевая:
     Радуйся, в дебрех Саровских старцу-пустыннику послуживый;
     Радуйся, яко пчела, от великаго Феодора духовный нектар в Санаксаре собравый.
     Радуйся, с другом Варлаамом братию Валаамскую утешавый, и нас утеши;
     Радуйся, дальних пустынников посещавый, и нас посети.
     Радуйся, и сам на поле «Германовом» пустынником ставый;
     Радуйся, тезоименитому твоему Герману, первоначальнику Валаамскому, святостию уподобился еси.
     Радуйся, за кротость и тихость братией Валаамстей почитаемый;
     Радуйся, ныне всей Церковию Вселенстей прославляемый.
     Радуйся, преподобне отче наш Германе, Аляски и всея Америки преславный чудотворче.

Кондак 3
      Сила Вышняго повеле Богомудрому первосвятителю Церкве Российския Гавриилу послати проповедников Православныя Веры в землю Американскую и тебе, преподобне Германе, сей апостольский жребий прияти. Тем же вси людие, просвещеннии светом Христовым, твоими трудами и личным примером жития твоего, воспеша Господеви: Аллилуиа.

Икос 3
      Имея тщание не токмо о подвизе иноческом, но и рвение апостольское в проповедании Христа распята людем, седящим во тьме языческаго неведения, ты, преподобне Германе, с великой силой явил еси. Поминающе болезни и труды твоя, мы с любовию восхваляем тя сице:
     Радуйся, безропотное послушание игумену явивый;
     Радуйся, в дальний путь на проповедь Добротолюбия до конца вселенныя изшедый.
     Радуйся, любовь твою к Отечеству не угасивый;
     Радуйся, новую отчизну твою пламенно полюбивый.
     Радуйся, созерцательнаго подвига в Америке родоначальниче;
     Радуйся, отражение преподобних Ладоги Святорусской.
     Радуйся, «Северную Фиваиду Российскую» в Америку перебросивший;
     Радуйся, зачатки святости, яко клад драгоценный, в Новый Мир вложивый.
     Радуйся, преподобне отче наш Германе, Аляски и всея Америки преславный чудотворче.

Кондак 4
      Ни буря грозных волн океана, ни быстрины великих рек, ни леса темные, не могли угасить чувств твоих, отче Германе, от благодеяний тебе игумена Назария, в благодарности взывающа: «Аз в уме воображаю любимый мною Валаам, на него всегда взираю чрез великий океан, и пою Богу: Аллилуиа».

Икос 4
      Слышим мы радость твою апостольскую, о преподобне отче наш Германе: «Восхитился аз духом: пребывая между ведром и ненастием, меж радостей и скуки, между довольством и недостатком, сытостью и гладом, теплом и хладом, при всех моих печалях обретаю нечто, веселящее меня, егда слышу ревность братскую о проповеди Слова Божия, и прихожу от радости в восторг», мы же тебе вопием таковая:
     Радуйся, Богопропроведниче, вдохнови нас твоею ревностию;
     Радуйся, Боголюбче, вдохни радость в сердца наша.
     Радуйся, молитвенниче за всех унывающих;
     Радуйся, душ смятенных умирителю пресладостный.
     Радуйся, яко смирением твоим подаеши исцеление;
     Радуйся, всем отшедшим от Православия грозный учителю.
     Радуйся, любовиею твоею направляяй на путь правый;
     Радуйся, кротостию твоею окрыляеши души наша созерцать горнее.
     Радуйся, преподобне отче наш Германе, Аляски и всея Америки преславный чудотворче.

Кондак 5
      Боготочною молитвою облагоухал еси дебри острова Еловаго и яко звезда монашеская возсиял еси, преподобне, назвал его Новым Валаамом, яко старый Валаам Новым Афоном назывался, да озариши светом любве твоея всю землю Американскую и да со всех концов ея иноки и вси людие воспоют тепле Богу: Аллилуиа.

Икос 5
      Видяще смирение твое, отче наш Германе, вси изумляшеся зело, како ты от великаго служения священническаго отреклся еси, Антонию Печерскому, первоначальнику монашества на Руси, подражая, яко же и той подражал Великому Антонию, первому в мире иноку. Тако и ты, первоначальниче на Дальнем Западе, по великому смирению твоему, восхотел еси по чину Афонскому простым иноком быти, глаголя: «Христианин бо есть воин, грядущий сквозь невидимыя полки вражия к небесному Отечеству», сего ради взываем ти таковая:
     Радуйся, смирением Небеснаго Отечества достигнувый;
     Радуйся, в сонме преподобных первым игуменом в Америце ставый.
     Радуйся, яко вождь велий на невидимой брани для всей рати иноческой был еси;
     Радуйся, Новый Валаам на месте подвигов твоих завещал еси.
     Радуйся, мощи твоя предреченной обители даровавый;
     Радуйся, тайны монашества усердный хранителю.
     Радуйся, братии, тобою собираемой, теплый защитниче;
     Радуйся, облачающий нас в новое желание и любовь будушаго века.
     Радуйся, преподобне отче наш Германе, Аляски и всея Америки преславный чудотворче.

Кондак 6
      Проповедует пустыня северная подвиги и чудеса твоя и тя, яко новую ветвь виноградника Церкве Российския, на земле Американской прозябшую, дебри бо Аляски и леса ея молитвою твоею облагоухал еси, подвижникам древним подражая, в безмолвии ночном взывал еси к Богу: Аллилуиа.

Икос 6
      Возсиял свет Евангелия от поучения твоего: «Христианин должен приводит себя в надежду и радость и отнюдь не внимать наносному отчаянию. Тут нужен щит веры». Принимая оный от тебя, с радованием взываем таковая:
     Радуйся, щит веры живой и разумной всем подаваяй;
     Радуйся, тьму язычества в нас посекаяй.
     Радуйся, суету и уныние богомыслием разгнал еси;
     Радуйся, яко отец родной всех немощных по сей день охраняеши.
     Радуйся, яко вождь духовный ны в горняя призываеши;
     Радуйся, убогим себя называя, нас смирению поучал еси.
     Радуйся, сердца наша радостию твоею уязвил еси;
     Радуйся, надеждою, яко радугой, нас осенил еси.
     Радуйся, преподобне отче наш Германе, Аляски и всея Америки преславный чудотворче.

Кондак 7
      Хотя возсияти свету Богопознания в стране язычестей, благоволи Господь смело сеяти семена Православныя Веры, и повеле тебе, преподобне, да всех научиши и защищати истинную Веру. Ты же, яко пастырь безстрашный, к нам взываеши: «Не бойся, малое стадо, се аз звоню Пасхальным звоном. Христос Воскресе!»: Аллилуиа.

Икос 7
      Дивно в вышних молитвенно пребывал еси, преподобне, но и в нижних на земли сущих не забывал еси, наипаче же о сиротах бездомных велие попечение явил еси, устрояя приют для них и училище, идеже заповедям Господним поучал их. Сих ради трудов твоих приими от нас похвалы сия:
     Радуйся, нищих и сирот защитителю;
     Радуйся, яко приют устроив, страху Божию их обучал еси.
     Радуйся, великим трудом землю вскопав, во сто крат плод принесл еси;
     Радуйся, хлебом небесным и земным сиропитателю.
     Радуйся, яко живою водою Евангелия всех напоил еси;
     Радуйся, единой малой рыбкой чудесно приумножив, многих насытил еси.
     Радуйся, молчальниче не от мира сего;
     Радуйся, учителю непрестанно молитися и Бога всем сердцем любити.
     Радуйся, преподобне отче наш Германе, Аляски и всея Америки преславный чудотворче.

Кондак 8
      Странное чудо яви человеколюбец Господь в тебе, преподобне, яко источник утешения людям своим, дарова тебе дар прозрения и исцеления. Делами бо своими и словесы многих привел еси к любви Божией, тем же сиянием подвигов твоих просвещеннии, люди взывали ко Господу: Аллилуиа.

Икос 8
      Весь бо избранник Божий был еси, люди новопросвещеннии светом Христовой Веры притекаху к тебе в болезнех и печалех. И ты, яко отец чадолюбивый, предстательствовал за всех в молитвах, источая исцеления и утешая всех, к тебе притекающих за помощью, тем же славяща тя духовная чада твоя:
     Радуйся, душ смятенных умирителю пресладкий;
     Радуйся, врачу наш благодатный и помощниче скорый.
     Радуйся, яко во время мора к Сретению Господню всеусердно прибегающий;
     Радуйся, в честь Сретения же первый храм на Еловом, яко преподобный Нил, нарекший.
     Радуйся, бездомных защитителю от врагов видимых и невидимых;
     Радуйся, обуреваемым, яко «Скала Монашеская», надежное пристанище.
     Радуйся, яко «нянькой» себя народу новому назвавший;
     Радуйся, любвеобильный авва, грядущее яко настоящее провидевший.
     Радуйся, преподобне отче наш Германе, Аляски и всея Америки преславный чудотворче.

Кондак 9
      Всего естества ангельскаго собеседниче был еси, блаженне отче наш Германе, еже сам о себе свидетельствовал еси, како с тобою в пустыни ангели быша, святую Агиасму1 на праздник Богоявления освящая, и с ними ты сладостно воспевал еси. Земнородные же, слушая сие, дивилися, взывая вкупе: Аллилуиа.

Икос 9
      Витии многовещаннии не возмогут исчислить чудеса твоя, людям явленныя, егда и моря волнение, и пожар лесной молитвами своими утишал еси. Егда же бысть наводнение велие, ты молитвою своею у иконы Божией Матери остановил еси море, рекши: «Далее сея черты не прейдет вода». Тем же ти воспеваем сице:
     Радуйся, стихии водныя усмирителю дивный;
     Радуйся, от пожара леснаго избавителю преславный.
     Радуйся, святителя Иннокентия, в море взывавшаго к тебе, услышавый;
     Радуйся, священномученика Патриарха Тихона к себе призвавый.
     Радуйся, в мори плавающим кормчий надежный;
     Радуйся, яростных медведей кротостию твоею приручивый.
     Радуйся, гнев злых людей тихостью исправлял еси;
     Радуйся, яко дивное благоухание с небес к тебе прибегающим посылал еси.
     Радуйся, преподобне отче наш Германе, Аляски и всея Америки преславный чудотворче.

Кондак 10
      Спасительную и честную кончину твою восхваляем, предузнал еси день и час блаженнаго восхождения твоего от земли на небо. Преславно бысть и погребение твое, егда тридесять дней бысть на море волнение и исполнися предречение твое о погребении твоем; ученик же твой Герасим, обоняв благоухание дивное и видя свет невечерний, яко овеян был еси в час смерти твоей, воспел Богу: Аллилуиа.

Икос 10
      Стена еси иноческому роду, отче, яко житием твоим и при кончине твоей явил еси дивное чудо: тело бо твое в теплой храмине множество дней пребысть без истления. Люди же, видяще в час кончины твоея огненный столп до небеси, возопиша тебе таковая:
     Радуйся, праведною кончиною в святости твоей нас уверивый;
     Радуйся, яко огненным столпом бысть путь восхождения твоего на небеса.
     Радуйся, тело твое благоуханное в наследие нам оставивый;
     Радуйся, яко у раки мощей твоих хромые возсташа и глас твой из гроба слышаша.
     Радуйся, яко землею с могилы твоея недужние исцелил еси;
     Радуйся, яко источник воды святой и целебной нам даровал еси.
     Радуйся, яко призываему на Еловый, Старцу Герасиму наяву явился еси;
     Радуйся, тайно, яко живый, на Еловом в тишине пребываеши.
     Радуйся, преподобне отче наш Германе, Аляски и всея Америки преславный чудотворче.

Кондак 11
      Пение непрестанное Святой Троице вознося в пустыни своей, среди дикой природы, ты, отче святый, духом прозревал собор святых угодников Божиих, на земли Американской насажденный и тобою хранимый, взывал еси с лики ангельскими: Аллилуиа.

Икос 11
      Светоподательный светильник был еси всему будущему иноческому чину, соратникам твоим святым дальней Америки, ранее чуждой истиннаго Православия, о преподобне отче наш Германе, защищая от напастей и ходатайствуя о нас, глаголя: «Не в морских токмо волнах обуреваемся, но среди прелестнаго и многомятежнаго мира страждем и скитаемся, к небесному нашему Отечеству грядем», сего ради вопием ти:
     Радуйся, верный сподвижниче Иоасафа, первосвятителя Русской Америки;
     Радуйся, свидетелю ревности Иувеналиевой даже до смерти.
     Радуйся, провозгласивший новомучеником алеута Петра;
     Радуйся, наставивый ученика своего Сергия стать ангелов собеседником.
     Радуйся, предвидевый святительство Иннокентия Алеутскаго, первоиерарха Всероссийскаго;
     Радуйся, чудесно призвавший себе подобнаго инока Герасима возобновити Новый Валаам.
     Радуйся, оградивый от темницы Адриана пресвитера на Руси безбожием плененной;
     Радуйся, вдохновивый святителя Иоанна потрудитися тебя прославити.
     Радуйся, преподобне отче наш Германе, Аляски и всея Америки преславный чудотворче.

Кондак 12
      Благодать твою и велие твое дерзновение пред Богом ведуще, тебе, преподобне отче, молимся, молися тепле ко Господу да оградит Церковь Свою святую от духа мира сего, посягающаго на сынов Ея неверием, затмевающим радость жизни, Богом дарованную на создание Града Божия, дабы восходить от земли на небо, и пети Богу: Аллилуиа.

Икос 12
      Поюще твое прославление, ублажаем тя, преподобне, яко многомощна, предстоя пред Лествицей «Восхождения Божественнаго» от земли на небо. Ты же, стяжавший Духа Святаго и осветивший земли наши, услыши нас, низу стоящих, вопиющих к тебе таковая:
     Радуйся, молитву чистую стяжавый теплотою сердца;
     Радуйся, действие святое приобретый.
     Радуйся, слезы сердечныя обильно источивый;
     Радуйся, тишины и мира помыслов достигнувый.
     Радуйся, очищение ума ради созерцаний Таин Божественных;
     Радуйся, осияние сокровенное и странное.
     Радуйся, просвещение сердца Духом Святым;
     Радуйся, вкусивый совершенство и нас к сему призываяй.
     Радуйся, преподобне отче наш Германе, Аляски и всея Америки преславный чудотворче.

Кондак 13
      О, преславный угодниче Божий, преподобне и Богоносне отче наш Германе, приими малое сие моление наше, в похвалу тебе возносимое, и предстоя ныне Престолу Господа Вседержителя, непрестанно молися о нас, чадах твоих смиренных, слышащих глас твой, к нам обращенный: «От сего дня, от сего часа, от сей минуты, да будем любить Бога превышше всего и творить святую Волю Его», поющих Ему: Аллилуиа.
Этот кондак читается трижды, затем икос 1-й и кондак 1-й

Молитва преподобному Герману Аляскинскому чудотворцу
      О предивный угодниче Божий, преподобне отче наш Германе, ты подвигом добрым подвизался в стране суровой природы и в малом сем ты верен был в служении Богу, по глаголу Господню: «В малом был еси верен, над многим тебя поставлю». И ныне поставлен ты небесным покровителем, яко ангелом хранителем, страны Дальняго Запада, Аляски и Америки и хранителем всех православных в странах новопросвещенных Верой нашей Православной, молися прилежно за монашеский чин, всех православных христиан и всех страждущих и томящихся в юдоли мирской суеты, да сохранит на земле Господь Церковь Воинствующую в чистоте Православия, да оградит всех людей доброй воли от темных сил вражиих и вселит в сердца наша жажду чистоты веры и благочестия, дух мира и любви, кротости Христовой и смирения, скорбящим — утешение, алчущим правды духовной — пищу небесную, и да улучив желаемое, обрящем праведное воздаяние в день Страшнаго Суда и со всеми святыми воспоем Живоначальную Троицу: Отца Непостижимаго, Истиннаго и Единороднаго Сына, и Святаго Утешителя Духа во веки. Аминь.

Молитва иная
      О преподобне отче Германе, новоявленный угодниче, Аляски просветителю! Молим тя: ходатайствуй нас, грешных рабех Божиих (имена), пред престолом Вседержителя Бога, да дарует нам вся потребная животу и благочестию, душам и телесем нашим здравие, во всех благих преспеяние и Свою всесильную помощь во всяких искушениих, бедах же и напастех, воздвизаемых на ны от врага спасения нашего. Наипаче же испроси, угодниче Христов, всем нам грехов отпущение, христианскую кончину жития и наследие Царствия Небеснаго у Христа Бога нашего, Емуже честь и слава, со Отцем и Святым Духом, ныне и присно и во веки веков.

Тропарь преподобному Герману Аляскинскому
Тропарь, глас 7:
      Звездо пресветлая Церкве Христовы, на Севере просиявшая, вся к Царствию Небесному путеводящая, учителю и апостоле истинныя веры, предстателю и заступниче гонимых, украшение изящное Святыя Церкве во Америце, преподобне отче Германе Аляскинский, молися ко Господу Спасу нашему, спастися душам нашим.

Ин тропарь, поемый во Америце, глас 3:
      Преподобне отче наш Германе, первый светильниче в земли нашей просиявый, приносим вси тебе похвалы сия, ты же, яко имея дерзновение ко Господу, буди нам заступник и утешитель и Церкве нашея покровитель дивный, да вси со умилением зовем ти: радуйся, отче наш Германе, Аляски и всея Америки преславный чудотворче.

Ин тропарь, глас 1:
      Лозу Православия принесл еси в Америку из России благочестивыя, и, удобрив корень постническими трудами, и напоив обильне молитвенными слезами, плоды принесл еси виноград возлюбленный, Германе, преблаженне отче наш. Темже и Бог тя прослави, яко апостола преподобнаго, нетлением мощей и благодатию чудес, от нихже почерпающе благодеяния, восхваляем тя: слава Давшему ти крепость, слава Венчавшему тя, слава Даровавшему тя Америце, светило Православия.

Кондак, глас 3:
      Свет вечный Христа Спаса нашего тя на путь евангельский во Америку настави, возвестити весть о мире евангельскую. Днесь Престолу Славы предстоя, молися о стране твоей и людех ея, о мире всего мира и спасении душ наших.

Кондак, глас 8:
      Взбранному Воеводе своинствовався, в брань вступил еси на духа злобы в поле преподобия и апостольства. И, пожав победы обоюдныя, воздвизаеши нас вопити тебе: радуйся, святе Германе, апостоле преподобный.

Ин кондак, глас 8:
      Валаама постриженник честный, возлюбленник Божия Матери бывый, ревнитель подвигов древних, подвижник новый, молитву, яко копие и щит, приемый, страшен демоном и тьме языческой ставый, Германе преподобне, моли Христа Бога спасти души наша.

Величание
      Ублажаем тя, преподобне отче Германе, и чтим святую память твою, наставниче монахов и собеседниче ангелов.

     Прим.
  • 1 Агиасма — здесь: вода освящаемая на праздник Богоявления и Крещения по особому литургическому чину. В другом значении этим словом называется любая иная православная святыня.^




  • Православный календарь

    Декабрь 2018
    Пн Вт Ср Чт Пт Сб Вс
    26 27 28 29 30 1 2
    3 4 5 6 7 8 9
    10 11 12 13 14 15 16
    17 18 19 20 21 22 23
    24 25 26 27 28 29 30
    31 1 2 3 4 5 6

    События календаря

    Нет событий

    Обсуждение на форуме


    Статистика:Каталоги:Рекомендуем:
    Яндекс.Метрика
    Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
    Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.