Вход

Изображения в галерее

814_42.jpg
427.jpg
829_75.jpg

АКАФИСТ святому мученику Александру Каталитскому


Мученик Александр Каталитский. Дерево, левкас, паволока, темпера, позолота. 10,5х13 см. Иконописная мастерская Е.Ильинской (icon-art.ru)

Кондак 1
      Избранный страстотерпче от града Каталита, во страдании своем крещение приявый, и тем благодати исполнивыйся, приими моление наше, яко имеяй дерзновение ко Господу, от всяких нас бед свободи, верно зовущих ти:
     Радуйся, Александре, мучениче Каталитский.

Икос 1
      Ангелов и всея твари Творец Премилосердный, приемлющий первых с последними, избра тя во утверждение веры нашея, мучителя тя в мученики претвори словом истины, мы же, дивящеся таковому о тебе Промыслу Вседержителя, со умилением вопием ти:
     Радуйся, града Каталита украшение;
     Радуйся, веры Православныя утверждение.
     Радуйся, силою свыше просвещенный;
     Радуйся, Господом вразумленный.
     Радуйся, обращением твоим Ангелов удививый;
     Радуйся, лик святых возвеселивый.
     Радуйся, Александре, мучениче Каталитский.

Кондак 2
      Видя гонение нечестивых на христиан, возопи Господь гласом велииим, возводя ум твой на высоту богоразумия, повеле пострадати с избранными, сего ради в надежде на неизреченное милосердие и откровение Божие вопием Ему: Аллилуиа.

Икос 2
      Разумно уразумев Александре в словесех сих Господа, со братией своею Алфеем и Зосимою дерзновенно исповедал себе быти Христовым, темже похваляюще дерзновение твое, глаголем ти сице:
     Радуйся, жизни своея долгоденствие в идолослужении презревый;
     Радуйся, за Христа, Бога Истиннаго, пострадати восхотевый.
     Радуйся, со братией Пресвятыя Троицы образе и носило;
     Радуйся, надежды нашея веро и сило.
     Радуйся, научаяй присно возносити ум к Богу;
     Радуйся, обретый истинную от грехов свободу.
     Радуйся, Александре, мучениче Каталитский.

Кондак 3
      Сила милосердия Божия на тебе открыся, Христос Бог наш, повелеваяй солнцу Своему восходити над злыми и добрыми, просвети сердце твое богослышанием, Емуже во страдании своем воспел: Аллилуиа.

Икос 3
      Имея сердце, Господом озаренное, по внушению Его, пострадати изволивый за имя Христово, прием во уста, аки манны небесныя, олово раскаленное, предая дух, Господу поклонивыйся, мы же, терпение твое восхваляюще, зовем ти таковая:
     Радуйся, мучениче, от рук беззаконных израненный;
     Радуйся, исповедания ради оловом опаленный.
     Радуйся, Господу сердце свое покоривый;
     Радуйся, чашу страданий до конца испивый.
     Радуйся, во искушениих терпению нас научаяй;
     Радуйся, верныя мужеством твоим насыщаяй.
     Радуйся, Александре, мучениче Каталитский.

Кондак 4
      Бурею одержими помышлений злобных, нечестивии ведоша святаго Марка истязати, призва тя, кузнече, и братий твоих, во мучители, вы же, видя веру непоколебиму, дивящеся чуду, воспели Христу Богу: Аллилуиа.

Икос 4
      Слышавше от тебе нечестивии исповедание Христовой веры, распыхахуся на тя злобою, и умерщвлению предаде, сего ради мир православный славит тя сице:
     Радуйся, мучеников соревнителю;
     Радуйся, Света Христова носителю.
     Радуйся, веры бесовския посрамление;
     Радуйся, грешников вразумление.
     Радуйся, вмале Господу послуживый;
     Радуйся, двери райския с честию открывый.
     Радуйся, Александре, мучениче Каталитский.

Кондак 5
      Боготечней звезде уподобился Александре, Солнце правды проповедал еси, тьмою одержимым, и во хвалении Господа смерть приявый, тому купно с тобою воспеваем: Аллилуиа.

Икос 5
      Видя чудеса силы Божия на тебе бываемая, восклицаю: «Пение ми даруй, Боже мой, воспети и глаголати подвиги страстотерпца твоего и мученика Александра, в лице мучеников возсиявшаго, и молящагося непрестанно о всех нас», тому, Господи, в Тебе прославльшемуся воспеваем:
     Радуйся, яко мужеством твоим небожители возвеселишася;
     Радуйся, подвигом твоим многи укрепишася.
     Радуйся, Света Христова носителю;
     Радуйся, молящихся тебе на Небеси водителю.
     Радуйся, цвете благоуханный;
     Радуйся, Александре мучениче православный.
     Радуйся, Александре, мучениче Каталитский.

Кондак 6
      Проповедник благовестный, Святый Марк, во страдании своем и терпении, тебе, Александре, примером послуживый и Христу Богу нашему пети научивый: Аллилуиа.

Икос 6
      Возсиявый Господь в Воскресении Своем, смерти победителю, избави тя от адова истления и жизнь даровав, мы же в надежде живота вечнаго молящеся не престаем восклицати:
     Радуйся, сердце для Господа открывый;
     Радуйся, язычество во языцех посрамивый.
     Радуйся, образе превысшаго богословия.
     Радуйся, достигший небеснаго сословия.
     Радуйся, адова тления избежавый;
     Радуйся, кузнече, подвигом исповедничества спасение свое сковавый.
     Радуйся, Александре, мучениче Каталитский.

Кондак 7
      Хотяй веру православную утвердити, возжег сердце твое Господь, аки светильник, мы же, зряще во свете Христа Бога нашего, поем Ему: Аллилуиа.

Икос 7
      Новаго мученика и страстотерпца показа тя Господь, новаго человека Божия тя являя, новую землю и новое небо отверзая нам, пети понуждая сице:
     Радуйся, яко во уповании на Бога не посрамился еси;
     Радуйся, яко во Царствии Небесном водворился еси.
     Радуйся, яко Бог прослави тя десницею крепости.
     Радуйся, посрамивый бесовския дерзости.
     Радуйся, скорби наша молением твоим растворяеши;
     Радуйся, любовию к Богу сердца наша запаляеши.
     Радуйся, Александре, мучениче Каталитский.

Кондак 8
      Странное чудо о тебе познаша, устранимся суетнаго мира, ум на Небеса возведем, идеже ты с Господем пребываеши, поя: Аллилуиа.

Икос 8
      Вси поем подвиг твой, Александре, почитаем страдание, хвалим долготерпение, ублажаем кончину твою, воистинну, что добро или что красно, но еже жити, паче умрети вкупе во Христе Иисусе за веру свою, мы же, недостойнии, единеми усты, единым сердцем славим и воспеваем страдания твоя сице:
     Радуйся, слова Божия устрашивыйся;
     Радуйся, воле Его покоривыйся.
     Радуйся, образе кончины святыя давый;
     Радуйся, за грехи земли своея пострадавый.
     Радуйся, кончиною своею Богу угодивый;
     Радуйся, даже до смерти мученическия Его возлюбивый.
     Радуйся, Александре, мучениче Каталитский.

Кондак 9
      Всего себе Господу Богу предав, страстотерпче Христов, егда узрел помышление нечестивцев — раскрыти уста твоя и олово кипящее влити, сего ради яко великий таинник Божия благодати, удостоился еси венца нетленнаго, поя Богу: Аллилуиа.

Икос 9
      Вития многовещанныя, яко рыбы безгласныя, не возмогут изрещи спасительный промысл о человецех — мучитель с лики мучеников вчиняется, и ризою светлою облачается, моляще о нас, поющих ти сице:
     Радуйся, ко Господу во страдании пришедый;
     Радуйся, яко приял еси венец победы.
     Радуйся, всех борющихся с грехами покровителю;
     Радуйся, покаяния нашего пред Богом поручителю.
     Радуйся, яко молитвами твоими Господь оставляет прегрешения;
     Радуйся, помогаяй нам перенести скорби и поношения.
     Радуйся, Александре, мучениче Каталитский.

Кондак 10
      Спастися хотяй всем человеком, и в разум истинный прийти, иже на крови мучеников Церковь свою основавый, Христос Бог наш, избравый тя, Александре, во основание новыя храмины своея, да сущия в ней верно вопиют: Аллилуиа.

Икос 10
      Стена еси всем к тебе прибегающим и необоримое ограждение миру православному, зане тако благоволи о тебе Небеси и земли Творец, темже и нас научи приглашати тебе:
     Радуйся, честное Христово избрание;
     Радуйся, непорочное Богови благоухание.
     Радуйся, от нечаяных зол чтущих тя покрывающий;
     Радуйся, души наша миром исполняющий.
     Радуйся, сокровенная мира духовнаго нам открывающий;
     Радуйся, познати истину нам помогающий.
     Радуйся, Александре, мучениче Каталитский.

Кондак 11
      Пение похвальное приносим ти, страстотерпче Александре, устне сердца смиренно любовию отверзающе, Богу укрепльшему и прославльшему тя зовем: Аллилуиа.

Икос 11
      Светом невещественным возсиял еси в селениих святых и радости неизреченныя исполнивыйся, со ангелы хвалу Господу воспеваеши, и нас, мраком суетнаго мира озлобленных, не оставляеши, зовущих ти сице:
     Радуйся, пред Царем Царей обеты хранити помогаеши;
     Радуйся, терпети в вере, надежде и любви научаеши.
     Радуйся, плененных во гресех свободителю;
     Радуйся, от соблазнов мира сего защитителю.
     Радуйся, доброделающих предстателю;
     Радуйся, пред иконою твоею молящихся скорый послушателю.
     Радуйся, Александре, мучениче Каталитский.

Кондак 12
      Благодать дана ти от Бога, Александре, предстоя Престолу Царя Славы, молитися за ны о прощении, да избавимся предстательством твоим пленения диавольскаго и воскликнем Богу: Аллилуиа.

Икос 12
      Славную кончину твою поюще, еюже возвеличился еси, яко светлый мученик Христов, молим тя, страстотерпче Александре, буди нам во всем ко благу помощниче и услыши ны, усердно взывающих ти:
     Радуйся, души нашея сокровище нетленное;
     Радуйся, Церкве нашея украшение многоценное.
     Радуйся, милостивый христианом заступниче;
     Радуйся, присный о нас молитвенниче.
     Радуйся, у одра смертнаго молитися Богу наставляеши;
     Радуйся, на мытарствах страшных души наша для Господа восхищаеши.
     Радуйся, Александре, мучениче Каталитский.

Кондак 13
      О преславный мучениче Христов Александре, приими хвалебное пение сие, в надежде и вере на твое предстательство приносимое, умоли Господа Бога даровати нам оставление грехов и жизнь вечную, и по часе смертнем внити в обители райския, идеже ты ныне пребываеши и Господу Богу нашему поеши: Аллилуиа.
Этот кондак читается трижды, затем икос 1-й и кондак 1-й

Молитва святому мученику Александру
      О святый угодниче Божий, Александре! Подвигом добрым подвизався на земли, восприял еси на Небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякого зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.

Тропарь святому мученику Александру
Тропарь, глас 4:
      Мученик Твой, Господи, Александре во страдании своем венец прият нетленный от Тебе, Бога нашего; имеяй бо крепость Твою, мучителей низложи, сокруши и демонов немощныя дерзости. Того молитвами спаси души наша.

Кондак, глас 2:
      Звезда светлая явился еси, непрелестная мирови, Солнца Христа возвещающи, зарями твоими, страстотерпче Александре, и прелесть погасил еси всю, нам же подаеши свет, моляся непрестанно о всех нас.

Величание
      Величаем тя, страстотерпче святый Александре, и чтим честная страдания твоя, яже за Христа претерпел еси.

Православный календарь

Декабрь 2018
Пн Вт Ср Чт Пт Сб Вс
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.