Вход

Изображения в галерее

171.jpg
127.jpg
50.jpg

АКАФИСТ Пресвятей Богородице пред иконою Ея Леснинскою


Образ Божией Матери «Леснинская». Тиснение, стразы. Современная икона. 18х24 см.

Кондак 1
      Избранней Предвечным Царем Преславней Владычице нашей Богородице, явлением иконы Своея Червонную Русь просветившей, похвальная возсылаем пения. Ты же яко имущая державу непобедимую и милость неизреченную, от всяких нас бед избави и спаси, да зовем Ти:
     Радуйся, премилосердая Мати, всех нас любовию Своею покрывающая.

Икос 1
      Архангел и ангел множество со страхом предстоят Тебе, Деве чистей, и непостижимому воплощению от Тебе Бога Слова удивляющеся, немолчными гласы вопиют: «Радуйся, Благодатная, Господь с Тобою!» Мы же, грешнии, прославляем Твое безмерное милосердие к рабом Твоим, во тьме лжемудрия униатскаго седящим, явлением иконы Твоея дарованное, и на Пречистый Лик Твой взирати не дерзаем, обаче смиренно из глубины души глаголем сице:
     Радуйся, Мати Царя Небеснаго, и единаго от земнородных не забывающая;
     Pадуйся, погибели созданий Сына Твоего зрети не терпящая.
     Радуйся, заблуждшия овцы стада Христова взыскающая;
     Pадуйся, Пастыря добраго, Сына Твоего, подражающая и на раме тыя восприемлющая.
     Радуйся, ко Отцу Небесному тех приводящая;
     Pадуйся, и вся ны на путь спасения наставляющая.
     Радуйся, в скорби молитвы и воззвания к Богу в сердца наша влагающая;
     Pадуйся, яже во благих прошения наша ко Господу возносящая.
     Радуйся, по исполнении тех хвалою и благодарением уста наша исполняющая;
     Pадуйся, не точию усты, но и делы хвалити Господа научающая.
     Радуйся, премилосердая Мати, всех нас любовию Своею покрывающая.

Кондак 2
      Видяще пастырие пречудную икону Твою, аки солнце на древе сияющую, потщашася о явлении ея всем православным людем возвестити. Тии же во множестве притекаху на место, идеже стоясте пречистеи нозе Твои, Владычице, и видяще токи чудес, от иконы Твоея источаемыя, со слезами благодарения взываху о Тебе Богу: Аллилуиа.

Икос 2
      Разумети ищуще предивное чудо о явлении иконы Твоея, Пресвятая Дево, суемудреннии людие испытоваху чудеса, бываемыя от нея, мы же, не дерзостию, но страхом точию, и верою взываем Тебе сице:
     Радуйся, исцелений чудесный и Живоносный Источниче;
     Pадуйся, благодати Божия неоскудевающая Сокровищнице, немощныя врачующая.
     Радуйся, Мати Слова Божия, немым и косноязычным уста отверзающая;
     Pадуйся, Мати Света истиннаго, очи слепых просвещающая.
     Радуйся, Мати Господа Сил, силы разслабленных возставляющая;
     Pадуйся, Мати Творца слух даровавшаго, глухим ушеса отверзающая.
     Радуйся, Мати Егоже трепещут демони, злыя духи изгоняющая;
     Pадуйся, Мати разум совершен Имущаго, разум лишенным ума возвращающая.
     Радуйся, Мати Врача душ и телес наших, врачами земными оставленных, от одра болезни воздвизающая;
     Pадуйся, Мати Живота вечнаго, мертвыя воскрешающая.
     Радуйся, премилосердая Мати, всех нас любовию Своею покрывающая.

Кондак 3
      Силу чудес от святыя Твоея иконы изливаемую видяще, лукавии латиняне похитиша чудный образ Твой, Владычице, православным людем ко утешению Тобою низпосланный, и в Леснинстем костеле поставиша и. Ты же не благоволила еси, да сокровище сие у инославных пребудет, но паки возвратила еси святую икону Твою верным рабом Твоим, иже с радостию и любовию прияша ю и благодарными усты воспеша Богу: Аллилуиа.

Икос 3
      Имея велию ревность о пастве своей, еже укрепитися ей в вере православней, святитель Варшавский Леонтий умоли Тя, Пречистая, да на месте явления иконы Твоея обитель иноческая будет. Ты же, Всеблагая, молитве сего добраго пастыря вняла еси, и под кров Твой святый многочисленный лик инокинь собрала еси, да, во славу Божию труждающеся, Тебе вопиют:
     Радуйся, Холмския Руси Солнце пресветлое;
     Pадуйся, Церкве Православныя Хранительнице, лукавством и насилием отторженных чад ея любовию возсоединяющая.
     Радуйся, обители Леснинстей Радосте и Покрове;
     Pадуйся, дев соборы ко служению младенствующим в Православии собравшая.
     Радуйся, инокиням в служении сем путь спасения указавшая;
     Pадуйся, безматерных сирот незримая Воспитательнице.
     Радуйся, болящим скорое исцеление низпосылающая;
     Pадуйся, крова лишенным Странноприимнице и помощи Подательнице.
     Радуйся, всем с верою в обитель Твою притекающим Покров и снабдение;
     Pадуйся, святую обитель Твою многоразличными чудесы исполнившая.
     Радуйся, премилосердая Мати, всех нас любовию Своею покрывающая.

Кондак 4
      Бурями многомятежнаго мира сего влаеми и волнами бед и скорбей потопляеми, вси со слезами и молитвою притекающии к Тебе, Заступнице, тихое пристанище в Тебе обретают и с радостию и благодарением вопиют о Тебе Спасу Христу: Аллилуиа.

Икос 4
      Слышаша ближняя и дальняя, яко Господь и Владыка всяческих дарова Тя нам в иконе Твоей, Богородице, яко благую Утешительницу всем нашим скорбем и немощем спострадати могущую: Ты бо Сама, Пречистая, во дни земнаго жития Твоего нужды и скорби терпела еси. Сего ради всяк возраст, чин и сословие к чудотворней иконе Твоей непрестанно припадают и тепле Тобою приемлеми, умильно зовут Ти:
     Радуйся, пастырем стада Христова премудрая Наставнице;
     Pадуйся, чада их духовная смирению и послушанию научающая.
     Радуйся, младенцем Питательнице, матернее попечение о них являющая;
     Pадуйся, отроком к восприятию полезнаго учения разум и сердце отверзающая.
     Радуйся, юныя в чистоте соблюдающая и от душепагубных действ ограждающая;
     Pадуйся, родителем и наставником в детоводительстве и в скорбех о чадех помогающая.
     Радуйся, девы христолюбивыя плодами духа и веры украшающая;
     Pадуйся, старцев и стариц крепкий Жезле.
     Радуйся, гонимым Предстательнице и обидимым Заступнице;
     Pадуйся, в великих бедах и напастех дивная Помощнице, и в малых житейских нуждах нас не оставляющая.
     Радуйся, премилосердая Мати, всех нас любовию Своею покрывающая.

Кондак 5
      Боготечную звезду узревши чудотворную икону Твою, Мати Божия, вся Русь Червонная тоя зари последова, и яко светильник держащи ю, истину Православия тою постиже и в ней утвердишися, возрадовася духом вопиющи о Тебе Господу Сил: Аллилуиа.

Икос 5
      Видевши Тя древле, Пресвятая Дево, аки звезду путеводную, возсиявшую во иконе Твоей чадом земли Холмския, под игом иноверных во мраце неведения погибающим, и ныне вся страна наша православная многою скорбию возгараема, о кознех вражиих на Веру ея святую возстающих, со слезами припадает к святым стопам Твоим, Владычице, яко благой Одигитрии, молящи извести ю из мрака неверия, ересей и расколов; многая возстания врага на ню утолити и очи всех заблуждшихся светом истины просветити, да и тии с нами славят Всечестное и Великолепое Имя Святыя Троицы и Тебе радостно взывают сице:
     Радуйся, Церкве Христовы непозыблемый Покрове;
     Pадуйся, Отечества нашего Свете Невечерний.
     Радуйся, апостольская преславная Похвало;
     Pадуйся, святителей изрядное Украшение.
     Радуйся, мучеников крепкое утверждение;
     Pадуйся, иноков и инокинь спасительное наставление.
     Радуйся, сущих в темницах, заточениих и гонениих веры ради и правды святыя, посещение и избавление;
     Pадуйся, врагов веры истинныя посрамление.
     Радуйся, ересей и тлетворных учений истребление;
     Pадуйся, всех козней вражиих противу истинных рабов Божиих разрушение.
     Радуйся, премилосердая Мати, всех нас любовию Своею покрывающая.

Кондак 6
      Проповедует святая икона Твоя, Пречистая Дево, неизглаголанную бездну милосердия Божия к роду нашему, чудесы от нея бываемыми, сердца верных озаряющи, радостию и веселием, и к пению наставляющи, неверныя же посрамляющи, неведущия пети: Аллилуиа.

Икос 6
      Возсияла еси яко солнце истинное во иконе Твоей, Богоизбранная Отроковице Марие, лучами матерния любве Своея нас согревающи; сего ради со смирением молим Тя: умилосердися, Госпоже Пресвятая, на бедствующия рабы Твоя, избави нас от всех напастей, бед и скорбей, находящих на ны за грехи наша, да Тобою радости причастницы бывше, зовем Ти:
     Радуйся, мир на землю принесшая;
     Pадуйся, ко спасению нас наставляющая.
     Радуйся, вечныя радости нас сподобляющая;
     Pадуйся, и временную жизнь нашу добре устрояющая.
     Радуйся, в годину браней Державная Предводительнице;
     Pадуйся, во дни мира от сна греховнаго возбуждение.
     Радуйся, плененных чудесное избавление;
     Pадуйся, внутренних нестроений миротворительнице.
     Радуйся, от глада, огня, и воднаго потопления защищающая;
     Pадуйся, жаждующую землю дождями благодатными напояющая.
     Радуйся, премилосердая Мати, всех нас любовию Своею покрывающая.

Кондак 7
      Хотяй Человеколюбец Господь вверити и нас якоже возлюбленнаго ученика Своего, Твоему Матернему заступлению, Владычице, благоволи явити нам пречудную икону Твою во великий праздник Воздвижения Честнаго и Животворящаго Креста Своего, да научимся купно с Тобою сраспинатися Ему душею и сердцем, и в самых страданиих своих взирающе на пречистый Лик Твой, взывати Ему: Аллилуиа.

Икос 7
      Новое чудо и боголепное содела Господь явлением иконы Твоея, Пречистая, в день поклонения Честному Кресту и Божественным Страстем Его, яко да и мы, воспоминающе скорби Твоя, егда предстояше Кресту Сына Твоего и оружие пройде святую душу Твою, возмем Крест Его и Тебе возопиим сице:
     Радуйся, смотревшая Сына Своего распятие и утробою терзавшаяся, но абие силу Креста Его прославившая;
     Pадуйся, скипетром Рождества Твоего хулящия Силу Крестную поражающая.
     Радуйся, Церковь Христову во дни гонений и крестных страданий ея омофором Своим покрывающая;
     Pадуйся, Истину непрестанно распинаемую, защищающая.
     Радуйся, руце Свои к распростершему длани на Животворящем Древе за всех нас простирающая;
     Pадуйся, изнемогающия под тяжестию креста укрепляющая.
     Радуйся, в самых лютых скорбех милосердное промышление Сына Твоего во спасение душ наших разумети научающая;
     Pадуйся, Воскресением Сына Твоего возвеличенная и нас верою и любовию Тя величающих на высоту славы небесныя возносящая.
     Радуйся, премилосердая Мати, всех нас любовию Своею покрывающая.

Кондак 8
      Страннолепная чудеса, от иконы Леснинския бываемыя видевше, устранимся суеты мира сего и вся наша помышления на божественная преложше, воззовем к ней во умилении: помяни нас, Владычице, странствующих во юдоли сей плачевней и многомятежней; управи путь наш в горняя и введи в чертог Небесный с мудрыми девами, да купно с ними воспоем богокрасную песнь Жениху Христу: Аллилуиа.

Икос 8
      Вся еси любовь и милосердие, вся еси надежда наша и радость неизглаголанная, Мати Господа Вышняго. Видим бо Тя умными очесы нашими стоящую пред престолом Владыки живота и смерти, тепле Его умоляющую, да отверзет двери благоутробия Своего всем рабом Своим в мире сущим, и от жития сего преставльшимся. Сия благосердная молитва Твоя подвизает нас радостно взывати Тебе:
     Радуйся, миру Покрове и Заступление;
     Pадуйся, Стено нерушимая, от всяких нас бед ограждающая.
     Радуйся, от напрасныя смерти и неправеднаго убиения спасающая;
     Pадуйся, христианския кончины нас сподобляющая.
     Радуйся, в страшный час смерти нам помогающая;
     Pадуйся, и по исходе из тела души верных раб Своих от горьких мытарств и темных духов защищающая.
     Радуйся, кающимся грешником на суде Божии крепкое заступление;
     Pадуйся, вечных мучений избавление.
     Радуйся, райския двери нам отверзающая;
     Pадуйся, в Царство славы Христовы на безконечныя веки нас водворяющая.
     Радуйся, премилосердая Мати, всех нас любовию Своею покрывающая.

Кондак 9
      Всякая похвала не довлеет, Пречистая Дево, ко прославлению милостей и щедрот Твоих от иконы Леснинския изливаемых на приходящия, покланяющияся и с любовию лобызающия ю. Обаче Благая сущи, веру приими и усердие наше, и Сама исполни Твоего хваления недостойная уста наша, яко да поем о Тебе Богу: Аллилуиа.

Икос 9
      Витийствующий не может язык поведати, Богородице, како явилася еси, истинная Мати Предвечнаго Бога, о нас милосердовавшаго и девства Твоего печати не разрушив, плоть от Тебе восприимшаго. Мы же, о неизглаголанном таинстве Боговочеловечения и о множестве благодеяний Твоих с верою и трепетом помышляюще и колена сердец наших преклоняюще, ублажаем Тя сице:
     Радуйся, Слову Божию плоть взаимодавшая;
     Pадуйся, Древо Живота, от Негоже человеком плод спасения прозябе.
     Радуйся, всемирная Радосте, Еюже нам живот вечный возсия;
     Pадуйся, страну Холмскую светом Своим озарившая и лучи света на всех нас разпростревшая.
     Радуйся, Заступнице православным людем;
     Pадуйся, многажды в напастех, бедах и болезнех скорую помощь тем являющая.
     Радуйся, от смертоносных ран и язв всегубительных чудесное избавление;
     Pадуйся, во узах и пленении сущим милостивая Печальнице.
     Радуйся, всем страдальцем благодатное утешение низпосылающая.
     Радуйся, премилосердая Мати, всех нас любовию Своею покрывающая.

Кондак 10
      Спасти хотяй холмския люди, в сети лукавства латинскаго уловленныя, Человеколюбец Господь дарова тем, Владычице, чудотворную икону Твою, яже аки лампада неугасающая Божественным светом сияет всем, огнем же любве Твоея ко святей Церкве Православней вся привлекает, да согласно поют Творцу: Аллилуиа.

Икос 10
      Стена и прибежище православным людем явися икона Твоя, Небесе и земли Царице, ибо не токмо просвещения ради рабов Своих, прелестию ложнаго единения с еретики ослепленных, но и во утешение страждущих за истинную веру, благоизволила еси создати обитель Свою посреде блат и дебрей, да свет Твой во тме светится. Сего бо ради мнози, гладом духовным истаевающии и истины жаждущии, к Тебе, яко к щедрей Питательнице, Хлебом жизни снабдевающей, прибегают, и к Живоносному воистинну Источнику чудотворней иконе Твоей припадающе, насыщени и напоени, с веселием взывают Ти сице:
     Радуйся, Веры Православныя непоколебимый Столпе;
     Pадуйся, лжеучителей еретических Прогонительнице.
     Радуйся, за святую веру подвизающихся Утверждение;
     Pадуйся, ревнующих о благочестии благословение.
     Радуйся, девствующих чистото и славо;
     Pадуйся, обителей иноческих дивная Печальнице и Наставнице.
     Радуйся, молящихся Тебе радосте;
     Pадуйся, постников Наслаждение.
     Радуйся, всех благих прошений скорое исполнение;
     Pадуйся, Всеблагая Утешительнице, слезы плачущих отирающая и печаль их на радость прелагающая.
     Радуйся, премилосердая Мати, всех нас любовию Своею покрывающая.

Кондак 11
      Пение хвалебное, Пресвятая Владычице, подаждь силу приносити Тебе, елико есть произволение душ наших: ибо аще и удобее молчание хранити пред множеством щедрот и чудес Твоих, но любовию и радостию движими, немолчно вопиют о Тебе уста наша: Аллилуиа.

Икос 11
      Светоприемную свещу, сущим во тме явльшуюся, зрим святую икону Твою, О Богомати: сия бо в наших студених сердцах пламень молитвы и любве к ближнему возжигает, и к разуму Божественному наставляет воспевающия Тебе сице:
     Радуйся, светом благодати Божия души верных озаряющая;
     Pадуйся, и омраченная сердца неверующих просвещающая.
     Радуйся, сомнения наша о истине Божией яко прах возметающая;
     Pадуйся, струпы наша греховныя врачующая.
     Радуйся, светильники душ наших елеем милости исполняющая;
     Pадуйся, кроткия и смиренныя возносящая.
     Радуйся, гордыя и сильныя низлагающая;
     Pадуйся, враждующих примирение.
     Радуйся, обидимым Заступнице и обидящим вразумление;
     Pадуйся, смятенным душам мир дарующая.
     Радуйся, премилосердая Мати, всех нас любовию Своею покрывающая.

Кондак 12
      Благодати неистощимыя знамения дарова нам, Владычице, в чудотворней иконе Твоей всех долгов Решитель, пришедый Тобою ко отшедшим Того благодати: Темже молим Тя, Пренепорочная Дево, молися Сыну Твоему, Христу Богу нашему, яко да раздрав рукописание грехов наших помилует нас в жизни сей временней, и в вечней да приимет от всех нас хвалебную песнь: Аллилуиа.

Икос 12
      Со страхом поюще, вопиюще, взывающе и глаголюще: «Свят, Свят, Свят Господь Бог Саваоф», поем, благословим, благодарим и Тебе, Владычице, о преславнем явлении иконы Твоея и о всех благодеяниих, яже обильно на ны изливаеши: Ты же покрый нас, Владычице, пречудным омофором Твоим, освяти нас, удобри, вразуми и молися о нас ко Господу, да милостив будет к нам, всякия неправды исполненным, и да пробавит благодать Свою чтущим Тя во святей иконе Твоей, и приносящим Ти похвалы таковыя:
     Радуйся, всемирная Радосте;
     Pадуйся, Источниче присноживыя воды.
     Радуйся, сиянием из Тебе возсиявшаго Света озаренная;
     Pадуйся, вся небесныя силы чистотою превозшедшая.
     Радуйся, Честнейшая Херувим и Славнейшая Серафим;
     Pадуйся, одушевленный храме Духа Всесвятаго.
     Pадуйся, примирение Бога и человеков;
     Радуйся, необуреваемое Пристанище всех к Тебе притекающих.
     Радуйся, премилосердая Мати, всех нас любовию Своею покрывающая.

Кондак 13
      О, Всепетая Мати, невместимаго Бога вместившая и радость миру родившая. Приими сие малое хвалебное приношение наше, и умоли Сына Твоего и Бога нашего да избавит Церковь Свою и отечество наше от враг видимых и невидимых, и всех верных рабов Своих да сподобит в селениих райских водворитися, во еже звати Ему о Тебе во вся веки: Аллилуиа.
Этот кондак читается трижды, затем икос 1-й и кондак 1-й

Тропарь Пресвятой Богородице пред иконою Ея Леснинскою
Тропарь, глас 4:
      К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.

Кондак, глас 6:
      Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти; ускори на молитву и потщися на умоление, предстательствующи присно, Богородице, чтущих Тя.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.

Православный календарь

Сентябрь 2019
Пн Вт Ср Чт Пт Сб Вс
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.