АКАФИСТ святителю Софронию, епископу Иркутскому, чудотворцу

Подробности

Создано 12.04.2018 18:01

      Возбранный Воеводо, Творец веков, Господь, Царь Славы, глубиною мудрости помышляя полезное в роды родов о Церкве Своей, видев наше маловерие, греховный сон и охлаждение, чудес действо сугубо даде по сгорении мощей угоднику своему, сим показуя велие дерзновение его ко Господу, да вси люди страны сибирския возгорающеся верою и любовию, воспоют новому чудотворцу и цельбоподателю и молитвеннику своему: от всяких бед свободи ны, отче, зовущия Ти:
     Радуйся, Софроние, горящий к Богу огнем любве неугасимыя.

      Ангелов Творец, Господь Вседержитель, благодатию Своею возвышая человеки в первое достоинство на Небеси, избра тя, отче Софроние, да служиши Ему во ангельском чину и монашествуеши на земли. Мы же воспоминающе юность и подвиги твоя глаголем сице:
     Радуйся, духовных родителей духовное чадо;
     Pадуйся, от юности положивый доброе начало.
     Радуйся, носяй имя соименно перводиакону Стефану;
     Pадуйся, сподобивыйся слышати небесный глас во храме.
     Радуйся, премудрости Божией сыне возлюбленный;
     Pадуйся, в пострижении Софронием нареченный.
     Радуйся, еще юн сый, бывый монахов наставниче;
     Pадуйся, отче любвеобильный и строгий подвижниче.
     Радуйся, Софроние, горящий к Богу огнем любве неугасимыя.

      Видя Елизавета, венчанная Царице, благонравие твое и святость жития, изволением Божиим избра тя в предстоятеля Лавры Невския, да якоже славил еси Бога на юге России, тако и на севере, в стольном граде, научиши монахи и бельцы непрестанно пети Богу ангельскую песнь: Аллилуиа.

      Разум, от премудрости Божией дарованный, не можаше укрытися в тебе, но яко пресветлая звезда возсия на высоте архиерейства и учительства, озаряя всю страну пространныя Сибири учением своим, внушая верным чадам Церкви благодарственно вопити просветителю своему:
     Радуйся, святителю богоизбранный и трудолюбивый;
     Pадуйся, тя бо не устраши путь лишениями многотрудный.
     Радуйся, мы бо тя приемлем яко друга Божия;
     Pадуйся, имел бо и ты друга душе инока праведна Синесия.
     Радуйся, мужу желаний, благодати Божией носителю;
     Pадуйся, архипастырю Иркутский, Иннокентия святаго вторый заместителю.
     Радуйся, иерарше Богом избранный и людем благоприятный;
     Pадуйся, от священнаго собора и от житель града Иркутска радостно приятый.
     Радуйся, Софроние, горящий к Богу огнем любве неугасимыя.

      Силою свыше облечен быв, святителю Софроние, обходя грады и веси паствы твоей, отечески наказуя клирики и иереи, да служат Богу со страхом, по достоинству сана своего, да учат дети, отцы и матери разумно пети небесную песнь: Аллилуиа.

      Имея ревность по Бозе, яко же и пророк Илия, всякаго власть имущаго учил еси право ходити в законе Господни, правду и суд творити, заступати немощныя, сирых и вдовиц от напасти избавляти, к нищим милостивым быти, за еже ублажающе тя, тако глаголем:
     Радуйся, отче, правых путей любителю;
     Pадуйся, злокозненных нравов искоренителю.
     Радуйся, истин евангельских провозвестниче;
     Pадуйся, злаго властелина усмирителю.
     Радуйся, яко града Нерчинска первый быв посетитель;
     Pадуйся, своим служением оставивый память чадам и родителям.
     Радуйся, от сосуда сердца своего благодать всем изливаяй;
     Pадуйся, земли нерчинской небесное благословение подаваяй.
     Радуйся, Софроние, горящий к Богу огнем любве неугасимыя.

      Бурю внутренних волнений не могий стерпети, ревнителю благочестия, яко не воздается честь благовестом Церковному песнопению в Литургии, Вечерни и Утрени: таже горя любовию ко славе Божией, повелел еси на «Достойно», «Господи воззвах» и на «Честнейшую» ударяти в кампан, да христиане в домех и на пути слышаше глас церкви, воспоют хвалу Богу: Аллилуиа.

      Слышав речение Господне: «Иже сотворит и научит, сей велий наречется в Царствии Небеснем». Делом слово исполняя: молитву, пост, поклоны и всяко томление плоти восприял еси, к сим же и человеколюбия не оставляя к меньшей братии, яко прежде кончины возмогл еси святость стяжати, за еже приими похвалу сию:
     Радуйся, отче, любве ради Христовы земная оставивый;
     Pадуйся, еяже ради вся красныя ни вочтоже вменивый.
     Радуйся, блаженство облобызавый нищеты духовныя;
     Pадуйся, страхом Божиим попаливый страсти греховныя.
     Радуйся, приявый иго Христово на рамена измлада;
     Pадуйся, узким путем шествовавый неуклонно до вышняго града.
     Радуйся, нетленных благ на Небеси обладателю;
     Pадуйся, дивныя славы во светлости святых созерцателю.
     Радуйся, Софроние, горящий к Богу огнем любве неугасимыя.

      Боготочною кровию, обновившему род человеческий, Христу последовал еси, блаженне, принося Ему бескровную жертву во оставление грехов людей твоих, таже и всего себе принесл еси во всесожжение, являяся источником исцелений, бесов прогонитель и зритель таин сердечных, возбуждая люди зрящия чудеса, пети Богу: Аллилуиа.

      Видевше сынове великия Сибирския страны пречудное твое житие, аще и в последняя лета возсиял еси в новопросвещенней стране, отче Софроние, обаче древних отец сподобляяся чести, равное дарование и чудес творение приял еси от Бога, Его же благодаряще, тя величаем приветствии сими:
     Радуйся, иерарше, Николая Чудотворца ревнителю;
     Pадуйся, дивному Иннокентию верный подражателю.
     Радуйся, соседателю в вышних всем святителем;
     Pадуйся, и земных являяся от искушений хранителем.
     Радуйся, благочестие и веру соблюдый нескверно;
     Pадуйся, в венце славы предстоя свету невечерню.
     Радуйся, на свет явивыйся, егда Христос родися;
     Pадуйся, ты бо во светлыя дни Пасхи ко Господу преставися.
     Радуйся, Софроние, горящий к Богу огнем любве неугасимыя.

      Проповедник бывый веры Христовы и познания истины в монголех и во всяком языце ближния и дальния Сибири, пришел еси и ко своему пределу, еже есть земля еси и в землю отидеши, отдав дух Богу, тело же оставив верным на многа лета в пещере, да приходящие поют надгробную песнь: Аллилуиа.

      Возсиявше солнце в земли Иркутстей, Святый Софроний, в старости преклонней позна запад свой, оставив земная, восприял есть от руки Господни вечная благая, еже мы познахом от чудес и целебныя силы, присущия святым мощем его, и удивляяся поем ему таковая:
     Радуйся, пастырю, неусыпно пасый Христово стадо;
     Pадуйся, надеждо ненадежных и сердечной туге отрадо.
     Радуйся, ты бо отшел еси прияти венец славы;
     Pадуйся, ибо оправдася на тебе суд Божией правды.
     Радуйся, твоя бо душа вчинена есть в святителей лики;
     Pадуйся, яко сице блаженство пребудет в бесконечные веки.
     Радуйся, тело бо твое остася нетленно;
     Pадуйся, яко чудо сие бысть всей Церкви Российской явленно.
     Радуйся, Софроние, горящий к Богу огнем любве неугасимыя.

      Хотя Господь утешити избранныя люди своя, междоусобным искушением угнетенныя, волною неверия колеблемыя и вкупе с пастырми гонимыя, открыл есть славу угодника своего преблаженнаго Софрония, юже имать со святыми на Небеси, да притекающе людие к его молитвенной помощи, поют Христу Богу: Аллилуиа.

      Дивныя знамения нача являтися у раки святых мощей твоих, отче преподобне. Уврачевал бо еси первее языкоболие, таже зубов возболение, таже и силу огневицы отрочат угасил еси, за еже благодарственно приносим ти песни сия:
     Радуйся, врачу безмездный и цельбоподателю;
     Pадуйся, помазанием елеа болезней облегчителю.
     Радуйся, изливаяй милость на книжных, разумных и простых;
     Pадуйся, обновляяй веру искушением колеблемых.
     Радуйся, явлением своим от позорныя смерти избавляяй;
     Pадуйся, молитвою твоею и кони свирепыя укрощаяй.
     Радуйся, теплое утешение всех гонимых и скорбящих;
     Pадуйся, предстателю Господень за всех к тебе прибегающих.
     Радуйся, Софроние, горящий к Богу огнем любве неугасимыя.

      Странно чудо, како части костей святых мучеников источают исцеления, се ныне видим кости святителя Софрония огнем изнурены, и от нас грешных сокровенны, раны и вред врачуют, и всяко томление души скорбящия на радость прелагают. Воистину чудо преславно, сего ради чудес дателю Богу поем: Аллилуиа.

      Весь еси ты отче, водворяешися в вышних, но и нижних, нас грешных, от скорби и от духа уныния долу поникших не оставляеши, присно бо притекающим к тебе помоществуеши, печаль на радость и скудость на довольство прелагаеши. За вся сия тя ублажающе, глаголем сице:
     Радуйся, источниче присный благодатных исцелений;
     Pадуйся, разрешаяй жен от тяжких рождений.
     Радуйся, умом изумленным разум возвращаяй;
     Pадуйся, явлением во сне изломление костей исправляяй.
     Радуйся, избавление от страха нощнаго боязливыя;
     Pадуйся, прогонителю блуднаго беса и подателю целомудрия.
     Радуйся, оком твоим свыше на иноческия обители призирающий;
     Pадуйся, огненным столпом в возгорении града мощи твоя показующий.
     Радуйся, Софроние, горящий к Богу огнем любве неугасимыя.

      Всякий естества закон превосходит, еже ты твориши, о, великий Чудотворче! Изподспуда бо земнаго являяся, глаголеши избранным: «Прославите мя и аз вас прославлю» и повелеваеши, да сотворят ограждение над гробом твоим, да не попирается ногами место святое, но со страхом, ходяще людие окрест, поют: Аллилуиа.

      Ветии многовещаннии неразумеюще тайны Божией яже, о, Софроние! Егда узреша дым запаления от святых мощей, велиим гласом, на стогнах града и в домех велемудренно кричаху православным: «Уа! Где есть вера ваша? Где святость? Где мощи? Аще Софроний бе свят, почто не противися огню?» И ругахуся вере Христовой. Таже видевше множество чудес паче прежняго, познаша яко Бог поругаем не бывает: зазираху себе, возжигаху свещи, припадаху к честным останкам святых мощей, бияху в перси своя и в глубоцем молчании, сердцем вопияху:
     Радуйся, Софроние, чудес делателю новоявленный;
     Pадуйся, подаяй прощение в покаянии просящим смиренно.
     Радуйся, имеяй власть вязати и решити;
     Pадуйся, и мощем своим ниспославый множайшую силу благодати.
     Радуйся, огнепальным действом лику сочетавыйся священномучеников;
     Pадуйся, отче милостивый, вразумителю мощей твоих хульников.
     Радуйся, ограждаяй паству твою от диавольских умышлений;
     Pадуйся, подателю благословения в начале добрых начинаний.
     Радуйся, Софроние, горящий к Богу огнем любве неугасимыя.

      Спасти хотя град свой от кровопролитныя брани, миротворный отче, явился еси прославляющемуся тя сопрестольнику твоему архипастырю Иоанну: «Мужайся» рекл еси ему. Таже и прежде явлейся, показуя гроб свой и глаголя: «гроб сей ветхий, нетребен ми еси», еже знаменова самоприношение в умилостивительную жертву о граде. Познати тайну сию Иоанн можаше. Егда сбыстся реченное, он и вся люди со умилением воспеша хвалу Богу: Аллилуиа.

      Стена каменна прямо, стена одесную, стена ошуюю в пещере, идеже бо хранимо тело твое, Угодниче Христов, яко несть возможно проникнути тамо пламени. Обаче Христос Господь, премудростию своею устрояяй полезное церкви, попустил есть, да сгорит гроб твой и тело твое, показуя сим, яко догмат Святаго Православия несть чувственное и осязаемое, но сердечною верою постигаемое и надеждою возмогаемое, и пети тебе любовию научающее:
     Радуйся, мысленный изъявителю православия;
     Pадуйся, смотрительно предавый мощи своя на сожжение.
     Радуйся, венцем священномученика украсивыйся по преставлении;
     Pадуйся, кротчайший отче, никогоже обличивый в запалении.
     Радуйся, правды Божией и премудрости честное орудие;
     Pадуйся, предваривый Иоанну во сне быти имущее.
     Радуйся, яко по сгорении усугубивый чудодействия;
     Pадуйся, сими бо чудесы возвеселишася люди Иркутска.
     Радуйся, Софроние, горящий к Богу огнем любве неугасимыя.

      Пение всеумиленное и горячую молитву вознесл еси к Богу в годину междоусобныя брани о граде твоем, великий наш заступниче, яко ни единому гласу оружному слышатися во граде в день прославления твоего, и тако священный собор и множество верных возмогоша в мирной тишине воспети тебе хвалу и Богу: Аллилуиа.

      Светильника Церкви, третияго епископа Иркутскаго, устрои тя Бог, в триех Ипостасех славимый, богоблаженне Софроние. Всесвятый же Дух, Бог всемогущий, всепремудрый, самовладычный, самоповелительный исполнил есть тя духа премудрости, духа разума, духа страха Божия: да сими дарами Духа Святаго приведеши люди ко спасению, вопиющия ти:
     Радуйся, вместилище даров Духа Святаго;
     Pадуйся, очистилище человеческаго злаго нрава.
     Радуйся, от страсти пьянственныя люди свобождаяй;
     Pадуйся, от боли главы, зубов и стомаха избавляяй.
     Радуйся, течение крови и воды яже в теле прикосновением уставляяй;
     Pадуйся, и срачицею возложенною на гроб твой, здравие подаваяй.
     Радуйся, устрояяй бедствующим жилища к пребыванию;
     Pадуйся, неимущим где главу подклонити кров дающий и пропитание.
     Радуйся, Софроние, горящий к Богу огнем любве неугасимыя.

      Благодать, данную ти от Бога ведуще прилежно просим тя, отче Софроние, пролей ныне теплую твою молитву о нас ко Господу, да презрев вся наша согрешения, дарует нам мирное житие, друг ко другу любве исполненное. Грады и Церкви не разоримы да сохранит, обилие всяких плодов земли да дарует, и всех нас да спасет и помилует: мы же благодарным сердцем воспоем ему: Аллилуиа.

      Поюще дивнаго во святых своих, Царя Небеснаго, прославльшаго тя, вернаго раба Своего, милостивое твое скорое нам во всяких нуждах поможение, прославляем и Бога благодаряще, радостно ти глаголем:
     Радуйся, великославный Сибирский заступниче;
     Pадуйся, совершенный в добредетелех человече.
     Радуйся, подражателю святых и священномучеников;
     Pадуйся, благий и добрый наставниче иноков.
     Радуйся, Пресвятыя Богородицы известный умилостивителю;
     Pадуйся, молитвенниче за град наш и всея страны покровителю.
     Радуйся, света Евангельскаго всесветлое сияние;
     Pадуйся, во тьме греховней сущим просвещающее озарение.
     Радуйся, Софроние, горящий к Богу огнем любве неугасимыя.

      О, чудотворче преславный и заступниче наш, богомудре Софроние, приими малое сие моление наше, якоже Христос приял вдовицы две лепты и богоприятным твоим ходатайством умоли Господа Сил силу свыше нам подати на исправление жития, да Того благодатию от грехов очистившимся, геенны избавитися и грядущия на Небесех благая улучити, вопиющим Ему: Аллилуиа.
      Святителю Христов Софроние! Предстоя у Престола Божия, призри с Небесе на нас, грешных и недостойных раб Божиих (имена)! Возгрей сердца немощных людей и призови к покаянию и исправлению жизни греховныя. Утверди нас твоею благодатною помощию, предстательством твоим и молитвами, приход сей от всякого зла и навета вражия огради, спаси и сохрани именем Господа Бога и Спаса нашего Иисуса Христа, Емуже славу приносим во веки. Аминь.

      Святче Божий, святителю Христов, добрый пастырю словеснаго стада, человече Божий, новый чудотворче и неусыпный к Богу молитвенниче за страну сию, отче Софроние, призри с высоты Небесныя на нас, с верою и любовию покланяющихся образу твоему и честным останкам святых мощей, в наше утешение избывшим от всепоядающаго огня. Призри, святче Божий, и виждь наше нестроение и раздоры, нашу тугу, скорбь и сердечную болезнь, от лишения братския любве пребывающия. Испроси у Христа Бога коемуждо нам благодати смирения, познание своея греховности и самоукорения, да внимающе кийждо своей совести, престанем осуждати ближняго, клеветати и поношати, но соединившеся ко друг другу любовию, сподобимся мирно во смирении прочее время живота нашего пожити и улучити христианскую кончину. Да, совокупльшеся в будущей жизни со всеми святыми и с тобою, пастырю наш, прославим Единаго в Троице славимаго Бога, Отца и Сына и Святаго Духа во веки веков. Аминь.

      Скорый в бедах и скорбех заступниче, отче иерарше страны Сибирския, святителю Софроние, на Небеси предстояй с первоиерархом Иркутския церкви и всеми святыми, выну имаши благоволение Господа славы; призри на люди, притекающия к честным останкам святых мощей твоих, с верою и любовию слезно просящия твоея помощи и заступления; моли, Егоже проповедал еси людем Сибири, избавити я от находящих зол и наветов вражиих, просветити людей оляденевшая древле неверием сердца, даровати утверждение веры Христовы, и спасти души наши.

      От юности Христа возлюбил еси, блаженне Софроние, добре управил еси иноческия обители и архиерейства саном почтен быв, упасл еси Иркутскую паству, темже и по преставлении дарования чудес от Бога приял еси и молиши Христа Бога избавити нас от бед и спасти души наша.

      Пастырей Начальнику Христу трудился еси, святителю Софроние, на пажити духовней северныя страны нашея, языцы монгольстии от прелести и скверны идольския избавляя, привел еси я к свету веры Христовы, и ныне, со ангелы Владычню Престолу предстоя, моли непрестанно о всех нас, избавити ны от бед и спасти души наша.

      Величаем тя, святителю отче Софроние, и чтим святую память твою, ты бо молиши за нас Христа Бога нашего.