Вход

Изображения в галерее

828_33.jpg
820_72.jpg
OP70200100.jpg

Главная

АКАФИСТ преподобному и богоносному отцу нашему Иосифу, старцу Оптинскому


Преподобный Иосиф, старец Оптинский.

Кондак 1
      Избранному угоднику Божия Матере и послушания теплому рачителю, богомудрому оптинскому старцу Иосифу похвальная принесем песнопения, яко да избавит нас от всякия беды и напасти и наставит на стези правыя вопиющих ему любовию:
     Радуйся, Иосифе, Божия Матере любимиче блаженный.

Икос 1
      От юности твоея, отче преподобне, играм не внимал еси младенческим, но все желание души твоея в небесная направив, сего ради явися ти Богородица на облаце, назнаменующи, яко угодник Ея будеши от юности твоея. Темже сицевому явлению чудящеся, похвальная тебе поем:
     Радуйся, отрочище, Богородицею избранное;
     Pадуйся, родителей твоих преславное величание.
     Радуйся, благочестивое веры процветение;
     Pадуйся, плоды явивый богопознания.
     Радуйся, отроком прекрасный образ подражания;
     Pадуйся, юношам благоуханный крине целомудрия.
     Радуйся, яко из уст младенческих Бог тобою похваляется;
     Pадуйся, яко от юности твоея Богородица прославляется.
     Радуйся, Иосифе, Божия Матере любимиче блаженный.

Кондак 2
      Силою свыше осенен был еси благодатию Пресвятаго Духа, иже обучи тя право не внимати обольщением лукаваго духа, сего ради от мирских красот яко от умет отвратился еси и стопы твоя направил еси по иноческому пути, поя Богу: Аллилуиа.

Икос 2
      Из мира изшел еси, яко от рабства фараоня, и Богу в ризе девства твоего предстал еси, темже яко втораго и прекраснаго Иосифа тя похваляем и целомудренней душе твоей поем:
     Радуйся, духовнаго девства избранный сосуде;
     Pадуйся, чистоты и целомудрия верный супруже.
     Радуйся, яко душу свою уневестивый Христу Жениху;
     Pадуйся, яко тело твое облекл еси в нетления чистоту.
     Радуйся, яко копием воздержания пробол еси змия;
     Pадуйся, яко достигл еси Ангельския чины.
     Радуйся, чаша Божественныя любве исполнена;
     Pадуйся, еюже напаяеши чада твоя.
     Радуйся, Иосифе, Божия Матере любимиче блаженный.

Кондак 3
      Яко звезда пресветлая в Оптину пустынь устремился еси, Иосифе, идеже богосветлый Амвросий на тверди церковней яко солнце возсия, иже во объятия своя тя прият отеческая и добродетельными лучи облиста, Богу благодарне воззвав: Аллилуиа.

Икос 3
      При исходищах премудрости старчестей водворился еси, отче Иосифе, при ногу Амвросиеву тридесять лет пожив. Темже по стезям любомудрия старца твоего ходити изволил еси, к нимже и нас направи, вопиющих тебе сия:
     Радуйся, благопослушное чадо отеческаго предания;
     Pадуйся, любомудрый учениче священнаго писания.
     Радуйся, Амвросиевых молитв плоде богодарованный;
     Pадуйся, оптинскаго старчества преемственная славо.
     Радуйся, образе любве сына к своему старцу;
     Pадуйся, наследниче даров богоноснаго аввы.
     Радуйся, яко благопокорением разоривый демонския твердыни;
     Pадуйся, яко благоволением подражавый Ангельским силам.
     Радуйся, Иосифе, Божия Матере любимиче блаженный.

Кондак 4
      Подвигом добрым изволив подвизатися, отче преподобне, пение, бдение, молитву и пост, аки оружие непобедимое восприим, козни демонския, аки паучину, растерзал еси, преблаженне Иосифе, Богу победную воспел еси песнь: Аллилуиа.

Икос 4
      Видя святое твое о Бозе преспеяние, богомудрый Амвросий в таинники своя тебе избра, не токмо дарми тя обогати сыноположения, но и паству свою тебе вручи, мы же, пастырским твоим окормившеся водительством, благодарно тебе поем:
     Радуйся, мысленных волков от стада Христова отгнание;
     Pадуйся, словесных овец святоотеческое воспитание.
     Радуйся, богомудрыя паствы твоея окормление;
     Pадуйся, усугубивый старческое на тебе благословение.
     Радуйся, яко послушанием явил еси о Бозе быстрое преспеяние;
     Pадуйся, яко сотаинник был еси Амвросиевых откровений.
     Радуйся, яко в меру отца твоего достигл еси;
     Pадуйся, яко о немже дерзновение пред Богом возымел еси.
     Радуйся, Иосифе, Божия Матере любимиче блаженный.

Кондак 5
      Божиим смотрением болезнь смертная нападе на тя, обаче не ко смерти бысть сия, но ко славе Божией. Криле бо схимы великия на болезненнем одре приял еси, темже обновился еси Духом яко орля, поя избавителю Богу: Аллилуиа.

Икос 5
      На одре болезненнем лежащу ти, отче богоносе, Сама Пречистая Дева Богородица прииде к тебе и укрепи тя в подвизе, и словеса изрече сладчайшая: «Потерпи, любимиче Мой, немного еще», – темже, чудящеся о таковом к тебе Божия Матере смотрении, со страхом и любовию тебе зовем:
     Радуйся, от младенства избранный Божия Матере любимиче;
     Pадуйся, Еюже от одра смертнаго возставленный.
     Радуйся, образе пламенеющей любве к Божией Матери;
     Pадуйся, непостыдный пред Нею о нас ходатаю.
     Радуйся, монашеских чинов невестоводителю;
     Pадуйся, под покровом Богоматере их предводителю.
     Радуйся, яко невест Христовых вручивый Богоматери;
     Pадуйся, обители Шамординския духовный воспитателю.
     Радуйся, Иосифе, Божия Матере любимиче блаженный.

Кондак 6
      На небеса восход души своея богомудрый Амвросий устрояя, яко Илия, колесницу добродетелей себе впряженну стяжав, на нейже восходя, яко милоть, благодать любве своея тебе оставив, в нюже облеклся еси, сугубейше Богу благодарне возвав: Аллилуиа.

Икос 6
      Скитом Оптинским богомудрое восприим управление, по завету старцев оптинских водити потщался еси монашеская стада, темже, благодать старческую на тебе зряще почивающую, овцы словесныя единогласно воззваша тебе:
     Радуйся, старца твоего достойный преемниче;
     Pадуйся, Амвросиевых даров наследниче.
     Радуйся, прозорливыма очима зревый тайны сердечныя;
     Pадуйся, исповеданием врачевавый язвы душевныя.
     Радуйся, богомудрыми советы к небеси восход указавый;
     Pадуйся, обличительными словесы от греховных уз разрешавый.
     Радуйся, оптинскаго старчества светлое зерцало;
     Pадуйся, утешение богатно всем подаваяй.
     Радуйся, Иосифе, Божия Матере любимиче блаженный.

Кондак 7
      Бурю страстей преминул еси на легцем корабле послушания, ветрилом окормляемь молитвами старцев твоих, во отишие безстрастия достигл еси, благодатию Божией охраняемь. Темже изми и нас молитвами твоими от потопа греховнаго, да спасающему тобою Всещедрому Богу благодарне вопием: Аллилуиа.

Икос 7
      Яко град, верху горы стоя, тако бысть душа твоя верою утвержденна в Господе, и яко светильник во тьме светяй, тако быша совети твои приходящим к тебе за помощию. Сего ради сбытие словес Евангельских на тебе зряще, похвальная тебе зовем:
     Радуйся, камень смирения положивый во основание здания добродетелей;
     Pадуйся, каменем тем сокрушивый главу змия-миродержца.
     Радуйся, град душевный устроивый по образу Горняго Иерусалима;
     Pадуйся, в немже не бе храм, но Господь его храм и светило.
     Радуйся, светильник разсуждения выну имея горящий;
     Pадуйся, имже от бед спасаяй к тебе приходящих.
     Радуйся, твердое в искушениих верным прибежище;
     Pадуйся, от треволнений душевных светлейшее разрешение.
     Радуйся, Иосифе, Божия Матере любимиче блаженный.

Кондак 8
      Свет пречуден с небес тебе облиста, отче Иосифе, егда на молитве умильно тебе предстоящу, виден бысть яве твой лик светозарен и радостен. Темже, чудящеся таковей благодати, на тебе почивающей, Богу, дающему молитву молящемуся, вопием: Аллилуиа.

Икос 8
      К Богу приближився непрестанным молением и причастием обожаемь, яко светильник Божествен был еси, чудодействы светя, сего ради просветившихся житием твоим, отче богоносе, светлоплодовитых сотвори нас, поющих тебе сия:
     Радуйся, светозарное Церкве Русския сияние;
     Pадуйся, непоколебимое благочестия утверждение.
     Радуйся, премудрости Божественныя возглаголание;
     Pадуйся, суеты мирския оглаголание.
     Радуйся, Светом Божественным с небеси облиставыйся;
     Pадуйся, земномудрствующих нас просвещаяй.
     Радуйся, яко наставил еси на спасительныя стези заблуждающих;
     Pадуйся, яко тайны Божественныя верным открываеши.
     Радуйся, Иосифе, Божия Матере любимиче блаженный.

Кондак 9
      На высоцем престоле разсуждения утвердил еси свой ум, Иосифе, и порфирою целомудрия, яко одеждею царскою, одеявся, нов Иосиф Прекрасный явился еси, богомудре отче, и над страстьми яко той над Египтом царствовал еси. Сего ради боговедения хлебы напитай чада твоя, и от страстнаго избави пленения вопиющих Христу: Аллилуиа.

Икос 9
      Сердце милостивое стяжал еси, отче Иосифе, яко требующим твоея помощи усердно благотворил еси, овем убо подая вещественную милостыню, овем убо невещественную, яко чудодейственную силу. Темже свыше богатящеся твоей помощию даже и доныне, благодарный ти приносим глас:
     Радуйся, Христа щедродательная деснице;
     Pадуйся, Богоматерь похваляющая уста.
     Радуйся, сердце милостивое стяжавый яко престол благодати;
     Pадуйся, чудодейственныя токи источивый от твоея раки.
     Радуйся, молитвою избавляяй от тирании страстей;
     Pадуйся, прикосновением исцеляяй от телесных немощей.
     Радуйся, нищим отверстая сокровищница сребра;
     Pадуйся, монашествующим духовное злато.
     Радуйся, Иосифе, Божия Матере любимиче блаженный.

Кондак 10
      Наследник отцев был еси, преподобне Иосифе, тех последуя житию и учению, и о спасении людей попечению, непоколебимое явился еси старчества оптинскаго утверждение. С нимиже яко дерзновение ко Господу имея, проси нам согрешений прощения и спасения вопиющим Богу, прославляющему святыя своя: Аллилуиа.

Икос 10
      Яко возделыватель богомудрый вертограда монашескаго, цветами Духа украсил еси иноческия чины и Амвросиевых дел продолжатель явился еси, богоблаженне, благоцветущими добродетельми исплел еси себе сугубыя венцы; мы же похвальная глаголем ти сице:
     Радуйся, яко кедр ливанский возвысивыйся в Оптинстем скиту;
     Pадуйся, яко благовонный кипарис облагоухавый монашеское сословие.
     Радуйся, яко уподобивыйся маслине многим твоим милосердием;
     Pадуйся, яко благовонный фимиам, исполнен был еси богоприятным молением.
     Радуйся, яко росою чудес кропиши тебе молящияся;
     Pадуйся, от раки мощей твоих исцеления подаваяй к тебе приходящим.
     Радуйся, яко благокрасный шипок, обитель Оптинскую украшаяй;
     Pадуйся, яко благоплодная лозо, обитель Шамординскую осеняяй.
     Радуйся, Иосифе, Божия Матере любимиче блаженный.

Кондак 11
      Пение ко Пресвятей Богородице приносиши, блаженне отче Иосифе, яко угодник Ея изряден сый пред престолом Святыя Троицы, и умильно ходатайствуеши о всех, к раце мощей твоих припадающих, да получивше силу свыше, вси благочестно поют Богу: Аллилуиа.

Икос 11
      Новое чудо во обретении мощей твоих явися, богоблаженне старче Иосифе, яко во славу старца твоего облеклся еси, и от земных недр чудодействовав преславными знаменьми, смиренномудрием богопослушно покрылся еси. Темже, промышлению Божию о тебе чудящеся, похвальная тебе зовем:
     Радуйся, яко вся отеческая хотения о тебе исполнивый;
     Pадуйся, крепкий послушниче воли Божией.
     Радуйся, яко и по смерти послушание старцу твоему явивый;
     Pадуйся, яко таинственным обретением мощей твоих всех удививый.
     Радуйся, яко унаследовал еси Амвросиеву славу;
     Pадуйся, яко чудесы божественными украсивый его честную раку.
     Радуйся, Оптиной пустыни нетления первый цвет явивый;
     Pадуйся, Рая Иисусова крине, благоухания исполненный.
     Радуйся, Иосифе, Божия Матере любимиче блаженный.

Кондак 12
      Покаяния изрядный проповедниче, отче Иосифе, чистоты и целомудрия неусыпный рачителю, яко показавый нам образ всеприлежнаго о Бозе подвизания, не отрини наша моления, в разслаблении сущих, но поспешествуй твоими молитвами, да последующе тебе, бодренно зовем Богу: Аллилуиа.

Икос 12
      Посещати нас от небесныя высоты непрестай, преподобне Иосифе, отгоняя всю житейскую тесноту к Богу твоими молитвами, яко попремногу ублажаем болезни и труды твоя, яже во бдении и пощении со всеми избранники Божия Матере всеусердне понесл еси. Сего ради, благодарни суще сицевому предстательству твоему, умильно зовем ти:
     Радуйся, яко теснотою подвига в широту Райскую достигл еси;
     Pадуйся, яко от небесных высей в тесноте живущим снисходиши.
     Радуйся, скорый предстателю о всех, тя призывающих;
     Pадуйся, от искушений внезапных паче чаяния избавляяй.
     Радуйся, в скорбех сущих к веселию незримо приводяй;
     Pадуйся, сатану злоумнаго пятою смиренномудрия попираяй.
     Радуйся, яко к Матери Божией приносиши наша моления;
     Pадуйся, яко со старцы Оптинскими вкушаеши райское веселие.
     Радуйся, Иосифе, Божия Матере любимиче блаженный.

Кондак 13
      О изрядный угодниче Божия Матере и теплый послушания рачителю, не презри нашея мольбы тебе, яко скорому ходатаю о нашей немощи приносимыя, но яви всегдашнее твое заступление, избавляя нас от зол и напастей сего развращеннаго века, да хранимии твоим молитвенным заступлением, Богу благодаряще о всем поем: Аллилуиа.
Этот кондак читается трижды, затем икос 1-й и кондак 1-й

Молитва преподобному Иосифу, старцу Оптинскому
      О, преподобне и богоносне отче наш Иосифе, старчества оптинскаго предивное украшение, воззри на нас милостивно, к земли приверженных, и к небесней возведи высоте, яко велие дерзновение ко Всемилостивому Владыце стяжавый и Пресвятыя Богородицы посещения сподобивыйся. Молися, богоблаженне отче, в любве и непорочности нам на земли пожити, страсти плотския попрати и добродетельный прекрасный венец постническим и любомудрым житием себе соплетати. Ты убо ведаеши, отче, коль опасно есть в нынешнем веце разслабленно жити, идеже соблазни и расколи яко волцы хищницы стадо Христово расхищают. Темже убо, отче, испроси нам в вере правой до смерти пребывати и предания святых отец со опастством хранити, да внутрь двора Церкве Христовыя пребудем, благодатию хранимии Всесвятаго Духа и твоим заступлением. Ей, отче, моли и Матерь Света Пресвятую Богородицу, да не оставит нас сирых, егда душею будем разлучени от тела сего бреннаго, но да проводит нас безбедно мимо горьких мытарств испытания ко Престолу Всемилостиваго Сына Своего, Ему же поклонение и славу возсылаем, со Безначальным Его Отцем и Пресвятым и Благим и Животворящим Его Духом, ныне и присно, и во веки веков. Аминь.

Тропарь Собору преподобных отцев и старцев, в Оптиной Пустыни просиявших
Тропарь глас 6:
      Православныя веры светильницы, монашества непоколебимии столпи, земли Российския утешителие, преподобнии старцы Оптинстии, любовь Христову стяжавшии и души своя за чада полагавшии, молитеся ко Господу, да утвердит земное Отечество ваше в православии и благочестии и спасет души наша.

Кондак глас 4:
      Воистину дивен Бог во святых Своих, Пустынь Оптину якоже вертоград старчества явивый, идеже богопросвещеннии отцы, тайная сердца человеческаго ведуще, народа Божия печальницы доблии явишася: сии бо на путь покаяния грехом отягощенныя наставиша, в вере колеблющияся светом Христова учения просветиша и Божией премудрости научиша, страждущим и немощным спострадаша и исцеления дароваша, ныне же, во славе Божией пребывающе, молятся непрестанно о душах наших.

Величание
      Ублажаем тя, преподобне отче Иосифе, и чтим святую память твою, наставниче монахов и собеседниче ангелов.

Акафист и образ прп. Иосифа позаимствованы на официальном сайте Введенского
ставропигиального мужского монастыря Оптина Пустынь http://www.optina.ru

Память 9/22 мая и 11/24 октября в соборе преподобных Оптинских старцев

Житие преподобного Иосифа, старца Оптинского

Православный календарь

Июль 2017
Пн Вт Ср Чт Пт Сб Вс
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

События календаря

Нет событий

Обсуждение на форуме

Тема: ?????? ?????? ??? ???????...
Написал: gena.bezvershenkoclex   23.07.2017
Тема: ?????? ????? 501 ? ??????...
Написал: narmanev93clex   23.07.2017
Тема: ??????? ??????? ?? ??????...
Написал: narmanev93clex   23.07.2017
Тема: ???????????? ?????? ?????...
Написал: rudolskiy.leopoldclex   23.07.2017
Тема: ?????? ?????? ?????? 2015...
Написал: m.vychizhaninFeers   23.07.2017

Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.