Вход

Изображения в галерее

64_0.jpg
403.jpg
804_74.jpg

АКАФИСТ Преподобному и Богоносному отцу нашему Иову, Почаевскому чудотворцу (иной)


Преподобный Иов, в схиме Иоанн, игумен Почаевский.

Кондак 1
      Избранный чудотворче и земли нашея добрый учителю, всея же вселенныя усердный молитвенниче, преподобне отче Иове, чистым твоим житием просвещаема обитель твоя и вси православнии людие благодарственная о тебе Святей Троице возносят хваления. Ты же яко имеяй дерзновение ко Господу, предстатель буди о душах наших неусыпный и на страсти воинствующим скорый помощник, да в радости сердца зовем ти:
     Радуйся, Иове, преславный угодниче Божий, и обители Почаевския украшение.

Икос 1
      Ангел благовестник воистинну явился еси нашим людем от врагов Церкви обуреваемым, отче наш Иове, елико писанми твоими и книг священных печатанием, толико и богоугодным житием и славным еже к Богу отшествием, ныне же и всей вселенней предстатель теплый являешися у Престола Владычня; сего ради зовем ти:
     Радуйся, истинныя Церкви добрый воине;
     Pадуйся, православия светлый светильниче.
     Радуйся, отцы наша от ереси оградивый;
     Pадуйся, чада их во благочестии утвердивый.
     Радуйся, спасения ради дом родителей издетска оставивый;
     Pадуйся, о души твоей попечение паче всех показавый.
     Радуйся, яко твоим отроческим подвигом старцы удивишася;
     Pадуйся, яко от юности во Ангельском образе к тем сопричтен был еси.
     Радуйся, обитель Угорницкую твоим житием просветивый;
     Pадуйся, множайшими труды монастырь Дубенский прославивый.
     Радуйся, немощных в вере утверждение;
     Pадуйся, неведущих вразумление.
     Радуйся, Иове, преславный угодниче Божий, и обители Почаевския украшение.

Кондак 2
      Видяще иноцы Угорництии ревностное твое в духовном житии преспеяние, схимонаха и пресвитера тебе быти устроиша, обаче Волынская земля на вящшия труды тя подвизающи, устрои тебе игумена быти во граде Дубенстем ко отражению еретических поползновений, православным же людем ко окормлению духовному и к неленостному Господеви воспеванию: Аллилуиа.

Икос 2
      Разум совершен воистинну отче показал еси, егда душевнаго ради устроения на гору Почаевскую уклонился еси и вместо начальствования послушанию паки предался еси, обаче в лучший того подвиг Господь тебе вменяше вторицею приятое зде игуменство, братие же Почаевстии взываху ти с веселием:
     Радуйся, наш отче новый и предивный;
     Pадуйся, благочестия образе.
     Радуйся, начальство, яко служение, приявший;
     Pадуйся, Богу и ближним волею поработивыйся.
     Радуйся, яко в начальстве твоем Христова смирения подобие является;
     Pадуйся, яко того ради покой душам нашим обретается.
     Радуйся, о людех доброе моление возносивый;
     Pадуйся, на демоны мужественно ополчивыйся.
     Радуйся, Ангельскаго ликостояния приобщивыйся;
     Pадуйся, добрый путевождь ко спасению нам явивыйся.
     Радуйся, спасающимся ободрение;
     Pадуйся, ленящимся обличение.
     Радуйся, Иове, преславный угодниче Божий, и обители Почаевския украшение.

Кондак 3
      Сила Духа Божественнаго обогати тя Иове премудре, егда татя монастырския пшеницы обличив, абие прощение тому даровал еси и утаенное паки ему возвратил еси покаяния его ради и алчущаго телесе насыщения, сие бо сотворив, окамененную умягчил еси душу и научил еси пети: Аллилуиа.

Икос 3
      Имеяй присное попечение о душе твоей отче преподобне, возлюбил еси пещерное затворение, идеже дни и нощи в молитве провождая, единому Богу беседовал еси, темже и свет благодати его темную пещеру яко Фаворскую гору облиставаше и научаше всех взывати тебе:
     Радуйся, молитвы непрестанное кадило;
     Pадуйся, слез неистощимый кладезю.
     Радуйся, древним Киево-Печерским затворником уподобивыйся;
     Pадуйся, тех благодатныя дарования стяжавый.
     Радуйся, яко молитвами твоими братия в терпении укрепляшеся;
     Pадуйся, яко воздыханьми твоими демони от твоея обители отгнашася.
     Радуйся, в темную пещеру небесный свет призвавший;
     Pадуйся, и в наша страстныя души благодать от Господа приносящий.
     Радуйся, скалы Почаевския твердейший адаманте;
     Pадуйся, всея страны нашея преславный светильниче.
     Радуйся, вселенския Церкве преславный столпе;
     Pадуйся, всех молящихся прибежище.
     Радуйся, Иове, преславный угодниче Божий, и обители Почаевския украшение.

Кондак 4
      Бурю еретических нахождений отгнати желая, был еси в богоспасаемом граде Киеве со освященным Собором Православных, идеже неврежденную веру дерзновенно исповедал еси и к томужде вся люди увещевал еси, тем же и священныя книги тиснением предавати во обители Почаевстей не преставал еси, яко всем чтущим сия истинную веру содержати и православно пети Богу: Аллилуиа.

Икос 4
      Слышаша иноцы Почаевстии непрестанную молитву Иисусову, твоими усты глаголемую, отче Иове, слезы же из очию твоею текущия видеша и твоею учительною беседою назидающеся, образом же жития твоего умиляющеся, глаголаху:
     Радуйся, молитвенниче наш предобрый;
     Pадуйся, учителю наш кроткий.
     Радуйся, благодатныя слезы источаяй;
     Pадуйся, и наша сердца умиляяй.
     Радуйся, яко духовную жертву непрестанно ко Господу возносиши;
     Pадуйся, яко райская утешения во уме твоем присно предносиши.
     Радуйся, Крестителя в воздержании подражателю;
     Pадуйся, многострадальнаго в долготерпении соревнователю.
     Радуйся, тою обою дарований приобщивыйся;
     Pадуйся, Ангельскаго сослужения сподобивыйся.
     Радуйся, нищих питателю;
     Pадуйся, скорбящих утешителю.
     Радуйся, Иове, преславный угодниче Божий, и обители Почаевския украшение.

Кондак 5
      Боготечней звезде уподобился еси преподобне, обходя землю Галицкую и Волынскую, светом же православия вся просвещая, ревнителем веры сугубую ревность внушая, добрых сердца в православии утверждая, ленивых же присно воздвизая к пению Богу: Аллилуиа.

Икос 5
      Видеша монаси и простии людие игумена Почаевския обители земли копанием и древес саждением и гноя собиранием себе смиряюща, яко другому Дамаскину дивляхуся, и всяку гордыню еретическую возненавидеша, в православии же души своя утверждаху, глаголюще:
     Радуйся, добраго подвига вождю;
     Pадуйся, истинныя веры утверждение.
     Радуйся, злочестивую гордыню еретиков обличаяй;
     Pадуйся, православное смиренномудрие возношаяй.
     Радуйся, яко тобою красоту благочестия познахом;
     Pадуйся, яко тобою суету мирскую в себе попрахом.
     Радуйся, богатым мира сего доброе вразумление;
     Pадуйся, нищим и трудником благое утешение.
     Радуйся, крест лишений волею подъявый;
     Pадуйся, той крест нам носити пособствуяй.
     Радуйся, Павла скинотворца последователю;
     Pадуйся, Христа Бога рабе благий.
     Радуйся, Иове, преславный угодниче Божий, и обители Почаевския украшение.

Кондак 6
      Проповедник православныя веры и благочестия чрез все житие твое быв, Иове преподобне, сие святою кончиною твоею запечатлел еси, уже за седмицу предрек, безболезненно по причащении Святых Таин, прияти сподобился еси, никакоже о мире сем жалея, но разрешитися хотя и со Христом быти, во еже непрестанно воспевати Серафимскую песнь: Аллилуиа.

Икос 6
      Возсия благолепною красотою мертвенное тело твое преподобне, еже бо в житии твоем постом и трудами сокрушал еси, тоежде Господь по успении твоем нетлением и благоуханием прослави, нас же пети тебе научи:
     Радуйся, небес пресельниче;
     Pадуйся, и земли молитвенниче.
     Радуйся, исхождение твое от земных предуведевый;
     Pадуйся, о том тепле возвеселивыйся.
     Радуйся, яко и нас в безстрашии ко смерти утверждаеши;
     Pадуйся, яко упованию на милость Божию нас научаеши.
     Радуйся, любителей временнаго живота обличителю;
     Pадуйся, будущаго воскресения нетленный плотию свидетелю.
     Радуйся, плоть свою в житии распинати поревновавый;
     Pадуйся, туюжде по смерти благоуханну явивый.
     Радуйся, неверующих явное обличение;
     Pадуйся, надеющихся доброе утверждение.
     Радуйся, Иове, преславный угодниче Божий, и обители Почаевския украшение.

Кондак 7
      Хотя Бог о нетлении мощей преподобнаго Иова известити Церковь, трищи в сонном видении того являет митрополиту Дионисию, аки жива и волю Господню извествующа, ему же веровав Дионисий прослави Вседержителя и угодника Его с песнию: Аллилуиа.

Икос 7
      Новаго тя о вселенней предстателя и чудотворца уведе освященный собор, монаси же и вси людие, егда пришедшу Дионисию на гору Почаевскую и житие твое уведевшу, честное твое тело из недр земли изнесеся нетленно и благоухания исполнено, чудеса же исцелений точаще, во еже вопити всем:
     Радуйся, чудотворче новый и великий;
     Pадуйся, всех святых сопричастниче.
     Радуйся, землю Волынскую погребением твоим освятивый;
     Pадуйся, явлением мощей твоих в православии нас утвердивый.
     Радуйся, яко тобою исцеления хромии и слепии приемлют;
     Pадуйся, яко твоего нетленнаго телесе демони трепещут.
     Радуйся, и нас, пред гробом твоим стоящих умиления исполняяй;
     Pадуйся, к желанию спасения нас подвизаяй.
     Радуйся, аки живый, по смерти многим явивыйся;
     Pадуйся, небесным силам духом твоим приобщивыйся.
     Радуйся, чудес источниче;
     Pадуйся, на демоны нам крепкий помощниче.
     Радуйся, Иове, преславный угодниче Божий, и обители Почаевския украшение.

Кондак 8
      Странное и дивное чудо показал еси, преподобне Иове, егда вскоре по прославлении твоем явился еси посреде двою Ангелу моляся в Церкве Почаевстей и плат миром исполненный девице некоей дал еси возложения ради на раны болящему игумену Досифею, той же исцеление прием абие к твоему гробу здрав припадаше, поя Богу: Аллилуиа.

Икос 8
      Весь еси воистинну обители твоея покров и заступление Иове преславне, сие бо православнии людие разумеша, егда тя на небеси узреша Богородице молящася о спасении святыя Лавры, монахов же и мирских челевек, от агарян зело осаждаемиих, но от того часа в радости тебе поющих:
     Радуйся, всемощный наш заступниче;
     Pадуйся, святыя обители стено необоримая.
     Радуйся, нападения агарянская отражаяй;
     Pадуйся, стрелы на главы их возвращаяй.
     Радуйся, яко умолил еси Ангельским Силам явитися к тех поражению;
     Pадуйся, яко многие агаряне ко Христу тогда привел еси.
     Радуйся, ратники на обитель воюющия в послушники Ея претворивый;
     Pадуйся, непокоривыя беглецы сотворивый.
     Радуйся, дерзости богоборныя посрамление;
     Pадуйся, терпения христианскаго увенчание.
     Радуйся, упования еже на тя не посрамивый;
     Pадуйся, молитвенники твоя спасый и прославивый.
     Радуйся, Иове, преславный угодниче Божий, и обители Почаевския украшение.

Кондак 9
      Всякия отступства и колебания в вере народом и обителию твоею претерпенная, отпустив преподобный Иов, молитвами своими землю Волынскую ко православию возврати и в ней святыню Почаевскую твердейший оплот истинныя веры ныне являет, приходящим к ней тьмочисленным людем, святыя же мощи его усты и сердцем целующим и поющим Богу: Аллилуиа.

Икос 9
      Витии славы твоея явишася православнии архиереи и весь освященный собор, егда мощи твоя, от отступник православия сокровенная, паки изнесоша во святую Церковь поклоняющимся христианом и в веселии глаголющим:
     Радуйся, православныя Волыни солнце;
     Pадуйся, истинныя Церкве звездо.
     Радуйся, заре правды нощи прешедшей возсиявшая;
     Pадуйся, луче, тьму ереси разгнавший.
     Радуйся, в нове твоих мощей явлении паки чудеса источаяй;
     Pадуйся, тем отступление от православия в конец обличаяй.
     Радуйся, яко моления верных исполняти не престал еси;
     Pадуйся, яко согрешения отец наших не помянул еси.
     Радуйся, и нас врагом прощати научаяй;
     Pадуйся, и нас в долготерпении утверждаяй.
     Радуйся, малодушных обличение;
     Pадуйся, кающихся прощение.
     Радуйся, Иове, преславный угодниче Божий, и обители Почаевския украшение.

Кондак 10
      Спасения нашего буди и ныне ходатай Иове преподобне, зане многия растленныя обычаи нечестивии людие введоша во страну нашу и теми крепость наша оскуде, но в сокрушении сердец наших к твоему заступлению припадаем, на твое же предстательство уповающе, вопием Богу: Аллилуиа.

Икос 10
      Стена твердая православной веры в земле Волынстей и Галицстей чрез все житие твое был еси отче преподобне, но и по преставлении твоем явленьми и исцеленьми за истину побораеши, еще же и невидимо душам чад твоих беседуеши, да вси вопием ти:
     Радуйся, спасения нашего поборниче;
     Pадуйся, искушений злых отгнателю.
     Радуйся, ко Господу дерзновение о нас стяжавый;
     Pадуйся, от Того благодать исцелений приявый.
     Радуйся, яко со Ангелы в раи днесь водворяешися;
     Pадуйся, яко со Апостолы и мученики тамо ликуеши.
     Радуйся, купно с ними о Церкви предстателю;
     Pадуйся, милосердия Божия к нам ходатаю.
     Радуйся, кающияся еще в житии твоем возлюбивый;
     Pадуйся, ныне тех молитвы, яко фимиам к небесному Престолу возносяй.
     Радуйся, и всех молящихся скорый слышателю;
     Pадуйся, смиренных сердцем покровителю.
     Радуйся, Иове, преславный угодниче Божий, и обители Почаевския украшение.

Кондак 11
      Пение наше благодарное, от любве чистыя приносимое, приими угодниче Божий, яко же вдовицине лепте зане духовное имение наше нищетно пред тобою, благими же делы подражати тебе не возможем, но сокрушенная воздыхания о гресех наших приносяще, твоих добродетелей славою утешаемся, поюще Богу: Аллилуиа.

Икос 11
      Светильник православныя веры и столп благочестия был еси отче наш Иове, словом, житием, любовию, верою, чистотою, в них же и нас твоими молитвами укрепи, всякия же ереси и развращенныя обычаи от нас далече отжени, да благодарственное сотворим ти пение:
     Радуйся, Божий избранниче;
     Pадуйся, Ангелов собеседниче.
     Радуйся, и от нас духом любве твоея не отступивый;
     Pадуйся, и нам от духа твоего дарования разделяяй.
     Радуйся, яко зрящии нетленное тело твое на страсти телесная ополчаются;
     Pадуйся, яко чтущии о святем житии твоем, душу свою очистити тщатся.
     Радуйся, ревновати о своем спасении нас научаяй;
     Pадуйся, и ближних спасению служити нас подвизаяй.
     Радуйся, ревностию о православии сердца наша распаляяй;
     Pадуйся, покаянием о гресех души наша сокрушаяй.
     Радуйся, духовнаго сна разгнателю;
     Pадуйся, духовныя бодрости подателю.
     Радуйся, Иове, преславный угодниче Божий, и обители Почаевския украшение.

Кондак 12
      Благодать непрестанныя молитвы и о теле небрежения, радости же духовныя и к ближним сострастия обильно стяжал еси отче Иове, тем же и нас ленивых и грешных, тоя причастники сотвори твоими всемощными молитвами, да мучительства страстей избавльшеся, воспоим Богу: Аллилуиа.

Икос 12
      Поюще твое дивное житие на земли и на небеси прославление, молим тя Иове преподобне: утверди молитвами твоими православную веру во стране тебе присной, всю же Христову Церковь на земли противу неверия и ереси защити и укрепи, наша же не отвергни хваления сицевая:
     Радуйся, Апостольскаго служения сопричастниче;
     Pадуйся, пустыннических подвигов ревнителю.
     Радуйся, нищеты духовныя благий образе;
     Pадуйся, плача духовнаго богатный стяжателю.
     Радуйся, яко кротостию твоею души татий и злодеев, аки наследие доброе Господеви привел еси;
     Pадуйся, яко со всеми алкавшими и жаждавшими правды ныне во дворех Божиих насыщаешися.
     Радуйся, от Бога со всеми милостивыми помилованный и прославленный;
     Pадуйся, со всеми чистыми сердцем лицем к лицу ныне Того созерцаяй.
     Радуйся, и нас от небесных с любовию назираяй;
     Pадуйся, всем о православии трудящимся помощь от Господа подаваяй.
     Радуйся, обитель твою от всякаго обстояния сохраняяй;
     Pадуйся, и о всей вселенней молитвы Господеви возносяяй.
     Радуйся, Иове, преславный угодниче Божий, и обители Почаевския украшение.

Кондак 13
      О всеблаженне преподобне Иове, православныя веры великий ревнителю и ереси твердый обличителю! Малаго сего моления от убогих сердец наших к тебе возносимаго не отвержи, но буди нам присный в вере и покаянии наставник, в подвизех благий помощник и пред Господом о спасении нашем неустанный молитвенник, о тебе вопиющих Богу: Аллилуиа.
Этот кондак читается трижды, затем икос 1-й и кондак 1-й

Молитва Преподобному и Богоносному отцу нашему Иову, Почаевскому чудотворцу
      О преподобне отче Иове, иноков трудолюбнаго жития богомудрый наставниче, кротости и воздержания, чистоты и целомудрия, братолюбия и нищелюбия, терпения и бдения от ранней юности до поздней старости неутомимый подвижниче, веры православныя великий ревнителю и непреоборимый поборниче, земли Волынския и Галицкия светило богосветлое и святыя Почаевския обители непобедимый защитниче. Призри оком благоутробия твоего на нас недостойных чад твоих, к тебе усердно по вся дни прибегающих и на боголюбивыя люди сия, пред твоими духоносными и многоцелебными мощами собравшияся и благоговейно к тем припадающия, и испроси предстательством твоим ко Всевышнему Владыце им и нам вся, яже к животу и благочестию, полезная и благопотребная: болящия исцели, малодушныя ободри, скорбящия утеши, обидимыя заступи, немощныя подкрепи и поверженныя долу возстави, всем вся, благодатию тебе от Бога данною, даруй по коегождо нужде и потребе, во спасение души и во здравие телу. Вознеси, угодниче Божий, всемощную молитву твою, да будет в стране нашей выну мир и тишина, благочестие и благоденствие, в судах правда и милость, в советех мудрость и благое преспеяние, да утверждается же во благих человецех верность, в злых же страх и боязнь, во еже престати им от зла и творити добрая, да тако в стране нашей Царство Христово растет и множится и да прославится в нем Бог, дивный во Святых Своих: Ему же единому подобает всякая слава, честь и поклонение Отцу, и Сыну, и Святому Духу, ныне и присно, и во веки веков. Аминь.

Молитва иная
      О всесвятый и преславный угодниче Божий, преподобне отче наш Иове, присный о нас ко Господу молитвенниче и теплый предстателю о душах наших, к тебе всеумиленно ныне притекаем, и поминающе подвиги и чудеса твоя, яже сотворил еси и твориши на земли, просим и молим твою благостыню, якоже твердо и неизменно потрудился еси в вере Христа Бога нашего, и сию до конца в себе и во всех присных твоих целу и невредиму сохранивый от всяких приражений вражиих и ересей тлетворных, сице и нас в православии и единомыслии укрепи, отгоняющи молитвами твоими всякую тьму неверия и неправомыслия от сердец и помышлений наших, послуживый Господу и Богу твоему делы благими и неизреченным самоотвержением в трудех, бдениих и пощениих, настави нас на путь всякия добродетели и благостыни, избавляющи от искушений и грехов, удаляющих нас от Бога и повергающих в бездну зла все житие наше, явивыйся иногда с Пречистою Девою Богородицею верху горы Почаевския во спасение обители твоей от нашествия и обложения агарянскаго, и ныне ускори на помощь всей православной и боголюбивой державе нашей противу всех врагов наших внешних и внутренних, утверждая мир и тишину в земли нашей, да твоими молитвами и предстательством тихое и безмолвное житие поживем во всяком благочестии и чистоте; и всем, к тебе притекающим и припадающим к раце честных и многоцелебных мощей твоих и твоея помощи и заступления требующим, неоскудныя милости независтно подаваяй, не остави и нас сирых и безпомощных, тебе молящихся, избавляющи от всякия скорби, гнева и нужды, от глада, губительства, труса, потопа, огня, меча, нашествия иноплеменник и междоусобныя брани. Ей, угодниче Божий, призри милостивно от престола Царя славы, Емуже ты ныне предстоиши со архангелы и ангелы и со всеми святыми, на обитель твою Почаевскую, еюже ты древле мудро правил еси, наздав ю всехвальным и дивным житием твоим, и сохрани ю молитвами твоими и всякий град и страну и всех отовсюду, на мори и на суши, в пустынях и в злоключениих многоразличных тебе призывающих, от всех зол видимых и невидимых, да тако твоею помощию и ходатайством спасаеми, в веце сем и по скончании живота нашего сподобимся купно с тобою славити и воспевати всечестное имя Отца и Сына и Святаго Духа во веки веков. Аминь.

Тропарь Преподобному и Богоносному отцу нашему Иову, Почаевскому чудотворцу
Тропарь, глас 4:
      Многострадальнаго праотца долготерпение стяжав, Крестителеву воздержанию уподобляяся, Божественныя же ревности обою приобщаяся, тех имена достойно прияти сподобился еси, и истинныя веры был еси проповедник безбоязнен, тем же монахов множество ко Христу привел еси, и вся люди в православии утвердил еси, Иове, преподобне отче наш, моли спастися душам нашим.

Ин тропарь на обретение мощей, глас 4:
      Возложив на ся иго Христово от юности, преподобне отче Иове, многолетне свято подвизался еси на поприще благочестия во обители Угорницкой и на острове Дубенстем, и притекл к горе Почаевской, знаменанней цельбоносною стопою Пресвятыя Богородицы, в тесной пещере каменней богомыслия ради и молитвы многократно заключался еси, и, благодатию Божиею укрепляяся, мужественно потрудился еси на пользу обители твоея, купно же и противу врагов Православия и благочестия христианскаго, и наставив сицевому ополчению иночествующих, победители тех представил еси своему Владыце и Богу. Того моли спастися душам нашим.

Кондак, глас 4:
      Явился еси истинныя веры столп, Евангельских же заповедей ревнитель, гордыни обличение, смиренным же предстатель и научение, тем же и ублажающим тя, грехов отпущение испроси, и обитель твою невредиму сохрани Иове, отче наш, многострадальному подобный.

Ин кондак на обретение мощей, глас 8:
      Возсия от спуда земнаго благодатная луча честных мощей твоих, угодниче Божий, яже благочестно пожив в вере Христа Бога нашего, достигл еси добродетелей совершенства, и, оставль сладость жития преходящаго, в пещере горы Почаевския в пощении, молитвах и трудех свято потрудился еси, и теми тело твое увядил еси. Ныне же пришед к Богу в безмятежный и вечный покой, молишися о всех, с верою к тебе прибегающих. Темже благодарне вопием ти: радуйся, отче Иове, преславный угодниче Божий и обители Почаевския украшение.

Величание
      Ублажаем тя, преподобне отче наш Иове, и чтем святую память твою, наставниче монахов, и собеседниче ангелов.

Православный календарь

Ноябрь 2017
Пн Вт Ср Чт Пт Сб Вс
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.