Котловка.ру 

Вход

Изображения в галерее

838_18.jpg
836_48.jpg
834_48.jpg

АКАФИСТ царю и страстотерпцу Николаю (иной)


Святые царственные страстотерпцы.

Кондак 1
      Избранный от рождения страстотерпче и Христовой любве воплощение, воспеваем ти похвальная, яко паче всего отечество возлюбившему. Ты же яко имеяй дерзновение ко Господу, просвети омраченныя умы и сердца наша, да зовем ти:
     Радуйся, Николае, боговенчанный царю и великий страстотерпче!

Икос 1
      Ангелов Творец посла тя земли Российстей, яко образ незлобия ко вразумлению народа твоего и яко жертву за грехи людския, мы же, дивящеся таковому о тебе промышлению Вседержителя, с умилением вопием ти:
     Радуйся, Христу уподобление!
     Радуйся, жертво всесожжения!
     Радуйся, царей Российских украшение!
     Радуйся, незлобия и всепрощения образ подавый!
     Радуйся, обидимых неложное упование!
     Радуйся, веры нерушимое основание!
     Радуйся, Николае, боговенчанный царю и великий страстотерпче!

Кондак 2
      Видящи всеблагая Богоматерь во уделе Своем страну нашу мерзостию растления оскверняемую, избра тя от рождения, яко чистейшаго, Руси во очищение, да вси надгробное рыдание тебе творим песнь: Аллилуиа.

Икос 2
      Разум предвечный предуведе тя ко спасению и в житии твоем, по образу Иова многострадальнаго бывшем, рождения день с праведника сего памятию сочета. Мы же, грехи и беззакония наша поминающе, с трепетом сердечным и сокрушением душевным вопием ти сице:
     Радуйся, хулы и напасти от народа твоего претерпевый!
     Радуйся, веру до конца сохранивый!
     Радуйся, образе кротости!
     Радуйся, светильниче правды!
     Радуйся, правило смирения!
     Радуйся, Николае, боговенчанный царю и великий страстотерпче!

Кондак 3
      Сила Вышняго осени тя, боговенчанне Николае, лжемудрствующу западу вразумление противоратное соделавшаго, да мир Богу возопиет: Аллилуиа.

Икос 3
      Имея тщание о вразумлении заблудших, поревновал еси благоверный царю храмов созиданию, мощей святых угодников Божиих прославлению, просвещения христианскаго насаждению и обездоленных от насилия ограждению, да мир христианский вопиет ти таковая:
     Радуйся, святителя Николая на земли соимените!
     Радуйся, преподобнаго Серафима на небеси сомолитвенниче!
     Радуйся, Православия насадителю!
     Радуйся, света Христова носителю!
     Радуйся, терпения христианскаго учителю!
     Радуйся, православным христианом заступниче!
     Радуйся, Николае, боговенчанный царю и великий страстотерпче!

Кондак 4
      Бури безумия и злоречия не убоялся еси, страстотерпче Николае, егда согласие со враги на пагубу отечества отвергнувый, злохуления, заточение и умерщвление претерпел еси, вопия Богу Вседержителю: Аллилуиа.

Икос 4
      Слыша о державы Российския нестроение и видя благочестие разорение, непрестанно молился еси, да спасет Всеблагая Русь православную. Сего ради вопием ти:
     Радуйся, молитвы кадило благовонное!
     Радуйся, лампадо веры неугасимая!
     Радуйся, буйствующих кротостию вразумление!
     Радуйся, неутешных в скорбех утешение!
     Радуйся, небесных благ любителю!
     Радуйся, правды ревнителю!
     Радуйся, Николае, боговенчанный царю и великий страстотерпче!

Кондак 5
      Боготечная звезда россияном явился еси, царю Николае, о имени твоем во едино их собирая и путь Христов к возрождению земли Российстей показуя, да поют ангелы песнь о кающихся грешницех: Аллилуиа.

Икос 5
      Видя яко кротость и смирение твое ничтоже успевает, все упование на Пречистую возложил еси и в руце Вседержителя всего себе предал еси, да и безумныя вразумит во еже пети тебе:
     Радуйся, гордыни победителю!
     Радуйся, венца небеснаго носителю!
     Радуйся, немощных стено необоримая!
     Радуйся, гордых вразумителю!
     Радуйся, к людем своим любы преизобильная!
     Радуйся, за Русскую землю жертва усердная!
     Радуйся, Николае, боговенчанный царю и великий страстотерпче!

Кондак 6
      Проповедуют концы вселенныя славу твою, во всю землю изыде слово твое, яко несть тоя жертвы, юже не принесл бых за благо отечества моего, научая тем люди твоя благодарственно пети Богу: Аллилуиа.

Икос 6
      Возсиял еси паче солнца земли Российстей, царю Николае, православному народу заступление даже до смерти явивый, да вси ко Христу обращаются и к тебе прибегают. Сего ради воспеваем ти таковая:
     Радуйся, свете от востока исшедый!
     Радуйся, образе царем православным!
     Радуйся, правды сияние неистощимое!
     Радуйся, кротости светило незаходимое!
     Радуйся, грешников отчее вразумление!
     Радуйся, праведников усердное прославление!
     Радуйся, Николае, боговенчанный царю и великий страстотерпче!

Кондак 7
      Хотяй веру православную на земли утвердити, подвигл еси все царство твое на заступление обидимыя страны Сербския, да вси вопиют Богу: Аллилуиа.

Икос 7
      Новаго тя Ноя, строителя спасения народу российскому яви Господь, да вся труды твоя поминающе, непрестанно воспеваем ти сицевая:
     Радуйся, Российскаго корабля водителю!
     Радуйся, славян в бедах утешителю!
     Радуйся, Сербстей стране заступление!
     Радуйся, россиян окормление!
     Радуйся, христианских добродетелей насадителю!
     Радуйся, Николае, боговенчанный царю и великий страстотерпче!

Кондак 8
      Странное чудо видим на тебе, Николае, десницею Всевышняго многажды спасаеме, со чады же и сродники мученическим венцем венчаеме, да Богу Промыслителю всяческих вопием: Аллилуиа.

Икос 8
      Весь христианом всем заступник явился еси, богоизбранне Николае, сугубое заступление народом славянским показуеши, на похвалу подвизая пети тебе:
     Радуйся, защито обидимых!
     Радуйся, вразумление обидящих!
     Радуйся, скорбных прибежище!
     Радуйся, гонимых заступниче!
     Радуйся, в житии твоем миротворче!
     Радуйся, по убиении твоем христианом поборниче!
     Радуйся, Николае, боговенчанный царю и великий страстотерпче!

Кондак 9
      Всякими чудесы яви Господь благоволение Свое людем российским, дондеже преогорчиша Господа зело. Но тобою к покаянию призываеми, купно воспоим Богу: Аллилуиа.

Икос 9
      Ветии многовещаннии, яко рыбы безгласнии, не возмогут изрещи высоту твоего терпения, мы же глубину падения нашего созерцающе, в сокрушении духа взываем:
     Радуйся, терпение необоримое!
     Радуйся, верносте христиан непоколебимая!
     Радуйся, гордыни сокрушение!
     Радуйся, безумным умудрение!
     Радуйся, образ верным в житии и мученичестей кончине давый!
     Радуйся, за грехи земли своея пострадавый!
     Радуйся, Николае, боговенчанный царю и великий страстотерпче!

Кондак 10
      Спастися хотяй всем человеком, иже на крови мученик Своих Церковь основавый, сердцеведец Христос положи тя, страстотерпче Николае, во основание новыя храмины державы Российския, да вси в ней сущии вопиют Богу: Аллилуиа.

Икос 10
      Стена еси всем к тебе с верою прибегающим и необоримое ограждение миру православному, научая вся верныя славити тя сице:
     Радуйся, на земли небесных явление!
     Радуйся, оскудевающих добродетельми восполнение!
     Радуйся, заре в земли Российстей возсиявшая!
     Радуйся, реко, вся пределы ея напитавшая!
     Радуйся, смиренномудрия учителю!
     Радуйся, веры и любве насадителю!
     Радуйся, Николае, боговенчанный царю и великий страстотерпче!

Кондак 11
      Пение Пресвятей Троице даже до смерти приносяще, течение скончал и веру соблюл еси, еюже вся православныя христианы подвизаеши пети: Аллилуиа.

Икос 11
      Светодателем послан быв земли нашей, яко агнец непорочный, полагаешися во искупление грех наших, да вси непрестанно тя славим:
     Радуйся, боголюбезная жертво!
     Радуйся, любвеобилие неистощимое!
     Радуйся, верности Христовы похвало!
     Радуйся, всеяние духа незримое!
     Радуйся, зерцало премудрости!
     Радуйся, ненадеющихся надеждо!
     Радуйся, Николае, боговенчанный царю и великий страстотерпче!

Кондак 12
      Божественная благодать, немощная врачующи, предуведе тя, яко врачевство неистощимое владомым твоим, вопиющим Богу: Аллилуиа.

Икос 12
      Поюще страдания твоя, страстотерпче Николае, поклоняемся терпению твоему, яко силе всемощныя Троицы явльшейся на тебе, да вси согласно вопием:
     Радуйся, возлюбленное чадо Христово!
     Радуйся, непорочная чада твоя и верныя слуги ко Христу приведый!
     Радуйся, царице праведною и мученицею быти пособствовавый!
     Радуйся, народ твой истине наставивый!
     Радуйся, отечества чести не посрамивый!
     Радуйся, Царствие Небесное стяжавый!
     Радуйся, Николае, боговенчанный царю и великий страстотерпче!

Кондак 13
      О пречудный и преславный страстотерпче царю Николае, призри на царство твое земное и люди твоя: всякаго бо ответа о гресех наших недоумеем. Но умоли Вседержителя, да не внидет в суд с нами, но сподобит ны непрестанно воспевати: Аллилуиа.
Этот кондак читается трижды, затем икос 1-й и кондак 1-й

Молитва
      О святый страстотерпче царю мучениче Николае! Помазанника Своего тя Господь избра, во еже милостивно и право судити людем твоим и хранителем царства православнаго быти. Царское служение сие и о душах попечение со страхом Божиим совершал еси. Испытуя же тя, яко злато в горниле, скорби горькия Господь ти попусти, якоже Иову многострадальному, последи же престола царскаго лишение и мученическую смерть посла ти. Вся сия кротко претерпевый, яко истинный раб Христов, наслаждаешися ныне вышния славы у престола всех Царя, купно со святыми мученики: святою царицею Александрою, святым отроком царевичем Алексием, святыми царевнами Ольгою, Татианою, Мариею и Анастасиею и с верными слугами твоими, такожде со святою мученицею княгинею Елисаветою и со всеми царственными мученики и святою мученицею Варварою. Но яко имея дерзновение велие у Христа Царя, Егоже ради вси пострадаша, моли с ними, да отпустит Господь грех народа, не возбранившаго убиение твое, царя и Помазанника Божия, да избавит Господь страждущую страну Российскую от лютых безбожник, за грехи наша и отступление от Бога попущенных, и возставит престол православных царей, нам же подаст грехов прощение и на всякую добродетель наставит нас, да стяжим смирение, кротость и любовь, яже сии мученицы явиша, да сподобимся Небеснаго Царствия, идеже купно с тобою и всеми святыми новомученики и исповедники Российскими прославим Отца и Сына и Святаго Духа, ныне и присно и во веки веков. Аминь.

Тропарь святому царю и страстотерпцу Николаю
Tропарь, глас 7:
      Ангели земли Российския, и воскресения ея путеводителие, Царю Николае и Царице Александро, начавшемуся богоотступлению, Державою благоверне правившии, и юныя Великия Княжны, в трудех и милосердии добре подвизавшияся, и Царевичу-страдальче Алексие, — Царственнии страстотерпцы, яко агнцы незлобивии, от безбожных губителей Руси мучимии и закланнии, ныне же царство вечное приимшии, молитеся Небесному Царю Царей о Державе сродников ваших, просветитися ей верою отцев и покаянием паки возродитися.

Память 4/17 июля

АКАФИСТ святому Царю-мученику Николаю

АКАФИСТ святой благоверной Царице-мученице Александре

АКАФИСТ святой великомученице благоверной царице Александре (иной)

АКАФИСТ святому великомученику благоверному царевичу Алексию

АКАФИСТ святым царственным страстотерпцем императору Николаю II и его семье

АКАФИСТ святым царственным страстотерпцем императору Николаю II и его семье (иной)

АКАФИСТ святым царственным страстотерпцем (третий)

Житие святых Царственных Страстотерпцев Царя Николая и его семьи

Православный календарь

Notice: Undefined index: n92f7ae in /home/pustota/html/kotlovka.ru/components/com_jevents/libraries/registry.php on line 1
Сентябрь 2014
Пн Вт Ср Чт Пт Сб Вс
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5

События календаря

Нет событий

Обсуждение на форуме

Тема: ???? ? ?????????? ??????
Написал: ?????   30.06.2013

Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.