Вход

Изображения в галерее

833_81.jpg
808_04.jpg
803_81.jpg

АКАФИСТ Пресвятой Богородице в честь иконы Ея «Прибавление ума»


Икона Божией Матери Прибавление ума. Современная икона.

Кондак 1
      Избранней от всех родов Божией Матери, Небеси и земли Царице, врачевство духовное всему миру подающей, благодарственная пения приносим о даровании Божественнаго сокровища, чудотворныя иконы Ея, «Прибавление ума» нареченныя, еюже ограждаеми, радуемся светло и с любовию взываем:
     Радуйся, Всемилостивая Владычице, премудрость и разум верным людем Твоим дарующая.

Икос 1
      Ангел предстатель послан бысть во град Назарет к чистей Отроковице Марии рещи: радуйся. Пречистая же Дева, благовестие Архангела слышавши, во смирении сердца отвеща: се, Раба Господня, буди Мне по глаголу твоему. Тогда Бог Слово воплощашеся во утробе Ея. Мы же грешнии, благоговейне чтуще Матерь Христа Бога нашего, яко Ангелом научихомся, тако со умилением вопием Благодатней:
     Радуйся, Благословенная в женах;
     Pадуйся, у Господа обретшая благодать.
     Радуйся, силою Всевышняго осененная;
     Pадуйся, Духом Святым освященная.
     Радуйся, верная Рабо Господня;
     Pадуйся, Богоизбранная Отроковице.
     Радуйся, Спасителя мира рождшая;
     Pадуйся, Мати Света, всех просвещающаго.
     Радуйся, премудрых превосходящая разум;
     Pадуйся, верных озаряющая смыслы.
     Радуйся, Небеси и земли Царице;
     Pадуйся, яко Тя ублажают вси роди.
     Радуйся, Всемилостивая Владычице, премудрость и разум верным людем Твоим дарующая.

Кондак 2
      Видящи, Всенепорочная, желание людей новопросвещенных, благослови евангельских таин благовестника апостола Луку написати пречистаго лика Твоего изображение, и на него зрящи, глаголала еси со властию: с сим образом благодать Моя и сила да будет. Темже благоговейне покланяющеся пред святыми иконами Твоими, имиже весь мир христианский украсила еси, благодарственно вопием о Тебе Богу: Аллилуиа.

Икос 2
      Разум небесный открывающе, Пречистая Дево, благоизволила еси явити всем верным, яко в мире есть воля Божия, благая, угодная и совершенная, и всяк ум превосходящая. Призри на нас, Всепетая Богородице, озари светом истины, утеши нас, яко Мати, настави нас на путь правды, да возопиим моляще Тебе тако:
     Радуйся, Божию Силу и Божию Премудрость, Христа породившая;
     Pадуйся, Бога с Человеком соединившая.
     Радуйся, светом разума души наша просвещающая;
     Pадуйся, неизреченныя славы Божия вместилище.
     Радуйся, почитания святых икон освящение;
     Pадуйся, духовных сокровищ Подательнице.
     Радуйся, честным Твоим иконам благодать даровавшая;
     Pадуйся, яко на иконы Твоя взирающе, Самой Тебе покланяемся.
     Радуйся, во всем мире исцеления от святых икон Твоих подающая;
     Pадуйся, к Небесем умы и сердца наша возводящая.
     Радуйся, всю вселенную лучами Твоея благодати озарившая;
     Pадуйся, с Сыном Твоим и Богом вечно царствующая.
     Радуйся, Всемилостивая Владычице, премудрость и разум верным людем Твоим дарующая.

Кондак 3
      Силою благодатною осеняеми, благочестивии людие во град Назарет приидоша и обретоша тамо дом Богородичен, идеже Пречистая Дева родися и благовестие Архангела прият, и пренесоша дом той в землю Италийскую, во град Лорето. Верху же дома онаго доныне есть икона Богородична, от древа сотворена, юже ангельския Небесныя Силы невидимо окружают и благолепно чествуют, радостно вопиюще Богу: Аллилуиа.

Икос 3
      Имущи к роду христианскому матернее милосердие, вси концы земли ко спасению призываеши, Пречистая, темже убо народи разноязычнии от многих стран приходят в дом Твой и пред иконою Твоею исповедуют грехи своя. Того ради от востока до запада прославлена бысть икона Твоя, и избавленнии от болезней, скорбей и напастей людие приносят Ти благодарения, взывающе:
     Радуйся, Доме, Егоже созда Себе Премудрость Божия;
     Pадуйся, граде Божий, иже от малаго града Назарета произыде.
     Радуйся, дом Божий явлением Своим озарившая;
     Pадуйся, Отроковице, Святая Святых большая.
     Радуйся, с Предвечным Богомладенцем в Назарет пришедшая;
     Pадуйся, таинству спасения рода человеческаго послужившая.
     Радуйся, лествице, Еюже восходим от земли на Небо;
     Pадуйся, всему миру предивный покрове.
     Радуйся, яко с верою покланяемся пречистаго лика Твоего изображению;
     Pадуйся, яко от него приемлем благодатныя дары во спасение душ наших.
     Радуйся, дивная знамения иконами Твоими совершающая;
     Pадуйся, державная Заступнице рода христианскаго.
     Радуйся, Всемилостивая Владычице, премудрость и разум верным людем Твоим дарующая.

Кондак 4
      Бурею скорби велия одержимь бе изограф некий, в помрачении разума от земных врачей никоеяже пользы получивый. Тогда Пречистая Мати Господа явися болящему и заповеда икону написати, яже дом Ея во граде Лорето освящает. Сия исполнив, изограф исцелися и от того дне икону новописанную «Прибавление ума» нарече, поя пред нею хвалебную песнь Богу: Аллилуиа.

Икос 4
      Слышавше людие земли Русския, яко благоизволи Пресвятая Богородица дати им в радость и утешение икону Свою, «Прибавление ума» нареченную, многими списками ея украсиша храмы и домы своя, от нихже дивная знамения и чудеса обильно содеваются всем притекающим с верою и поющим Преблагословенней таковая:
     Радуйся, образ Твой честный во утешение и освящение нам даровавшая;
     Pадуйся, болезни душевныя и телесныя иконою Твоею скоро врачующая.
     Радуйся, землю Русскую покровом милости Твоея осенившая;
     Pадуйся, любящия и чтущия Твой образ от всяких бед избавляющая.
     Радуйся, со иконами Твоими благодатными невидимо в домы наша входящая;
     Pадуйся, благословение и радование тем приносящая.
     Радуйся, оставленных врачами на Свои всемощныя руце приемлющая;
     Pадуйся, иждившим от недуга ум исцеление подающая.
     Радуйся, безнадежных надеждо;
     Pадуйся, умов наших просвещение.
     Радуйся, познания истины чистое зерцало;
     Pадуйся, яко от востока и до запада имя Твое ублажается.
     Радуйся, Всемилостивая Владычице, премудрость и разум верным людем Твоим дарующая.

Кондак 5
      Боготечней звезде подобна явися икона Твоя, Богомати: страну бо нашу Российскую и грады ея освящает, сущих во тьме невежества светом боговедения озаряет, разум наш, грехми помраченный, просвещает, заблуждающихся же на путь делания заповедей Сына Твоего и Бога наставляет, Емуже благодарственне вопием: Аллилуиа.

Икос 5
      Видевше Божественное сокровище — дивную икону Богоматере, к нейже усердно притекающе, в недузех исцеление, в скорбех утешение, в бедах избавление приемлем и радостно поем Заступнице нашей:
     Радуйся, явлением иконы Твоея верных осиявшая;
     Pадуйся, яко Тобою во тьме возсия Солнце Правды, Христос Бог наш.
     Радуйся, Мати Света умнаго, благодатию всю вселенную озарившаго;
     Pадуйся, зарями благодати нас просвещающая.
     Радуйся, светом Твоим мрак неведения нашего разгоняющая;
     Pадуйся, Дево, яко Тобою свет боговедения всем возсия.
     Радуйся, свеще неугасимая, свет веры воспламеняющая;
     Pадуйся, добродетели путь освещающая.
     Радуйся, святыни Источниче;
     Pадуйся, от бед и напастей крепкая наша Хранительнице.
     Радуйся, любве Божественныя светильниче неугасимый;
     Pадуйся, сиянием чудес Твоих весну спасения нам возвещающая.
     Радуйся, Всемилостивая Владычице, премудрость и разум верным людем Твоим дарующая.

Кондак 6
      Проповедует мир весь милости Твоя, Мати Господа нашего, во градех бо и весех земли Русския икона Твоя «Прибавление ума» лучами чудес сияет, просвещающи души наша светом Божия благодати и подвизающи пети прославльшему Тя Богу: Аллилуиа.

Икос 6
      Возсиял еси в честней иконе Твоей, Богородице, свет спасения всем, блуждающим во тьме грехов и страстей, и всем молящимся пред нею с верою и благоговением скорая помощь подается. Умов наших омрачение светом Твоим отжени, Всепетая, и даруй Истинный Свет узрети всем, с любовию вопиющим Ти сице:
     Радуйся, звездо незаходимая, Солнце Правды в мир вводящая;
     Pадуйся, Мати Света Истиннаго, души верных просвещающаго.
     Радуйся, благодатнаго учения Наставнице;
     Pадуйся, яко светлым покровом ум наш омраченный осеняеши.
     Радуйся, заре невечерняя, мглу наших грехов разгоняющая;
     Pадуйся, тьмы и вечных мук нас избавляющая.
     Радуйся, от сетей вражиих свобождающая;
     Pадуйся, безумие мира побеждающая.
     Радуйся, душевредных учений низложение;
     Pадуйся, душеполезных знаний дарование.
     Радуйся, иконою Твоею нас утешающая;
     Pадуйся, светом радости души ободряющая.
     Радуйся, Всемилостивая Владычице, премудрость и разум верным людем Твоим дарующая.

Кондак 7
      Хотяй всем человеком спастися и в разум истины приити, премилосердый Господь и Создатель наш Пречистыя Матере Своея образ «Прибавление ума» даровал есть нам, да вси с верою молящиися пред ним, крепость слова, и разум, и мудрость приимше, в тишине помыслов Царю и Богу нашему поют: Аллилуиа.

Икос 7
      Новая и преславная чудеса являеши, Мати Божия, верным людем святою иконою Твоею: силою благодати Христовы помраченныя умом просвещаеши, от безумия отвращаеши, разслабленныя укрепляеши и всем притекающим к целебному Твоему образу скорую помощь подаеши, подвизающи пети Тебе таковая:
     Радуйся, из глубины неведения извлачающая;
     Pадуйся, многи в разуме просвещающая.
     Радуйся, слово премудрости просящим дарующая;
     Pадуйся, несмысленных разумны содевающая.
     Радуйся, греховныя помыслы отгоняющая;
     Pадуйся, сердца ожесточенная умягчающая.
     Радуйся, ум к Богу возвышающая;
     Pадуйся, немудрыя умудряющая.
     Радуйся, ко благочестию наша Наставнице;
     Pадуйся, одаряющая нас вечною радостию.
     Радуйся, к Сыну Твоему и Богу молитвы верных приносящая;
     Pадуйся, и Сама непрестанно у Престола Вседержителя о всех молящаяся.
     Радуйся, Всемилостивая Владычице, премудрость и разум верным людем Твоим дарующая.

Кондак 8
      Странно есть видети икону Твою, Пречистая Богородице Дево, на досце написанную, духов тьмы прогоняющую силою Твоею Божественною и разум подающую немощию ума одержимым и всем неудобь учащимся; и нас, во гресех погибающих, молим со слезами, избави от враг видимых и невидимых, от тьмы неразумия, да всегда поем Спасителю и Богу нашему: Аллилуиа.

Икос 8
      Вся земля Русская преисполнена, яко звездами богосветлыми, чудотворными иконами Твоими, Богородице Дево, в нейже и сия икона Твоя, «Прибавление ума», благодатию сияет и согревает оледеневшая сердца наша знаменьми милости Твоея к нам грешным. Сего ради пред ликом Твоим святым преклоньше колена, воспеваем Тя, Всепречистая Мати наша, тако:
     Радуйся, скорби наша в радость претворяющая;
     Pадуйся, от разжженных стрел лукаваго нас защищающая.
     Радуйся, младенцев воспитание и благодатное хранение;
     Pадуйся, юности Охранительнице и Наставнице премудрая.
     Радуйся, детем неудобь учащимся разум подающая;
     Pадуйся, вражия сети разрушающая.
     Радуйся, верных разум просвещающая;
     Pадуйся, неверныя посрамляющая.
     Радуйся, помрачением ума одержимых исцеляющая;
     Pадуйся, яко благодатию от иконы Твоея демони прогоняются.
     Радуйся, Мати милосердия и щедрот;
     Pадуйся, надеждо вечнаго нашего спасения.
     Радуйся, Всемилостивая Владычице, премудрость и разум верным людем Твоим дарующая.

Кондак 9
      Всякое естество ангельское благоговейно Тебе служит, Небеси и земли Царице, человеческий же род хвалы Тебе приносит и Твою святую икону почитает, сию бо во отраду и утешение даровала еси нам. Научи нас, о Всеблагая, достойно славити Тя и воспевати рождшемуся от Тебе Спасителю мира: Аллилуиа.

Икос 9
      Ветии человечестии недоумевают познати тайну служения Твоего роду христианскому, Богородице, ниже могут изъяснити силу чудотворную, от икон Твоих происходящую на всяку пользу душевную и телесную человеком. Мы же, православнии, со слезами радости пред иконою Твоею святою предстояще, прославляем Тя, Благодатная, и глаголем:
     Радуйся, Ангелов радование;
     Pадуйся, от Архангел покланяемая.
     Радуйся, Юже на воздусе сретают Херувими;
     Pадуйся, Ейже похвальная приносят Серафими.
     Радуйся, светлое Церкве Небесныя и земныя украшение;
     Pадуйся, всех Небесных Сил вышшая.
     Радуйся, от воинств Небесных почитаемая;
     Pадуйся, всех земнородных славо.
     Радуйся, образом Твоим умы наша к Горнему возводящая;
     Pадуйся, Путеводительнице наша к Небесному Отечеству.
     Радуйся, сиянием души Твоея всю землю просвещающая;
     Pадуйся, всех нас при Кресте Сына Твоего усыновившая.
     Радуйся, Всемилостивая Владычице, премудрость и разум верным людем Твоим дарующая.

Кондак 10
      Спасти хотя мир от безумия и прелести вражия, Человеколюбец Господь чудную икону Твою, Богомати, дарова, пред неюже помраченнии умом исцеляются, беснующийся от демонов свобождаются, скорбящий утешение и радость обретают. Темже прославляюще Бога, подающаго нам таковыя милости, вопием Ему благодарне: Аллилуиа.

Икос 10
      Стена необоримая и Покров буди нам, Всенепорочная, сопротив ополчений видимых и невидимых враг, ограждающи нас от всяких бед и болезней. Сего ради припадающе к иконе Твоей «Прибавление ума», с верою в помощь благодатную и врачевство всем недугом душевным и телесным, радостно вопием Ти сице:
     Радуйся, от путей погибельных нас удаляющая;
     Pадуйся, на всяку истину верных наставляющая.
     Радуйся, духа болезни и уныния отгнание;
     Pадуйся, духа разума и крепости стяжание.
     Радуйся, врагов силою Божиею посрамляющая;
     Pадуйся, советы нечестивых разоряющая.
     Радуйся, беснующимся здравие подающая;
     Pадуйся, вся лютыя недуги врачующая.
     Радуйся, от смерти духовныя нас избавляющая;
     Pадуйся, слезами Твоими грехи наша омывающая.
     Радуйся, радостию духовною нас дивно насыщающая;
     Pадуйся, и в будущем веце вечныя радости нас сподобляющая.
     Радуйся, Всемилостивая Владычице, премудрость и разум верным людем Твоим дарующая.

Кондак 11
      Пение благодарственное приносим пред пречистым образом Твоим, Пренепорочная, за неизреченное Твое милосердие и молимся, о Богоблагодатная: огради ум наш и сердце от тлетворных учений, неверия и суеверия, сохрани страну нашу Российскую от всяких нестроений, врагами веры во Отечестве нашем воздвизаемых, и сподоби нас чистым сердцем славити Создателя нашего, поюще песнь: Аллилуиа.

Икос 11
      Яко светоприемную свещу зрим икону Твою, Богомати, сиянием чудес землю нашу просвещающую, на путь спасения нас наставляющую и сердца наша любовию воспламеняющую к Тебе, Пречистей Матери Господа. Мы же, ведуще силу благодати Твоея, песньми радостными прославляем Тя сице:
     Радуйся, премудрости Соломоновы превышшая;
     Pадуйся, сокровенныя тайны Божия верным открывающая.
     Радуйся, любомудрыя немудрыя являющая;
     Pадуйся, молние, души просвещающая.
     Радуйся, суетную мудрость века сего посрамляющая;
     Pадуйся, ослепленных ею на путь правый наставляющая.
     Радуйся, искренне молящимся ум обновляющая;
     Pадуйся, в час недоумений мысль благу на сердце полагающая.
     Радуйся, Премудрости и благости Божия откровение;
     Pадуйся, Горняго мира красото.
     Радуйся, явившая нам дивную икону Твою, яко дар Небесный;
     Pадуйся, источниче радости непрестанныя.
     Радуйся, Всемилостивая Владычице, премудрость и разум верным людем Твоим дарующая.

Кондак 12
      Благодать Божественную испроси у Сына Твоего и Бога, о Всеблагая, подай нам руку помощи, да не погибнем без покаяния; согрей нас любовию Твоею, очисти умы наша от греховных помыслов, просвети сердечныя очи наша к зрению спасения и сподоби нас в жизни сей и в Царстве Небеснем воспевати Творцу и Создателю нашему: Аллилуиа.

Икос 12
      Поюще чудеса, от иконы Твоея явленная, Владычице, хвалим, славим и величаем Тя, честнейшую воистинну Херувим и славнейшую без сравнения Серафим. Призри с Небесе, Богородице, на предстоящия пред святою иконою Твоею и благодать Твою низпосли нам, избави от всяких бед и искушений вражиих всех воспевающих Тя, яко Заступницу и Хранительницу нашу:
     Радуйся, молитвами Твоими весь мир спасающая;
     Pадуйся, нынешняго скорбнаго века утешение.
     Радуйся, Мати Света, светом чистоты Твоея всех просвещающая;
     Pадуйся, воли Господни тайны нам открывающая.
     Радуйся, страну Российскую в достояние Себе избравшая;
     Pадуйся, явлением чудотворных икон Твоих землю Русскую благословившая.
     Радуйся, чудесы от образа Твоего к Свету Истины нас возводящая;
     Pадуйся, незримо нас благодатию осеняющая в образе Твоем.
     Радуйся, радость благодатную в сердца боголюбивая изливающая;
     Pадуйся, двери милосердия Божия ходатайством Твоим отверзающая.
     Радуйся, дары Духа Святаго стяжати нам помогающая;
     Pадуйся, едина Чистая и Благословенная в женах.
     Радуйся, Всемилостивая Владычице, премудрость и разум верным людем Твоим дарующая.

Кондак 13
      О Всепетая Мати Присносущнаго Света и Отчия Премудрости, Ты еси свет омраченных, прибавление ума и радость сердец наших; услыши и приими моление нас грешных, умудри нас неразумных и настави на пение и молитву пред иконою Твоею, «Прибавление ума» нареченную. Не престай молити о нас, недостойных рабех Твоих, славящих Тя и поющих Сыну Твоему и Богу: Аллилуиа.
Этот кондак читается трижды, затем 1-й икос: «Ангел предстатель..." и 1-й кондак: «Избранней от всех родов...».

Mолитва ко Пресвятой Богородице в честь иконы Ея «Прибавление ума»
      Богородице Пречистая, Доме, Егоже созда Себе Премудрость Божия, даров духовных Подательнице, от мира к премирным ум наш возводящая и всех к познанию разума приводящая! Приими молебное пение от нас, недостойных раб Твоих, с верою и умилением покланяющихся пред пречистым образом Твоим. Умоли Сына Твоего и Бога нашего, да дарует властем нашим мудрость и силу, судиям правду и нелицеприятие, пастырем мудрость духовную, ревность и бдение о душах наших, наставником смиренномудрие, чадом послушание, всем же нам дух разума и благочестия, дух смирения и кротости, дух чистоты и правды. И ныне, Всепетая наша Мати, подай нам ума прибавление, умири, соедини во вражде и разделении сущия и положи им соуз любве неразрешимый, всех заблуждших от неразумия к свету истины Христовы обрати, страху Божию, воздержанию и трудолюбию настави, слово премудрости и душеполезное знание просящим даруй, осени нас вечною радостию, Херувимов честнейши и Серафимов славнейши сущая. Мы же, дивная дела и многоразумную премудрость Божию в мире и жизни нашей видяще, устранимся земныя суеты и излишних житейских попечений, и ум, сердце наше на Небеса возведем, яко да Твоим заступлением и помощию славу, хвалу, благодарение и поклонение за вся в Троице славимому Богу и всех Создателю возсылаем, ныне и присно и во веки веков. Аминь.

Тропарь Пресвятой Богородице в честь иконы Ея «Прибавление ума»
Тропарь, глас 4-й:
      О Преславная Мати Христа Бога нашего, благих Подателя, милостию Своею всю вселенную сохрани, даруй нам, рабом Твоим, премудрость и разум, светом Сына Твоего души наша просвети, едина Всепетая, от Херувим и Серафим славимая.

Тропарь, глас 3:
      Волею Отца Небеснаго зачала Сына Божия, без семени земнаго отца, прежде творения мира от Отца без матери рожденнаго плотию родила еси, и Егоже моли о даровании нам ума ко спасению душ наших.

Кондак, глас 6:
      Рожденнаго Духом от Отца Небеснаго, прежде сотворения денницы, Тобою плотию Рожденнаго без отца, не нарушив девства, Того умоли помочь нам победить завистию одержимаго падшаго денницу. Да одержим полную победу над диаволом, миром и плотию, Твоими молитвами, Богоневестная.

Кондак, глас 2-й:
      Яко умом Христовым нас просвещающую, хвалим Тя, Пречистая, Мати Господа, всю вселенную держащаго, Красото мира видимаго и невидимаго, лучами жизни нас озаряющая.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.

Празднование в 1-е воскресенье после 15/28 августа

Православный календарь

Октябрь 2020
Пн Вт Ср Чт Пт Сб Вс
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.