Вход

Изображения в галерее

802_03.jpg
835_14.jpg
806_61.jpg

Главная

АКАФИСТ Пресвятой Богородице в честь иконы Ея «Ченстоховская»


Богоматерь Ченстоховская. XIV век. Эта икона вариант византийской Одигитрии

Кондак 1
      Взбранной Воеводе, Спасительнице земли Русския, похвальное приносим пение. Ты же, Мати Царя Небеснаго от всякия избави напасти страну нашу и от всех скорбей и бед свободи зовущих:
    Радуйся, Заступнице Усердная, избави нас от всякаго зла и сотвори чудо спасения.

Икос 1
      Ангельский собор на небеси немолчно воспевает Тя, Владычице, мы, земнороднии, притекающе ко иконе Твоей чудотворней, святым Лукою писанной, вопием Ти сице:
    Радуйся, Света Невечерняго Мати.
    Радуйся, Духа Святаго обителе священная.
    Радуйся, светлое благодати познание.
    Радуйся, Ангельских Сил ликование.
    Радуйся, купино, неопально горящая.
    Радуйся, Господа Сил вечно зрящая.
    Радуйся, неувядаемый цвете нетления.
    Радуйся, образе Христова Воскресения.
    Радуйся, Заступнице Усердная, избави нас от всякаго зла и сотвори чудо спасения.

Кондак 2
      Видящи благочестие и веру святыя Царицы Елены, обретшей Крест Честный Господень во Иерусалиме, даровала еси ей, о Богомати, и икону Свою, чрез верных служителей Твоих сохраненную от лет древних, да молятся пред нею выну людие, поюще: Аллилуия.

Икос 2
      Разумевши святая Царица Елена, яко образ сей есть благословение Божие граду царствующему, постави и тамо в церкви соборней, идеже мнози от него исцеления прияша, поюще Матери Божией похвалы сицевыя:
    Радуйся, чаше, черплющая вечную радость.
    Радуйся, источниче, изливающий неизреченную сладость.
    Радуйся, чертоже, рая краснейший.
    Радуйся, вертограде Христов славнейший.
    Радуйся, Духа Святаго селение.
    Радуйся, врагов правды Божия посрамление.
    Радуйся, духовною радостию нас утешающая.
    Радуйся, с верою Тя призывающих не посрамляющая.
    Радуйся, Заступнице Усердная, избави нас от всякаго зла и сотвори чудо спасения.

Кондак 3
      Сила Вышняго храняше икону Твою, Богомати, во дни ересей от поругания и погубления от лютых иконоборцев, и от пленения руками варварскими, яко Самей Ти быти Хранительницею христианом цареградским и нам, поющим Сыну Твоему и Богу: Аллилуия.

Икос 3
      Имуще сокровище святыя иконы Твоея, Богомати, святии Кирилл и Мефодий просветиша земли славянския светом веры Христовой, да уведят язычницы Бога Истиннаго и прославят Матерь Божию тако:
    Радуйся, Державная наша Строительнице.
    Радуйся, Всесильная в Бозе Победительнице.
    Радуйся, Свободительнице плененных.
    Радуйся, Покровительнице обремененных.
    Радуйся, Ходатаице за всю вселенную.
    Радуйся, дарующая живот нетленный.
    Радуйся, от идольскаго служения избавляющая.
    Радуйся, с Богом наше примирение.
    Радуйся, Заступнице Усердная, избави нас от всякаго зла и сотвори чудо спасения.

Кондак 4
      Во дни бурныя смут и нестроений спасаше икона Твоя, Пресвятая Дево, всех притекающих к ней и обретаху вси от Тебе покров и заступление, благодарными сердцы вопиюще: Аллилуия.

Икос 4
      Слышаще и зряще чудеса, являемыя от иконы Твоея, Пресвятая Богородице, князие русскии храниша от рода в род святыню сию, молящеся пред нею умиленно и глаголюще:
    Радуйся, Агнца и Пастыря Мати нетленная.
    Радуйся, Дево Преблагословенная.
    Радуйся, Матернюю любовь нам являющая.
    Радуйся, ризою честною всех покрывающая.
    Радуйся, благ вечных надеждо верная.
    Радуйся, Молитвеннице наша Усердная.
    Радуйся, Судии Всеправеднаго умоление.
    Радуйся, всех грехов наших прощение.
    Радуйся, Заступнице Усердная, избави нас от всякаго зла и сотвори чудо спасения.

Кондак 5
      Шествуя боготечне из града во град Руси Червонныя, икона Твоя, Пресвятая Богородице, являше всюду славу Твою и Сына Твоего, Христа Бога нашего, людем, вопиющим Ему: Аллилуия.

Икос 5
      Видеша житилие града Белза грозное нападение агарян, изнесоша на стогны града икону Твою чудотворную, Пресвятая Дево, и молиша с верою Тя о заступлении; Ты же ускорила еси тогда на помощь им, да зовут Ти:
    Радуйся, милости Свои на нас изливающая.
    Радуйся, Владыку умилостивляющая.
    Радуйся, иконою Твоею от бед сохраняющая.
    Радуйся, христиан православных спасение.
    Радуйся, злая дела пресецающая.
    Радуйся, милосердие нам являющая.
    Радуйся, страны Российския утешение.
    Радуйся, Церкве Христовы священное украшение.
    Радуйся, Заступнице Усердная, избави нас от всякаго зла и сотвори чудо спасения.

Кондак 6
      Проповедаша всюду людие о дивнем заступлении Твоем, яко егда нечестивии татарове стрелою уязвиша на иконе Пречистаго Лика Твоего изображение, тогда внезапу тьма и помрачение найде на ня и друг друга убиваху, бежаще вспять, вернии же, зряще чудо сие, пояху Господу хваление: Аллилуия.

Икос 6
      Возсия благодать и мрак исчезе и возвысися рог христиан православных, яко Ты, о Богомати, укрепляла еси веру православную чудесми и знаменьми, от святыя иконы Твоея являемыми человеком, молящимся тако:
    Радуйся, от нашествия иноплеменников предивно избавляющая.
    Радуйся, от плена и поражения спасающая.
    Радуйся, агарянскою стрелою пронзенная.
    Радуйся, Материю и Девою неизреченно пребывшая.
    Радуйся, молящимся токи чудес источающая.
    Радуйся, печаль на радость прелагающая.
    Радуйся, ключу царствия небеснаго.
    Радуйся, Помощнице в житии честном.
    Радуйся, Заступнице Усердная, избави нас от всякаго зла и сотвори чудо спасения.

Кондак 7
      Хотяще оставити икону Свою во граде Ченстохове, соделала еси возок с нею недвижимым, егда нецыи злочестивии тщашася восхитити ю из града, христиане же, обретше образ Твой некраденным, возопиша Богу: Аллилуия.

Икос 7
      Новое чудо на устрашение нечестивых явила еси тогда от образа Твоего, Пречистая, поразивши слепотою и скорою смертию богохульников, яже икону Твою мечем уязвиша и на три части разсекоша, мы же, икону сию чтуще, вопием Ти:
    Радуйся, Мати Божия закланная.
    Радуйся, от начала веков предызбранная.
    Радуйся, первая к небу Путеводительнице.
    Радуйся, всех Ангельских Сил честнейшая.
    Радуйся, Милосердая всех Мати.
    Радуйся, неисчерпаемый сосуде благодати.
    Радуйся, просящим помощь являющая.
    Радуйся, доброе житие устрояющая.
    Радуйся, Заступнице Усердная, избави нас от всякаго зла и сотвори чудо спасения.

Кондак 8
      Странно бысть войску свейскому видети, яко сие непобедимое доселе грозное воинство побеждено бысть внезапу близ града Ченстохова, идеже чудотворная икона Богоматере стояше, пред нею же людие не преставаху пети: Аллилуия.

Икос 8
      Всем молящимся и притекающим ко иконе Твоей скорая Помощница являешися, Пресвятая Дево, якоже древле, тако и ныне заступающи и охраняющи почитающих Тя. Приими от нас похвалы сия:
    Радуйся, совета неизреченнаго Таиннице.
    Радуйся, благодати Божия сокровищнице.
    Радуйся, иноплеменных ратей одоление.
    Радуйся, от убиения и разорения спасающая.
    Радуйся, горняго и дольняго мира Всецарице.
    Радуйся, всяческих благ Подательнице.
    Радуйся, от врагов и бед избавление.
    Радуйся, непрестанное человеков удивление.
    Радуйся, Заступнице Усердная, избави нас от всякаго зла и сотвори чудо спасения.

Кондак 9
      Всякий чин и возраст возвеселися, зряще яко Царь русский Петр молебен пояше пред иконою Богоматере, яже бысть некогда достояние князей и Царей русских, тии бо восхваляху пред ним Господа и Матерь Его песнию: Аллилуия.

Икос 9
      Весь мир христианский покрываеши омофором милости Своея, на помощь скоро нам притекающи, купно со угодники Божии и святителем Николаем за нас пред Богом ходатайствуеши. Вонми и ныне гласу молений наших пред образом Твоим:
    Радуйся, светом истины нас озаряющая.
    Радуйся, руце Твои, за ны молящися, простирающая.
    Радуйся, Бога и человека соединившая.
    Радуйся, смертное естество безсмертием просветившая.
    Радуйся, верных душ услаждение.
    Радуйся, от душепагубных дел избавляющая.
    Радуйся, благочестивых христиан Окормительнице.
    Радуйся, смиренномудрых Благая Вседержительнице.
    Радуйся, Заступнице Усердная, избави нас от всякаго зла и сотвори чудо спасения.

Кондак 10
      Спасти хотя род человечь от тьмы неверия и заблуждения, о Богомати, явила еси миру свет веры Православныя и токмо воинству русскому даде одолети крепость, идеже икона Твоея чудотворная стояще, пред нею же воспеша вси благодарне: Аллилуия.

Икос 10
      Стена нератуемая и ограждение твердое Ты еси верным людем русским, почетающим Тя, о Мати Божия, яко во мнозех списках со иконы Ченстоховския являеши благоволение Свое, просимое подаеши и гнев Божий отвращаеши от поющих Ти:
    Радуйся, Державу Российскую устрояющая.
    Радуйся, под нозе Царя православнаго вся покаряющая.
    Радуйся, обличающая учения душевредныя.
    Радуйся, призревающая на молитвы смиренныя.
    Радуйся, в печалех и бедах утешение.
    Радуйся, от нечаянныя смерти спасение.
    Радуйся, дарующая победы верным.
    Радуйся, венчающая их венцем нетленным.
    Радуйся, Заступнице Усердная, избави нас от всякаго зла и сотвори чудо спасения.

Кондак 11
      Пение воспеваем и хвалу приносим Ти, о Пресвятая Дево, молимся пред иконою Твоею, на ней же зрим язвы, руками нечестивых человек нанесенныя, от наших же прегрешений не заживляемыя, имуще же Тя о нас Ходатаицу, к Богу взываем: Аллилуия.

Икос 11
      Светоявленная икона Твоя сияет чудесы, даже и доднесь являя милость Твою нам, яко многажды тщахуся людие сокрыти вапы различными уязвление Пречистаго Лика Твоего, на сей иконе живописаннаго, но всуе трудишася изографы, яко паки проступаху язи, имиже мы грехми и беззаконьми нашими уязвляем Тя, обаче отпусти нам вся, Дево, и помилуй зовущия:
    Радуйся, крепкое веры забрало.
    Радуйся, чудес Христовых начало.
    Радуйся, врат райских отверзение.
    Радуйся, тайны Божией всесильное проявление.
    Радуйся, приятное молитвы кадило.
    Радуйся, Носящаго вся носило.
    Радуйся, человечестими грехми терзаемая.
    Радуйся, в любви Божией утверждающая.
    Радуйся, Заступнице Усердная, избави нас от всякаго зла и сотвори чудо спасения.

Кондак 12
      Благодатию покрый нас, о Пресвятая Дево, исходящею от дивныя иконы Твоея, Предстательством Твоим спаси и помилуй страну Русскую, в ней же во дни древния чудесы многими просияла еси и яви нам, молящимся пред образом Твоим, чудо спасения, поющим Сыну Твоему и Богу: Аллилуия.

 Икос 12
      Поюще пение похвальное усты недостойными, уповаем на милость Божию и Твое, о Богомати, заступление и ходатайство за нас, грешных, пред Господем, яко да дарует Державе Русской на супостаты одоление, от иноплеменных поган свобождение, Царя православнаго во охранение и к царствию небесному путевождение, и выну буди с нами, зовущими Ти:
    Радуйся, огнем божественным всех просвещающая.
    Радуйся, мрак греха отгоняющая.
    Радуйся, жестокости наших сердец умягчение.
    Радуйся, заблуждших на путь спасения возвращение.
    Радуйся, стено нерушимая.
    Радуйся, победо непобедимая.
    Радуйся, небесе и земли украшение.
    Радуйся, надеждо нашего воскресения.
    Радуйся, Заступнице Усердная, избави нас от всякаго зла и сотвори чудо спасения.

Кондак 13
      О Всепетая Мати, рождшая всех святых Святейшее Слово, призри ныне на царство Твое земное и умоли Господа Вседержителя, да не внидет в суд с нами, но да подаст Святой Руси воскресение, нам грехов оставление и от ига бесовскаго свобождение, вопиющим Богу верою: Аллилуия.
Этот кондак читается трижды, затем икос 1 "Ангельский собор..." и кондак 1 "Взбранной Воеводе...".

Молитва Пресвятой Богородице в честь иконы Ея «Ченстоховская»
      О Всемилостивая Госпоже, Царице Богородице, от всех родов избранная и всеми роды небесными и земными ублажаемая! Воззри милостивно на люди сия, предстоящия пред святою иконою Твоею и усердно молящиеся Тебе, и сотвори предстательством Твоим и заступлением у Сына Твоего и Бога нашего, да никтоже отыдет от места сего упования своего тощ и посрамлен в надежде своей; но да приимет кийждо от Тебе вся по благому изволению сердца своего, по нужде и потребе своей, во спасение души и во здравие телу.
     Моли, о Милосердая Владычице, Пренебеснаго Бога, да присно Церковь Свою святую соблюдет, вышним Своим благословением архиереи наши Православныя укрепит, миром оградит и святей Своей Церкви целы, здравы, честны, долгодействующи и право правящи слово своея истины дарует, от всех же видимых и невидимых врагов со всеми православными христианы милостивно избавит и во Православии и твердей вере до конца веков неотступно и неизменно сохранит. Призри благосердием, Всепетая, и призрением милостивнаго Твоего заступления на всю страну нашу Российскую, грады ея, град сей и святой храм сей, и излей на ны богатыя Твоя милости, Ты бо еси Всесильная Помощница и Заступница всех нас.
     Приклонися к молитвам и всех раб Твоих, притекающих зде ко святей иконе Твоей сей, услыши воздыхания и гласы, ими же раби Твои молятся во святем храме сем. Аще же и иноверный, и иноплеменник, идя и проходя зде, помолится, услыши, чадолюбивая Госпоже, и человеколюбно и милостивно соделай яже к помощи ему, обращению и ко спасению. Ожесточенныя же и разсеянныя сердцы своими на путь истины настави. Отпадшия от благочестивыя веры обрати и паки сопричти святей Православней Кафолической Церкви.
     В семействах всех и во братии нашей мир огради и соблюди, в юных братолюбие и смиренномудрие утверди, старость поддержи, отрочество настави, мужество умудри, сирыя и вдовицы заступи, утесненныя и в скорбех сущия питай, болящия уврачуй, плененныя свободи, ограждая ны выну от всякаго зла благостию Твоею, и утеши милостивным Твоим посещением всех, благодеющих нам.
     Даруй же, Благая, земли плодоносие, воздуха благорастворение и вся, яже на пользу нашу дары благовременныя и благопотребныя, всемощным Своим предстательством пред Всесвятою Живоначальною Троицею, купно со святыми избранными угодниками Ея Кириллом и Мефодием. Прежде отшедшия отцы и матери, братия и сестры наша, и вся от лет древних припадавшия ко святей иконе Твоей сей, упокой в селениих святых, в месте светле, в месте злачне, в месте покойне, идеже несть печаль и воздыхание. Егда же приспеет и наше от жития сего отшествие и к жизни вечной преселение, предстани нам, Преблагословенная Дево, и даруй христианскую кончину живота нашего безболезненну, непостыдну, мирну и Святых Таин причастну, да и в будущем веце сподобимся вси, купно со всеми святыми, безконечныя блаженныя жизни во царствии возлюбленнаго Сына Твоего, Господа и Бога нашего Иисуса Христа, Емуже подобает слава, честь и держава, со Безначальным Его Отцем и Пресвятым и Благим и Животворящим Его Духом, ныне и присно и во веки веков, аминь.

Тропарь Божией Матери ради иконы Ее «Ченстоховская»
Тропарь, глас 4:
      Непобедимая Победо, Владычице Ченстоховская, древняго иже о нас благоволения Самозрительнице, будущаго спасения Хранительнице, покаянием соделай ны новыя грядущему Царю.

Величание
      Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.


Православный календарь

Октябрь 2017
Пн Вт Ср Чт Пт Сб Вс
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

События календаря

Нет событий

Обсуждение на форуме


Статистика:Каталоги:Рекомендуем:
Яндекс.Метрика
Яндекс цитирования HD TRACKER - фильмы DVD, кино, HDTV, Blu-Ray, HD DVD, скачать, torrent, торрент
Все материалы публикуются исключительно с разрешения правообладателей. ©   | Поддержка сайта - Дизайн студия КДК-Лабс 2005-2011 гг.